ಬಾಗಲಕೋಟೆ (Bagalkot) ಜಿಲ್ಲೆಯ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಇಲಾಖೆಯಲ್ಲಿ ಇತ್ತೀಚೆಗೆ ನಡೆದ ಬೆಳವಣಿಗೆಗಳು ಕೇವಲ ಸಾಧಾರಣ ಆಡಳಿತಾತ್ಮಕ ವರ್ಗಾವಣೆ ಅಥವಾ ಅಮಾನತಿನ ಕಥೆಯಲ್ಲ. ಇದು ನಿಯಮಾವಳಿಗಳಿಗೆ ಬದ್ಧರಾಗಿ ಕೆಲಸ ಮಾಡಲು ಯತ್ನಿಸಿದ ಒಬ್ಬ ಕರ್ತವ್ಯನಿಷ್ಠ ಅಧಿಕಾರಿಯನ್ನು ಬಲಿಪಶು ಮಾಡಲು ಹೆಣೆದ ರಾಜಕೀಯ ಹಾಗೂ ಆಡಳಿತಾತ್ಮಕ ಪಿತೂರಿಯ ಬೃಹತ್ ಜಾಲವಿರಬಹುದು ಎಂಬ ತೀವ್ರ ಸಂಶಯ ಸಾರ್ವಜನಿಕ ವಲಯದಲ್ಲಿ ಎದ್ದಿದೆ, ಅದಕ್ಕೆ ಪೂರಕ ದಾಖಲಾತಿಗಳು ಲಭ್ಯ ಆಗಿವೆ. ಕೇವಲ ಎರಡು ತಿಂಗಳ ಹಿಂದಷ್ಟೇ ಬಾಗಲಕೋಟೆ ಜಿಲ್ಲಾ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಅಧಿಕಾರಿಯಾಗಿ (DHO) ಅಧಿಕಾರ ವಹಿಸಿಕೊಂಡಿದ್ದ ಡಾ. ರಾಜಕುಮಾರ್ ಯರಗಲ್ ಅವರನ್ನು ಏಕಾಏಕಿ ಅಮಾನತುಗೊಳಿಸಿರುವ ಹಿಂದೆ ಬಲಾಢ್ಯ ರಾಜಕೀಯ ಶಕ್ತಿಗಳು, ಭ್ರಷ್ಟ ಹಿತಾಸಕ್ತಿಗಳು ಹಾಗೂ ಆಡಳಿತ ಯಂತ್ರದ ಶಾಮೀಲಾತಿ ಸ್ಪಷ್ಟವಾಗಿ ಎದ್ದು ಕಾಣುತ್ತಿದೆ ಎಂದು ಆರೋಪಿಸಲಾಗುತ್ತಿದೆ.
ಸೆಪ್ಟೆಂಬರ್ 5 ರಂದೇ ಅಮಾನತು ಮಾಡಲು ಹೆಣೆದಿತ್ತಾ ಪ್ರೀಪ್ಲಾನ್?
ಬಾಗಲಕೋಟೆ (Bagalkot) ಜಿಲ್ಲಾ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಅಧಿಕಾರಿಯಾಗಿ (DHO) ಅಮಾನತು ವಿಚಾರದಲ್ಲಿ ಲಭ್ಯವಿರುವ ದಿನಾಂಕವಾರಿ ವಿದ್ಯಮಾನಗಳನ್ನು ಸೂಕ್ಷ್ಮವಾಗಿ ಗಮನಿಸಿದರೆ, ಡಾ. ರಾಜಕುಮಾರ್ ಯರಗಲ್ ಅವರನ್ನು ಸೆಪ್ಟೆಂಬರ್ 5 ರಂದೇ ಹುದ್ದೆಯಿಂದ ತೆಗೆದುಹಾಕಲು ಪ್ಲಾನ್ ಸಿದ್ಧವಾಗಿತ್ತು ಎನ್ನುವ ಮಾತುಗಳು ಕೇಳಿಬರುತ್ತಿವೆ:
- ಫಾರ್ಮ್ಹೌಸ್ ಸಭೆಯ ಅಪಮಾನ: ಸೆಪ್ಟೆಂಬರ್ 3 ರಂದು ಜಿಲ್ಲಾ ಉಸ್ತುವಾರಿ ಸಚಿವರು ಜಿಲ್ಲಾ ಮಟ್ಟದ ಅಧಿಕಾರಿಗಳನ್ನು ತಮ್ಮ ಖಾಸಗಿ ಫಾರ್ಮ್ಹೌಸ್ಗೆ ಕರೆಯಿಸಿದ್ದರು. ಈ ಭೇಟಿ ಕಾರ್ಯಕ್ರಮ ಮಧ್ಯಾಹ್ನಕ್ಕೆ ನಿಗದಿಯಾಗಿತ್ತು ಆದರೆ, ರಾತ್ರಿಯವರೆಗೆ ಅಧಿಕಾರಿಗಳನ್ನು ಕಾಯಿಸಿ, ರಾತ್ರಿ 10 ಗಂಟೆಯ ನಂತರ ಬರುತ್ತಾರೆ ಸಚಿವರು… ಆಗ ಇತರ ಅಧಿಕಾರಿಗಳೊಂದಿಗೆ ಚರ್ಚಿಸಿದ ಅವರು, ಆದರೆ ಡಾ. ಯರಗಲ್ ಅವರನ್ನು ಕಂಡ ತಕ್ಷಣವೇ, “ನಿಮ್ಮ ಅಗತ್ಯ ಇಲ್ಲ, ನಿಮ್ಮ ಜೊತೆ ಏನೂ ಮಾತನಾಡೋದಿಲ್ಲ, ನೀವು ಹೊರಡಿ” ಎಂದು ವಾಪಸ್ ಕಳುಹಿಸುತ್ತಾರಂತೆ…
- ಸಿಇಒ ಮೆಮೋ ಹಿನ್ನೆಲೆ: ಆದಾಗ್ಯೂ, ಸೆಪ್ಟೆಂಬರ್ 4ರಂದು ಕೂಡಲಸಂಗಮದ ಆಸ್ಪತ್ರೆ ಭೇಟಿ ಸೇರಿದಂತೆ ಸಚಿವರ ಕಾರ್ಯಕ್ರಮಗಳ ನಿರ್ವಹಣೆಯಲ್ಲಿ ಯರಗಲ್ ನಿರತರಾಗಿರುತ್ತಾರೆ. ಆದರೆ ಸಂಜೆ ವೇಳೆಗೆ ಜಿಲ್ಲಾ ಪಂಚಾಯತ್ ಸಿಇಒ ಅವರು ಯರಗಲ್ ಅವರಿಗೆ ನೋಟಿಸ್/ಮೆಮೊ ಜಾರಿ ಮಾಡಿದ್ದರು. ಆಶ್ಚರ್ಯಕರ ಸಂಗತಿಯೆಂದರೆ, ಆ ಮೆಮೊದಲ್ಲಿ “ಸಚಿವರ ಮೌಖಿಕ ಆದೇಶದ ಮೇರೆಗೆ” ಎಂದು ಸ್ಪಷ್ಟವಾಗಿ ಉಲ್ಲೇಖಿಸಲಾಗಿತ್ತು.
