ಕರ್ನಾಟಕದ ರಾಜಕಾರಣದಲ್ಲಿ ಶೋಷಿತರ, ಹಿಂದುಳಿದ ವರ್ಗಗಳ ಸಾರಥಿಯಾಗಿ ಗುರುತಿಸಿಕೊಂಡಿರುವ ಅಹಿಂದ ನಾಯಕ ಸಿದ್ದರಾಮಯ್ಯ (Siddaramaiah) ಅವರ ಸಮಾಜವಾದಿ ಇಮೇಜ್ಗೆ ಧಕ್ಕೆ ತರಲು ಕೆಲವು ಪಟ್ಟಭದ್ರ ಹಿತಾಸಕ್ತಿಗಳು ಮತ್ತು ಮಾಧ್ಯಮಗಳ ಒಂದು ವರ್ಗ ನಿರಂತರವಾಗಿ ಸಂಚು ರೂಪಿಸುತ್ತಲೇ ಇವೆ. ಈ ಸಂಚಿನ ಭಾಗವಾಗಿಯೇ, ಸ್ವಯಂ ಘೋಷಿತ ಖಾವಿಧಾರಿ ಪ್ರಣವಾನಂದ (Praṇavananda) ಎಂಬುವವರನ್ನು ದಾಳವಾಗಿ ಬಳಸಿಕೊಂಡು ಸಿದ್ದರಾಮಯ್ಯ ಅವರಿಗೆ ‘ಜಾತಿವಾದಿ’ ಎಂಬ ಹಣೆಪಟ್ಟಿ ಕಟ್ಟಲು ವ್ಯವಸ್ಥಿತ ಪ್ರಯತ್ನ ನಡೆಸಿರುವುದು ಇದೀಗ ಸಂಪೂರ್ಣವಾಗಿ ಬಯಲಾಗಿದೆ.
ಸಿದ್ದರಾಮಯ್ಯ ಅವರು ಮುಖ್ಯಮಂತ್ರಿ ಸ್ಥಾನಕ್ಕೆ ರಾಜೀನಾಮೆ ನೀಡುವ ಸಂದರ್ಭದಲ್ಲಿ ಕೇವಲ ತಮ್ಮದೇ ಕುರುಬ ಸಮುದಾಯದ ಭವನಗಳಿಗೆ ಮಾತ್ರ ಕೋಟ್ಯಂತರ ರೂಪಾಯಿ ಅನುದಾನ ಬಿಡುಗಡೆ ಮಾಡಿ ಆದೇಶ ಹೊರಡಿಸಿದ್ದಾರೆ ಎನ್ನುವ ಸುಳ್ಳು ಸುದ್ದಿಯೊಂದನ್ನು ಸೃಷ್ಟಿಸಿ, ಅದಕ್ಕೆ ಪ್ರಣವಾನಂದನ ಕೈಯಲ್ಲಿ ತೀರಾ ಕೀಳುಮಟ್ಟದ ಹೇಳಿಕೆಗಳನ್ನು ಕೊಡಿಸುವ ಮೂಲಕ ಅಪಪ್ರಚಾರದ ನಾಟಕವಾಡಲಾಗಿದೆ. ಆದರೆ, ಈ ಕುರಿತು ಸಿದ್ದರಾಮಯ್ಯ ಅವರು ಸಾಮಾಜಿಕ ಜಾಲತಾಣಗಳಲ್ಲಿ ನೀಡಿರುವ ಅಧಿಕೃತ ಆಡಳಿತಾತ್ಮಕ ಸ್ಪಷ್ಟನೆ ಹಾಗೂ ಈ ಹಿಂದೆ ಈಡಿಗ ಸಮುದಾಯದ ಪ್ರಮುಖ ನಾಯಕರೇ ಈ ಪ್ರಣವಾನಂದನ ಅಸಲಿ ಹಿನ್ನೆಲೆಯನ್ನು ಬಿಚ್ಚಿಟ್ಟಿರುವ ಸತ್ಯಗಳು ಈ ವ್ಯವಸ್ಥಿತ ಷಡ್ಯಂತ್ರದ ಮುಖವಾಡವನ್ನು ಸಾರ್ವಜನಿಕವಾಗಿ ಕಳಚಿವೆ.
ಮಾಧ್ಯಮಗಳ ದ್ವಂದ್ವ ನೀತಿ ಮತ್ತು ‘ತುಕಾಲಿ’ ರಾಜಕಾರಣದ ಅಸಲಿ ಮುಖ!
