Satish Jarkiholi: ರಾಜಕೀಯದಲ್ಲಿ ಯಾವುದೂ ಶಾಶ್ವತವೂ ಅಲ್ಲ, ಅಧಿಕಾರದ ಆಸೆಗೆ ಬಿದ್ದು ಹೆಣೆಯುವ ಸುಳ್ಳುಗಳ ಮುಖವಾಡವನ್ನು ಹೆಚ್ಚು ದಿನ ಮುಚ್ಚಿಡಲು ಸಾಧ್ಯವೂ ಇಲ್ಲ. ಕರ್ನಾಟಕ ರಾಜಕಾರಣದ ಸದ್ಯದ ಹೈವೋಲ್ಟೇಜ್ ವಿದ್ಯಮಾನವೊಂದಕ್ಕೆ ಈಗ ಕಾಲವೇ ಕ್ರೂರವಾದ ಉತ್ತರ ನೀಡಿದೆ. ಸಿದ್ದರಾಮಯ್ಯ (Siddaramaiah) ಅವರು ಮುಖ್ಯಮಂತ್ರಿ ಸ್ಥಾನಕ್ಕೆ ರಾಜೀನಾಮೆ ನೀಡಿದ ಕ್ಷಣದಿಂದಲೇ ರಾಜ್ಯ ರಾಜಕೀಯದಲ್ಲಿ ಒಂದು ರೀತಿಯ ರಾಜಕೀಯ ಮೌನ ಸುನಾಮಿ ಸೃಷ್ಟಿಯಾಗಿತ್ತು. ಅದರಲ್ಲೂ ವಿಶೇಷವಾಗಿ ಅಹಿಂದ ಶಕ್ತಿಯ ಪರಮೋಚ್ಚ ನಾಯಕರಾದ ಸಿದ್ದರಾಮಯ್ಯ ಹಾಗೂ ಅವರಿಗೆ ಹೆಗಲಿಗೆ ಹೆಗಲು ಕೊಟ್ಟು ನಿಂತಿದ್ದ ಬೆಳಗಾವಿಯ ಪ್ರಭಾವಿ ನಾಯಕ ಸತೀಶ್ ಜಾರಕಿಹೊಳಿ (Satish Jarkiholi) ನಡುವೆ ಎಲ್ಲವೂ ಸರಿಯಿಲ್ಲ, ಇಬ್ಬರ ಮಧ್ಯೆ ದೊಡ್ಡ ಕಂದಕ ಸೃಷ್ಟಿಯಾಗಿದೆ ಎಂಬ ಚರ್ಚೆಗಳು ರಾಜಕೀಯ ವಲಯದಲ್ಲಿ ತೀವ್ರವಾಗಿ ಕೇಳಿಬರುತ್ತಿದ್ದವು. ಈ ಕುರಿತು ನಮ್ಮ ‘ಅಸಲಿ ಸುದ್ದಿ’ (asalisuddi.com) ಮೊದಲ ದಿನದಿಂದಲೇ ಸರಣಿ ವಿಶ್ಲೇಷಣಾತ್ಮಕ ಲೇಖನಗಳನ್ನು ಪ್ರಕಟಿಸುತ್ತಾ ಬಂದಿತ್ತು. ಆದರೆ ಅಂದು ಇದನ್ನು ನಿರಾಕರಿಸುತ್ತಿದ್ದ ನಾಯಕರು, ಇಂದು ಬಹಿರಂಗವಾಗಿಯೇ ಸತ್ಯ ಒಪ್ಪಿಕೊಂಡಿದ್ದಾರೆ ಎಂದು ಹೇಳಲಾಗುತ್ತಿದೆ.
ಸೋಷಿಯಲ್ ಮೀಡಿಯಾದಲ್ಲಿ ‘ಡ್ಯಾಮೇಜ್ ಕಂಟ್ರೋಲ್’ ನಾಟಕ!
