ಬೆಳಗಾವಿ ರಾಜಕಾರಣ (Beḷagavi Politics) ಎನ್ನುವುದೇ ಒಂದು ನಿಗೂಢ ಜಗತ್ತು, ಇಲ್ಲಿನ ಸಮೀಕರಣಗಳನ್ನು ಅರ್ಥ ಮಾಡಿಕೊಳ್ಳುವುದು ಅಷ್ಟು ಸುಲಭವಲ್ಲ. ಇಲ್ಲಿ ಸಿದ್ಧಾಂತಗಳಿಗಿಂತ ವೈಯಕ್ತಿಕ ಪ್ರತಿಷ್ಠೆ, ದಶಕಗಳ ಹಳೇ ಹಗೆತನ ಮತ್ತು ಪ್ರಾದೇಶಿಕ ಹಿಡಿತವೇ ಮುಖ್ಯ ಭೂಮಿಕೆ ವಹಿಸುತ್ತವೆ. ಯಾರು ಯಾವಾಗ ಮುಖಕ್ಕೆ ನಗು ಧರಿಸಿ ಬೆನ್ನಿಗೆ ಚೂರಿ ಹಾಕುತ್ತಾರೋ ಊಹಿಸುವುದೂ ಅಸಾಧ್ಯ. ಸ್ಥಳೀಯ ಸಂಸ್ಥೆಗಳ ಚುನಾವಣೆಗಳಲ್ಲಂತೂ ಇಲ್ಲಿನ ಕಾಂಗ್ರೆಸ್ ಮತ್ತು ಬಿಜೆಪಿ ನಾಯಕರು ಪರಸ್ಪರ ಹೊಂದಾಣಿಕೆ ಮಾಡಿಕೊಂಡು ನಡೆಸುವ ಒಳರಾಜಕಾರಣವನ್ನು ಕಂಡು ಸ್ವತಃ ರಾಜ್ಯ ಮಟ್ಟದ ನಾಯಕರೇ ಹಲವು ಬಾರಿ ದಂಗಾಗಿ ಹೋದ ಉದಾಹರಣೆಗಳಿವೆ. ರಾಜಕೀಯದಲ್ಲಿ “ಶಾಶ್ವತ ಶತ್ರುಗಳೂ ಇಲ್ಲ, ಶಾಶ್ವತ ಮಿತ್ರರೂ ಇಲ್ಲ” ಎಂಬ ನಾಣ್ಣುಡಿಗೆ ಬೆಳಗಾವಿಗಿಂತ ಸೂಕ್ತ ನಿದರ್ಶನ ಮತ್ತೊಂದಿಲ್ಲ. ಇದೀಗ ಕರ್ನಾಟಕ ರಾಜಕೀಯದಲ್ಲಿ ಚರ್ಚೆಯಾಗುತ್ತಿರುವ ಬಿಸಿ ಬಿಸಿ ವಿಷಯವೆಂದರೆ, ಬೆಳಗಾವಿ ಜಿಲ್ಲೆಯ ಸಚಿವ ಸಂಪುಟ ಕಸರತ್ತು ಮತ್ತು ತೆರೆಮರೆಯಲ್ಲಿ ನಡೆಯುತ್ತಿರುವ ರಾಜಕೀಯ ಧ್ರುವೀಕರಣ.