ಸರ್ಕಾರವೊಂದು ಸಚಿವ ಸಂಪುಟ ರಚನೆ ಮಾಡುವಾಗ ಒಕ್ಕಲಿಗ ಮತ್ತು ಲಿಂಗಾಯತ ಸಮುದಾಯದ ಶಾಸಕರು ಅತಿ ಹೆಚ್ಚಿನ ಸಂಖ್ಯೆಯಲ್ಲಿ ಆಯ್ಕೆಯಾಗಿದ್ದಾರೆ, ಅವರಿಗೆ 14 ರಿಂದ 15 ಸಚಿವ ಸ್ಥಾನಗಳನ್ನು ನೀಡಬೇಕು ಎಂದು ಇದೇ ಮಾಧ್ಯಮಗಳು ಹಗಲು-ರಾತ್ರಿ ಚರ್ಚೆ ನಡೆಸುತ್ತವೆ. ಹೆಚ್ಚು ಶಾಸಕರಿರುವ ಸಮುದಾಯಕ್ಕೆ ಹೆಚ್ಚಿನ ಪ್ರಾತಿನಿಧ್ಯ ಸಿಗುವುದು ಪ್ರಜಾಪ್ರಭುತ್ವ ವ್ಯವಸ್ಥೆಯ ಸಹಜ ನ್ಯಾಯ ಎಂದು ವಿಶ್ಲೇಷಿಸುವ ಇದೇ ಮಾಧ್ಯಮಗಳಿಗೆ, ಹಿಂದುಳಿದ ವರ್ಗಗಳ ಇಲಾಖೆಯಲ್ಲಿ ಹೆಚ್ಚು ಅರ್ಜಿ ಸಲ್ಲಿಸಿದ ಸಮುದಾಯಕ್ಕೆ ಸಹಜವಾಗಿ ಹೆಚ್ಚಿನ ಮಂಜೂರಾತಿ ಸಿಕ್ಕಾಗ ಮಾತ್ರ ಹಠಾತ್ತನೆ ‘ಜಾತಿವಾದ’ ಕಾಣಿಸತೊಡಗುತ್ತದೆ! ಇದಕ್ಕಿಂತ ದೊಡ್ಡ ಪತ್ರಿಕೋದ್ಯಮದ ದಿವಾಳಿತನ ಮತ್ತೊಂದಿದೆಯೇ?
ನೆನ್ನೆಯಿಂದ ಮಾಧ್ಯಮಗಳಲ್ಲಿ ಓಡುತ್ತಿರುವ ಸುದ್ದಿಗಳನ್ನು ನೋಡಿದರೆ, ಸಿದ್ದರಾಮಯ್ಯನವರು (Siddaramaiah) ಯಾವುದೋ ಮಹಾಪರಾಧ ಎಸಗಿ, ಇಡೀ ರಾಜ್ಯದ ಬಜೆಟ್ ಅನ್ನೇ ಕುರುಬ ಸಮುದಾಯದ ಹೆಸರಿಗೆ ಬರೆದುಕೊಟ್ಟುಬಿಟ್ಟಿದ್ದಾರೆ ಎಂಬಂತೆ ಬಿಂಬಿಸಲಾಗುತ್ತಿದೆ. ಲಕ್ಷಾಂತರ ಕೋಟಿ ರೂಪಾಯಿಗಳ ಬಜೆಟ್ನಲ್ಲಿ ಸಣ್ಣದೊಂದು ಪೂರ್ವಭಾವಿ ಮಂಜೂರಾತಿಯನ್ನು ಇಟ್ಟುಕೊಂಡು ಇಡೀ ಬಜೆಟ್ ಅನ್ನೇ ವರ್ಗಾವಣೆ ಮಾಡಲಾಗಿದೆ ಎಂದು ಅರಚಾಡುತ್ತಿರುವ ಮಾಧ್ಯಮಗಳಿಗೆ ಕಿಂಚಿತ್ತಾದರೂ ಪತ್ರಿಕಾ ಧರ್ಮ ಅಥವಾ ಸಾಂವಿಧಾನಿಕ ಚೌಕಟ್ಟಿನ ಜ್ಞಾನವಿದೆಯೇ ಎನ್ನುವ ಪ್ರಶ್ನೆ ಮೂಡುತ್ತದೆ.
