ಕರ್ನಾಟಕ ಕಾಂಗ್ರೆಸ್ ರಾಜಕಾರಣದ ಒಳಗುದಿ ಈಗ ಜ್ವಾಲಾಮುಖಿಯಾಗಿ ಸ್ಫೋಟಿಸಿದೆ. “ಮುಂದಿನ ಎರಡು ವರ್ಷಕ್ಕಷ್ಟೇ ನಾನು ಸಿಎಂ ಆದರೆ ಸಾಕಾ? 2028ರ ವಿಧಾನಸಭೆ ಚುನಾವಣೆಯೂ ನನ್ನದೇ ನೇತೃತ್ವ, ನಾನೇ ಮುಂದಿನ ಮುಖ್ಯಮಂತ್ರಿ” ಎಂದು ಕನಕಪುರದ ಬಂಡೆ ಡಿ.ಕೆ. ಶಿವಕುಮಾರ್ (DK Shivakumar) ಸ್ವಪಕ್ಷೀಯರಿಗೇ ಬಹಿರಂಗ ಸವಾಲು ಹಾಕಿದ ಬೆನ್ನಲ್ಲೇ, ಸಚಿವ ಸತೀಶ್ ಜಾರಕಿಹೊಳಿ (Satish Jarkiholi) ಹಾರಿಸಿರುವ ಪ್ರತಿ-ಬಾಣ ಇಡೀ ಪಲ್ಲಟಕ್ಕೆ ಕಾರಣವಾಗಿದೆ. ತಾನೇ ಸರ್ವಾಧಿಕಾರಿ, ತನ್ನದೇ ಏಕಚಕ್ರಾಧಿಪತ್ಯ ಎಂದು ಬೀಗುತ್ತಿದ್ದ ಡಿಕೆಶಿಗೆ ಜಾರಕಿಹೊಳಿ ಕೊಟ್ಟಿರುವ ಟಕ್ಕರ್, ಸದ್ಯದ ಬಂಡೆ ಸರ್ಕಾರದ ಅಡಿಪಾಯವನ್ನೇ ಕದಲಿಸುವ ಮುನ್ಸೂಚನೆ ನೀಡಿದೆ. ಇದು ಕೇವಲ ಇಬ್ಬರು ನಾಯಕರ ನಡುವಿನ ಕುರ್ಚಿ ಜಗಳವಲ್ಲ, ಬದಲಿಗೆ ಇಡೀ ಕಾಂಗ್ರೆಸ್ ಸಾಮ್ರಾಜ್ಯದ ಆಂತರಿಕ ಭಿನ್ನಮತದ ನಡುಕ.
“ಸಿಎಂ ಆಗಲು ಅಧ್ಯಕ್ಷ ಪಟ್ಟ ಬೇಕಿಲ್ಲ” – ಡಿಕೆಶಿಗೆ ಜಾರಕಿಹೊಳಿ ನೇರ ಸವಾಲು!