ಜನತಾ ಪರಿವಾರದಿಂದ ಶುರುವಾದ ಜಾರಕಿಹೊಳಿ-ಸವದಿ ದ್ವೇಷದ ಇತಿಹಾಸ
ಬೆಳಗಾವಿ ರಾಜಕಾರಣದಲ್ಲಿ (Beḷagavi Politics) ಜಾರಕಿಹೊಳಿ ಕುಟುಂಬಕ್ಕೂ (Jarkiholi family) ಹಾಗೂ ಲಕ್ಷ್ಮಣ ಸವದಿ (Lakshmana Savadi) ನಡುವಿನ ಸಿಟ್ಟು-ಸೆಡರು, ಹಗೆತನ ಇಂದು ನಿನ್ನೆಯದಲ್ಲ. ಇದು ಇವರಿಬ್ಬರೂ ಜನತಾ ಪರಿವಾರದಲ್ಲಿ ಜೊತೆಯಾಗಿದ್ದ ಕಾಲದಿಂದಲೂ ಬೆಳೆದು ಬಂದಿರುವ ದಟ್ಟವಾದ ರಾಜಕೀಯ ದ್ವೇಷ. ಬೆಳಗಾವಿ ಜಿಲ್ಲೆಯ ಸಹಕಾರಿ ವಲಯದ ಶಕ್ತಿ ಕೇಂದ್ರವಾದ ಡಿಸಿಸಿ ಬ್ಯಾಂಕ್ (DCC Bank) ಚುನಾವಣೆ ಇಲ್ಲಿ ಯಾವಾಗಲೂ ಪ್ರತಿಷ್ಠೆಯ ಕಣವಾಗಿರುತ್ತದೆ. ಈ ಬ್ಯಾಂಕ್ ಮೇಲಿನ ಹಿಡಿತಕ್ಕಾಗಿ ನಡೆದ ರಾಜಕೀಯ ಜಿದ್ದಾಜಿದ್ದಿನಲ್ಲಿ, ಸವದಿ ತಂಡದ ವಿರುದ್ಧ ಜಾರಕಿಹೊಳಿ ಕುಟುಂಬವೇ ನೇರವಾಗಿ ತಮ್ಮ ಅಭ್ಯರ್ಥಿಗಳನ್ನು ಕಣಕ್ಕಿಳಿಸಿತ್ತು. ಇದೇ ಕಾರಣಕ್ಕೆ ಇವರ ನಡುವೆ ದ್ವೇಷದ ಕಿಡಿ ಹೊತ್ತಿಕೊಂಡಿತು ಎನ್ನುತ್ತವೆ ರಾಜಕೀಯ ಮೂಲಗಳು.
ರಾಮಕೃಷ್ಣ ಹೆಗಡೆಯವರ ಕಾಲದ ಬಳಿಕ ಜನತಾ ಪರಿವಾರದಲ್ಲಿದ್ದ ಲಿಂಗಾಯತ ಸಮುದಾಯದ ಬಹುತೇಕ ನಾಯಕರು ಬಿಜೆಪಿಯತ್ತ ಮುಖ ಮಾಡಿದರು. ಕೆಲವು ವರ್ಷಗಳ ಕಾಲ ಜೆಡಿಎಸ್ನಲ್ಲಿದ್ದ ಸಿದ್ದರಾಮಯ್ಯ ಸೇರಿದಂತೆ ಹಲವು ನಾಯಕರು ಕಾಲಾನಂತರದಲ್ಲಿ ಕಾಂಗ್ರೆಸ್ ಸೇರಿಕೊಂಡರು. ಆದರೆ ಜಾರಕಿಹೊಳಿ ಕುಟುಂಬದ ಬಾಲಚಂದ್ರ ಜಾರಕಿಹೊಳಿ ಮಾತ್ರ 2008ರವರೆಗೂ ಜೆಡಿಎಸ್ನಲ್ಲೇ ಉಳಿದಿದ್ದರು. ಆನಂತರ ಗಾಲಿ ಜನಾರ್ದನ ರೆಡ್ಡಿ ಹಾಗೂ ಶ್ರೀರಾಮುಲು ಸಂಘದ ಸೆಳೆತಕ್ಕೆ ಸಿಲುಕಿ ಬಾಲಚಂದ್ರ ಜಾರಕಿಹೊಳಿ ಕೂಡ ಬಿಜೆಪಿ ಸೇರುತ್ತಾರೆ. ಬೆಳಗಾವಿ ರಾಜಕಾರಣದಲ್ಲಿ ಡಿಸಿಸಿ ಬ್ಯಾಂಕ್ ಹಾಗೂ ಸಹಕಾರಿ ಚುನಾವಣೆಗಳ ವಿಷಯ ಬಂದಾಗ ಪಕ್ಷಗಳು, ಸಿದ್ಧಾಂತಗಳು ಯಾವುದೂ ಮ್ಯಾಟರ್ ಆಗುವುದಿಲ್ಲ; ಇಲ್ಲಿ ಓನ್ಲಿ ‘ಸ್ಟೇಟಸ್ ಮ್ಯಾಟರ್’ ಎನ್ನುವಂತೆ ರಾಜಕಾರಣ ನಡೆಯುತ್ತಲೇ ಬಂದಿದೆ. ಈ ಪ್ರಾದೇಶಿಕ ಒಳಜಗಳದ ಬಗ್ಗೆ ರಾಜ್ಯ ಮಟ್ಟದ ಯಾವೊಬ್ಬ ನಾಯಕರೂ ತಲೆಕೆಡಿಸಿಕೊಳ್ಳುವ ಸಾಹಸಕ್ಕೆ ಕೈಹಾಕಿಲ್ಲ.
