SIR: ಚುನಾವಣಾ ಆಯೋಗ (Election Commission) ಎಂದರೆ ಪ್ರಜಾಪ್ರಭುತ್ವದ ರಕ್ಷಕನಾಗಿರಬೇಕು. ಆದರೆ ಅದೇ ಆಯೋಗ ತರುತ್ತಿರುವ ಕೆಲವು ವಿಚಿತ್ರ ನಿಯಮಗಳು ಜನರ ಅತ್ಯಂತ ಪವಿತ್ರವಾದ ‘ಮತದಾನದ ಹಕ್ಕು’ (Voters Right) ಅನ್ನೇ ಕಸಿದುಕೊಳ್ಳುವ ಭೀತಿ ಹುಟ್ಟಿಸಿದರೆ ಏನರ್ಥ? ಪ್ರಜಾಪ್ರಭುತ್ವದ ಅಸಲಿ ಮಾಲೀಕರಾದ ಮತದಾರರ ಹಕ್ಕನ್ನು ರಕ್ಷಿಸಲು, ಈಗ ಕರ್ನಾಟಕ ರಾಜ್ಯ ಸರ್ಕಾರವು ಕೇಂದ್ರ ಚುನಾವಣಾ ಆಯೋಗದ (Election Commission) ವಿರುದ್ಧವೇ ಸುಪ್ರೀಂ ಕೋರ್ಟ್ (SupremeCourt) ಮೆಟ್ಟಿಲೇರಲು ಸಜ್ಜಾಗಿದೆ. ಇದು ಕೇವಲ ಒಂದು ರಾಜಕೀಯ ಪಕ್ಷದ ತಂತ್ರವಲ್ಲ, ಬದಲಿಗೆ ಪ್ರತಿಯೊಬ್ಬ ನಾಗರಿಕನ ಸಾಂವಿಧಾನಿಕ ಹಕ್ಕನ್ನು ಉಳಿಸಿಕೊಳ್ಳಲು ಸರ್ಕಾರ ಇಟ್ಟಿರುವ ಅತ್ಯಂತ ಸ್ವಾಗತಾರ್ಹ ಮತ್ತು ದಿಟ್ಟ ಹೆಜ್ಜೆಯಾಗಿದೆ.
ಏನಿದು ‘SIR’ ಕರಾಳ ನೀತಿ? ಅಂಕಿ-ಅಂಶಗಳು ಹೇಳುವ ಕಟು ಸತ್ಯವೇನು?
ಕೇಂದ್ರ ಚುನಾವಣಾ ಆಯೋಗವು ರಾಜ್ಯದಲ್ಲಿ ಜಾರಿಗೆ ತರಲು ಹೊರಟಿರುವ Special Intensive Revision (SIR – ವಿಶೇಷ ತೀವ್ರ ಪರಿಷ್ಕರಣೆ) ಎಂಬ ಪ್ರಕ್ರಿಯೆಯೇ ಈಗ ಇಷ್ಟೆಲ್ಲಾ ರಾದ್ಧಾಂತಕ್ಕೆ ಕಾರಣವಾಗಿದೆ. ಮತದಾರರ ಪಟ್ಟಿ ಪರಿಷ್ಕರಣೆ ಹೆಸರಿನಲ್ಲಿ ನಡೆಯುವ ಈ ಪ್ರಕ್ರಿಯೆಯ ಹಿಂದೆ ದೊಡ್ಡದೊಂದು ಆತಂಕ ಅಡಗಿದೆ.