- ಸೆಪ್ಟೆಂಬರ್ 5 ರ ಪ್ಲಾನ್ ಫೇಲ್: ಸೆಪ್ಟೆಂಬರ್ 5 ರಂದು ಯರಗಲ್ ಅವರು ಸಚಿವರನ್ನು ಭೇಟಿಯಾಗಿ, “ನಾನು ಕಳೆದ 3-4 ದಿನಗಳಿಂದ ನಿಮ್ಮ ಕಣ್ಣಮುಂದೆಯೇ ಕರ್ತವ್ಯದಲ್ಲಿದ್ದೇನೆ, ಆದರೂ ಗೈರುಹಾಜರಿ ನೆಪವೊಡ್ಡಿ ಮೆಮೊ ನೀಡಲಾಗಿದೆ” ಎಂದು ತಾವಿದ್ದ ಸ್ಥಳಗಳ ದಾಖಲೆ ವಿವರ ನೀಡಿದಾಗ, ಆ ದಿನ ಅಮಾನತು ಮಾಡಲು ಅವರಿಗೆ ಅವಕಾಶವೇ ಸಿಗಲಿಲ್ಲ ಎನ್ನಲಾಗಿದೆ.
ಸಿಇಒ ದುರ್ವರ್ತನೆ, ನೌಕರರ ಸಂಘದ ಅಧ್ಯಕ್ಷನ ‘ಏಜೆನ್ಸಿ ದಂಧೆ’ ಮತ್ತು ಅಧಿಕಾರಶಾಹಿ ದೌರ್ಜನ್ಯ!
ಸೆಪ್ಟೆಂಬರ್ 5 ರ ಅಮಾನತು ಪ್ಲಾನ್ ವಿಫಲವಾದ ನಂತರ, ಮತ್ತೊಂದು ನೆಪಕ್ಕಾಗಿ ಕಾಯುತ್ತಿದ್ದ ಆಡಳಿತ ಯಂತ್ರಕ್ಕೆ ಬಾಗಲಕೋಟೆ (Bagalkot) ಸಿಇಒ ಅವರ ಉದ್ಧಟತನ, ನೌಕರರ ಸಂಘದ ಅಧ್ಯಕ್ಷರ ಹಿತಾಸಕ್ತಿ ಹಾಗೂ ಇಲಾಖೆಯೊಳಗಿನ ಸಿಂಡಿಕೇಟ್ ದಾರಿ ಮಾಡಿಕೊಟ್ಟಿತು ಎಂಬ ಗಂಭೀರ ಆರೋಪವಿದೆ:
- ಸಾರ್ವಜನಿಕರೊಂದಿಗೂ ನಾಲಿಗೆ ಹರಿಬಿಟ್ಟಿದ್ದ ಸಿಇಒ ಹಿನ್ನೆಲೆ: ಜಿ.ಪಂ. ಸಿಇಒ ಅವರ ಈ ರೀತಿಯ ನಡವಳಿಕೆ, ದುರ್ವರ್ತನೆ ಮತ್ತು ಅಧಿಕಾರದ ಗರ್ವ ಇದೇ ಮೊದಲೇನಲ್ಲ ಎನ್ನಲಾಗುತ್ತಿದೆ. ಈ ಹಿಂದೆ ಸಾರ್ವಜನಿಕರೊಂದಿಗೆ ಅತ್ಯಂತ ಕೀಳಾಗಿ ನಾಲಿಗೆ ಹರಿಬಿಟ್ಟು, ಜಗಳಕ್ಕಿಳಿದು ಭಾರಿ ಗಲಾಟೆಗೆ ಕಾರಣರಾಗಿದ್ದರು ಎಂದು ಮೂಲಗಳು ತಿಳಿಸಿವೆ. ಆ ಸಂದರ್ಭದಲ್ಲಿ ಅವರ ದುರ್ವರ್ತನೆ ಮತ್ತು ಸಾರ್ವಜನಿಕರ ಮೇಲಿನ ದೌರ್ಜನ್ಯದ ವಿಡಿಯೋ ಸಾಮಾಜಿಕ ಮಾಧ್ಯಮಗಳಲ್ಲಿ (Social Media) ವೈರಲ್ ಆಗಿ ಸಾರ್ವಜನಿಕ ವಲಯದಲ್ಲಿ ಭಾರಿ ಆಕ್ರೋಶಕ್ಕೆ ಈಡಾಗಿತ್ತು. ಸಾರ್ವಜನಿಕರನ್ನೇ ಹಗುರವಾಗಿ ಕಾಣುವ ಇಂತಹ ಅಧಿಕಾರಿಗೆ ಸಚಿವರ ಬೆಂಬಲವಿದ್ದಾಗ, ಸಹೋದ್ಯೋಗಿ ಅಧಿಕಾರಿಗಳ ಮೇಲೆ ಒತ್ತಡ ಹೇರುವುದು ಇನ್ನಷ್ಟು ಸುಲಭವಾಯಿತು ಏಂದೆನಿಸುತ್ತದೆ.
