Indian politics: ರಾಜಕೀಯ ಎಂಬುದು ಕೇವಲ ಸಿದ್ಧಾಂತಗಳ ಸಂಘರ್ಷವಲ್ಲ; ಅದು ಸೋಗಲಾಡಿತನ, ಮಾಧ್ಯಮಗಳ ಬಣ್ಣಬಣ್ಣದ ಕಲ್ಪನೆಗಳು ಮತ್ತು ಅಧಿಕಾರದ ಅನುಕೂಲ ಸಿಂಧು ನೀತಿಯನ್ನು ಅನಾವರಣಗೊಳಿಸುವ ಕನ್ನಡಿ. ಇದಕ್ಕೆ ಅತ್ಯುತ್ತಮ ಉದಾಹರಣೆಯೆಂದರೆ, ಸಮಕಾಲೀನ ಜಾಗತಿಕ ರಾಜಕಾರಣದಲ್ಲಿ ಮುಂಚೂಣಿಯಲ್ಲಿರುವ ಇಬ್ಬರು ಇಟಾಲಿಯನ್ ಮೂಲದ ಮಹಿಳೆಯರ ಸುತ್ತ ಭಾರತೀಯ ಸಮಾಜ ಕಟ್ಟಿಕೊಂಡಿರುವ ಭಿನ್ನ ದೃಷ್ಟಿಕೋನಗಳು. ಒಬ್ಬರು ಭಾರತದ ಸೊಸೆಯಾಗಿ ಬಂದು, ಇಲ್ಲಿನ ಏಳುಬೀಳುಗಳನ್ನು ಕಂಡು ಧೀಮಂತ ನಾಯಕಿಯಾಗಿ ಬೆಳೆದ ಸೋಯಾ ಗಾಂಧಿ (Sonia Gandhi). ಮತ್ತೊಬ್ಬರು ಇಟಲಿಯ ವರ್ತಮಾನದ ಪ್ರಧಾನಿಯಾಗಿ ಜಾಗತಿಕ ಗಮನ ಸೆಳೆಯುತ್ತಿರುವ ಜಾರ್ಜಿಯಾ ಮೆಲೋನಿ (Giorgia Meloni). ಈ ಇಬ್ಬರೂ ಮಹಿಳೆಯರ ಹಿನ್ನೆಲೆ, ಅವರು ಎದುರಿಸಿದ ಸವಾಲುಗಳು ಮತ್ತು ಭಾರತದ ರಾಜಕೀಯ ವ್ಯವಸ್ಥೆ ಅವರನ್ನು ನೋಡುವ ರೀತಿ—ನಮ್ಮದೇ ಸಮಾಜದ ಬೌದ್ಧಿಕ ದಿವಾಳಿತನವನ್ನು ಎತ್ತಿ ತೋರಿಸುತ್ತದೆ.