ಇಷ್ಟೇ ಅಲ್ಲದೆ, ಅಥಣಿ ಕ್ಷೇತ್ರದಲ್ಲಿ ಲಕ್ಷ್ಮಣ ಸವದಿ ವಿರುದ್ಧ ಲಿಂಗಾಯತ ಸಮುದಾಯದ ಮತ್ತೊಬ್ಬ ಅಭ್ಯರ್ಥಿಯನ್ನು ಕಣಕ್ಕಿಳಿಸಿ ಸವದಿಯನ್ನು ರಾಜಕೀಯವಾಗಿ ಮುಗಿಸಲು ಜಾರಕಿಹೊಳಿ ಕುಟುಂಬ ಸತತವಾಗಿ ಕೆಲಸ ಮಾಡುತ್ತಲೇ ಬಂದಿತ್ತು. ಅದರ ಫಲವಾಗಿಯೇ ಲಿಂಗಾಯತ ಸಮುದಾಯದ ಮಹೇಶ್ ಕುಮಟಳ್ಳಿ ಎಂಬ ಅಭ್ಯರ್ಥಿಯನ್ನು ಸವದಿ ವಿರುದ್ಧ ಗೆಲ್ಲಿಸಿಕೊಂಡು ಬರಲಾಯಿತು. ಮುಂದೆ ರಮೇಶ್ ಜಾರಕಿಹೊಳಿ ನೇತೃತ್ವದಲ್ಲಿ ಕುಮಟಳ್ಳಿ ‘ಆಪರೇಷನ್ ಕಮಲ’ದ ಮೂಲಕ ಬಿಜೆಪಿಗೆ ಸೇರಿದಾಗ ಉಪಚುನಾವಣೆ ಎದುರಾಯಿತು. ಆಗ ಲಕ್ಷ್ಮಣ ಸವದಿ ಅನಿವಾರ್ಯವಾಗಿ ಪಕ್ಷದ ಹೈಕಮಾಂಡ್ ಮಾತಿಗೆ ಬೆಲೆ ಕೊಟ್ಟು, ತಮ್ಮದೇ ಸ್ವಕ್ಷೇತ್ರವನ್ನು ಕುಮಟಳ್ಳಿಗಾಗಿ ಬಿಟ್ಟುಕೊಟ್ಟು ಸುಮ್ಮನಾಗಬೇಕಾಯಿತು. ಮುಂದೆ ಬಿಜೆಪಿಯಲ್ಲಿ ರಮೇಶ್ ಜಾರಕಿಹೊಳಿ ಅವರ ಅಬ್ಬರ ತಾರಕಕ್ಕೇರಿದಾಗ, ಸವದಿ ತಮಗೆ ಆಗುತ್ತಿದ್ದ ಅಪಮಾನ ಸಹಿಸದೇ ಬಿಜೆಪಿ ತೊರೆದು ಕಾಂಗ್ರೆಸ್ ಕೈ ಹಿಡಿದರು.
ಇದನ್ನೂ ಓದಿ: DK Shivakumar: ಬಂಡೆ ಕೋಟೆಗೆ ಸತೀಶ್ ಸುರಂಗ! ಕಸದ ಹಗರಣದ ನಡುವೆ ಡಿಕೆಶಿ ‘ಏಕಚಕ್ರಾಧಿಪತ್ಯ’ಕ್ಕೆ ಸರಣಿ ವಿಘ್ನ?
