ಬಾಗಲಕೋಟೆ: ಪ್ರಜಾಪ್ರಭುತ್ವದ ವ್ಯವಸ್ಥೆಯಲ್ಲಿ ಜನಪ್ರತಿನಿಧಿಯೊಬ್ಬನ ಯಶಸ್ಸು ಅಡಗಿರುವುದು ಆತ ತನ್ನ ಜನರಿಗೆ ನೀಡುವ ಆಡಳಿತ ಮತ್ತು ತೋರುವ ಜವಾಬ್ದಾರಿಯ ಮೇಲೆ. ಆದರೆ ಬಾಗಲಕೋಟೆ ಜಿಲ್ಲೆಯ ಇಂದಿನ ರಾಜಕೀಯ ಮತ್ತು ಆಡಳಿತಾತ್ಮಕ ಪರಿಸ್ಥಿತಿಯನ್ನು ಸೂಕ್ಷ್ಮವಾಗಿ ಗಮನಿಸಿದರೆ, ಇಲ್ಲಿ ಜವಾಬ್ದಾರಿಗಿಂತ ಉದಾಸೀನತೆಯೇ ಹೆಚ್ಚಾಗಿ ಮನೆಮಾಡಿದಂತೆ ಕಾಣುತ್ತಿದೆ. ಹೌದು, ಇಡೀ ಜಿಲ್ಲೆಯ ಸಮಗ್ರ ಅಭಿವೃದ್ಧಿಯ ದಿಕ್ಸೂಚಿಯಾಗಬೇಕಿದ್ದ, ಇಲಾಖೆಗಳ ನಡುವೆ ಸಮನ್ವಯ ಸಾಧಿಸಬೇಕಿದ್ದ ತ್ರೈಮಾಸಿಕ ಕೆಡಿಪಿ (ಜಿಲ್ಲಾ ಪ್ರಗತಿ ಪರಿಶೀಲನಾ) ಸಭೆಗಳು ಜಿಲ್ಲಾ ಉಸ್ತುವಾರಿ ಹಾಗೂ ಅಬಕಾರಿ ಸಚಿವರಾದ ಆರ್. ಬಿ. ತಿಮ್ಮಾಪುರ (RB Timmapur:) ಅವರ ದಿವ್ಯ ನಿರ್ಲಕ್ಷ್ಯಕ್ಕೆ ಬಲಿಯಾಗುತ್ತಿವೆ. ಸರ್ಕಾರದ ಕಟ್ಟುನಿಟ್ಟಿನ ನಿಯಮಾವಳಿಗಳ ಪ್ರಕಾರ ಪ್ರತಿ ಮೂರು ತಿಂಗಳಿಗೊಮ್ಮೆ ಕಡ್ಡಾಯವಾಗಿ ನಡೆಯಬೇಕಿದ್ದ ಈ ಪ್ರಮುಖ ಸಭೆಗಳು, ಕಳೆದ ಮೂರು ವರ್ಷಗಳ ಅವಧಿಯಲ್ಲಿ ಕೇವಲ ಬೆರಳೆಣಿಕೆಯಷ್ಟು ಮಾತ್ರ ನಡೆದಿರುವುದು ಜಿಲ್ಲೆಯ ಜನರ ದುರ್ದೈವವೇ ಸರಿ.