ನಮ್ಮ ‘ಅಸಲಿ ಸುದ್ದಿ’ಯಲ್ಲಿ ಸತೀಶ್ ಜಾರಕಿಹೊಳಿ (Satish Jarkiholi) ಮತ್ತು ಸಿದ್ದರಾಮಯ್ಯ ನಡುವಿನ ಶೀತಲ ಸಮರ ಹಾಗೂ ಮೌನ ಸುನಾಮಿಯ ಬಗ್ಗೆ ಲೇಖನಗಳು ಪ್ರಕಟವಾದಾಗ, ಸತೀಶ್ ಜಾರಕಿಹೊಳಿ ಅವರ ಬೆಂಬಲಿಗರು ಇದನ್ನು ಸುಳ್ಳು ಎಂದು ಬಿಂಬಿಸಲು ಹರಸಾಹಸ ಪಟ್ಟಿದ್ದರು. ಸಿದ್ದರಾಮಯ್ಯ ಅವರ ಜೊತೆ ಸತೀಶ್ ಜಾರಕಿಹೊಳಿ ಒಟ್ಟಿಗಿರುವ ಹಳೆಯ ಹಾಗೂ ಸಾಂದರ್ಭಿಕ ಭಾವಚಿತ್ರಗಳನ್ನು ಸಾಮಾಜಿಕ ಜಾಲತಾಣಗಳಲ್ಲಿ ಹರಿಬಿಡುವ ಮೂಲಕ, “ನಮ್ಮ ನಾಯಕರ ಮಧ್ಯೆ ಯಾವುದೇ ಬಿರುಕಿಲ್ಲ, ಇವೆಲ್ಲಾ ವಿರೋಧಿಗಳ ಸುಳ್ಳು ಸುದ್ದಿಗಳು” ಎಂದು ಸಮರ್ಥಿಸಿಕೊಳ್ಳುವ ಕೃತಕ ಪ್ರಯತ್ನಗಳು ನಡೆದಿದ್ದವು.
ಅಷ್ಟೇ ಏಕೆ, ಸ್ವತಃ ‘ಸತ್ಯಪ್ಪ ಸಾಹುಕಾರ್’ ಎಂದೇ ಬಿಂಬಿತರಾಗಿರುವ ಸತೀಶ್ ಜಾರಕಿಹೊಳಿ ಅವರೂ ಕೂಡ ಮಾಧ್ಯಮಗಳ ಮುಂದೆ ಬಂದು, “ಯಾರೋ ಸಾಮಾಜಿಕ ಜಾಲತಾಣದಲ್ಲಿ ಸುಳ್ಳು ಹರಡಿಸುತ್ತಿದ್ದಾರೆ, ನಮ್ಮ ನಡುವೆ ಏನೂ ಆಗಿಲ್ಲ” ಎಂದು ಹೇಳುತ್ತಲೇ ವಿವಾದಕ್ಕೆ ಮೇಲ್ಪದರದ ತೇಪೆ ಹಚ್ಚುವ ಜಾಣತನದ ಕೆಲಸ ಮಾಡಿದ್ದರು. ಆದರೆ, ರಾಜಕೀಯದ ಒಳಸುಳಿಗಳು ಅಷ್ಟು ಸುಲಭವಾಗಿ ಅಡಗಿರುವುದಿಲ್ಲ ಎಂಬುದಕ್ಕೆ ಇತ್ತೀಚಿನ ವಿದ್ಯಮಾನಗಳೇ ಸಾಕ್ಷಿ ನುಡಿಯುತ್ತಿವೆ.
ಸಿದ್ದು ಬೆಂಬಲಿಗರಿಗಿದ್ದ ಸ್ಪಷ್ಟತೆ ಮತ್ತು ದೂರು-ಬೆದರಿಕೆಯ ತಂತ್ರ!