- ಸರ್ಕಾರಿ ನೌಕರರ ಸಂಘದ ಅಧ್ಯಕ್ಷನ ಹಿತಾಸಕ್ತಿ ಧಕ್ಕೆ: ಈ ಇಡೀ ಅಮಾನತಿನ ಪಿತೂರಿಯ ಹಿನ್ನೆಲೆಯಲ್ಲಿ ಸರ್ಕಾರಿ ನೌಕರರ ಸಂಘದ ಜಿಲ್ಲಾಧ್ಯಕ್ಷ ಮಲ್ಲಪ್ಪ ಬಳ್ಳಾರಿ ಅವರ ಪಾತ್ರವೂ ಅತ್ಯಂತ ಪ್ರಮುಖವಾಗಿದೆ ಎಂಬ ಆರೋಪಗಳು ಕೇಳಿಬರುತ್ತಿವೆ. ಮಲ್ಲಪ್ಪ ಬಳ್ಳಾರಿಯವರು ಗುತ್ತಿಗೆ ಆಧಾರದ ಮೇಲೆ ನೌಕರರನ್ನು ಪೂರೈಸುವ ಏಜೆನ್ಸಿ ವಿಚಾರದಲ್ಲಿ ಭಾರಿ ಪ್ರಮಾಣದ ಅಕ್ರಮ ಎಸಗುತ್ತಿದ್ದರು ಎಂಬ ದೂರುಗಳಿದ್ದವು. ಡಾ. ಯರಗಲ್ ಅವರು ಡಿಎಚ್ಒ ಆಗಿ ಬಂದ ಮೇಲೆ ಈ ಏಜೆನ್ಸಿ ಅಕ್ರಮಗಳಿಗೆ ಕಟ್ಟುನಿಟ್ಟಿನ ಅಡಚಣೆ ಉಂಟುಮಾಡಿದ್ದರು ಎನ್ನಲಾಗಿದೆ. ಈ ಕಾರಣಕ್ಕಾಗಿಯೇ ಯರಗಲ್ ಅವರ ವಿರುದ್ಧ ಸೇಡು ತೀರಿಸಿಕೊಳ್ಳಲು ಮಲ್ಲಪ್ಪ ಬಳ್ಳಾರಿ ಕೂಡ ಈ ಪ್ರಕ್ರಿಯೆಯಲ್ಲಿ ಶಾಮೀಲಾಗಿದ್ದರು ಎಂಬ ಮಾತುಗಳು ಕೇಳಿಬರುತ್ತಿವೆ.
- ಸಿಬ್ಬಂದಿ ಪರ ಧ್ವನಿ ಎತ್ತಿದ್ದೇ ಅಪರಾಧವೇ?: ಸೆಪ್ಟೆಂಬರ್ 9ರ ರಾತ್ರಿ 8 ಗಂಟೆಯವರೆಗೆ ಸಿಇಒ ಸಭೆ ನಡೆಸಿದರು. ಸಭೆ ಮುಗಿದ ತಕ್ಷಣ, ಮರುದಿನ ಬೆಳಿಗ್ಗೆ 9 ಗಂಟೆಗೆ ಮತ್ತೆ ಸಭೆಗೆ ಹಾಜರಾಗುವಂತೆ ಸೂಚಿಸಿದರು. ಆಗ ಡಾ. ಯರಗಲ್ ಅವರು, ಜಮಖಂಡಿ, ತೇರದಾಳ ಮುಂತಾದ ದೂರದ ಪ್ರದೇಶಗಳಿಂದ ಬಂದಿರುವ ಇಲಾಖೆಯ ಸಿಬ್ಬಂದಿ ರಾತ್ರಿ ಮನೆಗೆ ತಲುಪಿ ಮತ್ತೆ ಬೆಳಿಗ್ಗೆ ಬೇಗ ಬರುವುದು ಕಷ್ಟವಾಗುತ್ತದೆ, ಹೀಗಾಗಿ ಸಭೆಯನ್ನು ಬೆಳಿಗ್ಗೆ 10 ಗಂಟೆಯ ನಂತರ ಕರೆದರೆ ಅನುಕೂಲವಾಗುತ್ತದೆ ಎಂದು ಮನವಿ ಮಾಡಿದ್ದರಂತೆ.
- ಅಹಂಕಾರದ ಮಾತುಗಳು ಮತ್ತು ತರಾತುರಿಯ ಪತ್ರ: ಯರಗಲ್ ಅವರ ಮಾತಿಗೆ ಕಡುಕೋಪಗೊಂಡ ಸಿಇಒ, “ಇಡಿಯಟ್, ಹೋಪ್ಲೆಸ್… ನಾನು ಹೇಳಿದ್ದಷ್ಟೇ ಕೇಳಬೇಕು” ಎಂದು ನಿಂದಿಸಿದ್ದಾರಂತೆ. ಸಹಜವಾಗಿ ಅಧಿಕಾರಿಯ ನಿಂದನೆಯ ಮಾತುಗಳನ್ನು ಯರಗಲ್ ಅವರು ಪ್ರಶ್ನಿಸಿದ್ದಾರೆ. ಈ ಘಟನೆಯ ಮರುದಿನವೇ ಸಿಇಒ ಅವರು ಯರಗಲ್ ವಿರುದ್ಧ ಗಂಭೀರ ಆರೋಪ ಹೊರಿಸಿ ಆಯುಕ್ತರಿಗೆ ಪತ್ರ ಬರೆದಿದ್ದರು ಎನ್ನಲಾಗಿದೆ.