ಇಟಲಿಯ ಸೊಸೆ ಮತ್ತು ಭಾರತದ ಅಗ್ನಿಪರೀಕ್ಷೆ
ದಶಕಗಳ ಹಿಂದೆ ಭಾರತದ ಅತ್ಯಂತ ಪ್ರಭಾವಿ ರಾಜಕೀಯ ಕುಟುಂಬದ ಸೊಸೆಯಾಗಿ ಕಾಲಿಟ್ಟ ಸೋನಿಯಾ ಗಾಂಧಿ ಅವರ ಜೀವನ ಕೇವಲ ವೈಭವದ ಕಥೆಯಲ್ಲ, ಅದೊಂದು ದುರಂತ ಮತ್ತು ಅಗ್ನಿಪರೀಕ್ಷೆಗಳ ಸರಣಿ. ಅತ್ಯಂತ ಸಾಮಾನ್ಯ ಹಿನ್ನೆಲೆಯಿಂದ ಬಂದು, ಕಷ್ಟದ ದಿನಗಳಲ್ಲಿ ವಿದ್ಯಾಭ್ಯಾಸದ ಜೊತೆಗೆ ಪಾರ್ಟ್ಟೈಮ್ ಕೆಲಸ ಮಾಡಿಕೊಂಡಿದ್ದ ಈ ಮಹಿಳೆಗೆ ಭಾರತ ನೀಡಿದ ಸ್ವಾಗತ ಸುಲಭದ್ದಾಗಿರಲಿಲ್ಲ. ಪ್ರಧಾನಿಯಾಗಿದ್ದ ಅತ್ತೆ ಇಂದಿರಾ ಗಾಂಧಿಯವರ ಕ್ರೂರ ಹತ್ಯೆ, ಆನಂತರ ಪತಿ ರಾಜೀವ್ ಗಾಂಧಿಯವರ ಭೀಕರ ರಕ್ತಪಾತ—ಇವೆಲ್ಲವೂ ಕಣ್ಣೆದುರೇ ನಡೆದರೂ ಸೋನಿಯಾ ಈ ದೇಶವನ್ನು ತೊರೆದು ಹೋಗಲಿಲ್ಲ. ತನ್ನ ಇಬ್ಬರು ಮಕ್ಕಳನ್ನು ಕಟ್ಟಿಕೊಂಡು, ಈ ಮಣ್ಣನ್ನೇ ತನ್ನದೆಂದು ನಂಬಿ ಇಲ್ಲೇ ಉಳಿದರು.
ಕಾಂಗ್ರೆಸ್ ಪಕ್ಷದ ಅಸ್ತಿತ್ವವೇ ಸಂಕಟದಲ್ಲಿದ್ದಾಗ ನಾಯಕತ್ವ ವಹಿಸಿಕೊಂಡು, ಪಕ್ಷವನ್ನು ಅಧಿಕಾರಕ್ಕೆ ತಂದರು. ಸ್ವತಃ ಪ್ರಧಾನಿಯಾಗುವ ಸರ್ವ ಅವಕಾಶಗಳಿದ್ದಾಗಲೂ, ಆ ಹುದ್ದೆಯನ್ನು ತ್ಯಾಗ ಮಾಡಿ ಡಾ. ಮನಮೋಹನ್ ಸಿಂಗ್ ಅವರಂತಹ ಜಾಗತಿಕ ಅರ್ಥಶಾಸ್ತ್ರಜ್ಞನನ್ನು ಪ್ರಧಾನಿ ಗಾದಿಗೇರಿಸಿದ ಇತಿಹಾಸ ಇವರದ್ದು. ಆದರೆ, ಭಾರತೀಯ ರಾಜಕೀಯದ ಒಂದು ವರ್ಗ ಇವರಿಗೆ ನೀಡಿದ ಗೌರವವೇನು? ದಶಕಗಳ ಕಾಲ ಇವರನ್ನು “ಇಟಲಿವಾಲಿ” ಎಂದು ಕರೆಯಲಾಯಿತು, “ಬಾರ್ ಡ್ಯಾನ್ಸರ್” ಎಂಬ ಕೀಳುಮಟ್ಟದ ಪದಗಳಿಂದ ಚಾರಿತ್ರ್ಯ ವಧೆ ಮಾಡಲಾಯಿತು. ಈ ದೇಶದ ಪೌರತ್ವ ಪಡೆದು, ಇಲ್ಲಿನ ಸಂಸ್ಕೃತಿಯನ್ನು ಅಪ್ಪಿ, ತನ್ನ ಗಂಡ-ಅತ್ತೆಯನ್ನು ದೇಶಕ್ಕಾಗಿ ಬಲಿ ಕೊಟ್ಟ ಮಹಿಳೆಯನ್ನು ಕೊನೆಯವರೆಗೂ ‘ಹೊರಗಿನವಳು’ ಎಂದೇ ಬಿಂಬಿಸಲಾಯಿತು. ಆದರೆ, ಈ ಎಲ್ಲ ವಿಷಪೂರಿತ ಟ್ರೋಲ್ಗಳ ಮಧ್ಯೆಯೂ ಆಕೆ ಕಲ್ಲುಬಂಡೆಯಂತೆ ಸ್ಥಿತಪ್ರಜ್ಞರಾಗಿ ನಿಂತರು.