ಅಪೆಕ್ಸ್ ಬ್ಯಾಂಕ್ ಬಿಗ್ ಶಾಕ್ ಮತ್ತು ಕದನ ಕಣವಾದ ಸಹಕಾರಿ ವಲಯ
ಜಾರಕಿಹೊಳಿ ಸಹೋದರರು ಮತ್ತು ಲಕ್ಷ್ಮಣ ಸವದಿ ನಡುವಿನ ಇತ್ತೀಚಿನ ಮಹತ್ವದ ಬೆಳಗಾವಿ ರಾಜಕೀಯ (Beḷagavi Politics) ಬೆಳವಣಿಗೆಯೆಂದರೆ ರಾಜ್ಯ ಮಟ್ಟದ ಅಪೆಕ್ಸ್ ಬ್ಯಾಂಕ್ (Apex Bank) ಚುನಾವಣೆ. ದಶಕಗಳಿಂದ ಸಹಕಾರಿ ವಲಯದಲ್ಲಿ ಭದ್ರ ಕೋಟೆ ಕಟ್ಟಿಕೊಂಡಿದ್ದ ಸವದಿಗೆ ಜಾರಕಿಹೊಳಿ ಕುಟುಂಬ ಇತ್ತೀಚೆಗೆ ದೊಡ್ಡ ಆಘಾತ ನೀಡಿದೆ. ಸತತ ಎರಡು ದಶಕಗಳ ಕಾಲ (ಬರೋಬ್ಬರಿ 20 ವರ್ಷ) ಲಕ್ಷ್ಮಣ ಸವದಿ ಅವರ ಕೈಯಲ್ಲಿದ್ದ ಅಪೆಕ್ಸ್ ಬ್ಯಾಂಕ್ ನಿರ್ದೇಶಕ ಸ್ಥಾನವು ಸದ್ದಿಲ್ಲದೆ ಅವರ ಕೈತಪ್ಪಿ ಹೋಗಿದೆ!
ಸವದಿಯವರನ್ನು ಕೆಳಗಿಳಿಸಿ ಆ ಜಾಗಕ್ಕೆ ಸಚಿವ ಸತೀಶ್ ಜಾರಕಿಹೊಳಿ ಅವರ ಪುತ್ರ ರಾಹುಲ್ ಜಾರಕಿಹೊಳಿ ಅವರನ್ನು ಪ್ರತಿಷ್ಠಾಪಿಸುವಲ್ಲಿ ಜಾರಕಿಹೊಳಿ ಸಹೋದರರು ಯಶಸ್ವಿಯಾಗಿದ್ದಾರೆ. ಈ ಒಂದು ರಾಜಕೀಯ ಚದುರಂಗದಾಟ ಜಿಲ್ಲೆಯ ಹಳೆಯ ದ್ವೇಷಕ್ಕೆ ಮತ್ತಷ್ಟು ತುಪ್ಪ ಸುರಿದಂತಾಗಿದೆ. ಸಹಕಾರಿ ವಲಯದ ಮೇಲೆ ಸಂಪೂರ್ಣ ಹಿಡಿತ ಸಾಧಿಸಿ, ಸವದಿಯವರ ಆರ್ಥಿಕ ಮತ್ತು ರಾಜಕೀಯ ಮೂಲಗಳಿಗೆ ಪೆಟ್ಟು ನೀಡುವುದು ಜಾರಕಿಹೊಳಿ ಕುಟುಂಬದ ಬಹುದೊಡ್ಡ ತಂತ್ರಗಾರಿಕೆಯ ಭಾಗವಾಗಿದೆ.
ಕಾಂಗ್ರೆಸ್ನಲ್ಲಿ ಸವದಿ ಮೂಲೆಗುಂಪು ಮತ್ತು ಡಿಕೆಶಿ ಎಂಬ ಸಂಜೀವಿನಿ
ಕಾಂಗ್ರೆಸ್ಗೆ ಬಂದ ಆರಂಭದಲ್ಲಿ ಲಕ್ಷ್ಮಣ ಸವದಿಗೆ ಪಕ್ಷದಲ್ಲಿ ಹೆಚ್ಚಿನ ಮನ್ನಣೆಯಾಗಲಿ, ಪ್ರಾಶಸ್ತ್ಯವಾಗಲಿ ಸಿಗಲಿಲ್ಲ. ಇದಕ್ಕೆ ಮುಖ್ಯ ಕಾರಣ, ಜಾರಕಿಹೊಳಿ ಕುಟುಂಬಕ್ಕೆ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರೊಂದಿಗೆ ಇದ್ದ ಅತ್ಯಾಪ್ತ ಒಡನಾಟ! ಸಿದ್ದರಾಮಯ್ಯ ಅವರ ಬಲದಿಂದ ಜಾರಕಿಹೊಳಿ ಕುಟುಂಬ ಸವದಿಗೆ ಕಾಂಗ್ರೆಸ್ನಲ್ಲಿ ಹೆಚ್ಚಿನ ಆದ್ಯತೆ ಸಿಗದಂತೆ ತಡೆಯುವಲ್ಲಿ ಯಶಸ್ವಿಯಾಗಿತ್ತು ಎಂಬ ಮಾತುಗಳು ಬಲವಾಗಿ ಕೇಳಿಬರುತ್ತಿವೆ. ಆದರೆ ಇದೀಗ ರಾಜಕೀಯ ದಾಳ ಉಲ್ಟಾ ಆಗಿದೆ.