ಕೆಪಿಸಿಸಿ ಅಧ್ಯಕ್ಷ ಗಾದಿ ಕೈತಪ್ಪಿದರೂ ಸತೀಶ್ ಜಾರಕಿಹೊಳಿ ಅವರ ರಾಜಕೀಯ ಮಹತ್ವಾಕಾಂಕ್ಷೆಯೇನೂ ಕುಗ್ಗಿಲ್ಲ ಎಂಬುದನ್ನು ಅವರ ಖಾರವಾದ ಮಾತುಗಳೇ ಸಾಬೀತುಪಡಿಸಿವೆ. ಡಿಕೆಶಿ (DK Shivakumar) ಅವರ ಏಕಪಕ್ಷೀಯ ಮತ್ತು ಅಹಂಕಾರದ ಸ್ವಯಂ ಘೋಷಣೆಗೆ ತೀಕ್ಷ್ಣವಾಗಿ ಪ್ರತಿಕ್ರಿಯಿಸಿರುವ ಜಾರಕಿಹೊಳಿ, “ಮುಖ್ಯಮಂತ್ರಿಯಾಗಲು ಕೆಪಿಸಿಸಿ ಅಧ್ಯಕ್ಷ ಹುದ್ದೆಯಲ್ಲೇ ಇರಬೇಕೆಂದೇನೂ ಇಲ್ಲ, ಸಿದ್ದರಾಮಯ್ಯನವರೇ ಅದಕ್ಕೆ ನಮ್ಮ ಕಣ್ಣಮುಂದಿರುವ ಲೇಟೆಸ್ಟ್ ಉದಾಹರಣೆ” ಎಂದು ಹೇಳುವ ಮೂಲಕ 2028ರ ಸಿಎಂ ರೇಸ್ನಿಂದ ತಾವು ಒಂದು ಇಂಚೂ ಹಿಂದೆ ಸರಿಯುವ ಪ್ರಶ್ನೆಯೇ ಇಲ್ಲ ಎಂದು ಹೈಕಮಾಂಡ್ಗೆ ನೇರ ಸಂದೇಶ ರವಾನಿಸಿದ್ದಾರೆ.
ಅಷ್ಟೇ ಅಲ್ಲ, “ಮುಂದಿನ ಸಿಎಂ ಯಾರು ಎಂಬುದನ್ನು ಒಬ್ಬ ವ್ಯಕ್ತಿ ಕನಕಪುರದಲ್ಲಿ ನಿಂತು ಘೋಷಿಸಿಕೊಳ್ಳಲು ಸಾಧ್ಯವಿಲ್ಲ, ಅದನ್ನು ಶಾಸಕಾಂಗ ಸಭೆ (CLP) ಮತ್ತು ಹೈಕಮಾಂಡ್ ತೀರ್ಮಾನಿಸುತ್ತದೆ. ಅದು ಅವತ್ತಿಗೆ ಆಗುವ ನಿರ್ಧಾರವೇ ಹೊರತು ಇವತ್ತೇ ಬಾಯಿ ಬಡಿದುಕೊಳ್ಳುವುದಲ್ಲ” ಎಂದು ಚಾಟಿ ಬೀಸಿದ್ದಾರೆ. ಈ ಹಿಂದೆ ಶಾಸಕರ ಬಹುಮತದ ಬೆಂಬಲವಿಲ್ಲದಿದ್ದರೂ ಕೇವಲ ಹೈಕಮಾಂಡ್ ಕೃಪಾಕಟಾಕ್ಷ ಮತ್ತು ಒತ್ತಡದ ತಂತ್ರದಿಂದ ಡಿಕೆಶಿ ಸಿಎಂ ಕುರ್ಚಿಯಲ್ಲಿ ಕೂತಾಗ, 30-40 ಶಾಸಕರು ಸಿದ್ದರಾಮಯ್ಯ ನಿವಾಸಕ್ಕೆ ದೌಡಾಯಿಸಿ ತೀವ್ರ ಆಕ್ರೋಶ ಹೊರಹಾಕಿದ್ದರು. ಅಂದು ಹೈಕಮಾಂಡ್ ಹೈಡ್ರಾಮಾ ನಡೆಸಿ ಹತ್ತಿಕ್ಕಿದ್ದ ಅದೇ ಶಾಸಕರ ಅಸಮಾಧಾನದ ಕಿಡಿಯನ್ನು ಜಾರಕಿಹೊಳಿ ಈಗ ಡಿಕೆಶಿ ವಿರುದ್ಧ ಪ್ರಬಲ ಅಸ್ತ್ರವಾಗಿ ಬಳಸಿಕೊಳ್ಳಲು ತೆರೆಮರೆಯಲ್ಲಿ ಪ್ರತ್ಯೇಕ ಸೈನ್ಯ ಸಜ್ಜುಗೊಳಿಸುತ್ತಿದ್ದಾರೆ. ಇದು ಬಂಡೆ ಸರ್ಕಾರಕ್ಕೆ ಎದುರಾಗಿರುವ ಮೊದಲ ಆಂತರಿಕ ಗಂಡಾಂತರ.