- ಆರೋಪ ಬಯಲಾಗಿದ್ದು ಆಮೇಲೆ: ಯರಗಲ್ ಅವರ ಮಗಳ ಪ್ರಕರಣ ಮಾಧ್ಯಮಗಳಲ್ಲಿ ಬೆಳಕಿಗೆ ಬಂದಿದ್ದು ಸೆಪ್ಟೆಂಬರ್ 12ರಂದು. ಆದರೆ ಅದಕ್ಕೂ ಮುನ್ನವೇ (ಸೆಪ್ಟೆಂಬರ್ 3 ರಿಂದ 9 ರವರೆಗಿನ ಬೆಳವಣಿಗೆಗಳಲ್ಲೇ) ಅಮಾನತು ಮಾಡಲು ಆಡಳಿತಾತ್ಮಕವಾಗಿ ಪ್ರಕ್ರಿಯೆ ನಡೆದಿತ್ತು ಎಂಬುದು ಈ ಪಿತೂರಿಯ ಆಳವನ್ನು ತೋರಿಸುತ್ತದೆ ಎಂಬ ಅಭಿಪ್ರಾಯ ವ್ಯಕ್ತವಾಗಿದೆ.
ಇದನ್ನೂ ಓದಿ: ಕೀಳುಮಟ್ಟದ ರಾಜಕೀಯ ಕಸರತ್ತು; ಶಾಸಕನ ಮೇಲಿನ ಸಿಟ್ಟಿಗೆ ಸಹೋದರಿ ಕುಟುಂಬವೇ ಟಾರ್ಗೆಟ್! ‘ಸೊಸೆಯ ಸಂಬಳ’ವೇ ಅಸ್ತ್ರವಾಯಿತೇ?
ಮಗಳ ನೇಮಕಾತಿ ನೆಪ: ಯರಗಲ್ ಅವರ ವಿರುದ್ಧದ ಆರೋಪದ ಅಸಲಿಯತ್ತು
ಡಾ. ರಾಜಕುಮಾರ್ ಯರಗಲ್ ಅವರನ್ನು ಅಮಾನತು ಮಾಡಲು ಮುಂದೆ ತಂದ ಪ್ರಮುಖ ನೆಪ ಎಂದರೆ ಅವರ ಮಗಳಾದ ಡಾ. ಅಂಕಿತಾ ಅವರು ಪಿಜಿ ವ್ಯಾಸಂಗ ಮಾಡುತ್ತಿದ್ದರೂ “ನಮ್ಮ ಕ್ಲಿನಿಕ್”ನಲ್ಲಿ ವೈದ್ಯಾಧಿಕಾರಿಯಾಗಿ ಕಾರ್ಯನಿರ್ವಹಿಸಲು ಅವಕಾಶ ಮಾಡಿಕೊಟ್ಟಿದ್ದಾರೆ ಎಂಬುದು. ಆದರೆ ಲಭ್ಯವಿರುವ ಅಧಿಕೃತ ದಾಖಲೆಗಳನ್ನು ಪರಿಶೀಲಿಸಿದರೆ ಈ ಆರೋಪ ಎಷ್ಟು ಕುತಂತ್ರದಿಂದ ಕೂಡಿದೆ ಎನ್ನುವುದು ಸ್ಪಷ್ಟವಾಗುತ್ತದೆ:
- ಹಿಂದಿನ ಅಧಿಕಾರಿಯ ನೇಮಕಾತಿ ಆದೇಶ: ಡಾ. ಅಂಕಿತಾ ಅವರನ್ನು ಶಿರೂರ ಹೆಚ್ಡಬ್ಲ್ಯೂಸಿ/ನಮ್ಮ ಕ್ಲಿನಿಕ್ಗೆ ಎಂಡಿಎಚ್ಎಮ್ ಅಡಿಯಲ್ಲಿ ಗುತ್ತಿಗೆ ಆಧಾರದ ಮೇಲೆ ಆಯ್ಕೆ ಮಾಡಿದ್ದು ಹಿಂದಿನ ಡಿಎಚ್ಒ (ಆದೇಶ ದಿನಾಂಕ: 01-09-2025). ಆ ಸಂದರ್ಭದಲ್ಲಿ ರಾಜಕುಮಾರ್ ಯರಗಲ್ ಅವರು ಬಾಗಲಕೋಟೆಯಲ್ಲಿ ಕರ್ತವ್ಯದಲ್ಲಿಯೇ ಇರಲಿಲ್ಲ.
- ವಾಂಬೆ ಕಾಲನಿಗೆ ವರ್ಗಾವಣೆ: ತದನಂತರ ಆಕೆಯನ್ನು ಶಿರೂರಿನಿಂದ ಬಾಗಲಕೋಟೆಯ ವಾಂಬೆ ಕಾಲನಿಯ ‘ನಮ್ಮ ಕ್ಲಿನಿಕ್’ಗೆ ಸ್ಥಳಾಂತರಿಸಿದ (26-09-2025) ಪ್ರಕ್ರಿಯೆಯೂ ಸಹ ಹಿಂದಿನ ಡಿಎಚ್ಒ ಅವಧಿಯಲ್ಲೇ ನಡೆದಿದೆ.
- ಯರಗಲ್ ಅವರ ಭೇಟಿ ಹಾಗೂ ಕ್ರಮ: ಡಾ. ರಾಜಕುಮಾರ್ ಯರಗಲ್ ಅವರು ಡಿಎಚ್ಒ ಆಗಿ ಅಧಿಕಾರ ವಹಿಸಿಕೊಂಡಿದ್ದು ಕೇವಲ ಎರಡು ತಿಂಗಳ ಹಿಂದೆ. ಅವರು ಬಂದ ಬಳಿಕ ಈ ವಿಷಯ ಗಮನಕ್ಕೆ ಬಂದಾಗ, ಆಕೆಗೆ ಯಾವುದೇ ವೇತನ ಪಾವತಿಯಾಗದಂತೆ ನೋಡಿಕೊಂಡಿದ್ದಲ್ಲದೆ, ಆಕೆಯನ್ನು ಗುತ್ತಿಗೆ ಸೇವೆಯಿಂದ ವಜಾಗೊಳಿಸಿ ಸೂಕ್ತ ಕ್ರಮ ಕೈಗೊಂಡಿದ್ದರು.
