Shivanand Neelannavar: ಬಾಯಲ್ಲಿ ಭಗವದ್ಗೀತೆ, ಬಗಲಲ್ಲಿ ಕತ್ತಿ ಎಂಬ ಹಳೇ ಗಾದೆ ಮಾತು ಇಂದಿನ ಡಿಜಿಟಲ್ ಜಮಾನಾಕ್ಕೆ ಜೀರ್ಣೋದ್ಧಾರಗೊಂಡಂತಿದೆ. ಈಗಿನ ಹೊಸ ಟ್ರೆಂಡ್ ಏನಪ್ಪಾ ಎಂದರೆ—ಬಾಯಲ್ಲಿ ಸಿಎಂ ಗದ್ದುಗೆಯ ಜಪ, ಬೆನ್ನ ಹಿಂದೆ 4,500 ಕೋಟಿ ರೂಪಾಯಿಯ ಸಾರ್ವಜನಿಕ ಲೂಟಿ ಹಣ, ಹಾಗೂ ಕೈಯಲ್ಲಿ ಕಾಲ್ಪನಿಕ 15,000 ಬಂದೂಕುಗಳು! ಹೌದು, ಕುಂದಾನಗರಿ ಬೆಳಗಾವಿಯ ಇತಿಹಾಸದಲ್ಲೇ ಅತ್ಯಂತ ಧೋಖಾಬಾಜ್ ಹಾಗೂ ಅತಿ ದೊಡ್ಡ ಆರ್ಥಿಕ ಹಗರಣದ ಹರಿಕಾರ, ‘ಶಿವಂ ಅಸೋಸಿಯೇಟ್ಸ್’ ಮಾಲೀಕ ಶಿವಾನಂದ ನೀಲಣ್ಣನವರ್ ಈಗ ಜೈಲಿನ ಕಂಬಿ ಎಣಿಸುತ್ತಿದ್ದಾನೆ.
“ನಾನು ಚಿಟಗೆ ಹೊಡೆಯುವುದರೊಳಗೆ ಮುಖ್ಯಮಂತ್ರಿ ಆಗುತ್ತೇನೆ, ನನ್ನ ಬಳಿ ಹದಿನೈದು ಸಾವಿರ ಬಂದೂಕುಗಳಿವೆ, ನಾನು ಕಲಿಯುಗದ ಅವತಾರ ಪುರುಷ” ಎಂದು ಮೈಕ್ ಸಿಕ್ಕಾಗಲೆಲ್ಲ ಅಹಂಕಾರದಿಂದ, ಚೀರುತ್ತ್ತಾ ಸಿನಿಮಾ ಸ್ಟೈಲ್ನಲ್ಲಿ ಅಬ್ಬರಿಸುತ್ತಿದ್ದ ಈ ಮಹಾ ವಂಚಕನ ಅಸಲಿ ಮುಖವಾಡ ಕಳಚಿಬಿದ್ದಿದೆ. ದೇಶ ಕಾಯುವ ನಿವೃತ್ತ ಸೈನಿಕರ ಮತ್ತು ಮುಗ್ಧ ಸಾರ್ವಜನಿಕರ ರಕ್ತ ಹೀರಿದ ಈ ಕಾಗೆ ಹಾರಿಸುವ ‘ಕಿಂಗ್ಪಿನ್’ ಇಂದು ಅಧಿಕಾರಿಗಳ ಬಿಗಿ ಪಾಶದಲ್ಲಿ ಸಿಲುಕಿ ಮುಖಭಂಗ ಅನುಭವಿಸಿದ್ದಾನೆ.
ಯಾರು ಈ ಶಿವಾನಂದ ನೀಲಣ್ಣನವರ್? ಮುಖವಾಡದ ಹಿಂದಿನ ಅಸಲಿ ನರಿ!