ಇದನ್ನೂ ಓದಿ: Beḷagavi Politics: ಸವದಿ ಹೆಲ್ಮೆಟ್ಗೆ ಸಾಹುಕಾರ್ ಬೌನ್ಸರ್! ಬೆಳಗಾವಿಯಲ್ಲಿ ಶುರುವಾಯ್ತಾ ಕಿಲ್ಲರ್ ಪಾಲಿಟಿಕ್ಸ್?
ಆಡಳಿತಾತ್ಮಕ ಪ್ರಕ್ರಿಯೆಯ ಸತ್ಯವೇನು? ಸುಳ್ಳಿನ ಕೋಟೆ ಧೂಳೀಪಟ!
ಯಾವುದೇ ಒಂದು ಸರ್ಕಾರಿ ಆದೇಶ ಹೊರಬೀಳಬೇಕಾದರೆ ಅದರ ಹಿಂದೆ ಸುದೀರ್ಘವಾದ ಆಡಳಿತಾತ್ಮಕ ಮತ್ತು ತಾಂತ್ರಿಕ ಪ್ರಕ್ರಿಯೆಗಳಿರುತ್ತವೆ. ಹಿಂದುಳಿದ ವರ್ಗಗಳ ಕಲ್ಯಾಣ ಇಲಾಖೆಯು ವಿವಿಧ ಸಂಘ-ಸಂಸ್ಥೆಗಳು ನೀಡಿರುವ ಮನವಿಗಳನ್ನು ಕಾನೂನುಬದ್ಧವಾಗಿ ಪರಿಶೀಲಿಸಿ, 155 ಹಿಂದುಳಿದ ವರ್ಗಗಳ ಸಂಘ-ಸಂಸ್ಥೆಗಳಿಗೆ ಸಮುದಾಯ ಭವನ ಹಾಗೂ ವಿದ್ಯಾರ್ಥಿ ನಿಲಯಗಳ ನಿರ್ಮಾಣಕ್ಕೆ ನೀಡಿರುವುದು ಕೇವಲ ‘ಪೂರ್ವಭಾವಿ ಮಂಜೂರಾತಿ’ ಮಾತ್ರ. ಇದು ಯಾವುದೇ ಫಲಾನುಭವಿಗಳ ಅಂತಿಮ ಪಟ್ಟಿಯಾಗಲಿ ಅಥವಾ ತಕ್ಷಣದ ಹಣ ಬಿಡುಗಡೆಯ ಆದೇಶವಾಗಲಿ ಅಲ್ಲ ಎನ್ನುವುದನ್ನು ಸಿದ್ದರಾಮಯ್ಯ ಅವರು ಸ್ಪಷ್ಟಪಡಿಸಿದ್ದಾರೆ.
ಸಿದ್ದರಾಮಯ್ಯ ಅವರು ತಮ್ಮ ಫೇಸ್ಬುಕ್ ಪೋಸ್ಟ್ನಲ್ಲಿ ನೀಡಿರುವ ಅಧಿಕೃತ ಸ್ಪಷ್ಟನೆ ಇಲ್ಲಿದೆ:
ಈ ಆದೇಶದಲ್ಲಿ ಕೇವಲ ಒಂದು ಸಮುದಾಯ ಮಾತ್ರವಲ್ಲದೆ ಮಡಿವಾಳ, ಲಿಂಗಾಯಿತ, ಒಕ್ಕಲಿಗ, ಬೆಸ್ತ, ಬಲಿಜ, ಗೊಲ್ಲ, ಜೆಟ್ಟಿ, ಕುಂಬಾರ, ಅರಸು, ಹೆಳವ, ಸವಿತಾ ಸಮಾಜ, ಉಪ್ಪಾರ, ಗಾಣಿಗ, ಕುರುಹಿನ ಶೆಟ್ಟಿ, ಹಾಲಕ್ಕಿ, ಮತ್ತು ರೆಡ್ಡಿ ಸೇರಿದಂತೆ ಹತ್ತಾರು ಜನಾಂಗಗಳ ಸಮುದಾಯ ಭವನ ಮತ್ತು ವಿದ್ಯಾರ್ಥಿ ನಿಲಯಗಳ ಕಟ್ಟಡ ನಿರ್ಮಾಣಕ್ಕೂ ಪೂರ್ವಭಾವಿ ಆದೇಶ ಹೊರಡಿಸಲಾಗಿದೆ.