ಇದಕ್ಕೆ ಇತ್ತೀಚಿನ ಪಶ್ಚಿಮ ಬಂಗಾಳದ ಉದಾಹರಣೆಯೇ ಸಾಕ್ಷಿ. ಅಲ್ಲಿ ಇದೇ ‘SIR’ ಪ್ರಕ್ರಿಯೆಯಿಂದಾಗಿ ಬರೋಬ್ಬರಿ 27 ಲಕ್ಷ ಮತದಾರರ ಹೆಸರುಗಳನ್ನು ಪಟ್ಟಿಯಿಂದ ಏಕಾಏಕಿ ಕೈಬಿಡಲಾಗಿತ್ತು! ತಮಿಳುನಾಡು ಸೇರಿದಂತೆ ಹಲವು ರಾಜ್ಯಗಳಲ್ಲೂ ಈ ನಿಯಮದ ವಿರುದ್ಧ ತೀವ್ರ ಆಕ್ರೋಶ ವ್ಯಕ್ತವಾಗಿದೆ. ಈಗ ಅದೇ ಕರಾಳ ನೆರಳು ಕರ್ನಾಟಕದ ಮೇಲೂ ಬೀಳುತ್ತಿದೆ. ಅಲೆಮಾರಿ ಕಾರ್ಮಿಕರು, ವಲಸೆ ಹೋದವರು ಅಥವಾ ಸಣ್ಣಪುಟ್ಟ ತಾಂತ್ರಿಕ ಕಾರಣಗಳನ್ನು ಮುಂದಿಟ್ಟುಕೊಂಡು ಲಕ್ಷಾಂತರ ಬಡ ಹಾಗೂ ಸಾಮಾನ್ಯ ಜನರ ಮತದಾನದ ಹಕ್ಕನ್ನು ಕಸಿದುಕೊಳ್ಳಲು ವ್ಯವಸ್ಥಿತ ಸಂಚು ನಡೆಯುತ್ತಿದೆಯೇ ಎಂಬ ಅನುಮಾನ ಮೂಡಿದೆ.
ಕರ್ನಾಟಕದಲ್ಲಿ ಯಾರಿಗೆ ಕುತ್ತು? ಜಿಲ್ಲಾವಾರು ಆಘಾತಕಾರಿ ಲೆಕ್ಕಾಚಾರ!
ಆಂತರಿಕ ವರದಿಗಳು ಮತ್ತು ತಾಂತ್ರಿಕ ವಿಶ್ಲೇಷಣೆಗಳನ್ನು ಸೂಕ್ಷ್ಮವಾಗಿ ಗಮನಿಸಿದರೆ, ಈ ‘SIR’ ಪ್ರಕ್ರಿಯೆ ಜಾರಿಯಾದರೆ ಕರ್ನಾಟಕದ ವಿವಿಧ ಜಿಲ್ಲೆಗಳಲ್ಲಿ ಶೇಕಡಾವಾರು ಮತಗಳು ಭಾರಿ ಪ್ರಮಾಣದಲ್ಲಿ ಕಡಿತಗೊಳ್ಳುವ ಭೀತಿಯಿದೆ. ಮುಖ್ಯವಾಗಿ ಬಡವರು, ವಲಸೆ ಕಾರ್ಮಿಕರು ಮತ್ತು ಯುವ ಮತದಾರರೇ ಈ ತಾಂತ್ರಿಕ ಕತ್ತರಿಗೆ ಬಲಿಯಾಗಲಿದ್ದಾರೆ.
- ರಾಯಚೂರು ಮತ್ತು ಕಲಬುರಗಿ ವಲಯದಲ್ಲಿ ಶೇ. 66 ರಷ್ಟು ಕಡಿತದ ಭೀತಿ: ಹಿಂದುಳಿದ ಕಲ್ಯಾಣ ಕರ್ನಾಟಕ ಭಾಗದ ರಾಯಚೂರು, ಕಲಬುರಗಿ ಮತ್ತು ಕೊಪ್ಪಳ ಜಿಲ್ಲೆಗಳಿಂದ ಪ್ರತಿ ವರ್ಷ ಲಕ್ಷಾಂತರ ಜನರು ಕೃಷಿ ಮತ್ತು ಕಟ್ಟಡ ಕಾರ್ಮಿಕರಾಗಿ ಮುಂಬೈ, ಪುಣೆ ಅಥವಾ ಬೆಂಗಳೂರಿಗೆ ವಲಸೆ ಹೋಗುತ್ತಾರೆ. ಅಧಿಕಾರಿಗಳು ಪರಿಶೀಲನೆಗೆ ಹೋದಾಗ ಇವರು ಮನೆಯಲ್ಲಿ ಇರುವುದಿಲ್ಲ. ಈ ಏಕಪಕ್ಷೀಯ ತನಿಖೆಯಿಂದಾಗಿ ಈ ಭಾಗದ ಶೇಕಡಾ 66 ರಷ್ಟು ಬಡ ಮತದಾರರ ಹೆಸರುಗಳು ಪಟ್ಟಿಯಿಂದ ಶಾಶ್ವತವಾಗಿ ಮಾಯವಾಗುವ ಅಪಾಯ ಎದುರಾಗಿದೆ.
