ಬಾಗಲಕೋಟೆ (Bagalkot): ರಾಜಕೀಯದಲ್ಲಿ ‘ತನಗೊಂದು ನ್ಯಾಯ, ಪರರಿಗೊಂದು ನ್ಯಾಯ’ ಎನ್ನುವ ದ್ವಿಮುಖ ನೀತಿ ಬಹಳ ದಿನ ನಡೆಯುವುದಿಲ್ಲ. ತಾನು ಮಾಡಿದರೆ ‘ರಾಸಲೀಲೆ’ (ದೈವಿಕ ನೃತ್ಯ), ಇತರರು ಮಾಡಿದರೆ ‘ಅಪಚಾರ’ ಎನ್ನುವಂತೆ ವರ್ತಿಸುವ ನಾಯಕರಿಗೆ ಕಾಲವೇ ತಕ್ಕ ಪಾಠ ಕಲಿಸುತ್ತದೆ ಎಂಬುದಕ್ಕೆ ಬಾಗಲಕೋಟೆ ಜಿಲ್ಲಾ ಕಾಂಗ್ರೆಸ್ನಲ್ಲಿ ಇತ್ತೀಚೆಗೆ ನಡೆಯುತ್ತಿರುವ ಬೆಳವಣಿಗೆಗಳೇ ಸಾಕ್ಷಿ. ಬಾಗಲಕೋಟೆ ಜಿಲ್ಲಾ ಕಾಂಗ್ರೆಸ್ ಅಧ್ಯಕ್ಷ ಎಸ್.ಜಿ. ನಂಜಯ್ಯನಮಠ ಅವರ ಒಂದಾದ ಮೇಲೊಂದರಂತೆ ನಡೆಯುತ್ತಿರುವ ಸಾಲು ಸಾಲು ಯಡವಟ್ಟುಗಳು, ಅವರ ಅವಕಾಶವಾದಿ ಧೋರಣೆ ಹಾಗೂ ಮುಖವಾಡದ ಸಿದ್ಧಾಂತ ಈಗ ಪಕ್ಷ ಮತ್ತು ನಿಷ್ಠಾವಂತ ಕಾರ್ಯಕರ್ತರು ಸಾರ್ವಜನಿಕವಾಗಿ ತಲೆ ತಗ್ಗಿಸುವಂತೆ ಮಾಡಿದೆ.
ಹದ್ಲಿ ಪ್ರಕರಣದಲ್ಲಿ ‘ಸಿದ್ಧಾಂತ’ದ ಶೋಕಿ ಪ್ರದರ್ಶಿಸಿದ್ದ ನಂಜಯ್ಯನಮಠ!
ಕೆಲ ದಿನಗಳ ಹಿಂದೆಯಷ್ಟೇ ಬಾಗಲಕೋಟೆ (Bagalkot) ಜಿಲ್ಲಾ ಕಾಂಗ್ರೆಸ್ ಪ್ರಚಾರ ಸಮಿತಿ ಅಧ್ಯಕ್ಷ ನಾಗರಾಜ್ ಹದ್ಲಿ ಅವರು ಬೆಳಗಾವಿಯಲ್ಲಿ ತಮ್ಮ ಹಳೆಯ ಸ್ನೇಹಿತರಾಗಿದ್ದ ಆರೆಸ್ಸೆಸ್ (RSS) ಮುಖಂಡರನ್ನು ಸೌಹಾರ್ದಯುತವಾಗಿ ಭೇಟಿಯಾಗಿದ್ದರು. ಆ ಭೇಟಿಯ ಫೋಟೋ ವೈರಲ್ ಆಗುತ್ತಿದ್ದಂತೆಯೇ, ನಂಜಯ್ಯನಮಠ ಅವರಲ್ಲಿದ್ದ ‘ಸಿದ್ಧಾಂತದ ಪ್ರೇಮ’ ದಿಢೀರನೇ ಜಾಗೃತವಾಗಿತ್ತು! ಹದ್ಲಿ ವಿರುದ್ಧ ಬಹಿರಂಗವಾಗಿಯೇ ಸಮರ ಸಾರಿದ್ದ ನಂಜಯ್ಯನಮಠ, ಅವರನ್ನು ಪಕ್ಷದಿಂದ ಉಚ್ಛಾಟನೆ ಮಾಡುವ ಮಟ್ಟಕ್ಕೂ ಆಲೋಚಿಸಿದ್ದರು.