ಡಿ.ಕೆ. ಶಿವಕುಮಾರ್ ಸಿಎಂ ಗದ್ದುಗೆ ಏರಿರುವುದರಿಂದ ಸವದಿ ಭವಿಷ್ಯಕ್ಕೆ ಹೊಸ ಆಶಾಕಿರಣ ಮೂಡಿದೆ. ಏಕೆಂದರೆ, ಹರಸಾಹಸ ಪಟ್ಟು ಸವದಿಯವರನ್ನು ಕಾಂಗ್ರೆಸ್ಗೆ ಕರೆತಂದಿದ್ದೇ ಡಿ.ಕೆ. ಶಿವಕುಮಾರ್. “ನನ್ನ ಅವಧಿಯಲ್ಲಿ ನಿಮಗೆ ಸಚಿವ ಸ್ಥಾನ ಫಿಕ್ಸ್” ಎಂದು ಹಿಂದೆ ನೀಡಿದ್ದ ಅಭಯದಂತೆ ನಡೆದುಕೊಳ್ಳಬೇಕಾದ ಅನಿವಾರ್ಯತೆ ಈಗ ಡಿಕೆಶಿ ಮೇಲಿದೆ. ಹಾಗಾಗಿ ಸವದಿಗೆ ಈ ಬಾರಿ ಸಚಿವ ಸ್ಥಾನ ಸಿಗುವ ಸಾಧ್ಯತೆ ತೀರಾ ಹೆಚ್ಚಿದೆ.
ಲಕ್ಷ್ಮಿ-ಜಾರಕಿಹೊಳಿ “ಹಾವು-ಮುಂಗೂಸಿ” ವೈರತ್ವಕ್ಕೆ ದಿಢೀರ್ ಬ್ರೇಕ್ ಯಾಕೆ?
ಕಳೆದ ಕೆಲವು ವರ್ಷಗಳಿಂದ ಬೆಳಗಾವಿ ರಾಜಕೀಯದಲ್ಲಿ ಜಾರಕಿಹೊಳಿ ಕುಟುಂಬ ಮತ್ತು ಲಕ್ಷ್ಮಿ ಹೆಬ್ಬಾಳ್ಕರ್ ನಡುವಿನ ವೈರತ್ವ “ಹಾವು-ಮುಂಗೂಸಿ”ಯ ಕಾದಾಟದಂತಿತ್ತು. ಆದರೆ, ಇತ್ತೀಚಿನ ದಿನಗಳಲ್ಲಿ ಸತೀಶ್ ಜಾರಕಿಹೊಳಿ ಅವರು ಲಕ್ಷ್ಮಿ ಹೆಬ್ಬಾಳ್ಕರ್ ಪರವಾಗಿ ಭರ್ಜರಿ ಬ್ಯಾಟಿಂಗ್ ನಡೆಸುತ್ತಿದ್ದಾರೆ. ಬೆಳಗಾವಿ ಜಿಲ್ಲೆಗೆ ಮಹಿಳಾ ಕೋಟಾದಡಿಯಲ್ಲಿ ಸಚಿವ ಸ್ಥಾನ ಸಿಗಬೇಕು ಎಂದು ಸತೀಶ್ ಹೇಳುತ್ತಿದ್ದಾರೆ. ಮೇಲ್ನೋಟಕ್ಕೆ ಇದು ಮಹಿಳಾ ಪ್ರಾತಿನಿಧ್ಯದ ಪರವಾದ ಕಾಳಜಿಯಂತೆ ಕಂಡರೂ, ಇದರ ಹಿಂದೆ ದಶಕಗಳ ಹಳೇ ಶತ್ರು ಲಕ್ಷ್ಮಣ ಸವದಿಗೆ ಸಚಿವ ಸ್ಥಾನ ತಪ್ಪಿಸುವ ಜಾರಕಿಹೊಳಿ ಕುಟುಂಬದ ಒಳಸಂಚು ಅಡಗಿದೆ!