ಕೊನೆಯದಾಗಿ ಬಾಗಲಕೋಟೆಯಲ್ಲಿ ಕೆಡಿಪಿ ಸಭೆ ನಡೆದಿದ್ದು 2025ರ ಸೆಪ್ಟೆಂಬರ್ 25 ರಂದು. ಅದಾಗಿ ಇಂದಿಗೆ ಬರೋಬ್ಬರಿ 8 ತಿಂಗಳುಗಳು ಕಳೆಯುತ್ತಾ ಬಂದಿದ್ದರೂ, ಮತ್ತೊಂದು ಸಭೆ ಕರೆದು ಜಿಲ್ಲೆಯ ಪ್ರಗತಿಯನ್ನು ಪರಿಶೀಲಿಸಲು ಉಸ್ತುವಾರಿ ಸಚಿವರಿಗೆ ಪುರಸೊತ್ತಿಲ್ಲದಂತಾಗಿದೆ. ಜಿಲ್ಲೆಯ ಹಣೆಬರಹವೇ ಹೀಗಾದರೆ, ಇತ್ತ ಸಚಿವರ ಸ್ವಕ್ಷೇತ್ರವಾದ ಮುಧೋಳದ ಕಥೆಯಂತೂ ಹೇಳ ತೀರದಾಗಿದೆ. “ಇತ್ತ ಜಿಲ್ಲೆಯೂ ಇಲ್ಲ, ಅತ್ತ ಸ್ವಕ್ಷೇತ್ರವೂ ಇಲ್ಲ” ಎನ್ನುವಂತಹ ಪರಿಸ್ಥಿತಿ ನಿರ್ಮಾಣವಾಗಿದ್ದು, ಸಾರ್ವಜನಿಕರು ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಪೋಸ್ಟರ್ಗಳ ಮೂಲಕ ಸಚಿವರ ವಿರುದ್ಧ ಬಂಡಾಯ ಎದ್ದಿದ್ದಾರೆ.
ನಿಯಮಗಳ ಗಾಳಿಗೆ ತೂರಾಟ: 8 ತಿಂಗಳ ಸುದೀರ್ಘ ನಿದ್ರೆ!
ರಾಜ್ಯ ಸರ್ಕಾರದ ನಿಯಮಗಳ ಪ್ರಕಾರ, ಪ್ರತಿಯೊಂದು ಜಿಲ್ಲೆಯಲ್ಲೂ ಉಸ್ತುವಾರಿ ಸಚಿವರ (RB Timmapur) ನೇತೃತ್ವದಲ್ಲಿ 3 ತಿಂಗಳಿಗೊಮ್ಮೆ ಕೆಡಿಪಿ (KDP) ಸಭೆ ನಡೆಯುವುದು ಕಡ್ಡಾಯ. ಈ ಸಭೆಯಲ್ಲಿ ಜಿಲ್ಲೆಯ ಶಾಸಕರು, ಸಂಸದರು, ಜಿಲ್ಲಾಧಿಕಾರಿಗಳು ಹಾಗೂ ಎಲ್ಲಾ ಇಲಾಖೆಗಳ ಮುಖ್ಯಸ್ಥರು ಭಾಗವಹಿಸಿ, ಸರ್ಕಾರದ ಯೋಜನೆಗಳು ಜನರಿಗೆ ತಲುಪುತ್ತಿದ್ದಾವೆಯೇ ಎಂಬುದನ್ನು ಪರಾಮರ್ಶಿಸಬೇಕು. ಆದರೆ ಬಾಗಲಕೋಟೆ ಜಿಲ್ಲೆಯಲ್ಲಿ ಈ ಆಡಳಿತಾತ್ಮಕ ನಿಯಮ ಕೇವಲ ಕಾಗದದ ಮೇಲಷ್ಟೇ ಉಳಿದಿದೆ. ಎಂಟು ತಿಂಗಳಿನಿಂದ ಸಭೆಯೇ ನಡೆಯದ ಕಾರಣ ಇಲಾಖೆಗಳ ಅಧಿಕಾರಿಗಳು ಕೇಳುವವರೇ ಇಲ್ಲದಂತಾಗಿದ್ದಾರೆ.
ಮುಂಗಾರು ಹಂಗಾಮು ಹೊಸ್ತಿಲಲ್ಲಿ ಬಂದು ನಿಂತಿದೆ. ಬಾಗಲಕೋಟೆ ಜಿಲ್ಲೆಯು ಮೂಲತಃ ಕೃಷಿ ಪ್ರಧಾನ ಜಿಲ್ಲೆಯಾಗಿದ್ದು, ನೇಕಾರಿಕೆ ಹಾಗೂ ತೋಟಗಾರಿಕೆ ಇಲ್ಲಿನ ಜನರ ಜೀವನಾಡಿಯಾಗಿದೆ. ಇಂತಹ ಸಂದರ್ಭದಲ್ಲಿ ರೈತರಿಗೆ ಸಕಾಲದಲ್ಲಿ ಬಿತ್ತನೆ ಬೀಜ ಸಿಗುತ್ತಿದೆಯೇ, ರಸಗೊಬ್ಬರದ ದಾಸ್ತಾನು ಸಮರ್ಪಕವಾಗಿದೆಯೇ, ಕುಡಿಯುವ ನೀರಿನ ಪೂರೈಕೆಗೆ ಕೈಗೊಂಡಿರುವ ಕ್ರಮಗಳೇನು ಎಂಬಿತ್ಯಾದಿ ಗಂಭೀರ ವಿಷಯಗಳ ಬಗ್ಗೆ ಕೆಡಿಪಿ ಸಭೆಯಲ್ಲಿ ವ್ಯಾಪಕ ಚರ್ಚೆಯಾಗಬೇಕಿತ್ತು. ಆದರೆ ಸಚಿವರ ಉದಾಸೀನತೆಯಿಂದಾಗಿ ಇಡೀ ಜಿಲ್ಲೆಯ ಆಡಳಿತ ಯಂತ್ರ ಸಂಪೂರ್ಣ ನಿಶ್ಚಲಗೊಂಡಿದೆ. ಜನಪ್ರತಿನಿಧಿಗಳ ಸಮ್ಮುಖದಲ್ಲಿ ಪ್ರಗತಿ ಪರಿಶೀಲನೆ ನಡೆಯದೇ ಹೋದಾಗ ಅಧಿಕಾರಿಗಳು ತಮಗೆ ಇಷ್ಟ ಬಂದಂತೆ ವರ್ತಿಸುವುದು ಸಹಜ. ಪರಿಣಾಮವಾಗಿ ಸರ್ಕಾರದ ಕೋಟ್ಯಂತರ ರೂಪಾಯಿಗಳ ಅನುದಾನ ಬಳಕೆಯಾಗದೇ ಧೂಳು ಹಿಡಿಯುತ್ತಿದೆ ಇಲ್ಲವೇ ದುರ್ಬಳಕೆಯಾಗುತ್ತಿದೆ.
ಇದನ್ನೂ ಓದಿ: RB Timmapur: ಅಬಕಾರಿ ಸಚಿವರ ತವರಲ್ಲೇ ಎಗ್ಗಿಲ್ಲದ ಮದ್ಯದ ದರ್ಬಾರ್! ಮಾಧ್ಯಮ ರಂಗಕ್ಕೂ ಅಂಟಿದ ‘ಸರಾಯಿ’ ಕಳಂಕ (Part 2)
ಸ್ವಕ್ಷೇತ್ರ ಮುಧೋಳದಲ್ಲಿ ಅಭಿವೃದ್ಧಿ ಶೂನ್ಯ: ಕತ್ತಲಲ್ಲಿ ಮುಳುಗಿದ ನಗರ
ಜಿಲ್ಲಾ ಮಟ್ಟದ ನಿರ್ಲಕ್ಷ್ಯ ಒಂದು ಕಡೆಯಾದರೆ, ಸಚಿವರು ತಮ್ಮನ್ನು ನಂಬಿ ಗದ್ದುಗೆಗೆ ಏರಿಸಿದ ಮುಧೋಳ ಮತಕ್ಷೇತ್ರವನ್ನು ಸಂಪೂರ್ಣವಾಗಿ ಕೈಬಿಟ್ಟಿದ್ದಾರೆ ಎಂಬ ಗಂಭೀರ ಆರೋಪಗಳು ಕೇಳಿಬರುತ್ತಿವೆ. ಮುಧೋಳದ ಇಂದಿನ ಸ್ಥಿತಿಯನ್ನು ಸಾರ್ವಜನಿಕರು ಸಾಮಾಜಿಕ ಮಾಧ್ಯಮಗಳಲ್ಲಿ ಪೋಸ್ಟರ್ಗಳ ಮೂಲಕ ಅನಾವರಣಗೊಳಿಸುತ್ತಿದ್ದಾರೆ.