ಮಾಧ್ಯಮಗಳ ಮುಂದೆ ನಿಂತು, “ಆರೆಸ್ಸೆಸ್ ಮತ್ತು ಬಿಜೆಪಿ ನಮ್ಮ ಕಾಂಗ್ರೆಸ್ಗೆ ಕಟು ವಿರೋಧಿ ಸಿದ್ಧಾಂತದವು. ಅಂತಹ ಸಂಘಟನೆಯ ನಾಯಕರನ್ನು ಭೇಟಿಯಾಗಿದ್ದು ಅಕ್ಷಮ್ಯ ಅಪರಾಧ. ಇದಕ್ಕೆ ಫೋಟೋ ಸಾಕ್ಷಿಯಿದೆ. ಈ ಬಗ್ಗೆ ಸ್ಪಷ್ಟನೆ ಕೇಳಿ ನೋಟಿಸ್ ನೀಡಿದ್ದೇವೆ, ಹೈಕಮಾಂಡ್ಗೆ ವರದಿ ಸಲ್ಲಿಸುತ್ತೇವೆ” ಎಂದು ಗಂಭೀರ ಧಾಟಿಯಲ್ಲಿ ರೋಷಾವೇಶ ವ್ಯಕ್ತಪಡಿಸಿದ್ದರು. ಆದರೆ, ಬೆನ್ನಲ್ಲೇ ಇದ್ದಕ್ಕಿದ್ದಂತೆ ತಮ್ಮ ಮಾತಿನಿಂದ ಉಲ್ಟಾ ಹೊಡೆದಿದ್ದ ಅಧ್ಯಕ್ಷರು, “ನಾನು ನೋಟಿಸ್ ಕೊಟ್ಟಿಲ್ಲ, ಬರಿ ಪತ್ರ ಬರೆದಿದ್ದೇನೆ. ಹದ್ಲಿ ನಿಷ್ಠಾವಂತ ಕಾರ್ಯಕರ್ತ, ವಿಷಯ ಇಲ್ಲಿಗೆ ಮುಗಿಯಿತು” ಎಂದು ಸೋಷಿಯಲ್ ಮೀಡಿಯಾದಲ್ಲಿ ಪೋಸ್ಟರ್ ಹಾಕಿ ಜಾರಿಕೊಳ್ಳುವ ಪೇಚಾಟ ನಡೆಸಿದ್ದರು.
ಸಿದ್ದರಾಮಯ್ಯ ಮತ್ತು ಗ್ಯಾರಂಟಿಗಳಿಗೆ ಕಪಾಳಮೋಕ್ಷ: ಅಧ್ಯಕ್ಷರ ಮಂದಹಾಸ!
ಅಂದು ಬಾಗಲಕೋಟೆ (Bagalkot) ಜಿಲ್ಲಾ ಕಾಂಗ್ರೆಸ್ ಪ್ರಚಾರ ಸಮಿತಿ ಅಧ್ಯಕ್ಷ ನಾಗರಾಜ್ ಹದ್ಲಿ ಅವರ ಸಹಜ ಭೇಟಿಗೆ ‘ಪಕ್ಷದ ಸಿದ್ಧಾಂತ’ ಮತ್ತು ‘ವಿರೋಧಿ ಧೋರಣೆ’ಯ ಪಾಠ ಮಾಡಿದ್ದ ನಂಜಯ್ಯನಮಠ ಅವರಿಗೆ, ಇಂದು ಸ್ವತಃ ತಾವೇ ಮಾಡಿರುವ ಅಕ್ಷಮ್ಯ ಆವಾಂತರಕ್ಕೆ ಯಾವ ಸಿದ್ಧಾಂತದ ಉತ್ತರವಿದೆ? ಬಿಜೆಪಿ ಎಂಎಲ್ಸಿ, ಹಿರಿಯ ರಾಜಕಾರಣಿ ಎಚ್. ವಿಶ್ವನಾಥ್ ಅವರು ಕಾಂಗ್ರೆಸ್ ಸರ್ಕಾರ ಮತ್ತು ಮಾಜಿ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರ ವಿರುದ್ಧ ಮಾಧ್ಯಮಗಳ ಮುಂದೆ ಅತ್ಯಂತ ಕಠೋರ ಭಾಷೆಯಲ್ಲಿ ವಾಗ್ದಾಳಿ ನಡೆಸುವಾಗ ನಂಜಯ್ಯನಮಠ ಮಾಡಿದ್ದೇನು?