- ಬೆಂಗಳೂರು ಮಹಾನಗರದಲ್ಲಿ ಶೇ. 46 ರಷ್ಟು ಮತಗಳಿಗೆ ಕುತ್ತು: ಸಿಲಿಕಾನ್ ಸಿಟಿ ಬೆಂಗಳೂರಿನಲ್ಲಿ ಬಾಡಿಗೆ ಮನೆಗಳನ್ನು ಬದಲಾಯಿಸುವವರ ಸಂಖ್ಯೆ ಹೆಚ್ಚು. ಇದರ ಜೊತೆಗೆ ಐಟಿ ಉದ್ಯೋಗಿಗಳು ಮತ್ತು ಯುವಕರು ಉದ್ಯೋಗದ ನಿಮಿತ್ತ ಸ್ಥಳಾಂತರಗೊಳ್ಳುತ್ತಿರುತ್ತಾರೆ. ವಿಳಾಸದ ಸಣ್ಣಪುಟ್ಟ ಗೊಂದಲಗಳು ಮತ್ತು ದಾಖಲೆಗಳ ಹೊಂದಾಣಿಕೆಯಾಗದ ಕಾರಣಕ್ಕೆ ರಾಜಧಾನಿಯಲ್ಲೇ ಬರೋಬ್ಬರಿ ಶೇಕಡಾ 46 ರಷ್ಟು ಮತಗಳು ಡಿಲೀಟ್ ಆಗುವ ಆತಂಕ ಮೂಡಿದೆ.
- ಉತ್ತರ ಕರ್ನಾಟಕ ಭಾಗದಲ್ಲಿ ಶೇ. 35 ರಿಂದ 40 ರಷ್ಟು ಆಘಾತ: ಬೆಳಗಾವಿ, ಬಾಗಲಕೋಟೆ, ವಿಜಯಪುರ ಸೇರಿದಂತೆ ಉತ್ತರ ಕರ್ನಾಟಕದ ಜಿಲ್ಲೆಗಳಲ್ಲಿ ಕಾಲೋಚಿತ ಕೃಷಿ ಕಾರ್ಮಿಕರ ಸಂಖ್ಯೆ ದೊಡ್ಡದಿದೆ. ಸರಿಯಾದ ದಾಖಲೆಗಳ ಮಾಹಿತಿ ಇಲ್ಲದ ಕಾರಣ ಅಥವಾ ನಿರಂತರ ವಲಸೆಯ ಹಿನ್ನೆಲೆಯಲ್ಲಿ ಈ ಭಾಗದಲ್ಲೂ ಶೇಕಡಾ 35 ರಿಂದ 40 ರಷ್ಟು ಮತದಾರರು ತಮ್ಮ ಸಾಂವಿಧಾನಿಕ ಹಕ್ಕನ್ನು ಕಳೆದುಕೊಳ್ಳುವ ಭೀತಿಯಲ್ಲಿದ್ದಾರೆ.