ರಾಜ್ಯದಲ್ಲಿ ಕುರುಬ ಸಮುದಾಯವು ಸುಮಾರು ಶೇ. 9 ರಷ್ಟು ಜನಸಂಖ್ಯೆಯನ್ನು ಹೊಂದಿದೆ. ಪ್ರತಿ ವಿಧಾನಸಭಾ ಕ್ಷೇತ್ರದ ಶಾಸಕರು ತಮ್ಮ ವ್ಯಾಪ್ತಿಯ ಹಿಂದುಳಿದ ವರ್ಗಗಳ ಬೇಡಿಕೆಗಳ ಪಟ್ಟಿಯನ್ನು ಸರ್ಕಾರಕ್ಕೆ ನೀಡುವುದು ಸಾಮಾನ್ಯ ಪ್ರಕ್ರಿಯೆ. ಕೇವಲ ಈ ವರ್ಷದ ಅವಧಿಯಷ್ಟೇ ಅಲ್ಲ; ಕಳೆದ ಮೂರು ವರ್ಷಗಳ ಸಿದ್ದರಾಮಯ್ಯನವರ ಸರ್ಕಾರ, ಅದರ ಹಿಂದಿನ ಬಿಜೆಪಿ ಸರ್ಕಾರ ಮತ್ತು ಜೆಡಿಎಸ್-ಕಾಂಗ್ರೆಸ್ ಸಮ್ಮಿಶ್ರ ಸರ್ಕಾರದ ಅವಧಿಯಲ್ಲಿ ಯಾವ ಯಾವ ಸಮುದಾಯಗಳಿಗೆ ಎಷ್ಟೆಷ್ಟು ಅನುದಾನ ಬಿಡುಗಡೆಯಾಗಿದೆ ಎಂಬ ಮುಕ್ತ ಲೆಕ್ಕಾಚಾರವನ್ನು ಪರಿಶೀಲಿಸಿದರೆ ಸತ್ಯ ಏನೆಂಬುದು ಯಾರಿಗಾದರೂ ಅರ್ಥವಾಗುತ್ತದೆ. ಇಷ್ಟಿದ್ದರೂ ಸಿದ್ದರಾಮಯ್ಯ ಹಾಗೂ ಒಂದು ನಿರ್ದಿಷ್ಟ ಸಮುದಾಯವನ್ನು ಗುರಿಯಾಗಿಸಿಕೊಂಡು ಮಾಧ್ಯಮಗಳು ಸಾಧಿಸುತ್ತಿರುವುದಾದರೂ ಏನನ್ನು?
ಅಂಕಿ-ಅಂಶಗಳ ಸವಾಲು ಮತ್ತು ಕುರುಬ ಸಮುದಾಯದ ರಾಜಕೀಯ ಶಕ್ತಿ
ರಾಜ್ಯದ ಒಟ್ಟು 122 ವಿಧಾನಸಭಾ ಕ್ಷೇತ್ರಗಳಲ್ಲಿ ಕುರುಬ ಸಮುದಾಯವು ಪ್ರತಿ ಕ್ಷೇತ್ರದಲ್ಲಿ 25 ರಿಂದ 60 ಸಾವಿರದವರೆಗೆ ನಿರ್ಣಾಯಕ ಜನಸಂಖ್ಯೆಯನ್ನು ಹೊಂದಿದೆ. ಬೀದರ್ನಿಂದ ಚಾಮರಾಜನಗರದ ತನಕ ಈ ಸಮುದಾಯಕ್ಕೆ ಸಿಗುತ್ತಿರುವ ದೇವರಾಜ ಅರಸು ಸಾಲ ಇರಬಹುದು ಅಥವಾ ಗಂಗಾ ಕಲ್ಯಾಣ ಯೋಜನೆಯ ಇರಬಹುದು, ಪ್ರತಿಯೊಂದು ಕ್ಷೇತ್ರದ ಅಂಕಿ-ಅಂಶಗಳ ನಿಖರ ಮಾಹಿತಿಯನ್ನು ಬಹಿರಂಗಪಡಿಸಲು ನಾವು ಸಿದ್ಧರಿದ್ದೇವೆ. ಆದರೆ, ಸಿದ್ದರಾಮಯ್ಯ ಅವರನ್ನು ಟಾರ್ಗೆಟ್ ಮಾಡುವ ಮಾಧ್ಯಮಗಳಿಗೆ ಆ ನೈಜ ಅಂಕಿ-ಅಂಶಗಳನ್ನು ಪ್ರಕಟಿಸುವ ತಾಕತ್ತು ಮತ್ತು ಪ್ರಾಮಾಣಿಕತೆ ಇದೆಯೇ?