ಎಚ್. ವಿಶ್ವನಾಥ್ ಅವರು ನಂಜಯ್ಯನಮಠ ಅವರ ಹೆಗಲ ಮೇಲೆ ಕೈಹಾಕಿಕೊಂಡು ನಿಂತು, “ಸಿದ್ದರಾಮಯ್ಯ ಅವರು ಗ್ಯಾರಂಟಿ ಯೋಜನೆಗಳ ಹೆಸರಿನಲ್ಲಿ ರಾಜ್ಯದ ಖಜಾನೆಯನ್ನು ಪೂರ್ತಿ ಖಾಲಿ ಮಾಡಿದ್ದಾರೆ. ಬರ ಪರಿಹಾರಕ್ಕೂ ಸರ್ಕಾರದ ಬಳಿ ಹಣವಿಲ್ಲ” ಎಂದು ಕಾಂಗ್ರೆಸ್ ಸರ್ಕಾರದ ಮಹತ್ವಾಕಾಂಕ್ಷಿ ಯೋಜನೆಗಳನ್ನು ತರಾಟೆಗೆ ತೆಗೆದುಕೊಳ್ಳುತ್ತಿದ್ದರು. ಸಿದ್ದರಾಮಯ್ಯ ಅವರ ನೇತೃತ್ವ ಹಾಗೂ ಸರ್ಕಾರದ ಆಡಳಿತ ವೈಖರಿಯನ್ನು ನಡುಬೀದಿಯಲ್ಲಿ ಹರಾಜು ಹಾಕಲಾಗುತ್ತಿತ್ತು. ಅಷ್ಟು ಮಾತ್ರವಲ್ಲ, ಪಕ್ಕದಲ್ಲೇ ಇದ್ದ ಜಿಲ್ಲಾ ಕಾಂಗ್ರೆಸ್ ಅಧ್ಯಕ್ಷ ನಂಜಯ್ಯನಮಠ ಅವರು ಇದಕ್ಕೆ ಯಾವುದೇ ಪ್ರತಿರೋಧ ಒಡ್ಡದೆ, ತುಟಿ ಪಿಟಕ್ ಎನ್ನದೆ, ನಸುನಗುತ್ತಾ ನಿಂತಿದ್ದರು!
ಪಕ್ಷದ ಸರ್ಕಾರದ ವಿರುದ್ಧ, ಸಿದ್ದರಾಮಯ್ಯ ಅವರ ವಿರುದ್ಧ ಅಷ್ಟೊಂದು ಗಂಭೀರ ಆರೋಪಗಳನ್ನು ಮಾಡುತ್ತಿದ್ದರೂ ಒಬ್ಬ ಜವಾಬ್ದಾರಿಯುತ ಜಿಲ್ಲಾ ಅಧ್ಯಕ್ಷರಾಗಿ ಪ್ರತಿಭಟಿಸುವುದು ಹಾಗಿರಲಿ, ಮೌನವಾಗಿ ಬೆಂಬಲಿಸುವಂತೆ ನಿಂತಿದ್ದು ಯಾವ ಸಿದ್ಧಾಂತ? ಹದ್ಲಿ ಫೋಟೋದಲ್ಲಿ ನಿಂತಾಗ ಉರಿದುಬಿದ್ದ ಅಧ್ಯಕ್ಷರ ಸಿದ್ಧಾಂತದ ಜ್ವಾಲೆ, ವಿಶ್ವನಾಥ್ ಅವರು ಗ್ಯಾರಂಟಿಗಳನ್ನು ಮೂದಲಿಸುವಾಗ ಎಲ್ಲಿಗೆ ಹೋಗಿತ್ತು?