ಮೂಲಗಳ ಪ್ರಕಾರ, ಸಿದ್ದರಾಮಯ್ಯ ಹಾಗೂ ಸತೀಶ್ ಜಾರಕಿಹೊಳಿ (Satish Jarkiholi) ನಡುವಿನ ಬಿರುಕಿನ ಬಗ್ಗೆ ಸ್ವತಃ ಸಿದ್ದರಾಮಯ್ಯ ಅವರ ತಳಮಟ್ಟದ ಭಾವುಕ ಬೆಂಬಲಿಗರಿಗೆ ಸಂಪೂರ್ಣ ಸ್ಪಷ್ಟತೆ ಇತ್ತು. ರಾಜಕೀಯದಲ್ಲಿ ಮಾತಿನ ಆಳಕ್ಕಿಂತ ನಾಯಕರ ‘ಬಾಡಿ ಲ್ಯಾಂಗ್ವೇಜ್’ ಹೆಚ್ಚು ಸತ್ಯವನ್ನು ಹೇಳುತ್ತದೆ ಎಂಬುದನ್ನು ಅರಿತಿದ್ದ ಸಿದ್ದರಾಮಯ್ಯ ಬೆಂಬಲಿಗರ ಫೇಸ್ಬುಕ್ ಪೇಜ್ಗಳಲ್ಲಿ ಈ ಬಿರುಕಿನ ಬಗ್ಗೆ ಬಹಿರಂಗವಾಗಿಯೇ ಆಕ್ರೋಶದ ಚರ್ಚೆಗಳು ಆರಂಭವಾಗಿದ್ದವು. ಅಷ್ಟೇ ಅಲ್ಲದೆ, “ಸಿದ್ದುಗೆ ಸತೀಶ್ ಮೋಸ ಮಾಡಿದರೇ?” ಅಥವಾ “ಸಿದ್ದು ಬೆನ್ನಿಗೆ ಸತೀಶ್ ಚೂರಿ ಹಾಕಿದರೇ?” ಎನ್ನುವ ಒಕ್ಕಣೆಯಿರುವ ತೀಕ್ಷ್ಣವಾದ ಪೋಸ್ಟ್ಗಳು ವ್ಯಾಪಕವಾಗಿ ಹರಿದಾಡತೊಡಗಿದವು. ಇದರಿಂದಾಗಿ ಸತೀಶ್ ಜಾರಕಿಹೊಳಿ ಅವರ ರಾಜಕೀಯ ಇಮೇಜ್ಗೆ ಹಾಗೂ ಅಹಿಂದ ನಾಯಕತ್ವದ ವರ್ಚಸ್ಸಿಗೆ ಭಾರಿ ದೊಡ್ಡ ಮಟ್ಟದ ಧಕ್ಕೆಯಾಗಿತ್ತು ಎಂದು ವಿಶ್ಲೇಷಿಸಲಾಗುತ್ತಿದೆ.
ಇದರಿಂದ ತಕ್ಷಣವೇ ಎಚ್ಚೆತ್ತುಕೊಂಡ ಸತೀಶ್ ಜಾರಕಿಹೊಳಿ ಬಣ, ತಮ್ಮ ವರ್ಚಸ್ಸನ್ನು ಉಳಿಸಿಕೊಳ್ಳಲು ಕಾನೂನು ಕ್ರಮದ ಮೊರೆ ಹೋಗಿತ್ತು. ಕುರುಬ ಸಮುದಾಯದ ಹೆಸರಿನಲ್ಲಿದ್ದ ಎರಡು ಪ್ರಮುಖ ಫೇಸ್ಬುಕ್ ಅಕೌಂಟ್ಗಳ ವಿರುದ್ಧ ಸೈಬರ್ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಲಾಯಿತು. ಈ ವಿವಾದ ಇಷ್ಟಕ್ಕೇ ನಿಲ್ಲಲಿಲ್ಲ; ‘ಅಸಲಿ ಸುದ್ದಿ’ಯ ಎಡಿಟರ್ ಆಗಿರುವ ನಮಗೂ ಕೂಡ ಕೆಲವರು ಕರೆ ಮಾಡಿ, ಸ್ಪಷ್ಟನೆಯ ನೆಪದಲ್ಲಿ ಒಂದು ರೀತಿಯ ಬೆದರಿಸುವ ತಂತ್ರಗಳನ್ನು ಬಳಸುವ ವಿಫಲ ಪ್ರಯತ್ನ ಮಾಡಿದರು! ಆದರೆ, ಪತ್ರಿಕೋದ್ಯಮದ ಧರ್ಮ ಮತ್ತು ಸತ್ಯದ ಪರವಾಗಿ ನಿಂತ ನಾವು, ಅದ್ಯಾವುದಕ್ಕೂ ಲೆಕ್ಕಿಸದೇ ರಾಜ್ಯದ ಜನತೆಗೆ ಅಸಲಿ ಸತ್ಯವನ್ನು ತಲುಪಿಸುವ ಲೇಖನಗಳನ್ನು ಧೈರ್ಯವಾಗಿ ಬರೆದೆವು.