ಯಾರೋ ಕುಳಿತಲ್ಲೇ ಕುಳಿತು ಕಂಪ್ಯೂಟರ್ ಬಟನ್ ಒತ್ತಿ ಲಕ್ಷಾಂತರ ಜನರ ಹೆಸರನ್ನು ಪಟ್ಟಿಯಿಂದ ತೆಗೆದುಹಾಕಿದರೆ, ಆ ಜನ ಸಾಮಾನ್ಯರು ಚುನಾವಣೆಯ ದಿನ ಮತಗಟ್ಟೆಗೆ ಹೋಗಿ ಅಸಹಾಯಕರಾಗಿ ನಿಲ್ಲಬೇಕಾಗುತ್ತದೆ. ಇದನ್ನು ಮನಗಂಡಿರುವ ಮುಖ್ಯಮಂತ್ರಿ ಸಿದ್ದರಾಮಯ್ಯ ನೇತೃತ್ವದ ಸಚಿವ ಸಂಪುಟ, “ನಮ್ಮ ರಾಜ್ಯದ ಯಾವುದೇ ಒಬ್ಬನೇ ಒಬ್ಬ ನಾಗರಿಕನೂ ಕಾರಣವಿಲ್ಲದೆ ಮತದಾನದ ಹಕ್ಕು ಕಳೆದುಕೊಳ್ಳಬಾರದು” ಎಂದು ಕಠಿಣ ನಿಲುವು ತಳೆದಿದೆ.
ಚುನಾವಣಾ ಆಯೋಗದ ‘ರಕ್ಷಾ ಕವಚ’ಕ್ಕೆ ಸುಪ್ರೀಂ ಬ್ರೇಕ್ ಸಾಧ್ಯವೇ?
ಸಾಮಾನ್ಯವಾಗಿ ಸಂವಿಧಾನದ ವಿಧಿ 324 (Article 324) ರ ಅಡಿಯಲ್ಲಿ ಚುನಾವಣಾ ಆಯೋಗದ ನಿರ್ಧಾರಗಳಿಗೆ ಕಾನೂನಿನ ವಿಶೇಷ ವಿನಾಯಿತಿಗಳು (Immunity) ಇರುತ್ತವೆ. ಅವರು ತಪ್ಪು ಮಾಡಿದರೂ ಸುಲಭವಾಗಿ ಪ್ರಶ್ನಿಸಲು ಸಾಧ್ಯವಾಗದಂತಹ ವ್ಯವಸ್ಥೆಯಿದೆ. ಆದರೆ ಕರ್ನಾಟಕ ಸರ್ಕಾರ ಈಗ ಇದೇ ವಿನಾಯಿತಿಯನ್ನು ಸುಪ್ರೀಂ ಕೋರ್ಟ್ನಲ್ಲಿ ಸವಾಲು ಮಾಡಲು ಹೊರಟಿದೆ.
“ಆಯೋಗವು ತಪ್ಪು ನಿರ್ಧಾರಗಳನ್ನು ತೆಗೆದುಕೊಂಡಾಗ ಅದಕ್ಕೆ ಪಾರದರ್ಶಕತೆ ಇಲ್ಲದಿದ್ದರೆ ಹೇಗೆ? ಲಕ್ಷಾಂತರ ಮತಗಳನ್ನು ಡಿಲೀಟ್ ಮಾಡುವ ಅಧಿಕಾರವನ್ನು ಆಯೋಗಕ್ಕೆ ಯಾರು ನೀಡಿದರು?” ಎಂದು ಕಾನೂನು ಸಚಿವ ಹೆಚ್.ಕೆ. ಪಾಟೀಲ್ ನೇರವಾಗಿಯೇ ಪ್ರಶ್ನಿಸಿದ್ದಾರೆ.