ಅಧ್ಯಕ್ಷರ ದ್ವಿಮುಖ ನೀತಿ: ಸ್ವಯಂಕೃತ ಅಪರಾಧದ ನೈಜ ರೂಪ!
ಬಾಗಲಕೋಟೆ (Bagalkot) ಜಿಲ್ಲೆಯಲ್ಲಿ ಕಾಂಗ್ರೆಸ್ ಪಕ್ಷವನ್ನು ಸಂಘಟಿಸಿ ಬಲಪಡಿಸಬೇಕಾದ ಜಿಲ್ಲಾ ಅಧ್ಯಕ್ಷರೇ ಇಂದು ಪಕ್ಷದ ಅಸ್ತಿತ್ವಕ್ಕೆ ಮಾರಕವಾಗುತ್ತಿದ್ದಾರೆ ಎನ್ನುವ ಮಾತುಗಳು ಕೇಳಿಬರುತ್ತಿವೆ. ಬೃಹತ್ ಕೈಗಾರಿಕೆ ಹಾಗೂ ಮೂಲಸೌಕರ್ಯಗಳ ಅಭಿವೃದ್ಧಿ ನಿಗಮದ ಅಧ್ಯಕ್ಷರಂತಹ ಜವಾಬ್ದಾರಿಯುತ ಹುದ್ದೆಯಲ್ಲಿದ್ದುಕೊಂಡು, ಸ್ವತಃ ಸರ್ಕಾರ ಮತ್ತು ಮುಖ್ಯಮಂತ್ರಿಗಳ ಚಾರಿತ್ರ್ಯ ವಧೆಯಾಗುವಾಗ ಶರಣಾಗತಿಯಂತೆ ನಿಲ್ಲುವುದು ಎಂಥ ಅಧ್ಯಕ್ಷತೆ?
- ಬೇರೆಯವರು ತಮ್ಮ ಹಳೆಯ ಗೆಳೆಯರನ್ನು ಭೇಟಿಯಾದರೆ ಅದು “ಪಕ್ಷದ ಸಿದ್ಧಾಂತಕ್ಕೆ ಬಗೆದ ದ್ರೋಹ”.
- ತಾವೇ ವಿರೋಧ ಪಕ್ಷದ ನಾಯಕರ ಜೊತೆ ನಿಂತು ಸ್ವಪಕ್ಷದ ಗ್ಯಾರಂಟಿ ಯೋಜನೆಗಳಿಗೆ ಎಳ್ಳುನೀರು ಬಿಡಿಸಿದರೆ ಅದು “ಸೌಜನ್ಯದ ನಡವಳಿಕೆ”?
ನಂಜಯ್ಯನಮಠ ಅವರ ಈ ನಡವಳಿಕೆಯಿಂದಾಗಿ ಬಾಗಲಕೋಟೆ ಜಿಲ್ಲಾ ಕಾಂಗ್ರೆಸ್ ನಾಯಕರ ನಡುವೆ ಸೃಷ್ಟಿಯಾಗಿರುವ ಭಿನ್ನಮತೀಕರಣ ಬೀದಿಗೆ ಬಂದಿದೆ. ಕಾರ್ಯಕರ್ತರಿಗೆ ನೀತಿ ಬೋಧಿಸುವ ಅಧ್ಯಕ್ಷರು ತಮ್ಮ ಸ್ಥಾನಕ್ಕೆ ತಾವೇ ಕಪ್ಪುಚುಕ್ಕೆ ತಂದಿಟ್ಟುಕೊಂಡಿದ್ದಾರೆ. ನಂಜಯ್ಯನಮಠ ಅವರಿಗೆ ತಮ್ಮ ನಾಯಕರ ಮೇಲಿರುವ ಬದ್ಧತೆ ಮತ್ತು ಪಕ್ಷದ ಮೇಲಿರುವ ಪ್ರೀತಿ ಎಷ್ಟು ಡೋಂಗಿ ಎನ್ನುವುದು ಈ ವಿಡಿಯೋ ಸಾಕ್ಷಿಯ ಮೂಲಕ ಕನ್ನಡಿಯಂತೆ ಸ್ಪಷ್ಟವಾಗಿದೆ.