ಇದನ್ನೂ ಓದಿ: RSS ‘ಅನಧಿಕೃತ’ ಸಾಮ್ರಾಜ್ಯಕ್ಕೆ ಖರ್ಗೆ ಲೀಗಲ್ ಪೆಟ್ಟು! ಕೇಸರಿ ಪಡೆಯ ಮುಖವಾಡ ಕಳಚುತ್ತಾ?
ಕೃಷ್ಣ ಬೈರೇಗೌಡ, ಜಮೀರ್ ಅಸ್ತ್ರ: ಡಿಕೆಶಿ ನಾಯಕತ್ವಕ್ಕೆ ಆರಂಭಿಕ ಆಘಾತ
ಡಿಕೆಶಿ (DK Shivakumar) ಸಿಎಂ ಪೀಠಕ್ಕೇರುತ್ತಿದ್ದಂತೆ ಇಡೀ ಸಚಿವ ಸಂಪುಟವೇ ನಿಯಂತ್ರಣಕ್ಕೆ ಸಿಗದೆ ತತ್ತರಿಸುತ್ತಿದೆ. ಸಚಿವ ಕೃಷ್ಣ ಬೈರೇಗೌಡ (Krishna Byre Gowda) ದೆಹಲಿಗೆ ದೌಡಾಯಿಸಿ ಹೈಕಮಾಂಡ್ ಎದುರೇ ಹಠ ಹಿಡಿದು ಕುಳಿತಿದ್ದಾರೆ. ಕಳೆದ ಬಾರಿ ಡಿಕೆಶಿ ಹೊಂದಿದ್ದ ಬೆಂಗಳೂರು ನಗರ ಅಭಿವೃದ್ಧಿ, ಬಿಡಿಎ ಮತ್ತು ಬಿಎಂಆರ್ಡಿಎ ಸೇರಿದಂತೆ ಇಡೀ ಬೆಂಗಳೂರಿನ ಉಸ್ತುವಾರಿಯನ್ನು ತಮಗೆ ನೀಡಬೇಕು, ಇಲ್ಲವೇ ಕಂದಾಯ ಖಾತೆಯನ್ನಾದರೂ ಪೂರ್ಣವಾಗಿ ಸ್ವತಂತ್ರವಾಗಿ ಬಿಡಬೇಕು, ಇಲ್ಲದಿದ್ದರೆ ತಮಗೆ ಸಚಿವ ಸ್ಥಾನವೇ ಬೇಡ ಎಂದು ರಾಹುಲ್ ಗಾಂಧಿ ಮತ್ತು ಮಲ್ಲಿಕಾರ್ಜುನ ಖರ್ಗೆ ಎದುರು ಕಠಿಣ ನಿಲುವು ತಳೆದಿದ್ದಾರೆ. ಯಾರ ಮುಂದೆಯೂ ತಲೆಬಾಗದ ಕೃಷ್ಣ ಬೈರೇಗೌಡರ ಈ ಪಟ್ಟು ಡಿಕೆಶಿಯ ಬೆಂಗಳೂರು ಸಾಮ್ರಾಜ್ಯದ ಹಿಡಿತಕ್ಕೆ ಬಿದ್ದ ದೊಡ್ಡ ಪೆಟ್ಟು.