- ಕುಟುಂಬ ಹಿನ್ನೆಲೆ: ಡಾ. ಅಂಕಿತಾ ಅವರು ಪ್ರೇಮ ವಿವಾಹವಾಗಿ ತಮ್ಮ ಪತಿಯೊಂದಿಗೆ ಪ್ರತ್ಯೇಕವಾಗಿ ವಾಸಿಸುತ್ತಿದ್ದು, ಅವರ ಪಿಜಿ ಶಿಕ್ಷಣ ಅಥವಾ ಉದ್ಯೋಗದ ನಿರ್ಧಾರಗಳಲ್ಲಿ ಡಾ. ಯರಗಲ್ ಅವರ ಯಾವುದೇ ಪಾತ್ರವಾಗಲಿ ಅಥವಾ ಹಸ್ತಕ್ಷೇಪವಾಗಲಿ ಇರಲಿಲ್ಲ ಎನ್ನುವುದು ಕುಟುಂಬಸ್ಥರ ಸ್ಪಷ್ಟಣೆ.
- ತಾಲೂಕು ಆರೋಗ್ಯಾಧಿಕಾರಿ (THO) ಪಾತ್ರ: ಈ ಎಲ್ಲಾ ನೇಮಕಾತಿ, ಸ್ಥಳಾಂತರ ಹಾಗೂ ಕಾರ್ಯನಿರ್ವಹಣೆಯ ದಿನನಿತ್ಯದ ಮಾಹಿತಿಯ ಸಂಪೂರ್ಣ ಉಸ್ತುವಾರಿ ವಹಿಸಿದ್ದ ತಾಲೂಕು ಆರೋಗ್ಯಾಧಿಕಾರಿ (THO) ಕಳೆದ 2 ವರ್ಷಗಳಿಂದ ಅದೇ ಹುದ್ದೆಯಲ್ಲಿದ್ದಾರೆ. ಆದರೆ, ಮೂಲ ಜವಾಬ್ದಾರಿಯುತ ಈ ಅಧಿಕಾರಿಯ ಮೇಲೆ ಯಾವುದೇ ಕ್ರಮ ಕೈಗೊಳ್ಳದೆ, ಘಟನೆಗೆ ಯಾವುದೇ ಸಂಬಂಧವಿಲ್ಲದ ಡಾ. ಯರಗಲ್ ಅವರನ್ನು ಮಾತ್ರ ಗುರಿಮಾಡಲಾಗಿದೆ ಎನ್ನಲಾಗಿದೆ.
ಅಮಾನತು ಆದೇಶದಲ್ಲಿನ ವೇತನ ಪಾವತಿ ಆರೋಪ ಮತ್ತು ಅದರ ಅಸಲಿ ಸತ್ಯ:
ಸರ್ಕಾರ ಹೊರಡಿಸಿರುವ ಅಮಾನತು ಆದೇಶದಲ್ಲಿ (ಆದೇಶ ಸಂಖ್ಯೆ: Chi3/105/E-3021/2026-27, ದಿನಾಂಕ: 17.09.2026), ಡಾ. ರಾಜಕುಮಾರ್ ಯರಗಲ್ ಅವರು ತಮ್ಮ ಅಧಿಕಾರ ದುರುಪಯೋಗಪಡಿಸಿಕೊಂಡು, ಅನಧಿಕೃತವಾಗಿ ಗೈರುಹಾಜರಾಗಿದ್ದ ಡಾ. ಅಂಕಿತಾ ಯರಗಲ್ ಅವರಿಗೆ ನಿಯಮಬಾಹಿರವಾಗಿ ರೂ. 75,000/- ವೇತನ ಪಾವತಿಸಿದ್ದಾರೆ ಎಂದು ನೇರ ಆರೋಪ ಹೊರಿಸಲಾಗಿದೆ.
ಆದರೆ ದಾಖಲೆಗಳ ಪ್ರಕಾರ ಯರಗಲ್ ಅವರು ವೇತನ ಪಾವತಿಸಿದ್ದರೆ? ಅಸಲಿ ಸತ್ಯವೇನು?:
- ವೇತನ ಪಾವತಿಸಿದ್ದು ಯರಗಲ್ ಅವರಲ್ಲ: ಡಾ. ಅಂಕಿತಾ ಅವರಿಗೆ ಸಂಬಂಧಿಸಿದ ನೇಮಕಾತಿ, ಸ್ಥಳಾಂತರ ಹಾಗೂ ಆಕೆಗೆ ನೀಡಲಾಗಿದೆ ಎನ್ನಲಾದ ವೇತನ ಪಾವತಿಯ ಪ್ರಕ್ರಿಯೆಗಳು ನಡೆದಿದ್ದು ಹಿಂದಿನ ಡಿಎಚ್ಒ ಅವರ ಅವಧಿಯಲ್ಲಿ ಎಂದು ತಿಳಿದುಬಂದಿದೆ.
- ಯರಗಲ್ ತಡೆದಿದ್ದ ವೇತನ: ಡಾ. ರಾಜಕುಮಾರ್ ಯರಗಲ್ ಅವರು ಬಾಗಲಕೋಟೆ ಡಿಎಚ್ಒ ಆಗಿ ಅಧಿಕಾರ ವಹಿಸಿಕೊಂಡಿದ್ದು ಕೇವಲ ಎರಡು ತಿಂಗಳ ಹಿಂದೆ. ಅವರು ಬಂದ ಬಳಿಕ ಅಂಕಿತಾ ಅವರಿಗೆ ಯಾವುದೇ ವೇತನ ನೀಡಲಾಗಿಲ್ಲ. ಅದೇ ರೀತಿ ಈ ವಿಚಾರ ಗಮನಕ್ಕೆ ಬಂದಾಗ, ನಿಯಮಬಾಹಿರವಾಗಿ ನಡೆಯುತ್ತಿದ್ದ ಯಾವುದೇ ಪ್ರಕ್ರಿಯೆಗೆ ಆಸ್ಪದ ನೀಡದೆ ಆಕೆಗೆ ಮುಂದಿನ ವೇತನ ಪಾವತಿಯಾಗದಂತೆ ಕಟ್ಟುನಿಟ್ಟಾಗಿ ತಡೆಹಿಡಿದಿದ್ದರು ಎನ್ನಲಾಗಿದೆ.