ಆರು ತಿಂಗಳ ಮುಂಚಿನ ರಹಸ್ಯ ಸಭೆಗಳು ಹಾಗೂ ಸಹಿ ಸಂಗ್ರಹದ ಗುಮಾನಿ!
ಸತೀಶ್ ಜಾರಕಿಹೊಳಿ ಸೇರಿದಂತೆ ಅವರ ಇಡೀ ಬಣ ಸಿದ್ದರಾಮಯ್ಯ ಅವರ ಜೊತೆ ಯಾವುದೇ ಬಿರುಕಿಲ್ಲ ಅಂತಲೇ ಬಿಂಬಿಸುತ್ತಾ ಬಂದರೂ, ತೆರೆಮರೆಯ ಅಸಲಿ ಚಿತ್ರಣವೇ ಬೇರೆಯಾಗಿತ್ತು. ಸಿದ್ದರಾಮಯ್ಯ ಅವರು ಮುಖ್ಯಮಂತ್ರಿ ಸ್ಥಾನಕ್ಕೆ ರಾಜೀನಾಮೆ ಕೊಡುವುದಕ್ಕಿಂತ ಕನಿಷ್ಠ ಆರು ತಿಂಗಳ ಮುಂಚಿನಿಂದಲೇ ಅವರ ವಿರುದ್ಧ ರಹಸ್ಯ ಸಭೆಗಳು ನಡೆದಿದ್ದವು ಎನ್ನುವ ಬಲವಾದ ಗುಮಾನಿ ರಾಜಕೀಯ ವಲಯದಲ್ಲಿದೆ. ಸಿದ್ದರಾಮಯ್ಯ ಅವರ ವಿರೋಧಿ ಬಣದೊಂದಿಗೆ ಸತೀಶ್ ಜಾರಕಿಹೊಳಿ ಅವರು ರಹಸ್ಯ ಮಾತುಕತೆಗಳನ್ನು ನಡೆಸಿದ್ದರು ಎನ್ನುವ ದಟ್ಟವಾದ ಸಂಶಯಗಳು ಸಿದ್ದು ಕ್ಯಾಂಪ್ನಲ್ಲಿ ದಟ್ಟವಾಗಿದ್ದವು ಎಂದು ಹೇಳಲಾಗುತ್ತಿದೆ.