ಸದ್ಯ ಸಾಮಾಜಿಕ ಜಾಲತಾಣಗಳಲ್ಲಿ ತೀವ್ರವಾಗಿ ವೈರಲ್ ಆಗುತ್ತಿರುವ ಪೋಸ್ಟರ್ ಒಂದರಲ್ಲಿ, ಮುಧೋಳ ನಗರ ಪ್ರದೇಶದಲ್ಲಿ ಬೀದಿ ದೀಪಗಳಿಲ್ಲದೆ ಕತ್ತಲಾಗಿರುವ ರಸ್ತೆಯ ಚಿತ್ರವನ್ನು ಹಾಕಿ, “ಮುಧೋಳ ನಗರಸಭೆಯ ಸಾಧನೆ… ಕ್ಷೇತ್ರದ ಶಾಸಕರೇ ಎಲ್ಲಿದ್ದೀರಾ…? ಕತ್ತಲು ಭಾಗ್ಯದ ಗ್ಯಾರಂಟಿ…!” ಎಂದು ಲೇವಡಿ ಮಾಡಲಾಗುತ್ತಿದೆ. ರಾತ್ರಿಯಾಗುತ್ತಲೇ ಮುಧೋಳದ ಪ್ರಮುಖ ರಸ್ತೆಗಳು ಕತ್ತಲ ಕೂಪವಾಗಿ ಪರಿಣಮಿಸುತ್ತಿದ್ದು, ನಾಗರಿಕರು, ವಿಶೇಷವಾಗಿ ಮಹಿಳೆಯರು ಮತ್ತು ಮಕ್ಕಳು ರಸ್ತೆಯಲ್ಲಿ ಓಡಾಡಲು ಭಯಪಡುವಂತಾಗಿದೆ. ಜನಸಾಮಾನ್ಯರ ಮೂಲಭೂತ ಹಕ್ಕಾದ ಬೀದಿ ದೀಪಗಳನ್ನೇ ಒದಗಿಸಲು ಸಾಧ್ಯವಾಗದ ಶಾಸಕರು ಇನ್ಯಾವ ಮಹಾನ್ ಅಭಿವೃದ್ಧಿ ಮಾಡಲು ಸಾಧ್ಯ ಎನ್ನುವುದು ಸಾರ್ವಜನಿಕರ ನೇರ ಪ್ರಶ್ನೆಯಾಗಿದೆ.
ಗಲ್ಲಿ ತುಂಬ ನಲ್ಲಿ, ನೀರಿಲ್ಲದೇ ಖಾಲಿ: ಮುಧೋಳದ ಜಲಕ್ಷಾಮ
ಮುಧೋಳ ತಾಲೂಕಿನ ಕುಡಿಯುವ ನೀರಿನ ಸಮಸ್ಯೆ ಇತ್ತೀಚಿನ ದಿನಗಳಲ್ಲಿ ತುತ್ತತುದಿಗೆ ತಲುಪಿದೆ. ಬೇಸಿಗೆಯ ಬಿಸಿಲಿಗೆ ಜನ ಹನಿ ನೀರಿಗೂ ಪರದಾಡುವಂತಾಗಿದೆ. ಆದರೆ ಈ ಸಮಸ್ಯೆಗೆ ಶಾಶ್ವತ ಪರಿಹಾರ ಕಂಡುಕೊಳ್ಳಬೇಕಾದ ಅಬಕಾರಿ ಸಚಿವರು ಕಣ್ಣು ಮುಚ್ಚಿ ಕುಳಿತಿದ್ದಾರೆ. ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿರುವ ಮತ್ತೊಂದು ಪೋಸ್ಟರ್ ಮುಧೋಳ ನಗರದ ನೀರಿನ ಭೀಕರತೆಯನ್ನು ಎತ್ತಿ ತೋರಿಸುತ್ತದೆ.