- ವಜಾಗೊಳಿಸುವ ಕ್ರಮ: ಅಷ್ಟೇ ಅಲ್ಲದೆ, ಗುತ್ತಿಗೆ ಆಧಾರದ ಮೇಲಿದ್ದ ಆಕೆಯನ್ನು ಹುದ್ದೆಯಿಂದ ವಜಾಗೊಳಿಸಿ ಆಡಳಿತಾತ್ಮಕವಾಗಿ ಸೂಕ್ತ ಕ್ರಮ ಕೈಗೊಂಡಿದ್ದೇ ಡಾ. ಯರಗಲ್.
- ಅಸಲಿ ಹೊಣೆ ಯಾರದ್ದು?: ಪ್ರತಿಯೊಂದು ‘ನಮ್ಮ ಕ್ಲಿನಿಕ್’ ನೌಕರರ ದಿನನಿತ್ಯದ ಹಾಜರಾತಿ, ಕಾರ್ಯನಿರ್ವಹಣೆ ಹಾಗೂ ವೇತನ ಬಿಲ್ ಅನುಮೋದಿಸುವ ಮೂಲ ಜವಾಬ್ದಾರಿ ತಾಲೂಕು ಆರೋಗ್ಯಾಧಿಕಾರಿ (THO) ಅವರದ್ದಾಗಿರುತ್ತದೆ. ಕಳೆದ 2 ವರ್ಷಗಳಿಂದ ಅದೇ ಹುದ್ದೆಯಲ್ಲಿರುವ ಟಿಎಚ್ಒ ಹಾಗೂ ವೇತನ ಮಂಜೂರು ಮಾಡಿದ ಹಿಂದಿನ ಅಧಿಕಾರಿಗಳ ಮೇಲೆ ಯಾವುದೇ ಕ್ರಮ ಕೈಗೊಳ್ಳದೆ, ಬಂದ ತಕ್ಷಣವೇ ಅಕ್ರಮ ತಡೆದು ವೇತನ ತಡೆಹಿಡಿದ ಡಾ. ಯರಗಲ್ ಅವರ ಮೇಲೆಯೇ “ವೇತನ ಪಾವತಿಸಿದ್ದಾರೆ” ಎಂದು ಸುಳ್ಳು ಆರೋಪ ಹೊರಿಸಿರುವುದು ಆಡಳಿತಶಾಹಿ ಹೆಣೆದ ಪಿತೂರಿಯ ಭಾಗ ಅಲ್ಲವೇ?
ಬಿರಾದಾರ ಗೈರುಹಾಜರಿ ಪ್ರಕರಣ ಮತ್ತು ಸಿಇಒ ನೋಟಿಸ್ಗೆ ನೀಡಿದ ಕಟು ಸತ್ಯದ ಉತ್ತರ
ಡಾ. ರಾಜಕುಮಾರ್ ಯರಗಲ್ ಅವರು ಆಡಳಿತಾತ್ಮಕವಾಗಿ ತೋರಿದ ಕಟ್ಟುನಿಟ್ಟಿನ ಶಿಸ್ತೇ ಅವರಿಗೆ ಮುಳುವಾಯಿತು ಎಂಬ ಮಾತುಗಳೂ ಇವೆ.
ಗುಳೇದಗುಡ್ಡ ಸಮುದಾಯ ಆರೋಗ್ಯ ಕೇಂದ್ರದ ಹಿರಿಯ ವೈದ್ಯಾಧಿಕಾರಿ ಡಾ. ಪ್ರಕಾಶ್ ಬಿರಾದಾರ ಎಂಬುವವರು ದೀರ್ಘಕಾಲದಿಂದ ಅನಧಿಕೃತವಾಗಿ ಕರ್ತವ್ಯಕ್ಕೆ ಗೈರುಹಾಜರಾಗುತ್ತಿದ್ದರು ಎನ್ನಲಾಗಿದೆ. ದಿನಾಂಕ 17-06-2026 ರಿಂದ 15-07-2026 ಹಾಗೂ 01-08-2026 ರಿಂದ 19-08-2026 ರವರೆಗೆ ಅನಧಿಕೃತವಾಗಿ ಗೈರಾಗಿದ್ದಕ್ಕೆ ಕಾರಣ ಕೇಳಿ ಅವರಿಗೆ ಹಲವು ಬಾರಿ ನೋಟಿಸ್ ಹಾಗೂ ಮೆಮೊ ನೀಡಲಾಗಿತ್ತು. ಆದಾಗ್ಯೂ, ಬಿರಾದಾರ ಅವರು ಜಿಲ್ಲಾ ಉಸ್ತುವಾರಿ ಸಚಿವರಿಗೆ ಹತ್ತಿರದವರಾಗಿದ್ದ ಕಾರಣ, ಅವರ ಮೇಲೆ ಯಾವುದೇ ಕ್ರಮ ಕೈಗೊಳ್ಳದಂತೆ ರಾಜಕೀಯ ಒತ್ತಡವಿತ್ತು ಎನ್ನಲಾಗಿದೆ.