ಮತ್ತೊಂದೆಡೆ, ಸಚಿವ ಸಂಪುಟದ ಎರಡನೇ ಪಟ್ಟಿಯಲ್ಲೂ ತಮಗೆ ಸ್ಥಾನ ಸಿಗಲ್ಲ ಎನ್ನುವುದು ಖಚಿತವಾಗುತ್ತಿದ್ದಂತೆ ಪ್ರಭಾವಿ ನಾಯಕ ಜಮೀರ್ ಅಹ್ಮದ್ ಖಾನ್ (Zameer Ahmed Khan) ತೀವ್ರ ಆಕ್ರೋಶಗೊಂಡಿದ್ದಾರೆ. ಮಾಧ್ಯಮಗಳ ಮೈಕ್ ಕಂಡರೆ ಬೆನ್ನು ತಿರುಗಿಸಿ ಕುಳಿತುಕೊಳ್ಳುತ್ತಿರುವ ಜಮೀರ್, ಸದ್ಯದಲ್ಲೇ ಕಾಂಗ್ರೆಸ್ ಪಕ್ಷಕ್ಕೆ ಭಾರಿ ಆಘಾತ ನೀಡುವ ನಿಟ್ಟಿನಲ್ಲಿ ದೊಡ್ಡ ಹೆಜ್ಜೆಯನ್ನಿಡಲು ತಂತ್ರ ರೂಪಿಸುತ್ತಿದ್ದಾರೆ. ಒಟ್ಟಾರೆ ಪ್ರಮುಖ ನಾಯಕರ ಈ ಸರಣಿ ಬಂಡಾಯಗಳು ಡಿ.ಕೆ. ಶಿವಕುಮಾರ್ ಅವರ ನಾಯಕತ್ವದ ದಕ್ಷತೆಯನ್ನೇ ಪ್ರಶ್ನಿಸುವಂತೆ ಮಾಡಿದೆ.
ಒಳಗಡೆ ಕುರ್ಚಿ ಜಗಳ, ಹೊರಗಡೆ 36 ಸಾವಿರ ಕೋಟಿಯ ಭೀಕರ ಕಸದ ಹಗರಣ!
ಸ್ವಪಕ್ಷೀಯರ ಆಂತರಿಕ ದ್ರೋಹ ಮತ್ತು ಬಂಡಾಯದ ಬೆಂಕಿಯ ನಡುವೆಯೇ, ಡಿಕೆಶಿ ಸರ್ಕಾರಕ್ಕೆ ವಿರೋಧ ಪಕ್ಷಗಳು ಚೇತರಿಸಿಕೊಳ್ಳಲಾಗದ ಭೀಕರ ಕಾನೂನು ಕಂಟಕವನ್ನು ತಂದಿಟ್ಟಿವೆ. ಡಿ.ಕೆ. ಶಿವಕುಮಾರ್ ಅವರು ನಗರಾಭಿವೃದ್ಧಿ ಸಚಿವರಾಗಿದ್ದ ಅವಧಿಯಲ್ಲಿ ಬೆಂಗಳೂರಿನ ಕಸ ವಿಲೇವಾರಿ ಹೆಸರಿನಲ್ಲಿ ಬರೋಬ್ಬರಿ 36,000 ಕೋಟಿ ರೂಪಾಯಿಗಳ ಬೃಹತ್ ಹಗರಣ ನಡೆದಿದೆ ಎಂದು ಸಾಕ್ಷ್ಯ ಸಮೇತ ಬಿಜೆಪಿ ರಾಜ್ಯಪಾಲರ ಕದ ತಟ್ಟಿದೆ. ಇಷ್ಟು ದೊಡ್ಡ ಮಟ್ಟದ ಹಗರಣದ ದಾಖಲೆಗಳು ಕಾಂಗ್ರೆಸ್ ಇತಿಹಾಸದಲ್ಲೇ ಹೊರಬಂದಿರಲಿಲ್ಲ ಎಂಬ ಮಾತುಗಳು ಕೇಳಿಬರುತ್ತಿವೆ.