ಒಂದು ವೇಳೆ ಸವದಿಯಂತಹ ಘಟಾನುಘಟಿ ನಾಯಕ ಸಂಪುಟ ಸೇರಿದರೆ ಜಿಲ್ಲೆಯಲ್ಲಿ ತಮ್ಮ ಏಕಸ್ವಾಮ್ಯಕ್ಕೆ ಧಕ್ಕೆ ಬರಬಹುದು ಎಂಬ ಆತಂಕ ಸತೀಶ್ ಅವರನ್ನು ಕಾಡುತ್ತಿರುವುದು ನಿಶ್ಚಿತ. ಇದೇ ಕಾರಣಕ್ಕೆ ಹಳೇ ಶತ್ರು ಲಕ್ಷ್ಮಿ ಹೆಬ್ಬಾಳ್ಕರ್ ಹೆಗಲ ಮೇಲೆ ಬಂದೂಕನ್ನಿಟ್ಟು ಸವದಿ ಹಾದಿಗೆ ಮುಳ್ಳಾಗಲು ಸತೀಶ್ ತಂತ್ರ ಹೂಡಿದ್ದಾರೆ. ಸವದಿಗೆ ಅವಕಾಶ ಸಿಕ್ಕರೆ ಸತೀಶ್ ಜಾರಕಿಹೊಳಿ ಸಾಮ್ರಾಜ್ಯಕ್ಕೆ ಆತಂಕ ಶುರುವಾಗುವುದರಲ್ಲಿ ಯಾವುದೇ ಅನುಮಾನವಿಲ್ಲ.
ಇದನ್ನೂ ಓದಿ: DK Shivakumar: ವೋಟ್ ಹಾಕಿದ ಜನರೇನು ನಿಮ್ಮ ಎಂಜಲು ತಿನ್ನುವ ಗುಲಾಮರೇ? ‘ಕನಕಪುರ ಬಂಡೆ’ಯ ಅಹಂಕಾರಕ್ಕೆ ಜನರ ಸ್ವಾಭಿಮಾನವೇ ಬಲಿ!
ಡಿಕೆಶಿ – ಸತೀಶ್ ಜಾರಕಿಹೊಳಿ ನಡುವಿನ ಕೋಲ್ಡ್ ವಾರ್!
ಜಾರಕಿಹೊಳಿ ಫ್ಯಾಮಿಲಿಗೂ ಹಾಗೂ ಡಿ.ಕೆ. ಶಿವಕುಮಾರ್ಗೂ ಮೊದಲಿನಿಂದಲೂ ಸಂಬಂಧ ಸರಿ ಇಲ್ಲ ಎನ್ನುವುದು ಇಡೀ ರಾಜ್ಯದ ಜನರಿಗೆ ತಿಳಿದಿರುವ ಜಗಜ್ಜಾಹೀರು ವಿಷಯ. ಆದರೆ ಕಳೆದ ಆರು ತಿಂಗಳ ಅವಧಿಯಲ್ಲಿ ಮಾತ್ರ ಸತೀಶ್ ಜಾರಕಿಹೊಳಿ ಹಾಗೂ ಡಿ.ಕೆ. ಶಿವಕುಮಾರ್ ಮಧ್ಯೆ ದಿಢೀರ್ ಅತ್ಯಾಪ್ತತೆ ಬೆಳೆದಿತ್ತು. ಆದರೆ ರಾಜಕೀಯ ಹಿತಾಸಕ್ತಿಗಳ ಮುಂದೆ ಈ ದೋಸ್ತಿ ಬಹಳ ದಿನ ಉಳಿಯಲಿಲ್ಲ. ಇದೀಗ ಮತ್ತೆ ಇಬ್ಬರು ನಾಯಕರು ಒಳಗೊಳಗೇ ಒಬ್ಬರಿಗೊಬ್ಬರು ಟಾಂಗ್ ಕೊಡುವುದರಲ್ಲಿ, ಪರಸ್ಪರ ಕಾಲೆಳೆಯುವುದರಲ್ಲಿ ಬ್ಯುಸಿಯಾಗಿದ್ದಾರೆ.
ಸಂಪುಟದಿಂದ ಲಕ್ಷ್ಮಿ ಹೆಬ್ಬಾಳ್ಕರ್ ಔಟ್? ಕಾಂಗ್ರೆಸ್ ಪಾಳಯದ ಹೊಸ ಲೆಕ್ಕಾಚಾರ!