ಇದಕ್ಕೆ ಪುಷ್ಟಿ ನೀಡುವಂತೆ, ಸಿದ್ದರಾಮಯ್ಯ ಅವರನ್ನು ಸಿಎಂ ಗಾದಿಯಿಂದ ಕೆಳಗಿಳಿಸಲು ಅಥವಾ ಅವರ ನಾಯಕತ್ವಕ್ಕೆ ಸೆಡ್ಡು ಹೊಡೆಯಲು ತೆರೆಮರೆಯಲ್ಲಿ ಶಾಸಕರ ‘ಸಹಿ ಸಂಗ್ರಹ’ ನಡೆಸುವ ಕುರಿತಾದ ಗಂಭೀರ ಚರ್ಚೆಗಳು ಮತ್ತು ವದಂತಿಗಳು ರಾಜಕೀಯ ಕಾರಿಡಾರ್ನಲ್ಲಿ ಜೋರಾಗಿಯೇ ಹರಿದಾಡಿದ್ದವು. ಸಿದ್ದರಾಮಯ್ಯ ಅವರು ಅಧಿಕಾರದಲ್ಲಿದ್ದಾಗಲೇ ಅವರ ಕುರ್ಚಿಗೆ ಕುತ್ತು ತರಲು ಇಂತಹದೊಂದು ಆಂತರಿಕ ದಾಳ ಉರುಳಿಸಲಾಗಿತ್ತು ಎನ್ನುವ ಆರೋಪಗಳು ಕೇಳಿಬಂದಿದ್ದವು. ಹಾಗಾಗಿಯೇ, ಸಿದ್ದರಾಮಯ್ಯ ಅವರು ಮುಖ್ಯಮಂತ್ರಿ ಸ್ಥಾನಕ್ಕೆ ಅಧಿಕೃತವಾಗಿ ರಾಜೀನಾಮೆ ನೀಡಿದ ಬಳಿಕ, ಈ ಎಲ್ಲಾ ಬೆಳವಣಿಗೆಗಳನ್ನು ಅತ್ಯಂತ ಸೂಕ್ಷ್ಮವಾಗಿ ಗಮನಿಸಿ ತಮ್ಮ ಆಪ್ತ ವಲಯದಲ್ಲೇ ಇದ್ದ ಕೆಲವು ಪ್ರಮುಖ ನಾಯಕರನ್ನು ತಾವಾಗಿಯೇ ದೂರ ಇಟ್ಟಿದ್ದಾರೆ ಎನ್ನಲಾಗಿದೆ. ಈ ರೀತಿ ಸಿದ್ದರಾಮಯ್ಯ ಅವರು ದೂರ ಇಟ್ಟಿರುವ ನಾಯಕರ ಪಟ್ಟಿಯಲ್ಲಿ ಬೆಳಗಾವಿಯ ಸಾಹುಕಾರರ ಹೆಸರೂ ಪ್ರಮುಖವಾಗಿದೆ ಎನ್ನುವ ಮಾತುಗಳು ಕೇಳಿಬರುತ್ತಿವೆ.
ವೇದಿಕೆಯ ಮೇಲಿನ ಮುನಿಸು ಸಣ್ಣಮಟ್ಟದ್ದಲ್ಲ!
ಬೆಂಗಳೂರಿನ ಅರಮನೆ ಮೈದಾನದಲ್ಲಿ ನಡೆದ ಕೆಪಿಸಿಸಿ ಸರ್ವ ಸದಸ್ಯರ ಸಭೆಯಲ್ಲೂ ಇವರಿಬ್ಬರ ನಡುವಿನ ಮೌನ ಸಮರ ಜಗಜ್ಜಾಹೀರಾಗಿತ್ತು. ವೇದಿಕೆಗೆ ಸಿದ್ದರಾಮಯ್ಯ ಅವರು ಆಗಮಿಸುತ್ತಿದ್ದಂತೆ, ಅಲ್ಲಿಯವರೆಗೆ ಇದ್ದ ಸತೀಶ್ ಜಾರಕಿಹೊಳಿ ಅವರು ಸಿದ್ದರಾಮಯ್ಯ ಅವರಿಂದ ಮೂರು ಕುರ್ಚಿಗಳಷ್ಟು ದೂರ ಹೋಗಿ ಕುಳಿತುಕೊಂಡಿದ್ದರು. ಎಐಸಿಸಿ ಮುಖಂಡರು ಮತ್ತು ಹಿರಿಯ ನಾಯಕರು ಬಂದು ಇದನ್ನು ಸೂಕ್ಷ್ಮವಾಗಿ ಗಮನಿಸಿ, ಒತ್ತಾಯಪೂರ್ವಕವಾಗಿ ಕೈಹಿಡಿದು ಎಳೆದುಕೊಂಡು ಬಂದು ಸಿದ್ದರಾಮಯ್ಯ ಅವರ ಪಕ್ಕದಲ್ಲೇ ಕೂರಿಸಲು ಪ್ರಯತ್ನಿಸಿದರು. ಆರಂಭದಲ್ಲಿ ಸತೀಶ್ ಅವರು ತೀವ್ರ ಹಠ ಹಿಡಿದು ನಿರಾಕರಿಸಿದರೂ, ಕೊನೆಗೆ ಹಿರಿಯರ ಒತ್ತಡಕ್ಕೆ ಮಣಿದು ಪಕ್ಕದಲ್ಲಿ ಕುಳಿತರು. ಆದರೆ, ಇಡೀ ಕಾರ್ಯಕ್ರಮದಲ್ಲಿ ಇಬ್ಬರ ನಡುವೆ ಯಾವುದೇ ಸೌಜನ್ಯದ ಮಾತಿನ ಚಕಮಕಿ ಅಥವಾ ಕಣ್ಣಿನ ಸಂಪರ್ಕ ಇರಲಿಲ್ಲ. ಇದು ಇಬ್ಬರ ನಡುವಿನ ಬಿರುಕು ಸಣ್ಣಮಟ್ಟದ್ದಲ್ಲ ಎಂಬುದಕ್ಕೆ ಪ್ರತ್ಯಕ್ಷ ಸಾಕ್ಷಿಯಂತಿತ್ತು.
ಸಿದ್ದು ಇಡುತ್ತಿದ್ದಾರಾ ಸತೀಶ್ಗೆ ನಿರಂತರ ಚೆಕ್ಮೇಟ್!?
ರಾಜಕೀಯ ಪಡಸಾಲೆಯಲ್ಲಿ ಕೇಳಿಬರುತ್ತಿರುವ ಅತಿ ದೊಡ್ಡ ಆಘಾತಕಾರಿ ಆರೋಪವೆಂದರೆ, ಸಿದ್ದರಾಮಯ್ಯ ಅವರನ್ನು ಮುಖ್ಯಮಂತ್ರಿ ಸ್ಥಾನದಿಂದ ಕೆಳಗಿಳಿಸಲು ವಿರೋಧಿ ಬಣದವರ ಜೊತೆ ಅವರ ಸ್ವಂತ ಆಪ್ತರೇ ಕೈಜೋಡಿಸಿದ್ದರು ಎನ್ನುವುದು. ಈ ಆಂತರಿಕ ತಂತ್ರಗಾರಿಕೆಯ ಅಸಲಿ ಸತ್ಯ ಸಿದ್ದರಾಮಯ್ಯ ಅವರಿಗೆ ಸಂಪೂರ್ಣವಾಗಿ ಮನವರಿಕೆಯಾದ ಬಳಿಕ, ಅವರು ತಮ್ಮ ಆಪ್ತ ವಲಯದಲ್ಲೇ ಇದ್ದು ತೆರೆಮರೆಯಲ್ಲಿ ಕೆಲಸ ಮಾಡಿದ ನಾಯಕರನ್ನು ಸಂಪೂರ್ಣವಾಗಿ ಮೂಲೆಗುಂಪು ಮಾಡುತ್ತಿದ್ದಾರೆ ಎನ್ನಲಾಗುತ್ತಿದೆ. ಈ ದ್ರೋಹದ ಆರೋಪದ ಪಟ್ಟಿಯಲ್ಲಿ ಸತೀಶ್ ಜಾರಕಿಹೊಳಿ ಅವರ ಹೆಸರೂ ಕೇಳಿಬರುತ್ತಿರುವುದು ಸದ್ಯದ ಸಂಚಲನ.