ಸಮಾಜದಲ್ಲಿ ತಾನೊಬ್ಬ ಮಹಾ ಉದ್ಯಮಿ, ದಾನಶೂರ, ಸಮಾಜ ಸೇವಕ ಎಂಬ ಬಣ್ಣದ ಮುಖವಾಡ ಧರಿಸಿ ಓಡಾಡುತ್ತಿದ್ದವನೇ ಈ ಶಿವಾನಂದ ನೀಲಣ್ಣನವರ್ (Shivanand Neelannavar). ಇತ್ತೀಚೆಗೆ ಕಡೂರಿನಲ್ಲಿ ನಡೆದ ಕಾರ್ಯಕ್ರಮವೊಂದರಲ್ಲಿ ಈತ ಆಡಿದ್ದ ಉದ್ಧಟತನದ ಮಾತುಗಳು ಇಡೀ ರಾಜ್ಯದಾದ್ಯಂತ ಭಾರಿ ಚರ್ಚೆಗೆ ಗ್ರಾಸವಾಗಿದ್ದವು. ವೇದಿಕೆಯ ಮೇಲೆ ನಿಂತು ಈತ ಅರಚಿದ್ದ ಏನೆಂದರೆ:
“ರಾಮಾಯಣದಲ್ಲಿ ಶ್ರೀರಾಮ, ಮಹಾಭಾರತದಲ್ಲಿ ಶ್ರೀಕೃಷ್ಣ, ಈ ಕಲಿಯುಗದಲ್ಲಿ ಶಿವಾನಂದ ನೀಲಣ್ಣನವರ್! ನಾನು ಕಲಿಯುಗದ ಅವತಾರ ಪುರುಷ. ನಾನು ಸುಮ್ಮನೆ ಬಂದು ಮಾತನಾಡುತ್ತಿಲ್ಲ, ಒಂದು ಬೃಹತ್ ಸಾಮ್ರಾಜ್ಯವನ್ನೇ ಕಟ್ಟಿದ್ದೇನೆ. 2028ರ ವಿಧಾನಸಭಾ ಚುನಾವಣೆಯಲ್ಲಿ ರಾಜ್ಯದ ಎಲ್ಲಾ 224 ಕ್ಷೇತ್ರಗಳನ್ನು ಒಂದೇ ಬಾರಿಗೆ ಗೆದ್ದು, ಚಿಟಗೆ ಹೊಡೆಯುವುದರೊಳಗೆ ನಾನೇ ಕರ್ನಾಟಕದ ಮುಖ್ಯಮಂತ್ರಿ ಆಗುತ್ತೇನೆ. ಇಡೀ ವಿಶ್ವವೇ ನನ್ನತ್ತ ತಿರುಗಿ ನೋಡುವಂತೆ ಮಾಡುತ್ತೇನೆ!”
ಈತನ ಇಂತಹ ಸೈಕೋ ಶೈಲಿಯ ಅಹಂಕಾರದ ಮಾತುಗಳು ಮತ್ತು ಅತಿರೇಕದ ವರ್ತನೆಗಳನ್ನು ನೋಡಿ ಕಲ್ಪನಾ ಲೋಕದಲ್ಲಿದ್ದ ಕೆಲವು ಯುವಕರು “ವಾಹ್, ಇದ್ದರೆ ಇಂತಹ ನಾಯಕನಿರಬೇಕು” ಎಂದು ಭ್ರಮಿಸಿದ್ದರು. ಆದರೆ, ಈ ಭಾಷಣದ ಆಕ್ರೋಶದ ಹಿಂದಿದ್ದದ್ದು ಸಮಾಜಸೇವೆಯಲ್ಲ, ಬದಲಿಗೆ 45,000ಕ್ಕೂ ಹೆಚ್ಚು ಮುಗ್ಧ ಹೂಡಿಕೆದಾರರನ್ನು ನಡುನೀರಿನಲ್ಲಿ ಮುಳುಗಿಸುವ ಮಹಾ ವಂಚನೆಯ ಮಾಸ್ಟರ್ ಪ್ಲಾನ್ ಎಂಬುದು ಯಾರಿಗೂ ತಿಳಿದಿರಲಿಲ್ಲ.
ಇದನ್ನೂ ಓದಿ: D.K. Shivakumar: ಡಿಕೆಶಿ ಕನಸು ಭಗ್ನ! ಟ್ರಬಲ್ ಶೂಟರ್ ಸಿಎಂ ಆಗೋದೇ ಡೌಟ್?
ಶಿವಂ ಅಸೋಸಿಯೇಟ್ಸ್ ಎಂಬ ಮಾಯಾಲೋಕ: 36% ಬಡ್ಡಿಯ ಬ್ರಹ್ಮಾಂಡ ಆಮಿಷ!