ಕುರುಬ ಸಮುದಾಯವು ಸಿದ್ದರಾಮಯ್ಯನವರೂ ಸೇರಿದಂತೆ ಯಾವುದೇ ಜನಪ್ರತಿನಿಧಿಗಳಿಂದ ವಿಶೇಷ ಸವಲತ್ತನ್ನೇನೂ ನಿರೀಕ್ಷಿಸಿಲ್ಲ ಮತ್ತು ನಿರೀಕ್ಷಿಸುವುದೂ ಇಲ್ಲ. ಆದರೆ, ಸಮುದಾಯ ಎದುರಿಸುತ್ತಿರುವ ನೈಜ ಸಮಸ್ಯೆಗಳು ಮತ್ತು ಸ್ಥಳೀಯ ಶಾಸಕರಿಂದ ಆಗುತ್ತಿರುವ ನೋವುಗಳನ್ನು ವರದಿ ಮಾಡಲು ಈ ಮಾಧ್ಯಮಗಳು ಎಂದಾದರೂ ತಯಾರಾಗಿವೆಯೇ? ಪ್ರಜಾಪ್ರಭುತ್ವ ವ್ಯವಸ್ಥೆಯಲ್ಲಿ ನಮಗೆ ಮತದಾನದ ಪವಿತ್ರ ಹಕ್ಕಿದೆ ಮತ್ತು ಆ ಹಕ್ಕಿನ ಮೂಲಕ ಯಾರು ಏನು ಎಂಬುದನ್ನು ನಿರ್ಣಯಿಸುವ ಶಕ್ತಿ ಸಮುದಾಯಕ್ಕೆ ಚೆನ್ನಾಗಿ ಗೊತ್ತಿದೆ.
ಇದನ್ನೂ ಓದಿ: DK Shivakumar: ಬಂಡೆ ಕೋಟೆಗೆ ಸತೀಶ್ ಸುರಂಗ! ಕಸದ ಹಗರಣದ ನಡುವೆ ಡಿಕೆಶಿ ‘ಏಕಚಕ್ರಾಧಿಪತ್ಯ’ಕ್ಕೆ ಸರಣಿ ವಿಘ್ನ?
‘ಬಾಡಿಗೆ ಭಾಷಣಕಾರ’ ಪ್ರಣವಾನಂದನ ಅಸಲಿ ಮುಖ ಸೀಳಿದ ಸ್ವಜಾತಿ ನಾಯಕರು!
ತಾನೊಬ್ಬನೇ ಈಡಿಗ ಸಮುದಾಯದ ಮಹಾಸ್ವಾಮೀಜಿ ಎಂದು ಘೋಷಿಸಿಕೊಂಡು ತಿರುಗುತ್ತಿರುವ ಈ ಪ್ರಣವಾನಂದನಿಗೆ ಸ್ವತಃ ಆ ಸಮುದಾಯದಲ್ಲೇ ಯಾವುದೇ ಮಾನ್ಯತೆ ಇಲ್ಲ ಎನ್ನುವುದನ್ನು ಇತಿಹಾಸವೇ ಸಾಬೀತುಪಡಿಸಿದೆ. ಕೆಲವು ದಿನಗಳ ಹಿಂದೆ ಇದೇ ಮನುಷ್ಯ ಮಾಧ್ಯಮಗಳ ಮುಂದೆ ಬಂದು ರಾಜಕೀಯ ಪ್ರೇರಿತ ಹೇಳಿಕೆಗಳನ್ನು ನೀಡುತ್ತಿದ್ದ. ಈಗ ಮತ್ತೊಂದು ಹೆಜ್ಜೆ ಮುಂದೆ ಹೋಗಿ, ಸಿದ್ದರಾಮಯ್ಯ ಅವರ ಸಮಾಜಮುಖಿ ನಿರ್ಧಾರಗಳನ್ನು ತೀರಾ ಅಸಭ್ಯ ಮತ್ತು ಕೀಳುಮಟ್ಟದ ಪದಗಳನ್ನು ಬಳಸಿ ನಿಂದಿಸುವ ಮೂಲಕ ತನ್ನ ಕೀಳು ಸಂಸ್ಕೃತಿಯನ್ನು ಜಗತ್ತಿನ ಮುಂದೆ ಪ್ರದರ್ಶಿಸಿದ್ದಾನೆ.