“ಮುಧೋಳ ನಗರದ ಸಾರ್ವಜನಿಕರಿಗೆ ಬರಡಾದ ಭಾವನೆಯನ್ನು ಉಡುಗೊರೆ ಕೊಟ್ಟ ಅಬಕಾರಿ ಸಚಿವರು: ಗಲ್ಲಿ ತುಂಬ ನಲ್ಲಿ, ನೀರಿಲ್ಲದೇ ಖಾಲಿ….” ಎಂಬ ಸಾಲುಗಳು ಜನರ ಆಕ್ರೋಶದ ತೀವ್ರತೆಯನ್ನು ಸಾರುತ್ತಿವೆ. ರಸ್ತೆ ರಸ್ತೆಗಳಲ್ಲಿ ನಲ್ಲಿಗಳನ್ನೇನೋ ಅಳವಡಿಸಲಾಗಿದೆ, ಆದರೆ ಆ ನಲ್ಲಿಗಳಲ್ಲಿ ನೀರು ಮಾತ್ರ ಬರುತ್ತಿಲ್ಲ. ಜನರು ಕೊಡ ಹಿಡಿದು ಕಿಲೋಮೀಟರ್ಗಟ್ಟಲೆ ಅಲೆಯಬೇಕಾದ ಪರಿಸ್ಥಿತಿ ನಿರ್ಮಾಣವಾಗಿದೆ. ಕ್ಷೇತ್ರದ ಶಾಸಕರೇ ರಾಜ್ಯದ ಪ್ರಭಾವಿ ಸಚಿವರಾಗಿದ್ದರೂ ಸ್ವಕ್ಷೇತ್ರದ ಜನರಿಗೆ ಕುಡಿಯುವ ನೀರು ಕೊಡಲಾಗದ ಪರಿಸ್ಥಿತಿಯಲ್ಲಿರುವುದು ಆಡಳಿತದ ವೈಫಲ್ಯಕ್ಕೆ ಹಿಡಿದ ಕನ್ನಡಿಯಾಗಿದೆ.
ಇದನ್ನೂ ಓದಿ: Media Masala: KPCC ಗೆ ಅಬಕಾರಿ ಮಿನಿಸ್ಟರ್ ದೋಖಾ? ಆಪ್ತ ಪತ್ರಕರ್ತ ಶಾಮೀಲು!
ಶಿಕ್ಷಣಕ್ಕೆ ಎಳ್ಳುನೀರು, ಮದ್ಯದ ಅಂಗಡಿಗಳಿಗೆ ಮಣೆ: ಅಂಕಿ-ಅಂಶಗಳ ಆಘಾತಕಾರಿ ಸಮರ
ಸಾರ್ವಜನಿಕ ವಲಯದಲ್ಲಿ ಸಚಿವರ ವಿರುದ್ಧ ಕೇಳಿಬರುತ್ತಿರುವ ಅತ್ಯಂತ ಗಂಭೀರ ಹಾಗೂ ಆಘಾತಕಾರಿ ಆರೋಪವೆಂದರೆ ಅದು ಅಬಕಾರಿ ಇಲಾಖೆಯ ದುರ್ಬಳಕೆ ಮತ್ತು ಮದ್ಯದ ಅಂಗಡಿಗಳ ಮಿತಿಮೀರಿದ ವಿಸ್ತರಣೆ. ಮುಧೋಳ ಕ್ಷೇತ್ರದ ನಾಗರಿಕರು ಹಳೆಯ ಅವಧಿ ಮತ್ತು ಸದ್ಯದ ಅವಧಿಯ ನಡುವಿನ ಶಾಲಾ ಕಟ್ಟಡಗಳು ಮತ್ತು ಮದ್ಯದ ಅಂಗಡಿಗಳ ಸಂಖ್ಯೆಯನ್ನು ಹೋಲಿಕೆ ಮಾಡಿ ಅಂಕಿ-ಅಂಶಗಳ ಸಮರ ಸಾರಿದ್ದಾರೆ.