‘ಪಪ್ಪು’ ಬಿರುದಿನ ಹಿಂದಿನ ರಾಜಕೀಯ ಪಿತೂರಿ ಮತ್ತು ವಾಸ್ತವ
ಸೋನಿಯಾ ಗಾಂಧಿಯವರ ಮಗ ರಾಹುಲ್ ಗಾಂಧಿ ಅವರ ಇಮೇಜ್ ಧ್ವಂಸ ಮಾಡಲು ರಾಜಕೀಯ ವಿರೋಧಿಗಳು ಹೂಡಿದ ಬಂಡವಾಳ ಮತ್ತು ನಡೆಸಿದ ವ್ಯವಸ್ಥಿತ ತಂತ್ರಗಾರಿಕೆ ಸಣ್ಣದೇನಲ್ಲ. ಬಾಯಲ್ಲಿ ಚಿನ್ನದ ಚಮಚ ಇಟ್ಟುಕೊಂಡು ಹುಟ್ಟಿದ ನಾಯಕ ಎಂದು ಟೀಕಿಸುತ್ತಲೇ, ಅವರನ್ನು “ಪಪ್ಪು” ಎಂದು ಹೀಯಾಳಿಸಲು ಸಾವಿರಾರು ಕೋಟಿ ರೂಪಾಯಿಗಳ ಸೋಶಿಯಲ್ ಮೀಡಿಯಾ ಅಭಿಯಾನಗಳನ್ನು ನಡೆಸಲಾಯಿತು. ಆದರೆ, ನಿಜವಾದ ನಾಯಕ ಯಾರೆಂಬುದನ್ನು ಕಾಲ ನಿರ್ಣಯಿಸುತ್ತದೆ. ‘ಭಾರತ್ ಜೋಡೋ ಯಾತ್ರೆ’ಯ ಮೂಲಕ ದೇಶದ ಉದ್ದಗಲಕ್ಕೂ ಸಾವಿರಾರು ಕಿಲೋಮೀಟರ್ ಬರಿಗಾಲಿನಲ್ಲಿ ನಡೆಯುತ್ತಾ, ಬಿಸಿಲು-ಮಳೆ ಎನ್ನದೆ ಶ್ರೀಸಾಮಾನ್ಯನ ಕಣ್ಣೀರು ಒರೆಸಿದಾಗ ರಾಹುಲ್ ಗಾಂಧಿ ಅವರ ನಿಜವಾದ ವ್ಯಕ್ತಿತ್ವ ಅನಾವರಣಗೊಂಡಿತು. ಜಾತಿ, ಧರ್ಮದ ಭೇದವಿಲ್ಲದೆ ಜನರನ್ನ ಅಪ್ಪಿಕೊಳ್ಳುವ ಅವರ ನಡವಳಿಕೆ, ತನಗೆ ಸಿಕ್ಕ ರಾಜಕೀಯ ನಿಂದನೆಗಳನ್ನು ಪ್ರೀತಿಯಿಂದಲೇ ಎದುರಿಸಿದ ರೀತಿ—ಅವರೊಬ್ಬ ಜಂಟಲ್ಮನ್ ಮತ್ತು ಪ್ರಬುದ್ಧ ಜನನಾಯಕ ಎಂಬುದನ್ನು ಸಾಬೀತುಪಡಿಸಿತು.