ಈಗಾಗಲೇ ಅಕ್ರಮ ಎಸಗಿ ಕಪ್ಪು ಪಟ್ಟಿಗೆ (Blacklist) ಸೇರಿರುವ ‘ರಾಮ್ಕಿ’ ಎಂಬ ವಿವಾದಿತ ಸಂಸ್ಥೆಗೆ ಮುಂದಿನ 30 ವರ್ಷಗಳ ಅವಧಿಗೆ (ಮತ್ತೆ 35 ವರ್ಷ ವಿಸ್ತರಣೆಯ ಕ್ಲಾಸ್ನೊಂದಿಗೆ) ಇಡೀ ಬೆಂಗಳೂರಿನ ಕಸದ ಟೆಂಡರ್ ಅನ್ನು ಅಕ್ರಮವಾಗಿ ನೀಡಲಾಗಿದೆ. ಈ ಭೀಕರ ಹಗರಣದಲ್ಲಿ ಬರೋಬ್ಬರಿ 10,000 ಕೋಟಿ ರೂಪಾಯಿಗಳ ಕಿಕ್ ಬ್ಯಾಕ್ ಪಡೆಯಲಾಗಿದ್ದು, ಆ ಕಾಸು ನೇರವಾಗಿ ದೆಹಲಿ ಹೈಕಮಾಂಡ್ಗೆ ಕಪ್ಪ ಕಾಣಿಕೆಯಾಗಿ ಹೋಗಿದೆ ಎಂಬ ಗಂಭೀರ ಆರೋಪದ ದಾಖಲೆಗಳು ಈಗ ಲೋಕಾಯುಕ್ತದ ಅಂಗಳ ತಲುಪುತ್ತಿವೆ. ಬೆಂಗಳೂರಿನ ತೆರಿಗೆದಾರರ ಹಣವನ್ನು ಲೂಟಿ ಮಾಡಿ ಹೈಕಮಾಂಡ್ ಸಾಕಲು ಹೊರಟಿರುವ ಈ “ಗಾರ್ಬೇಜ್ ಟು ಗೋಲ್ಡ್” ಹಗರಣ ಸದ್ಯದಲ್ಲೇ ಇಡೀ ಸರ್ಕಾರವನ್ನೇ ನುಂಗಿ ನೀರು ಕುಡಿಯುವ ಸಾಧ್ಯತೆ ದಟ್ಟವಾಗಿದೆ.
ಇದನ್ನೂ ಓದಿ: DK Shivakumar: ವೋಟ್ ಹಾಕಿದ ಜನರೇನು ನಿಮ್ಮ ಎಂಜಲು ತಿನ್ನುವ ಗುಲಾಮರೇ? ‘ಕನಕಪುರ ಬಂಡೆ’ಯ ಅಹಂಕಾರಕ್ಕೆ ಜನರ ಸ್ವಾಭಿಮಾನವೇ ಬಲಿ!
ದಿಕ್ಕು ತಪ್ಪಿದ ಆಡಳಿತ: ಕಸದ ಗಬ್ಬು ವಾಸನೆಯಲ್ಲಿ ಕಾಂಗ್ರೆಸ್ ಅಧಿಪತ್ಯ
ಬೆಂಗಳೂರಿನ ಕಸದಲ್ಲಿ ಭ್ರಷ್ಟಾಚಾರದ ಗಬ್ಬು ವಾಸನೆ ಹೊಡೆಯುತ್ತಿದ್ದು, ತೆರಿಗೆದಾರರ ರಕ್ತ ಹೀರುವ ಇಂತಹ ಬೋಗಸ್ ಮತ್ತು ಕರಪ್ಟ್ ಟೆಂಡರ್ ಅನ್ನು ತಕ್ಷಣ ರದ್ದುಗೊಳಿಸಬೇಕೆಂದು ವಿಪಕ್ಷಗಳು ಪಟ್ಟು ಹಿಡಿದಿವೆ. ಕಸ ವಿಲೇವಾರಿಗಾಗಿ ರಾಮ್ಕಿ ಕಂಪನಿಗೆ ನೂರು ಎಕರೆ ಸರ್ಕಾರಿ ಜಾಗವನ್ನು