ದೇಶದ ಪ್ರಮುಖ ರಾಷ್ಟ್ರೀಕೃತ ಬ್ಯಾಂಕುಗಳು ಮತ್ತು ಆರ್ ಬಿಐ ಮಾನ್ಯತೆ ಪಡೆದ ಹಣಕಾಸು ಸಂಸ್ಥೆಗಳು ವರ್ಷಕ್ಕೆ ಕೇವಲ ಶೇಕಡಾ 7 ರಿಂದ 8 ರಷ್ಟು ಬಡ್ಡಿ ನೀಡಲು ಹರಸಾಹಸ ಪಡುತ್ತಿದ್ದರೆ, ನಮ್ಮ ‘ಭವಿಷ್ಯದ ಮುಖ್ಯಮಂತ್ರಿ’ ಶಿವಾನಂದ ನೀಲಣ್ಣನವರ್ ತನ್ನ ‘ಶಿವಂ ಅಸೋಸಿಯೇಟ್ಸ್’ ಮೂಲಕ ಜನರಿಗೆ ವಾರ್ಷಿಕ ಬರೋಬ್ಬರಿ ಶೇಕಡಾ 36 ರಷ್ಟು (ತಿಂಗಳಿಗೆ 3%) ಬಡ್ಡಿ ನೀಡುವುದಾಗಿ ಆಮಿಷ ಒಡ್ಡಿದ್ದ! ಹಣ ದುಪ್ಪಟ್ಟಾಗುತ್ತದೆ, ಶ್ರಮವಿಲ್ಲದೆ ಶ್ರೀಮಂತರಾಗಬಹುದು ಎಂಬ ಆಸೆಗೆ ಬಿದ್ದ ಮಧ್ಯಮ ವರ್ಗದ ಮುಗ್ಧ ಜನರು, ಕಷ್ಟಪಟ್ಟು ದುಡಿದ ಹಣವನ್ನು ತಂದು ಈತನ ಕಾಲಬುಡಕ್ಕೆ ಸುರಿದಿದ್ದರು.
ಇಲ್ಲಿ ಅತ್ಯಂತ ದುರಂತದ ಸಂಗತಿಯೆಂದರೆ, ದೇಶ ಕಾಯುವ ಗಡಿಯಲ್ಲಿ ನಿಂತು ತಮ್ಮ ಜೀವವನ್ನೇ ಪಣಕ್ಕಿಟ್ಟು ದುಡಿದ ನಿವೃತ್ತ ಸೈನಿಕರು ತಮಗೆ ಬಂದ ಪಿಂಚಣಿ, ಗ್ರಾಚ್ಯುಟಿ ಮತ್ತು ಕರಗುವ ಉಳಿತಾಯದ ಕೋಟ್ಯಂತರ ರೂಪಾಯಿಗಳನ್ನು ಈ ಸೋಗಲಾಡಿಯ ನಂಬಿ ಹೂಡಿಕೆ ಮಾಡಿದ್ದರು. ಇದು ಯಾವುದೇ ಅಧಿಕೃತ ಬ್ಯಾಂಕಿಂಗ್ ವ್ಯವಸ್ಥೆಯಲ್ಲ, ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ (RBI) ನಿಯಮಾವಳಿಗಳ ಗಾಳಿ ತೂರಿದ ಅಕ್ರಮ ‘ಚೈನ್ ಲಿಂಕ್’ ಮಾದರಿಯ ದಂದೆಯಾಗಿತ್ತು. ಒಬ್ಬರ ಹಣವನ್ನು ಪಡೆದು ಮತ್ತೊಬ್ಬರಿಗೆ ಬಡ್ಡಿ ರೂಪದಲ್ಲಿ ಕೊಡುವುದು, ಆ ಮೂಲಕ ನಂಬಿಕೆ ಹುಟ್ಟಿಸಿ ಇಡೀ ಊರನ್ನೇ ಲೂಟಿ ಮಾಡುವ ಸಾಂಪ್ರದಾಯಿಕ ‘ಪೋಂಜಿ ಸ್ಕೀಮ್’ ಇದಾಗಿತ್ತು. ಈ ಮಾಯಾಲೋಕದ ಬಲೆಯಲ್ಲಿ ಬಿದ್ದ ಹೂಡಿಕೆದಾರರ ಸಂಖ್ಯೆ ಬರೋಬ್ಬರಿ 45,000ದಾಟಿದೆ ಎಂದರೆ ಈ ಹಗರಣದ ವ್ಯಾಪ್ತಿ ಮತ್ತು ಆಳ ಎಷ್ಟು ಭೀಕರವಾಗಿದೆ ಎಂಬುದನ್ನು ನಾವು ಅರ್ಥ ಮಾಡಿಕೊಳ್ಳಬಹುದು. ಒಟ್ಟು ವಂಚನೆಯ ಅಂದಾಜು ಮೊತ್ತ ಬರೋಬ್ಬರಿ 4,500 ಕೋಟಿ ರೂಪಾಯಿಗಳು!