ಅಂತಿಮ ಮತದಾರರ ಪಟ್ಟಿಯನ್ನು ಆಯೋಗವು ಏಕಪಕ್ಷೀಯವಾಗಿ ಪ್ರಕಟಿಸುವ ಬದಲು, ನೇರವಾಗಿ ಸುಪ್ರೀಂ ಕೋರ್ಟ್ಗೇ ಸಲ್ಲಿಕೆ ಮಾಡಿ ಅನುಮತಿ ಪಡೆಯುವಂತೆ ಆದೇಶಿಸಬೇಕು ಎಂದು ಸರ್ಕಾರ ಕೋರಲು ನಿರ್ಧರಿಸಿದೆ. ಇದು ದೇಶದಲ್ಲೇ ಒಂದು ಐತಿಹಾಸಿಕ ಕಾನೂನು ಹೋರಾಟವಾಗುವುದರಲ್ಲಿ ಸಂಶಯವಿಲ್ಲ.
ಇದನ್ನೂ ಓದಿ: West Bengal: ಬಿಜೆಪಿಯ ‘SIR ಕುತಂತ್ರ’ ಮತ್ತು ‘ಚುನಾವಣಾ ಆಯೋಗದ ಪಕ್ಷಪಾತ’ಕ್ಕೆ ಬಲಿಯಾದ ಮಮತಾ ಬ್ಯಾನರ್ಜಿ?
ಜನರ ಹಕ್ಕಿಗಾಗಿ ತಡವಾಗಿಯಾದರೂ ಎಚ್ಚೆತ್ತ ಸರ್ಕಾರ!
ಸಾಮಾನ್ಯವಾಗಿ ರಾಜಕಾರಣಿಗಳು ತಮ್ಮ ಮೇಲೆ ಕೇಸು ಬಿದ್ದಾಗ ಅಥವಾ ಕುರ್ಚಿ ನಡುಗಿದಾಗ ಮಾತ್ರ ಸುಪ್ರೀಂ ಕೋರ್ಟ್ಗೆ ಓಡುತ್ತಾರೆ ಎಂಬ aparatvavide. ಆದರೆ ಈ ಬಾರಿ ಕರ್ನಾಟಕ ಸರ್ಕಾರ ಮತದಾರರ ಪರವಾಗಿ, ಜನರ ಸಾಂವಿಧಾನಿಕ ಹಕ್ಕಿನ ರಕ್ಷಣೆಗಾಗಿ ಕೋರ್ಟ್ ಮೆಟ್ಟಿಲೇರುತ್ತಿರುವುದು ಅತ್ಯಂತ ಶ್ಲಾಘನೀಯ ಬೆಳವಣಿಗೆ.
ದೇಶದಲ್ಲಿ ತನಿಖಾ ಸಂಸ್ಥೆಗಳು ಮತ್ತು ಸಾಂವಿಧಾನಿಕ ಸಂಸ್ಥೆಗಳು ಒಂದು ಪಕ್ಷದ ಹಿತಾಸಕ್ತಿಗೆ ತಕ್ಕಂತೆ ಕೆಲಸ ಮಾಡುತ್ತಿವೆ ಎಂಬ ಆರೋಪಗಳ ನಡುವೆ, ಚುನಾವಣಾ ಆಯೋಗದ ಏಕಪಕ್ಷೀಯ ಧೋರಣೆಗೆ ಕೋರ್ಟ್ ಮೂಲಕವೇ ಕಡಿವಾಣ ಹಾಕುವುದು ಇಂದಿನ ತುರ್ತು ಅಗತ್ಯವಾಗಿದೆ. ಪ್ರಜಾಪ್ರಭುತ್ವ ಉಳಿಯಬೇಕಾದರೆ ಮೊದಲು ಮತದಾರ ಉಳಿಯಬೇಕು. ಸರ್ಕಾರದ ಈ ಹೆಜ್ಜೆ ಯಶಸ್ವಿಯಾದರೆ, ಅದು ಇಡೀ ದೇಶದ ಒಕ್ಕೂಟ ವ್ಯವಸ್ಥೆಗೆ ಮತ್ತು ಪ್ರಜಾಪ್ರಭುತ್ವದ ಮೌಲ್ಯಗಳಿಗೆ ಸಿಗುವ ದೊಡ್ಡ ಜಯವಾಗಲಿದೆ.