ಧಾರೆ ಎರೆಯಲಾಗಿದ್ದು, ಕ್ಯಾಬಿನೆಟ್ನಲ್ಲೇ ಈ ದೊಡ್ಡ ಲೂಟಿಗೆ ಅಪ್ರೂವಲ್ ಪಡೆದುಕೊಳ್ಳಲಾಗಿದೆ. ಬೆಂಗಳೂರು ನಗರಾಭಿವೃದ್ಧಿ ಸಚಿವರಾಗಿದ್ದಾಗ ಡಿಕೆಶಿ ಹಾಕಿದ ಸಹಿ ಮತ್ತು ಅದಕ್ಕೆ ಅಂದಿನ ಸಿಎಂ ಸಿದ್ದರಾಮಯ್ಯ ನೀಡಿದ ಸಾಥ್ ಇಬ್ಬರನ್ನೂ ಜೈಲು ಕಂಬಿ ಎಣಿಸುವಂತೆ ಮಾಡಿದರೂ ಅಚ್ಚರಿಯಿಲ್ಲ. ಬೆಂಗಳೂರಿನ ಜನ ಇನ್ನು ಮುಂದೆ ಕಸ ಹಾಕಬೇಕಾದರೂ ಬಂಗಾರದ ಬೆಲೆ ತೆರಬೇಕಾದ ಪರಿಸ್ಥಿತಿಯನ್ನು ಈ ಸರ್ಕಾರ ತಂದಿಟ್ಟಿದೆ. ಖಾತೆಗಳಿಗಾಗಿ ಮತ್ತು ಕಸದ ದುಡ್ಡಿನ ಲೂಟಿಗಾಗಿಯೇ ನಾಯಕರು ಕಿತ್ತಾಡುತ್ತಿದ್ದಾರೆ ಎಂಬುದು ಇವತ್ತು ಬೀದಿ ರಂಪಾಟವಾಗಿದೆ.
ಮುಖ್ಯಮಂತ್ರಿಯಾಗಿ ಅಧಿಕಾರ ಕೈ ಸೇರಿದ ಕೆಲವೇ ದಿನಗಳಲ್ಲಿ ಸ್ವಪಕ್ಷೀಯ ಸಚಿವರ ಬಹಿರಂಗ ಬಂಡಾಯ, ಉತ್ತರ ಕರ್ನಾಟಕದ ನಾಯಕರ ಕೌಂಟರ್ ಅಟ್ಯಾಕ್, ಖಾತೆಗಳಿಗಾಗಿ ದೆಹಲಿಯಲ್ಲಿ ನಡೆಯುತ್ತಿರುವ ಬ್ಲ್ಯಾಕ್ಮೇಲ್ ರಾಜಕಾರಣ ಮತ್ತು ವಿರೋಧ ಪಕ್ಷಗಳು ಹೂಡಿರುವ 36 ಸಾವಿರ ಕೋಟಿಯ ಭ್ರಷ್ಟಾಚಾರದ ಬ್ರಹ್ಮಾಸ್ತ್ರ—ಈ ಎಲ್ಲದರ ನಡುವೆ ಡಿ.ಕೆ. ಶಿವಕುಮಾರ್ ಅವರ ‘ಬಂಡೆ’ ಕೋಟೆ ಆರಂಭದಲ್ಲೇ ಸಂಪೂರ್ಣವಾಗಿ ಬಿರುಕು ಬಿಟ್ಟಿದೆ. 2028 ರವರೆಗೆ ತಾನೇ ಸರ್ವಾಧಿಕಾರಿ, ನಾನೇ ಅಧಿಪತಿ ಎಂದು ಬೀಗುತ್ತಿದ್ದ ಡಿಕೆಶಿಗೆ, ಸ್ವಪಕ್ಷದ ಸತೀಶ್ ಜಾರಕಿಹೊಳಿ ಪಡೆಯೇ ಸುರಂಗ ತೋಡುತ್ತಿದ್ದು, 2026 ರಲ್ಲೇ ಬಂಡೆ ಸರ್ಕಾರದ ಮೊದಲ ವಿಕೆಟ್ ಪತನವಾಗುವ ಎಲ್ಲಾ ಲಕ್ಷಣಗಳು ಗೋಚರಿಸುತ್ತಿವೆ!