ಸ್ವಚ್ಛ ಬೆಳಗಾವಿ ಹೆಸರಿನಲ್ಲಿ ಶಕ್ತಿ ಪ್ರದರ್ಶನದ ಬೃಹತ್ ನಾಟಕ!
ತನ್ನ ವಿರುದ್ಧ ಯಾರೂ ಧ್ವನಿ ಎತ್ತಬಾರದು, ಕಾನೂನಿನ ಮತ್ತು ಸರ್ಕಾರದ ಕಣ್ಣಿಗೆ ತಾನೊಬ್ಬ ಮಹಾ ಸತ್ಪ್ರಜೆ ಎಂದು ಬಿಂಬಿಸಿಕೊಳ್ಳಲು ಶಿವಾನಂದ ನೀಲಣ್ಣನವರ್ ಮತ್ತೊಂದು ಬೃಹತ್ ಕುತಂತ್ರದ ಸ್ಕೆಚ್ ಹಾಕಿದ್ದ. ಮೇ 17 ರಂದು ಬೆಳಗಾವಿಯಲ್ಲಿ “ಸ್ವಚ್ಛ ಬೆಳಗಾವಿ” ಎಂಬ ಬ್ಯಾನರ್ ಅಡಿಯಲ್ಲಿ ಭಾರಿ ಸಾರ್ವಜನಿಕ ಕಾರ್ಯಕ್ರಮವೊಂದನ್ನು ಆಯೋಜಿಸಿದ್ದ. ಸುಮಾರು 20,000 ಕ್ಕೂ ಹೆಚ್ಚು ಜನರನ್ನು ಸೇರಿಸಿ, ಬೆಳಗಾವಿಯನ್ನು ಸ್ವಚ್ಛ ಮಾಡುವ ಸೋಗಿನಲ್ಲಿ ತನ್ನ ರಾಜಕೀಯ ಮತ್ತು ಸಾಮಾಜಿಕ ಶಕ್ತಿ ಪ್ರದರ್ಶನ ಮಾಡಲು ಈತ ಅಖಾಡ ಸಿದ್ಧಪಡಿಸಿದ್ದ.
ಈ ಮೆಗಾ ಡ್ರಾಮಾದ ಮೂಲಕ ಸಾರ್ವಜನಿಕರಲ್ಲಿ ಮತ್ತಷ್ಟು ವಿಶ್ವಾಸ ಮೂಡಿಸಿ, ಇನ್ನೂ ನೂರಾರು ಕೋಟಿ ರೂಪಾಯಿಗಳನ್ನು ಹೊಸ ಹೂಡಿಕೆದಾರರಿಂದ ವಸೂಲಿ ಮಾಡುವುದು ಈತನ ಅಂತರಾಷ್ಟ್ರೀಯ ಮಟ್ಟದ ಕುತಂತ್ರವಾಗಿತ್ತು. ತನ್ನ ಅಕ್ರಮಗಳನ್ನು ಸಮಾಜ ಸೇವೆಯ ಬಣ್ಣದ ಹೊದಿಕೆಯಿಂದ ಮುಚ್ಚಿಡಲು ಹೊರಟಿದ್ದ. ಆದರೆ, ಈ ಬೂಟಾಟಿಕೆಯ ನಾಟಕ ಆರಂಭವಾಗುವ ಕೇವಲ ಮೂರು ದಿನಗಳ ಮುನ್ನವೇ ಜಿಲ್ಲಾಡಳಿತದ ಸಕಾಲಿಕ ಹಸ್ತಕ್ಷೇಪ ಈತನ ಹಗಲುಗನಸನ್ನು ಧೂಳೀಪಟ ಮಾಡಿದೆ.
ಇದನ್ನೂ ಓದಿ: Vinay Vs Joshi: ‘ಸೇಡಿನ’ ರಾಜಕಾರಣದ ಅನಾವರಣ; ಕುಲಕರ್ಣಿ ಮುಗಿಸಲು ನಡೆದ ‘ಸಿಸ್ಟಮ್ಯಾಟಿಕ್’ ಗೇಮ್ ಪ್ಲಾನ್?