ಮತ್ತೊಂದೆಡೆ, ಜಿಲ್ಲಾ ಪಂಚಾಯತ್ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿಗಳು (CEO) ಡಾ. ಯರಗಲ್ ಅವರಿಗೆ ದಿನಾಂಕ 05-09-2026 ರಂದು ಕಚೇರಿಗೆ ಗೈರುಹಾಜರಾಗಿದ್ದಾರೆ ಎಂದು ನೋಟಿಸ್ ಜಾರಿ ಮಾಡಿದ್ದರು. ಇದಕ್ಕೆ ದಿನಾಂಕ 09-09-2026 ರಂದು ಅತ್ಯಂತ ಖಡಕ್ಕಾಗಿ ಮತ್ತು ಆಡಳಿತಾತ್ಮಕ ದಾಖಲೆಗಳ ಸಹಿತ ಉತ್ತರ ನೀಡಿದ್ದ ಡಾ. ಯರಗಲ್, ತಾವು ಗೈರುಹಾಜರಾಗಿಲ್ಲವೆಂಬುದನ್ನು ದಿನಾಂಕವಾರಿ ವಿವರಗಳೊಂದಿಗೆ ಸಾಬೀತುಪಡಿಸಿದ್ದರು:
- ದಿನಾಂಕ 01-09-2026: ಕಚೇರಿ ಕೆಲಸ ಹಾಗೂ ಡಿ.ಸಿ ಕಚೇರಿಯಲ್ಲಿ ಮುಖ್ಯಮಂತ್ರಿಗಳ ಭೇಟಿಯ ಪೂರ್ವಭಾವಿ ಸಭೆ.
- ದಿನಾಂಕ 02-09-2026: ಇಲಕಲ್ನಲ್ಲಿ ಮಾನ್ಯ ಉಸ್ತುವಾರಿ ಸಚಿವರ ಜೊತೆ ‘ನಮ್ಮ ಕ್ಲಿನಿಕ್’ ಉದ್ಘಾಟನೆ.
- ದಿನಾಂಕ 03-09-2026: ಉಸ್ತುವಾರಿ ಸಚಿವರ ಇಲಕಲ್ ಗೃಹ ಕಚೇರಿ ಸಭೆಯಲ್ಲಿ ರಾತ್ರಿ 11 ಗಂಟೆಯವರೆಗೆ ಭಾಗಿ.
- ದಿನಾಂಕ 04-09-2026: ಕೂಡಲಸಂಗಮಕ್ಕೆ ಆಗಮಿಸಿದ ಮಾನ್ಯ ಮುಖ್ಯಮಂತ್ರಿಗಳ ಭೇಟಿ ಹಾಗೂ ಪ್ರವಾಸದ ನಿರ್ವಹಣೆ.
ಸಚಿವರ ಕಾರ್ಯಕ್ರಮಗಳಲ್ಲೇ ರಾತ್ರಿ-ಹಗಲೆನ್ನದೆ ಕರ್ತವ್ಯ ನಿರತರಾಗಿದ್ದ ಅಧಿಕಾರಿಗೆ “ಗೈರುಹಾಜರಿ”ಯ ಸುಳ್ಳು ನೆಪವೊಡ್ಡಿ ನೋಟಿಸ್ ನೀಡಿದ್ದು, ಸಿಇಒ ಹಾಗೂ ಸಚಿವರ ಮೌಖಿಕ ಆದೇಶದ ಹಿನ್ನೆಲೆಯಲ್ಲಿ ರೂಪುಗೊಂಡ ಪಿತೂರಿಯ ಭಾಗವಾಗಿತ್ತು ಎಂದು ಆರೋಪಿಸಲಾಗುತ್ತಿದೆ.
ಸಾಕ್ಷ್ಯ ನಾಶ ಮಾಡುವ ಆತುರ: ಕಾನೂನುಬಾಹಿರ ಆರೋಪ ಹೊತ್ತ ಹೊಸ ಡಿಎಚ್ಒ ನೇಮಕ
ಡಾ. ರಾಜಕುಮಾರ್ ಯರಗಲ್ ಅವರನ್ನು ಅಮಾನತುಗೊಳಿಸಿದ ಕೆಲವೇ ಗಂಟೆಗಳಲ್ಲಿ ಹೊಸ ಡಿಎಚ್ಒ ಅವರ ತರಾತುರಿಯ ನೇಮಕಾತಿ ನಡೆದಿದೆ. ಈ ನೂತನ ಆಯ್ಕೆಯ ಹಿಂದೆ ಭಾರಿ ಪ್ರಮಾಣದ ಆರ್ಥಿಕ ವ್ಯವಹಾರ ನಡೆದಿದೆ ಎಂಬ ಗಂಭೀರ ಆರೋಪಗಳು ಸಾರ್ವಜನಿಕ ವಲಯದಲ್ಲಿ ಕೇಳಿಬರುತ್ತಿವೆ.
ಇನ್ನೂ ಕಳವಳಕಾರಿ ವಿಷಯವೆಂದರೆ, ನೂತನವಾಗಿ ಆಯ್ಕೆಯಾದ ಅಧಿಕಾರಿಯ ಹಿನ್ನೆಲೆ ಅತ್ಯಂತ ಕಳಂಕಿತವಾಗಿದೆ ಎಂಬ ದೂರುಗಳಿವೆ:
- ಬಾಗಲಕೋಟೆ ಶಾಸಕರಾದ ಉಮೇಶ ಮೇಟಿ ಅವರು ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಇಲಾಖೆಯ ಪ್ರಧಾನ ಕಾರ್ಯದರ್ಶಿಗಳಿಗೆ ಸುದೀರ್ಘ ಪತ್ರ ಬರೆದು ಈ ಅಧಿಕಾರಿಯ ಭ್ರಷ್ಟಾಚಾರವನ್ನು ಬಯಲಿಗೆಳೆದಿದ್ದರು.
- ಸರ್ಕಾರಿ ನೌಕರರಾಗಿದ್ದರೂ ಖಾಸಗಿ ಸ್ಕ್ಯಾನಿಂಗ್ ಸೆಂಟರ್ ನಡೆಸುವುದು, ಸರ್ಕಾರಿ ಆಸ್ಪತ್ರೆಯ ಔಷಧಿಗಳನ್ನು ಖಾಸಗಿ ಕ್ಲಿನಿಕ್ಗೆ ಮಾರಾಟ ಮಾಡುವುದು ಸೇರಿದಂತೆ ಗಂಭೀರ ಆರೋಪಗಳನ್ನು ಶಾಸಕರ ಪತ್ರದಲ್ಲಿ ಉಲ್ಲೇಖಿಸಲಾಗಿತ್ತು.