ಹೈಕಮಾಂಡ್ ಮತ್ತು ವರಿಷ್ಠರ ನಡೆ ಏನು?
ಕಾಂಗ್ರೆಸ್ ಪಕ್ಷದ ಪ್ರಮುಖ ಅಸ್ತ್ರವಾಗಿರುವ ಗ್ಯಾರಂಟಿ ಯೋಜನೆಗಳನ್ನೇ ಪ್ರಶ್ನಿಸಿ, ಸಿದ್ದರಾಮಯ್ಯ ಅವರ ನಾಯಕತ್ವವನ್ನೇ ನಿಂದಿಸುವಾಗ ನಸುನಗುತ್ತಾ ಸಾಕ್ಷಿಯಾಗಿ ನಿಂತ ಎಸ್.ಜಿ. ನಂಜಯ್ಯನಮಠ ಅವರ ಈ ನಡವಳಿಕೆ ಈಗ ಜಿಲ್ಲಾದ್ಯಂತ ಹಾಗೂ ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕ ಆಕ್ರೋಶಕ್ಕೆ ಈಡಾಗಿದೆ. “ಬೇರೆಯವರ ಸಣ್ಣ ತಪ್ಪಿಗೂ ತೂಗುಕತ್ತಿ ತೂಗಾಡಿಸಿ, ಉಚ್ಛಾಟನೆಯ ಬೆದರಿಕೆ ಹಾಕುವ ಅಧ್ಯಕ್ಷರು, ತಮಗೆ ಬಂದಾಗ ಯಾವ ಬಾಗಿಲಿನಿಂದ ಓಡಿಹೋಗುತ್ತಾರೆ?” ಎಂದು ನಿಷ್ಠಾವಂತ ಕಾರ್ಯಕರ್ತರು ಬಹಿರಂಗವಾಗಿಯೇ ಪ್ರಶ್ನೆ ಮಾಡುತ್ತಿದ್ದಾರೆ.
ಅಧ್ಯಕ್ಷರ ಈ ನಿರಂತರ ಯಡವಟ್ಟುಗಳಿಂದಾಗಿ ತಳಮಟ್ಟದ ಕಾರ್ಯಕರ್ತರು ದಿಕ್ಕು ತೋಚದಂತಾಗಿದ್ದಾರೆ. ಬೇರೆಯವರ ವಿರುದ್ಧ ಕ್ರಮ ಕೈಗೊಳ್ಳಲು ಆತುರ ಬಿದ್ದಿದ್ದ ಕೆಪಿಸಿಸಿ ಹಾಗೂ ಕಾಂಗ್ರೆಸ್ ವರಿಷ್ಠರು, ಸ್ವತಃ ಸರ್ಕಾರ ಮತ್ತು ಸಿದ್ದರಾಮಯ್ಯ ಅವರ ಇಮೇಜಿಗೆ ಧಕ್ಕೆ ತಂದ ಜಿಲ್ಲಾ ಅಧ್ಯಕ್ಷ ನಂಜಯ್ಯನಮಠ ಅವರ ವಿರುದ್ಧ ಸೂಕ್ತ ಶಿಸ್ತುಕ್ರಮ ಕೈಗೊಳ್ಳುತ್ತಾರೋ ಅಥವಾ ಈ ‘ಹಿತ್ತಲ ರಾಜಕೀಯ’ವನ್ನು ನೋಡಿಕೊಂಡು ಮೌನಕ್ಕೆ ಶರಣಾಗುತ್ತಾರೋ ಎಂಬುದನ್ನು ಕಾದು ನೋಡಬೇಕಿದೆ.