ಜಿಲ್ಲಾಡಳಿತದ ‘ಸರ್ಜಿಕಲ್ ಸ್ಟ್ರೈಕ್’: ಧೂಳೀಪಟವಾದ ಅಕ್ರಮ ಸಾಮ್ರಾಜ್ಯ!
ಶಿವಾನಂದ ನೀಲಣ್ಣನವರ್ನ ಅತಿಯಾದ ಉದ್ಧಟತನದ ಭಾಷಣಗಳು ಮತ್ತು ಬೆಳಗಾವಿಯಲ್ಲಿ ಹರಿಯುತ್ತಿದ್ದ ನೂರಾರು ಕೋಟಿ ರೂಪಾಯಿ ಅಕ್ರಮ ಹಣದ ವಾಸನೆ ಕೊನೆಗೂ ಬೆಳಗಾವಿ ಜಿಲ್ಲಾಡಳಿತದ ಮೂಗಿಗೆ ಬಡಿಯಿತು. ತಕ್ಷಣವೇ ತಡಮಾಡದೆ ಕಾರ್ಯಪ್ರವೃತ್ತರಾದ ಬೆಳಗಾವಿ ಜಿಲ್ಲಾಧಿಕಾರಿ (DC) ಮೊಹಮ್ಮದ್ ರೋಷನ್ ಅವರು ಖಡಕ್ ಆದೇಶ ಹೊರಡಿಸಿದರು. ಡಿಸಿ ಅವರ ಸ್ಪಷ್ಟ ಸೂಚನೆಯ ಮೇರೆಗೆ ಉಪವಿಭಾಗಾಧಿಕಾರಿ (AC) ಶ್ರವಣ್ ಕುಮಾರ್ ನಾಯಕ್ ನೇತೃತ್ವದ ಜಂಟಿ ಅಧಿಕಾರಿಗಳ ಮತ್ತು ಸಹಕಾರ ಇಲಾಖೆಯ ಬೃಹತ್ ತಂಡ ಬೆಳಗಾವಿಯ ಶಿವಬಸವ ನಗರದಲ್ಲಿರುವ ‘ಶಿವಂ ಅಸೋಸಿಯೇಟ್ಸ್’ ಪ್ರಧಾನ ಕಚೇರಿಯ ಮೇಲೆ ಹಠಾತ್ ದಾಳಿ ನಡೆಸಿತು.
ಕೇವಲ ಕಚೇರಿ ಮಾತ್ರವಲ್ಲದೆ, ಶಿವಾನಂದನ ಐಷಾರಾಮಿ ನಿವಾಸ, ಆತನಿಗೆ ಸೇರಿದ ಅಪಾರ್ಟ್ಮೆಂಟ್ ಸೇರಿದಂತೆ ಹಲವೆಡೆ ಸತತ 24 ಗಂಟೆಗಳಿಗೂ ಹೆಚ್ಚು ಕಾಲ ಅಧಿಕಾರಿಗಳು ಇಂಚಿಂಚೂ ಜಾಲಾಡಿದ್ದಾರೆ. ಬೆಳಗಾವಿಯ ಇತಿಹಾಸದಲ್ಲೇ ಇದು ಅತ್ಯಂತ ದೊಡ್ಡ ಆರ್ಥಿಕ ದಾಳಿ ಎನ್ನಲಾಗಿದೆ. ರೇಡ್ ತೀವ್ರತೆ ಎಷ್ಟಿತ್ತೆಂದರೆ ಹೂಡಿಕೆದಾರರು ಮುಗಿಬೀಳುವ ಸಾಧ್ಯತೆ ಇದ್ದಿದ್ದರಿಂದ ಇಡೀ ಪ್ರದೇಶದಲ್ಲಿ ಬಿಗುವಿನ ಪೊಲೀಸ್ ಬಂದೋಬಸ್ತ್ ನಿಯೋಜಿಸಲಾಗಿತ್ತು.
ಡಿಸಿ ಟೇಬಲ್ ಮೇಲಿದೆ ಕಪ್ಪು ಹಣದ ಜಾತಕ: ಬಯಲಾಯ್ತು ರಹಸ್ಯಗಳು!