- ಶಾಸಕರು ಈಕೆಯ ವಿರುದ್ಧ ಸೂಕ್ತ ಶಿಸ್ತುಕ್ರಮ ಕೈಗೊಂಡು ಬೇರೆ ಜಿಲ್ಲೆಗೆ ವರ್ಗಾಯಿಸುವಂತೆ ಕೋರಿದ್ದರೂ, ಅದೇ ಅಧಿಕಾರಿಗೆ ಜಿಲ್ಲೆಯ ಅತ್ಯುನ್ನತ DHO ಹುದ್ದೆಯನ್ನು ನೀಡಿರುವುದು ಹಲವು ಅನುಮಾನಗಳಿಗೆ ದಾರಿ ಮಾಡಿಕೊಟ್ಟಿದೆ.
ಮಾಧ್ಯಮಗಳ ಏಕಪಕ್ಷೀಯ ಧೋರಣೆ ಮತ್ತು ಸತ್ಯದ ಮರೆಮಾಚುವಿಕೆ
ಈ ಇಡೀ ಪ್ರಹಸನದಲ್ಲಿ ಕೆಲವು ಮಾಧ್ಯಮಗಳು ನಡೆದುಕೊಂಡ ರೀತಿ ಅತ್ಯಂತ ಶೋಚನೀಯ… ಯಾವುದೇ ವಿಷಯದ ಸತ್ಯಾಸತ್ಯತೆಯನ್ನು ಪರಿಶೀಲಿಸದೆ, ಯಾರ ಅವಧಿಯಲ್ಲಿ ಯಾವ ನಿರ್ಧಾರಗಳಾಗಿದ್ದವು ಎಂಬ ಪ್ರಾಥಮಿಕ ದಾಖಲೆಗಳನ್ನು ಪರಿಶೀಲಿಸದೆ, ಕೇವಲ ಮೇಲಾಧಿಕಾರಿಗಳು ಹಾಗೂ ಸಚಿವರ ಕಚೇರಿಯಿಂದ ಬಂದ ಮಾಹಿತಿಯನ್ನೇ ಆಧರಿಸಿ “ಬ್ರೇಕಿಂಗ್ ನ್ಯೂಸ್” ನೀಡುವ ತರಾತುರಿ ತೋರಿದ್ದು ಮಾಧ್ಯಮ ಧರ್ಮಕ್ಕೆ ಬಗೆದ ದ್ರೋಹ ಎಂಬ ವಿಶ್ಲೇಷಣೆ ವ್ಯಕ್ತವಾಗಿದೆ.
ಉನ್ನತ ಮಟ್ಟದ ತನಿಖೆಗೆ ಸಾರ್ವಜನಿಕರ ಆಗ್ರಹ
ಡಾ. ರಾಜಕುಮಾರ್ ಯರಗಲ್ ಅವರ ಅಮಾನತು ಕೇವಲ ಒಬ್ಬ ಅಧಿಕಾರಿಯ ಮೇಲಾದ ಅನ್ಯಾಯವಲ್ಲ; ಇದು ಇಡೀ ಆಡಳಿತ ವ್ಯವಸ್ಥೆಯಲ್ಲಿ ಕೆಲಸ ಮಾಡುವವರ ಧ್ವನಿ ಉಡಾಯಿಸುವ ಪ್ರಯತ್ನವಿರಬಹುದು ಎನ್ನಲಾಗುತ್ತಿದೆ. ಸಚಿವರ ಮೌಖಿಕ ಆದೇಶಕ್ಕೆ ತಲೆಯಾಡಿಸಿದ ಆಡಳಿತ ಯಂತ್ರ, ಯರಗಲ್ ಅವರಂತಹ ಅಧಿಕಾರಿಯನ್ನು ತುಳಿದು, ಗಂಭೀರ ಆರೋಪ ಹೊತ್ತವರಿಗೆ ಕೆಂಪು ರತ್ನಗಂಬಳಿ ಹಾಸಿದೆ ಎಂಬ ಗಂಭೀರ ಆರೋಪಗಳು ಸಾರ್ವಜನಿಕ ವಲಯದಲ್ಲಿ ವ್ಯಕ್ತವಾಗುತ್ತಿವೆ.
ಈ ತಕ್ಷಣವೇ ಅಮಾನತು ಆದೇಶವನ್ನು ಮರುಪರಿಶೀಲಿಸಿ, ಕಳಂಕಿತ ಅಧಿಕಾರಿಯ ನೇಮಕಾತಿಯ ಹಿಂದೆ ನಡೆದಿದೆ ಎನ್ನಲಾದ ಆರ್ಥಿಕ ವ್ಯವಹಾರ, ನೌಕರರ ಸಂಘದ ಅಧ್ಯಕ್ಷನ ಏಜೆನ್ಸಿ ಅಕ್ರಮಗಳ ಹಸ್ತಕ್ಷೇಪ, ಸಿಇಒ ಅವರ ದುರ್ವರ್ತನೆ ಹಾಗೂ ರಾಜಕೀಯ ಒತ್ತಡದ ಬಗ್ಗೆ ಉನ್ನತ ಮಟ್ಟದ ನಿಷ್ಪಕ್ಷಪಾತ ತನಿಖೆಯಾಗಬೇಕಿದೆ ಎಂದು ಸಾರ್ವಜನಿಕರು ಆಗ್ರಹಿಸುತ್ತಿದ್ದಾರೆ.
ಯಾರ ಹಂಗೂ ಇಲ್ಲದ, ಯಾರಿಗೂ ಬಗ್ಗದ ಸ್ವತಂತ್ರ ಮಾಧ್ಯಮಕ್ಕೆ ನಿಮ್ಮ ಬೆಂಬಲದ ಅವಶ್ಯಕತೆ ಇದೆ...