ರಾಜಕೀಯದಲ್ಲಿ ಒಬ್ಬ ವ್ಯಕ್ತಿಯ ನಿಜವಾದ ಯೋಗ್ಯತೆಯನ್ನು ಮುಚ್ಚಿಡಲು ಸುಳ್ಳು ಕಥೆಗಳನ್ನು ಸೃಷ್ಟಿಸಬಹುದು, ಆದರೆ ಆತನ ಜನಪರ ಹೋರಾಟವನ್ನು ಎಂದಿಗೂ ಹತ್ತಿಕ್ಕಲು ಸಾಧ್ಯವಿಲ್ಲ.
ಮೆಲೋನಿ ಸಂಭ್ರಮ ಮತ್ತು ದ್ವಂದ್ವ ನೀತಿಯ ಪರಾಕಾಷ್ಠೆ
ಈಗ ಚಿತ್ರಣದ ಮತ್ತೊಂದು ಬದಿಗೆ ಬರೋಣ. ಜಾರ್ಜಿಯಾ ಮೆಲೋನಿ ಇಟಲಿಯ ಪ್ರಧಾನಿ. ಆಕೆಯೂ ಕಷ್ಟದ ದಿನಗಳಿಂದ ಬಂದವರು, ಬಾರ್ಟೆಂಡಿಂಗ್ ಕೆಲಸ ಮಾಡಿದವರು. ಆಕೆ ತನ್ನ ಹಳೆಯ ದಿನಗಳ ಬಗ್ಗೆ ಹೆಮ್ಮೆಯಿಂದ ಮಾತನಾಡಿದಾಗ ಜಗತ್ತು ಮೆಚ್ಚುತ್ತದೆ. ಭಾರತದಲ್ಲಂತೂ ಆಕೆಯನ್ನು ಸಾಮಾಜಿಕ ಜಾಲತಾಣಗಳಲ್ಲಿ “ಮನೆಮಗಳು” ಎನ್ನುವಂತೆ ಸಂಭ್ರಮಿಸಲಾಗುತ್ತದೆ. ಮೀಮ್ಗಳು, ರೀಲ್ಸ್ಗಳ ಮೂಲಕ ಆಕೆಗೆ ಜೈಕಾರ ಹಾಕಲಾಗುತ್ತದೆ.
ಇಲ್ಲೇ ಇರುವುದು ಭಾರತೀಯ ರಾಜಕಾರಣದ ಅತ್ಯಂತ ದೊಡ್ಡ ವಿಪರ್ಯಾಸ! ಭಾರತದ ಮಣ್ಣಿನಲ್ಲಿ ಬದುಕಿ, ಇಲ್ಲಿನ ಸಾರ್ವಜನಿಕ ಜೀವನದಲ್ಲಿ ಸಕ್ರಿಯವಾಗಿರುವ ಮಹಿಳೆ ‘ವಿದೇಶಿ’ಯಾಗಿ ಉಳಿಯುತ್ತಾಳೆ. ಆದರೆ, ಕೇವಲ ಫೋಟೋಜೆನಿಕ್ ಆಗಿರುವ, ರೀಲ್ಸ್ಗಳಿಗೆ ಕಂಟೆಂಟ್ ನೀಡುವ, ಭಾರತದ ಜೊತೆ ಯಾವುದೇ ಭಾವನಾತ್ಮಕ ನಂಟಿಲ್ಲದ ಇಟಲಿಯ ಮತ್ತೊಬ್ಬ ಮಹಿಳೆ ನಮಗೆ ‘ಸ್ವಂತದವಳು’ ಆಗಿಬಿಡುತ್ತಾಳೆ! ದೇಶದ ಹಿತಾಸಕ್ತಿಯ ವಿಷಯ ಬಂದಾಗ ಮೆಲೋನಿ ಯಾವತ್ತೂ ಇಟಲಿಯ ಪರವಾಗಿಯೇ ನಿಲ್ಲುತ್ತಾರೆಯೇ ಹೊರತು ಭಾರತದ ಪರವಾಗಿ ಅಲ್ಲ ಎಂಬ ಕನಿಷ್ಠ ಜ್ಞಾನವೂ ಈ ಸೋಷಿಯಲ್ ಮೀಡಿಯಾ ಭಕ್ತರಿಗೆ ಇಲ್ಲದಿರುವುದು ದುರಂತ.