ಈ ಸುದೀರ್ಘ ಕಾರ್ಯಾಚರಣೆಯ ವೇಳೆ ಅಧಿಕಾರಿಗಳಿಗೆ ಸಿಕ್ಕ ರಹಸ್ಯ ದಾಖಲೆಗಳನ್ನು ನೋಡಿ ಸ್ವತಃ ತನಿಖಾ ತಂಡವೇ ಬೆಚ್ಚಿಬಿದ್ದಿದೆ. ಹೂಡಿಕೆದಾರರ ಒಟ್ಟು ಲೆಕ್ಕದ ಪುಸ್ತಕಗಳು, ನೂರಾರು ಬ್ಯಾಂಕ್ ಪಾಸ್ಬುಕ್ಗಳು ಹಾಗೂ ಕಪ್ಪು ಹಣದ ವ್ಯವಹಾರಗಳ ಸಂಪೂರ್ಣ ಕಚ್ಚಾ ಮಾಹಿತಿ ಒಳಗೊಂಡ ಕಂಪ್ಯೂಟರ್ ಹಾರ್ಡ್ ಡಿಸ್ಕ್ಗಳನ್ನು ಜಪ್ತಿ ಮಾಡಲಾಗಿದೆ.
ಈಗ ತನಿಖಾ ಸಂಸ್ಥೆಗಳ ಮುಂದಿರುವ ಅತಿ ದೊಡ್ಡ ಪ್ರಶ್ನೆಗಳೆಂದರೆ:
- ಮುಗ್ಧ ಜನರಿಂದ ಲೂಟಿ ಮಾಡಿದ ಈ 4,500 ಕೋಟಿ ರೂಪಾಯಿ ಹಣ ಸದ್ಯ ಎಲ್ಲಿದೆ?
- ಶಿವಾನಂದ ಈ ಹಣವನ್ನು ಬೇನಾಮಿ ಹೆಸರಿನಲ್ಲಿ ಬೆಂಗಳೂರು, ಗೋವಾ ಅಥವಾ ಇತರ ಕಡೆಗಳಲ್ಲಿ ರಿಯಲ್ ಎಸ್ಟೇಟ್ ದಂದೆಯಲ್ಲಿ ಹೂಡಿಕೆ ಮಾಡಿದ್ದಾನೆಯೇ?
- ಅಥವಾ ಹವಾಲಾ ಮಾರ್ಗದ ಮೂಲಕ ವಿದೇಶಿ ಬ್ಯಾಂಕುಗಳ ರಹಸ್ಯ ಖಾತೆಗಳಿಗೆ ವರ್ಗಾಯಿಸಲಾಗಿದೆಯೇ?
ಈ ಎಲ್ಲಾ ಆಯಾಮಗಳಲ್ಲಿ ಇಲಾಖೆಯ ಹಿರಿಯ ಅಧಿಕಾರಿಗಳು ತನಿಖೆಯನ್ನು ಚುರುಕುಗೊಳಿಸಿದ್ದು, ಜಿಲ್ಲಾಧಿಕಾರಿಗಳ ಟೇಬಲ್ ಮೇಲೆ ದಿನನಿತ್ಯದ ವರದಿಗಳು ಸಲ್ಲಿಕೆಯಾಗುತ್ತಿವೆ.
ಇದನ್ನೂ ಓದಿ: Revanasiddeshwara: ಕುರುಬರ ಕುಲಗುರು ರೇವಣಸಿದ್ದರನ್ನೇ ಕದ್ದರೇ ವೀರಶೈವರು? ಸಾಂಸ್ಕೃತಿಕ ಹೈಜಾಕ್ನ ಅಸಲಿ ಆಟ ಇಲ್ಲಿದೆ!
15,000 ಬಂದೂಕುಗಳ ಕಥೆಯೇನು? ಪೊಲೀಸರ ನಿದ್ದೆಗೆಡಿಸಿದ ಸತ್ಯ!