ಹಾಗಾಗಿಯೇ, ಹಳೇ ಮೈಸೂರು ಭಾಗದಿಂದ ಹಿಡಿದು ಕಿತ್ತೂರು ಕರ್ನಾಟಕದವರೆಗಿನ ರಾಜಕೀಯ ವಿಶ್ಲೇಷಕರ ಪ್ರಕಾರ, ಸಿದ್ದರಾಮಯ್ಯ ಅವರು ಈಗ ಪ್ರತಿ ಹಂತದಲ್ಲೂ ಸತೀಶ್ ಜಾರಕಿಹೊಳಿ ಅವರಿಗೆ ರಾಜಕೀಯವಾಗಿ ಚೆಕ್ಮೇಟ್ ಇಡುತ್ತಲೇ ಬರುತ್ತಿದ್ದಾರೆ ಎಂದು ಚರ್ಚಿಸಲಾಗುತ್ತಿದೆ. ಉದಾಹರಣೆಗೆ ಕೆಪಿಸಿಸಿ ಅಧ್ಯಕ್ಷಗಿರಿ ಮೇಲೆ ಕಣ್ಣಿಟ್ಟಿದ್ದ ಸತೀಶ್ಗೆ ಒಬ್ಬರಿಗೆ ಒಂದೇ ಹುದ್ದೆ ಎಂದು ಹೈಕಮಾಂಡ್ ಬಾಯಲ್ಲಿ ಹೇಳಿಸುವ ಮೂಲಕ ಸಚಿವ ಸ್ಥಾನದ ಜೊತೆಗೆ ಸಿಗಬಹುದಾಗಿದ್ದ ಅಧ್ಯಕ್ಷಗಿರಿ ತಪ್ಪಿಸಿದ್ದು ಸಿದ್ದರಾಮಯ್ಯ ಎನ್ನುವ ಮಾತು ಇದೆ. ಇದೀಗ ಕೆಪಿಸಿಸಿ ಅಧ್ಯಕ್ಷ ಸ್ಥಾನ ವಹಿಸಿರುವ ಬಿಕೆ ಹರಿಪ್ರಸಾದ್ ಅವರಿಗೆ ಸಚಿವ ಸ್ಥಾನ ನೀಡಬೇಕು ಎಂದು ಪಟ್ಟು ಹಿಡಿದಿರುವುದು ಅದೇ ಸಿದ್ದರಾಮಯ್ಯ ಎಂದು ಹೇಳಲಾಗುತ್ತಿದೆ. ಹೀಗೆ ಹಂತಹಂತವಾಗಿ ಸತೀಶ್ ಜಾರಕಿಹೊಳಿ ಅವರಿಗೆ ಎಲ್ಲೆಲ್ಲಿ ಚೆಕ್ಮೇಟ್ ಇಡಬಹುದೋ ಅಲ್ಲೆಲ್ಲಾ ಸಿದ್ದು ಕೆಲಸ ಮಾಡುತ್ತಿದ್ದಾರೆ ಎಂದು ಹೇಳಲಾಗುತ್ತಿದೆ. ಸತೀಶ್ ಅವರ ನಾಯಕತ್ವದ ಬೆಳವಣಿಗೆಗೆ ಬ್ರೇಕ್ ಹಾಕಲು ಹಾಗೂ ಅಹಿಂದ ಮತಬ್ಯಾಂಕ್ ಸಂಪೂರ್ಣವಾಗಿ ಅವರ ಕೈ ತಪ್ಪದಂತೆ ನೋಡಿಕೊಳ್ಳಲು ಸಿದ್ದರಾಮಯ್ಯ ಬಣ ತೆರೆಮರೆಯ ಗೇಮ್ ಪ್ಲಾನ್ ಮಾಡುತ್ತಿದೆ ಎನ್ನುವ ಮಾತುಗಳು ರಾಜಕೀಯ ವಲಯದಲ್ಲಿ ದಟ್ಟವಾಗಿವೆ.
ಇದನ್ನೂ ಓದಿ: Siddaramaiah: ಮೂಲೆಗುಂಪು ಮಾಡಿದ್ರೆ ಮುಳುವಾದೀತು; ಕಾಂಗ್ರೆಸ್ ಅಂಗಳದಲ್ಲಿ ಸಿದ್ದಣ್ಣನ ‘ಬಾಡೂಟದ ರಾಜಕೀಯ’!
ಕೊನೆಗೂ ಸತ್ಯ ಒಪ್ಪಿಕೊಂಡ ಸತ್ಯಪ್ಪ ಸಾಹುಕಾರ್!