ಈ ಎಲ್ಲ ಬೆಳವಣಿಗೆಗಳ ನಡುವೆ ಕಾಂಗ್ರೆಸ್ ಪಾಳಯದಿಂದ ಅತ್ಯಂತ ಅಚ್ಚರಿಯ ಸುದ್ದಿಯೊಂದು ಕೇಳಿಬರುತ್ತಿದೆ. ಸತೀಶ್ ಜಾರಕಿಹೊಳಿ ಅವರು ಲಕ್ಷ್ಮಿ ಹೆಬ್ಬಾಳ್ಕರ್ ಪರವಾಗಿ ಬ್ಯಾಟ್ ಬೀಸುತ್ತಿದ್ದರೂ, ಲಕ್ಷ್ಮಿ ಹೆಬ್ಬಾಳ್ಕರ್ ಅವರು ಈ ಬಾರಿ ಸಚಿವ ಸಂಪುಟದಿಂದ ಹೊರಗೆ ಉಳಿಯುವ ಸಾಧ್ಯತೆಗಳೇ ಹೆಚ್ಚಿವೆ ಎನ್ನಲಾಗುತ್ತಿದೆ! ಇದು ಮೇಲ್ನೋಟಕ್ಕೆ ಶಾಕಿಂಗ್ ಎನಿಸಿದರೂ, ಇದಕ್ಕೆ ಕಾಂಗ್ರೆಸ್ ಹೈಕಮಾಂಡ್ ವಲಯದಲ್ಲಿ ಬೇರೆಯದ್ದೇ ಆದ ರಾಜಕೀಯ ಕಾರಣಗಳು ಮತ್ತು ಆಂತರಿಕ ಸಮೀಕರಣಗಳು ಸದ್ದು ಮಾಡುತ್ತಿವೆ.
ಒಳನೋಟ: ಸಧ್ಯದ ಪರಿಸ್ಥಿತಿಯನ್ನು ಸೂಕ್ಷ್ಮವಾಗಿ ಅವಲೋಕಿಸಿದರೆ, ಬೆಳಗಾವಿ ಜಿಲ್ಲೆಗೆ ಈ ಹಂತದಲ್ಲಿ ಕೇವಲ ಎರಡು ಸಚಿವ ಸ್ಥಾನಗಳು ಸಿಗುವ ಸಾಧ್ಯತೆಗಳು ದಟ್ಟವಾಗಿವೆ. ಈಗಾಗಲೇ ಸತೀಶ್ ಜಾರಕಿಹೊಳಿ ಅವರಿಗೆ ಒಂದು ಸ್ಥಾನ ಫಿಕ್ಸ್ ಆಗಿದೆ.
ಮೂರನೇ ಸ್ಥಾನದ ರೇಸ್ನಲ್ಲಿ ಯಾರಿದ್ದಾರೆ?
ಜನಸಂಖ್ಯಾವಾರು ಲೆಕ್ಕಾಚಾರದಲ್ಲಿ ನೋಡಿದರೆ ರಾಜಧಾನಿ ಬೆಂಗಳೂರು ಬಿಟ್ಟರೆ ರಾಜ್ಯದಲ್ಲೇ ಅತಿ ಹೆಚ್ಚು ಜನಸಂಖ್ಯೆ ಮತ್ತು ವಿಧಾನಸಭಾ ಕ್ಷೇತ್ರಗಳನ್ನು ಹೊಂದಿರುವ ಬೃಹತ್ ಜಿಲ್ಲೆ ಎಂದರೆ ಅದು ಬೆಳಗಾವಿ. ಇಲ್ಲಿನ ಒಟ್ಟು 18 ಕ್ಷೇತ್ರಗಳ ಪೈಕಿ ಬರೋಬ್ಬರಿ 11 ಕ್ಷೇತ್ರಗಳಲ್ಲಿ ಕಾಂಗ್ರೆಸ್ ಶಾಸಕರಿದ್ದಾರೆ. ಜಿಲ್ಲೆಯ ಈ ಬೃಹತ್ ಕೊಡುಗೆಯನ್ನು ಗಮನಿಸಿದರೆ ಬೆಳಗಾವಿಗೆ ಕನಿಷ್ಠ ಮೂರು ಸಚಿವ ಸ್ಥಾನಗಳನ್ನು ನೀಡಬೇಕಾದ ಅನಿವಾರ್ಯತೆ ಸರ್ಕಾರಕ್ಕಿದೆ.