ಈ ಪ್ರಣವಾನಂದನ ಹಿನ್ನೆಲೆ ಏನು ಎಂಬುದನ್ನು ಸ್ವತಃ ಈಡಿಗ ಸಮುದಾಯದ ಪ್ರಭಾವಿ ನಾಯಕರು ಹಾಗೂ ಮಾಜಿ ಸಚಿವರಾದ ಮಧು ಬಂಗಾರಪ್ಪ ಅವರು ಈ ಹಿಂದೆ ಮಾಧ್ಯಮಗಳ ಎದುರೇ ಸಾರ್ವಜನಿಕವಾಗಿ ಬಿಚ್ಚಿಟ್ಟಿದ್ದರು. ಮಧು ಬಂಗಾರಪ್ಪ ಅವರು ತಮ್ಮ ಹೇಳಿಕೆಯಲ್ಲಿ, “ಆ ಸ್ವಾಮೀಜಿ ಸ್ವಲ್ಪ ತಲಹರಟೆ ಇದ್ದಾರೆ, ಅವರ ಬ್ಯಾಕ್ಗ್ರೌಂಡ್ ಸ್ವಲ್ಪ ಹುಡುಕಿ ನೋಡಿ. ಬೆಂಗಳೂರಿನಲ್ಲಿದ್ದಾಗ ಅವರು ವಿಶ್ವ ಹಿಂದೂ ಪರಿಷತ್ನಲ್ಲಿದ್ದವರು. ಅವರು ಕೇವಲ ನಮ್ಮ ಸಮುದಾಯದ ಹೆಸರನ್ನು ದುರುಪಯೋಗ ಮಾಡಿಕೊಳ್ಳುತ್ತಿದ್ದಾರೆ. ಅವರಿಗೂ ನಮ್ಮ ಸಮುದಾಯಕ್ಕೂ ಯಾವುದೇ ಸಂಬಂಧವಿಲ್ಲ” ಎಂದು ಖಡಕ್ ಆಗಿ ಆಕ್ರೋಶ ಹೊರಹಾಕಿದ್ದರು.
ಕೇವಲ ರಾಜಕೀಯ ನಾಯಕರಷ್ಟೇ ಅಲ್ಲ, ಎರಡು ವರ್ಷಗಳ ಹಿಂದೆ ಅಂದಿನ ಅಪ್ಪಟ ಈಡಿಗ ಸಂಘದ ಅಧ್ಯಕ್ಷರಾಗಿದ್ದ ಡಾ. ತಿಮ್ಮೇಗೌಡ ಅವರು ಕೂಡ ಮಾಧ್ಯಮಗಳ ಮುಂದೆ ಬಂದು, “ಪ್ರಣವಾನಂದರು ನಮ್ಮ ಸಮುದಾಯದ ಸ್ವಾಮೀಜಿಯೇ ಅಲ್ಲ” ಎಂದು ಸ್ಪಷ್ಟವಾಗಿ ಘೋಷಿಸಿದ್ದರು. ಸಮುದಾಯದ ಹಿತಾಸಕ್ತಿಗಿಂತ ಹೆಚ್ಚಾಗಿ ವೈಯಕ್ತಿಕ ಪ್ರಚಾರ ಮತ್ತು ಸಮಾಜದಲ್ಲಿ ಒಡಕು ಮೂಡಿಸುವ ಕೆಲಸವನ್ನೇ ಬಂಡವಾಳ ಮಾಡಿಕೊಂಡಿರುವ ಇಂತಹ ವ್ಯಕ್ತಿಯನ್ನು ‘ಸ್ವಾಮೀಜಿ’ ಎಂದು ಕರೆಯುವುದೇ ಖಾವಿಗೆ ಮಾಡುವ ಅಪಮಾನ ಎಂದು ಅಂದೇ ಸಂಘದ ಪ್ರಮುಖರು ಎಚ್ಚರಿಸಿದ್ದರು.