ಈ ಹಿಂದೆ ಗೋವಿಂದ ಕಾರಜೋಳ ಅವರು ಶಾಸಕರಾಗಿದ್ದ ಅವಧಿಯಲ್ಲಿ ಕ್ಷೇತ್ರದಲ್ಲಿ ಬರೋಬ್ಬರಿ ಎರಡು ಸಾವಿರದ ಏಳುನೂರ ಐದು ಶಾಲಾ ಕಟ್ಟಡಗಳಿದ್ದರೆ, ಕೇವಲ ನೂರ ನಲವತ್ತೈದು ಮದ್ಯದ ಅಂಗಡಿಗಳಿದ್ದವು ಎಂದು ಪೋಸ್ಟರ್ಗಳು ನೆನಪಿಸುತ್ತಿವೆ. ಆದರೆ ಆರ್. ಬಿ. ತಿಮ್ಮಾಪುರ ಅವರು ಅಧಿಕಾರಕ್ಕೆ ಬಂದ ಮೇಲೆ, ಕ್ಷೇತ್ರದಲ್ಲಿ ಶಾಲೆಗಳ ಸಂಖ್ಯೆ ಕೇವಲ ಇನ್ನೂರ ಹತ್ತಕ್ಕೆ ಕುಸಿದಿದ್ದು, ಬಾರ್ ಹಾಗೂ ರೆಸ್ಟೋರೆಂಟ್ಗಳ ಸಂಖ್ಯೆ ಬರೋಬ್ಬರಿ ಒಂದು ಸಾವಿರದ ಆರುನೂರ ಐವತ್ತಕ್ಕೆ ಏರಿಕೆಯಾಗಿದೆ ಎಂದು ಸಾರ್ವಜನಿಕರು ಅಂಕಿ-ಅಂಶಗಳ ಸಹಿತ ಆರೋಪಿಸುತ್ತಿದ್ದಾರೆ.
“ಮನೆಗಿಂತ ಮದ್ಯದ ಅಂಗಡಿಯೇ ಹತ್ತಿರ: ಬಾರ್ಗಳ ಸಂಖ್ಯೆ ಹೆಚ್ಚಳಕ್ಕೆ ಸಾರ್ವಜನಿಕರಲ್ಲಿ ಮೂಡಿದೆ ತೀವ್ರ ಆತಂಕ” ಎಂಬ ಒಕ್ಕಣೆ ಇಡೀ ಸಮಾಜ ಎತ್ತ ಸಾಗುತ್ತಿದೆ ಎಂಬುದನ್ನು ಬಿಂಬಿಸುತ್ತದೆ. ಅಭಿವೃದ್ಧಿಯ ಹೆಸರಿನಲ್ಲಿ ಮುಧೋಳ ಮತಕ್ಷೇತ್ರವನ್ನು ‘ಮಿನಿ ಗೋವಾ’ ಅಥವಾ ‘ಮಹಾ ಮದ್ಯರಾಜ್ಯ’ ಮಾಡಲು ಹೊರಟಿದ್ದೀರಾ ಎಂದು ಸಾರ್ವಜನಿಕರು ಸಚಿವರನ್ನು ತರಾಟೆಗೆ ತೆಗೆದುಕೊಳ್ಳುತ್ತಿದ್ದಾರೆ. ಎಲ್ಲೆಡೆ ತಲೆಯೆತ್ತುತ್ತಿರುವ ಮದ್ಯದ ಅಂಗಡಿಗಳಿಂದಾಗಿ ಗ್ರಾಮೀಣ ಮತ್ತು ನಗರ ಪ್ರದೇಶಗಳಲ್ಲಿ ಸಮಾಜದ ಶಾಂತಿ ಹದಗೆಡುತ್ತಿದೆ. ಯುವ ಪೀಳಿಗೆ ದಾರಿ ತಪ್ಪುತ್ತಿದ್ದು, ಭವಿಷ್ಯದ ಪ್ರಜೆಗಳ ಬದುಕು ಅಂಧಕಾರದತ್ತ ಸಾಗುತ್ತಿದೆ. “ಗಲ್ಲಿಗೊಂದು ಬಾರ್ ಬೇಡ, ಮನೆಗೊಂದು ಸಂಸಾರ ಬೇಕು!” ಎಂಬ ಘೋಷಣೆಗಳು ಇಂದು ಮುಧೋಳದ ಪ್ರತಿಯೊಬ್ಬ ತಾಯಿಯ ಆಕ್ರೋಶದ ಧ್ವನಿಯಾಗಿದೆ.