ಇಷ್ಟು ದಿನಗಳ ಕಾಲ ಎಲ್ಲವೂ ಸುಳ್ಳು, ಮಾಧ್ಯಮಗಳ ಸೃಷ್ಟಿ ಎಂದು ವಾದಿಸುತ್ತಿದ್ದ ಸತೀಶ್ ಜಾರಕಿಹೊಳಿ ಅವರು ನಿನ್ನೆ ಹಾವೇರಿಯಲ್ಲಿ ಮಾಧ್ಯಮಗಳ ಮುಂದೆ ಮಾತನಾಡುತ್ತಾ, ತಮ್ಮಿಬ್ಬರ ನಡುವಿನ ಭಿನ್ನಾಭಿಪ್ರಾಯದ ಅಸಲಿ ಸತ್ಯವನ್ನು ಕೊನೆಗೂ ಒಪ್ಪಿಕೊಂಡಿದ್ದಾರೆ. “ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗುತ್ತಿರುವ ವಿಡಿಯೋಗಳು ಮತ್ತು ನಮ್ಮ ನಡುವಿನ ಅಸಮಾಧಾನವೇನೂ ರಾಜ್ಯದ ಸಮಸ್ಯೆಯಲ್ಲ. ಅದು ಕೇವಲ ನಮ್ಮಿಬ್ಬರ ನಡುವಿನ ವೈಯಕ್ತಿಕ ಸಮಸ್ಯೆ ಅಷ್ಟೇ” ಎಂದು ಹೇಳುವ ಮೂಲಕ ತಮ್ಮ ನಡುವೆ ದೊಡ್ಡ ಮಟ್ಟದ ಬಿರುಕಿರುವುದನ್ನು ಅಧಿಕೃತವಾಗಿ ಒಪ್ಪಿಕೊಂಡಿದ್ದಾರೆ.
ಸುಳ್ಳಿನ ಮುಖವಾಡಗಳು ಎಷ್ಟು ದಿನ ಧರಿಸಿದರೂ ಒಂದು ದಿನ ಕಳಚಲೇಬೇಕು. ನಮ್ಮ ‘ಅಸಲಿ ಸುದ್ದಿ’ ಮೊದಲ ದಿನದಿಂದ ಏನನ್ನು ವರದಿ ಮಾಡುತ್ತಿತ್ತೋ, ಅದೇ ಅಂತಿಮ ಸತ್ಯ ಎಂಬುದು ಈಗ ಸಾಬೀತಾಗಿದೆ. ಸತ್ಯಪ್ಪ ಸಾಹುಕಾರ್ ಕೊನೆಗೂ ಸತ್ಯ ಒಪ್ಪಿಕೊಂಡಿದ್ದಾರೆ. ಈ ಆಂತರಿಕ ಬಿರುಕು, ಆರು ತಿಂಗಳ ಮುಂಚಿನ ರಹಸ್ಯ ಸಭೆಗಳ ಪರಿಣಾಮ ಮತ್ತು ಸಿದ್ದರಾಮಯ್ಯ ಅವರ ರಾಜಕೀಯ ಚೆಕ್ಮೇಟ್ ತಂತ್ರಗಳು ಮುಂದಿನ ದಿನಗಳಲ್ಲಿ ಕಾಂಗ್ರೆಸ್ ಕೋಟೆಯಲ್ಲಿ ಎಂತಹ ಭೂಕಂಪ ಸೃಷ್ಟಿಸಲಿದೆ ಎಂಬುದನ್ನು ಕಾದು ನೋಡಬೇಕಿದೆ.
ರಾಜಕೀಯದ ಇಂತಹದೇ ಮತ್ತಷ್ಟು ಆಳವಾದ ಮತ್ತು ನಿಖರವಾದ ಒಳಸುಳಿಗಳ ಮಾಹಿತಿಗಾಗಿ ಓದುತ್ತಿರಿ ನಮ್ಮ ‘ಅಸಲಿ ಸುದ್ದಿ’.