“ನನ್ನ ಬಳಿ 15,000 ಬಂದೂಕುಗಳಿವೆ, ನಾವು ಯುದ್ಧಕ್ಕೆ ಸಿದ್ಧನಾಗಿ ಬಂದಿದ್ದೇವೆ” ಎಂದು ವೇದಿಕೆಯಲ್ಲಿ ಅರಚಾಡಿದ್ದ ಶಿವಾನಂದನ ಮಾತುಗಳನ್ನು ಗೃಹ ಇಲಾಖೆ ಮತ್ತು ಪೊಲೀಸರು ಅತ್ಯಂತ ಗಂಭೀರವಾಗಿ ಪರಿಗಣಿಸಿದ್ದಾರೆ. ಒಬ್ಬ ವ್ಯಕ್ತಿ ಸಾರ್ವಜನಿಕವಾಗಿ ಇಷ್ಟೊಂದು ದೊಡ್ಡ ಪ್ರಮಾಣದ ಶಸ್ತ್ರಾಸ್ತ್ರಗಳನ್ನು ಹೊಂದಿದ್ದೇನೆ ಎಂದು ಹೇಳಿಕೊಳ್ಳುವುದು ಕೇವಲ ರಾಜಕೀಯ ಭಾಷಣವಾಗಲು ಸಾಧ್ಯವಿಲ್ಲ.
ಒಂದು ವೇಳೆ ಈತನ ಬಳಿ ಅಷ್ಟೊಂದು ಬಂದೂಕುಗಳಿದ್ದರೆ, ಅವುಗಳನ್ನು ಕಾನೂನುಬಾಹಿರವಾಗಿ ಯಾವ ಮೂಲದಿಂದ ತರಲಾಯಿತು? ಯಾರಾದರೂ ದೇಶದ್ರೋಹಿ ಶಕ್ತಿಗಳು ಅಥವಾ ಭೂಗತ ಜಗತ್ತಿನ ಲಿಂಕ್ ಈತನಿಗೆ ಇದೆಯೇ? ದೇಶದ ಭದ್ರತೆಗೆ ಧಕ್ಕೆ ತರುವಂತಹ ಯಾವುದೇ ವಿಧ್ವಂಸಕ ಚಟುವಟಿಕೆಗೆ ಈತ ಅಡಿಪಾಯ ಹಾಕುತ್ತಿದ್ದನೇ? ಅಥವಾ ಬರೀ ಸಿನಿಮಾ ಡೈಲಾಗ್ ಹೊಡೆದು ಹೂಡಿಕೆದಾರರನ್ನು ಹೆದರಿಸಲು ಈ ರೀತಿ ಬಡಬಾಯಿಕೊಂಡಿದ್ದನೇ? ಎಂಬುದರ ಬೆನ್ನತ್ತಿ ಸದ್ಯ ಪೊಲೀಸ್ ಇಲಾಖೆ ತೀವ್ರ ವಿಚಾರಣೆ ನಡೆಸುತ್ತಿದೆ. ವೇದಿಕೆಯಲ್ಲಿ ಸಿಂಹದಂತೆ ಗರ್ಜಿಸುತ್ತಿದ್ದವನಿಗೆ ಈಗ ಲಾಕಪ್ನ ಕತ್ತಲಲ್ಲಿ ಕಾನೂನಿನ ಅಸಲಿ ಬಿಸಿ ಮುಟ್ಟಿದೆ.
ಹೂಡಿಕೆದಾರರ ಕಣ್ಣೀರು, ತಲೆಮೇಲೆ ಕೈ ಹೊತ್ತ ಜನ!
ಶಿವಾನಂದ ನೀಲಣ್ಣನವರ್ ಎಂಬ ಮಹಾ ವಂಚಕ ಇಂದು ಜೈಲು ಪಾಲಾಗಿರಬಹುದು, ಆದರೆ ಆತನನ್ನು ಕುರುಡಾಗಿ ನಂಬಿ ತಮ್ಮ ಜೀವಮಾನದ ಇಡೀ ಗಳಿಕೆಯನ್ನು ಕಳೆದುಕೊಂಡ ಸಾವಿರಾರು ಮುಗ್ಧ ಕುಟುಂಬಗಳ ಪರಿಸ್ಥಿತಿ ಈಗ ಶೋಚನೀಯವಾಗಿದೆ.