ಬೆಂಬಲಿಗರ ಮೌನ ಅಚ್ಚರಿ ಮತ್ತು ನಮ್ಮ ಮುಂದಿನ ಎಚ್ಚರಿಕೆ
ಹಿಂದುಳಿದ ವರ್ಗಗಳ ಆಶಾಕಿರಣವಾಗಿರುವ ಸಿದ್ದರಾಮಯ್ಯ ಅವರ ವಿರುದ್ಧ ಇಷ್ಟೊಂದು ಕೀಳುಮಟ್ಟದ, ತೇಜೋವಧೆ ಮಾಡುವಂತಹ ಹೇಳಿಕೆಗಳನ್ನು ಪ್ರಣವಾನಂದನಂತಹ ಬಾಡಿಗೆ ದಾಳಗಳು ನೀಡುತ್ತಿದ್ದರೂ, ಸಿದ್ದರಾಮಯ್ಯ ಅವರ ಅಭಿಮಾನಿಗಳು ಮತ್ತು ಆಪ್ತ ವಲಯದ ನಾಯಕರು ಕೈಕಟ್ಟಿ ಕುಳಿತಿರುವುದು ನಿಜಕ್ಕೂ ಆಶ್ಚರ್ಯ ಮತ್ತು ಬೇಸರದ ಸಂಗತಿಯಾಗಿದೆ. ಪ್ರಜಾಪ್ರಭುತ್ವ ವ್ಯವಸ್ಥೆಯಲ್ಲಿ ಪ್ರತಿಯೊಬ್ಬರಿಗೂ ವೈಚಾರಿಕವಾಗಿ ಟೀಕಿಸುವ ಹಕ್ಕಿದೆ, ಆದರೆ ಸಾಂವಿಧಾನಿಕವಾಗಿ ನಡೆದುಕೊಂಡಿರುವ ಒಬ್ಬ ಹಿರಿಯ ನಾಯಕನ ವಿರುದ್ಧ ವೈಯಕ್ತಿಕ ನಿಂದನೆ ಹಾಗೂ ಸಾಮಾಜಿಕ ಇಮೇಜ್ ಹಾಳುಮಾಡುವ ಸುಪಾರಿ ರಾಜಕಾರಣ ನಡೆಯುತ್ತಿರುವಾಗ ಬೆಂಬಲಿಗರು ಮೌನ ಮುರಿಯಬೇಕಾಗಿದೆ.
ಒಟ್ಟಾರೆಯಾಗಿ ಹೇಳುವುದಾದರೆ, ಪ್ರಣವಾನಂದ ಎನ್ನುವ ಈ ಖಾವಿಧಾರಿಯ ಹಿಂದೆ ಯಾರಿದ್ದಾರೆ? ಯಾರ ಓಲೈಕೆಗಾಗಿ ಆತ ಸಿದ್ದರಾಮಯ್ಯ ಹಾಗೂ ಒಂದು ನಿರ್ದಿಷ್ಟ ಸಮುದಾಯದ ವಿರುದ್ಧ ಈ ಮಟ್ಟದ ಕೀಳು ರಾಜಕಾರಣ ಮಾಡುತ್ತಿದ್ದಾನೆ ಎನ್ನುವುದು ಸರ್ಕಾರದ ನಿಯಮಾವಳಿಗಳ ಸತ್ಯಾಸತ್ಯತೆ ಮತ್ತು ಈತನ ಸ್ವಂತ ಸಮುದಾಯದ ನಾಯಕರ ಹಳೆಯ ಹೇಳಿಕೆಗಳಿಂದ ಸ್ಪಷ್ಟವಾಗಿದೆ. ಸಿದ್ದರಾಮಯ್ಯ ಅವರ ಸಮಾಜವಾದಿ, ಜಾತ್ಯತೀತ ಇಮೇಜ್ ಅನ್ನು ಇಂತಹ ಸುಳ್ಳು ಅಪಪ್ರಚಾರಗಳ ಮೂಲಕ ಧೂಳೀಪಟ ಮಾಡಲು ಸಾಧ್ಯವಿಲ್ಲ. ಜನತೆ ಮತ್ತು ಹಿಂದುಳಿದ ವರ್ಗಗಳ ಸಮುದಾಯಗಳು ಇಂತಹ ‘ಸುಪಾರಿ ಸ್ವಾಮಿಗಳ’ ಮತ್ತು ಅವರನ್ನು ಮುಂದಿಟ್ಟುಕೊಂಡು ಆಟ ಆಡಿಸುತ್ತಿರುವ ತೆರೆಯ ಮರೆಯ ಶಕ್ತಿಗಳ ಬಗ್ಗೆ ತೀವ್ರ ಎಚ್ಚರಿಕೆಯಿಂದ ಇರಬೇಕಾಗಿದೆ.