ಆರ್ಥಿಕ ಬಿಕ್ಕಟ್ಟು ಮತ್ತು ಪ್ರಧಾನಿಯವರ ‘ರೀಲ್ಸ್’ ಪ್ರಬುದ್ಧತೆ
ಭಾರತ ಇಂದು ಆರ್ಥಿಕವಾಗಿ ಹತ್ತಾರು ಸವಾಲುಗಳನ್ನು ಎದುರಿಸುತ್ತಿದೆ. ನಿರುದ್ಯೋಗ, ಪೆಟ್ರೋಲ್-ಡೀಸೆಲ್ ಬೆಲೆ ಏರಿಕೆ, ಗ್ಯಾಸ್ ಸಿಲಿಂಡರ್ ದರ ಮತ್ತು ದಿನಬಳಕೆ ವಸ್ತುಗಳ ಬೆಲೆ ಗಗನಕ್ಕೇರಿ ಸಾಮಾನ್ಯ ಜನರ ಬದುಕು ದುಸ್ತರವಾಗಿದೆ. ಸಾರ್ವಜನಿಕ ವೇದಿಕೆಗಳಲ್ಲಿ ಜನರಿಗೆ “ಖರ್ಚು ಕಡಿಮೆ ಮಾಡಿ, ವಿದೇಶಿ ಪ್ರವಾಸ ನಿಲ್ಲಿಸಿ, ಸಾರ್ವಜನಿಕ ಸಾರಿಗೆ ಬಳಸಿ” ಎಂದು ಉಪದೇಶ ನೀಡುವ ಪ್ರಧಾನಿ ನರೇಂದ್ರ ಮೋದಿಯವರು, ಮರುದಿನವೇ ಕೋಟಿಗಟ್ಟಲೆ ವೆಚ್ಚದ ವಿದೇಶಿ ಪ್ರವಾಸ ಕೈಗೊಳ್ಳುತ್ತಾರೆ.
ಅಂತರರಾಷ್ಟ್ರೀಯ ವೇದಿಕೆಗಳಲ್ಲಿ ದೇಶದ ಗಂಭೀರ ಸಮಸ್ಯೆಗಳ ಬಗ್ಗೆ ಚರ್ಚಿಸಬೇಕಾದ ಪ್ರಧಾನಿಯೊಬ್ಬರು, ಇಟಲಿಗೆ ಹೋಗಿ ಅಲ್ಲಿನ ಮಹಿಳಾ ಪ್ರಧಾನಿಗೆ ಕೇವಲ 50 ರೂಪಾಯಿಯ ಚಾಕಲೇಟ್ ಪ್ಯಾಕೆಟ್ ನೀಡಿ, “ಚಾಕಲೇಟ್ ಹೆಸರು ಮೆಲೋಡಿ, ನಿನ್ನ ಹೆಸರು ಮೆಲೋನಿ, ನನ್ನ ಹೆಸರು ಮೋದಿ (ಮೆಲೋನಿ + ಮೋದಿ = ಮೆಲೋಡಿ)” ಎಂದು ಪ್ರಾಸಬದ್ಧವಾಗಿ ಜೋಕ್ ಮಾಡುತ್ತಾ ರೀಲ್ಸ್ ಮಾಡಿದ್ದು ಮತ್ತು ಪ್ರೀ-ವೆಡ್ಡಿಂಗ್ ಶೂಟ್ ಮಾದರಿಯಲ್ಲಿ ಫೋಟೋಗಳಿಗೆ ಪೋಸ್ ನೀಡಿದ್ದು ದೇಶದ ಪ್ರಧಾನಿ ಹುದ್ದೆಯ ಘನತೆಗೆ ತಕ್ಕುದೇ? ಎಂದು ಸಾರ್ವಜನಿಕರು ಪ್ರಶ್ನಿಸುವಂತಾಗಿದೆ. ಬೇರೆಯವರನ್ನು ‘ಪಪ್ಪು’ ಎಂದು ಕರೆಯುತ್ತಿದ್ದವರೇ ಇಂದು ಜಾಗತಿಕ ಮಟ್ಟದಲ್ಲಿ ಅತ್ಯಂತ ಅಪ್ರಬುದ್ಧ ನಡವಳಿಕೆಯಿಂದಾಗಿ ಟ್ರೋಲ್ಗೆ ಒಳಗಾಗುತ್ತಿರುವುದು ಕಾಲದ ಕ್ರೂರ ಲೇವಡಿ.