ಹೆಚ್ಚು ಬಡ್ಡಿ ಸಿಗುತ್ತದೆ, ನಾವೂ ಅಲ್ಪಾವಧಿಯಲ್ಲಿ ಶ್ರೀಮಂತರಾಗಬಹುದು ಎಂದು ನಂಬಿದ್ದ ಬಡ ರೈತರು, ಹೆಣ್ಣು ಮಕ್ಕಳ ಮದುವೆಗೆ ಹಣ ಇಟ್ಟಿದ್ದ ತಾಯಂದಿರು, ನಿವೃತ್ತ ಸೈನಿಕರು ಇಂದು ಬೀದಿಗೆ ಬೀಳುವಂತಾಗಿದೆ. “ನಮ್ಮ ದುಡ್ಡು ನಮಗೆ ವಾಪಸ್ ಸಿಗುತ್ತಾ? ಅಥವಾ ಈ ಆರ್ಥಿಕ ನರಭಕ್ಷಕ ಎಲ್ಲವನ್ನೂ ಗುಳುಂ ಮಾಡಿದನೇ?” ಎಂಬ ಭೀತಿ ಮತ್ತು ಆತಂಕ ಹೂಡಿಕೆದಾರರನ್ನು ಕಾಡುತ್ತಿದೆ. ಕಣ್ಣೀರಿನಲ್ಲಿ ಮುಳುಗಿರುವ ಈ ಬಡ ಜನರ ಶಾಪ ಮತ್ತು ಆಕ್ರೋಶ ಶಿವಾನಂದನ ಅಕ್ರಮ ಸಾಮ್ರಾಜ್ಯವನ್ನು ಸರ್ವನಾಶ ಮಾಡುವುದರಲ್ಲಿ ಯಾವುದೇ ಸಂಶಯವಿಲ್ಲ.
ದುರಾಸೆಯ ದಾರಿಗೆ ಇದುವೇ ಕಠಿಣ ಪಾಠ!
ಸಮಾಜದಲ್ಲಿ ರಾತ್ರೋರಾತ್ರಿ ಶ್ರಮವಿಲ್ಲದೆ ಶ್ರೀಮಂತರಾಗಬೇಕು, ಬ್ಯಾಂಕಿಂಗ್ ನಿಯಮಗಳನ್ನು ಗಾಳಿಗೆ ತೂರಿ ಶೇಕಡಾ 36 ರಷ್ಟು ಬಡ್ಡಿ ಗಳಿಸಬೇಕು ಎಂಬ ಸಾರ್ವಜನಿಕರ ಅತಿಯಾದ ಆಸೆ ಮತ್ತು ದುರಾಸೆಯೇ ಇಂತಹ ವಂಚಕರಿಗೆ ಬಂಡವಾಳವಾಗುತ್ತದೆ. ಶಿವಾನಂದ ನೀಲಣ್ಣನವರ್ನಂತಹ ‘ಅವತಾರ ಪುರುಷರು’ ಸಮಾಜದಲ್ಲಿ ಸದಾ ಕಾಲ ಸೋಗಲಾಡಿ ತತ್ವಗಳನ್ನು ಬೋಧಿಸುತ್ತಾ, ತಾವೊಬ್ಬ ದೇವದೂತರೆಂಬಂತೆ ಮುಖವಾಡ ಧರಿಸಿ ತಿರುಗುತ್ತಿರುತ್ತಾರೆ.
ಇವರ ಬಣ್ಣ ಬಣ್ಣದ ಮಾತುಗಳಿಗೆ, ಸಿನಿಮಾ ಶೈಲಿಯ ಡೈಲಾಗ್ಗಳಿಗೆ ಮರುಳಾದರೆ ಕೊನೆಗೆ ಸಿಗುವುದು ಕಣ್ಣೀರು ಮತ್ತು ಶೂನ್ಯ ಮಾತ್ರ. ಚಿಟಗೆ ಹೊಡೆಯುವುದರೊಳಗೆ ಸಿಎಂ ಆಗ್ತೀನಿ ಎಂದು ಬೀಗುತ್ತಿದ್ದ ಅಹಂಕಾರಿ ಇಂದು ಜೈಲಿನ ಕತ್ತಲ ಕೋಣೆಯಲ್ಲಿ ತನ್ನ ಕರ್ಮಕಾಂಡದ ಫಲವನ್ನು ಉಣ್ಣುತ್ತಿದ್ದಾನೆ. ಕಾನೂನು ಈತನಿಗೆ ಕಠಿಣಾತಿಕಠಿಣ ಶಿಕ್ಷೆ ವಿಧಿಸಲಿ ಮತ್ತು ನೊಂದ ಮುಗ್ಧ ಹೂಡಿಕೆದಾರರ ಪ್ರತಿಯೊಂದು ಪೈಸೆ ಹಣವೂ ಮರಳಿ ಸಿಗುವಂತಾಗಲಿ ಎಂಬುದೇ ‘ಅಸಲಿ ಸುದ್ದಿ’ಯ ಕಳಕಳಿಯಾಗಿದೆ.