ಒಂದು ವೇಳೆ ಹೈಕಮಾಂಡ್ ಬೆಳಗಾವಿಯ ಹಿರಿಯ ಶಾಸಕರ ಒತ್ತಡಕ್ಕೆ ಮಣಿದು ಮೂರನೇ ಸಚಿವ ಸ್ಥಾನವನ್ನು ನೀಡಲು ಮುಂದಾದರೆ, ಲಕ್ಷ್ಮಿ ಹೆಬ್ಬಾಳ್ಕರ್ ಹೊರಗುಳಿದ ಪಕ್ಷದಲ್ಲಿ ಆ ಸ್ಥಾನ ಯಾರ ಪಾಲಾಗಲಿದೆ ಎಂಬ ಹೊಸ ಲೆಕ್ಕಾಚಾರ ಜಿಲ್ಲಾ ರಾಜಕಾರಣದಲ್ಲಿ ತೀವ್ರಗೊಂಡಿದೆ. ಜಿಲ್ಲೆಯಲ್ಲಿ ಆಸಿಫ್ (ರಾಜು) ಸೇಠ್, ಗಣೇಶ್ ಹುಕ್ಕೇರಿ, ಅಶೋಕ್ ಪಟ್ಟಣ ಸೇರಿದಂತೆ ಐವರು ಹಿರಿಯ ಶಾಸಕರು ರೇಸ್ನಲ್ಲಿದ್ದು, ಆ ಒಳಗುದ್ದಾಟದ ಲೆಕ್ಕಾಚಾರಗಳು ಈಗ ತೆರೆಮರೆಯಲ್ಲಿ ಜೋರಾಗಿಯೇ ನಡೆಯುತ್ತಿವೆ.
ಕುತೂಹಲ ಮೂಡಿಸಿದ ಎರಡನೇ ಲಿಸ್ಟ್
ಸದ್ಯದ ಪರಿಸ್ಥಿತಿಯಲ್ಲಿ ಬೆಳಗಾವಿ ರಾಜಕಾರಣ ಬಹುಮುಖಿ ಸಂಘರ್ಷದ ಕಣವಾಗಿದೆ. ಅಪೆಕ್ಸ್ ಬ್ಯಾಂಕ್ ನಿರ್ದೇಶಕ ಸ್ಥಾನ ಕಸಿದುಕೊಂಡು ಸವದಿಗೆ ಮೊದಲ ಪೆಟ್ಟು ನೀಡಿರುವ ಜಾರಕಿಹೊಳಿ ಕುಟುಂಬ, ಈಗ ಸಚಿವ ಸ್ಥಾನವನ್ನೂ ತಪ್ಪಿಸಲು ಜಾಲ ಹೆಣೆಯುತ್ತಿದೆ. ತಮಗೆ ಸಿಕ್ಕ ಸಿಎಂ ಪಟ್ಟದ ಬಲದಿಂದ ಆಪ್ತ ಸವದಿಯ ಕೈ ಹಿಡಿಯಲು ಹೊರಟಿರುವ ಡಿಕೆಶಿ, ಸಂಪುಟದಿಂದ ಹೊರಗಿರುವ ಲಕ್ಷ್ಮಿ ಹೆಬ್ಬಾಳ್ಕರ್ ಲೆಕ್ಕಾಚಾರ.. ಹೀಗೆ ಕುಂದಾನಗರಿಯ ಕುರ್ಚಿ ಕದನ ರೋಚಕ ಹಂತ ತಲುಪಿದೆ. ಈ ತಿಂಗಳ ಕೊನೆಯಲ್ಲಿ ಹೊರಬರಲಿರುವ ಸಚಿವ ಸಂಪುಟದ ಎರಡನೇ ಲಿಸ್ಟ್ನಲ್ಲಿ ಯಾರಿಗೆ ಅದೃಷ್ಟ ಒಲಿಯಲಿದೆ ಮತ್ತು ಯಾರ ರಾಜಕೀಯ ತಂತ್ರಗಾರಿಕೆ ಧೂಳೀಪಟವಾಗಲಿದೆ ಎಂಬುದನ್ನು ಕಾದುನೋಡಬೇಕಿದೆ!