Thank you for the gift pic.twitter.com/7ePxbJwPbA
— Giorgia Meloni (@GiorgiaMeloni) May 20, 2026
ರಾಜಕೀಯದಲ್ಲಿ ಮಹಿಳಾ ನಾಯಕತ್ವವನ್ನು ಒಪ್ಪಿಕೊಳ್ಳುವುದು ಎಂದರೆ ಕೇವಲ ಅವರ ಬಾಹ್ಯ ರೂಪ ಅಥವಾ ಸಾಮಾಜಿಕ ಜಾಲತಾಣಗಳ ಟ್ರೆಂಡ್ಗಳನ್ನು ನೋಡುವುದಲ್ಲ. ಸೋನಿಯಾ ಗಾಂಧಿ ಮತ್ತು ಜಾರ್ಜಿಯಾ ಮೆಲೋನಿ ಇಬ್ಬರೂ ತಮ್ಮದೇ ಆದ ಹಾದಿಯಲ್ಲಿ ಯಶಸ್ಸು ಕಂಡವರು. ಆದರೆ, ಭಾರತೀಯ ರಾಜಕೀಯ ವ್ಯವಸ್ಥೆಯು ಇವರಿಬ್ಬರನ್ನು ತೂಗಿದ ರೀತಿ ಮಾತ್ರ ನಮ್ಮ ಸೋಗಲಾಡಿತನವನ್ನು ಬಯಲು ಮಾಡುತ್ತದೆ.
ಒಬ್ಬ ಮಹಿಳೆ ರಾಷ್ಟ್ರೀಯವಾದಕ್ಕೆ ಮತ್ತು ರಾಜಕೀಯ ಲಾಭಕ್ಕೆ ಕಂಟೆಂಟ್ ಒದಗಿಸುವವರೆಗೂ ಆಕೆ ನಮಗೆ ಪ್ರೀತಿಯ ಪಾತ್ರಳಾಗುತ್ತಾಳೆ; ಅದೇ ಮತ್ತೊಬ್ಬ ಮಹಿಳೆ ತನ್ನ ಇಡೀ ಜೀವನವನ್ನೇ ಈ ದೇಶಕ್ಕಾಗಿ ಸವೆಸಿದರೂ ಆಕೆಯನ್ನು ಕೇವಲ ರಾಜಕೀಯ ವಿರೋಧಕ್ಕಾಗಿ ನಿಂದಿಸಲಾಗುತ್ತದೆ. ಸಿನಿಮಾ ಚಿತ್ರಕಥೆಗಿಂತಲೂ ರೋಚಕವಾಗಿರುವ ಈ ರಾಜಕೀಯ ನಾಟಕದಲ್ಲಿ, ಜನರ ನೆನಪುಗಳು ಎಷ್ಟು ಸ್ವಾರ್ಥಪೂರಿತ ಮತ್ತು ಸೀಮಿತ ಎಂಬುದಕ್ಕೆ ಇತ್ತೀಚಿನ ಘಟನೆಗಳೇ ಸಾಕ್ಷಿ.