ಕಾನೂನು ಸುವ್ಯವಸ್ಥೆ ಕುಸಿತ: ಮಧುರ ಮುಧೋಳದಲ್ಲಿ ದಂಧೆಗಳ ಅಬ್ಬರ
ಮುಧೋಳ ಕ್ಷೇತ್ರದ ನಾಗರಿಕರು ಸಿದ್ಧಪಡಿಸಿರುವ ಪೋಸ್ಟರ್ಗಳಲ್ಲಿ ಕೇವಲ ಮೂಲಸೌಕರ್ಯಗಳ ಕೊರತೆಯಷ್ಟೇ ಅಲ್ಲದೇ, ಕಾನೂನು ಸುವ್ಯವಸ್ಥೆಯ ಸಂಪೂರ್ಣ ಕುಸಿತದ ಬಗ್ಗೆಯೂ ಗಂಭೀರ ಆರೋಪಗಳನ್ನು ಮಾಡಲಾಗಿದೆ. ಕ್ಷೇತ್ರದಲ್ಲಿ ಸದ್ಯದ ಪರಿಸ್ಥಿತಿಯಲ್ಲಿ ನಾಗರಿಕರಿಗೆ ಸಿಗುತ್ತಿರುವುದು ಕೇವಲ ಕರಾಳ ಭಾಗ್ಯಗಳು ಮಾತ್ರ ಎಂದು ಸಾರ್ವಜನಿಕರು ಲೇವಡಿ ಮಾಡುತ್ತಿದ್ದಾರೆ.
- ದಂಧೆಗಳ ಸಾಮ್ರಾಜ್ಯ: ಸರ್ಕಾರಿ ಭ್ರಷ್ಟ ಅಧಿಕಾರಿಗಳ ಲಂಚಾವತಾರ ಭಾಗ್ಯ, ಮರಳು ದಂಧೆ ಭಾಗ್ಯ, ಇಸ್ಪೀಟ್ ಜೂಜಾಟದ ದಂಧೆ ಭಾಗ್ಯ, ಅಕ್ರಮ ಅಕ್ಕಿ ಸಾಗಾಟದ ದಂಧೆ ಭಾಗ್ಯ ಹಾಗೂ ಗಾಂಜಾ ದಂಧೆ ಭಾಗ್ಯಗಳು ಕ್ಷೇತ್ರದಲ್ಲಿ ರಾಜಾರೋಷವಾಗಿ ನಡೆಯುತ್ತಿವೆ ಎಂದು ಪೋಸ್ಟರ್ಗಳಲ್ಲಿ ಪಟ್ಟಿ ಮಾಡಲಾಗಿದೆ.
- ಸಾಮಾಜಿಕ ಕಳಕಳಿ: ಇವೆಲ್ಲದರ ನಡುವೆ ಮನೆಗಳ್ಳತನ, ದರೋಡೆ, ವೈಶ್ಯಾವಾಟಿಕೆ ಹಾಗೂ ಅತ್ಯಂತ ಆತಂಕಕಾರಿ ವಿಷಯವೆಂದರೆ ಅಪ್ರಾಪ್ತ ಬಾಲಕಿಯರು ಕಾಣೆಯಾಗುತ್ತಿರುವ ಪ್ರಕರಣಗಳು ಹೆಚ್ಚುತ್ತಿರುವುದು ಕ್ಷೇತ್ರದ ಹೆತ್ತವರಲ್ಲಿ ಭೀತಿ ಮೂಡಿಸಿದೆ.
“ಇದೇ ನಮ್ಮ ಕ್ಷೇತ್ರದ ಶಾಸಕರ ಅಭಿವೃದ್ಧಿ” ಎಂದು ಸಾರ್ವಜನಿಕರು ವ್ಯಂಗ್ಯವಾಗಿ ಸಾರುತ್ತಿದ್ದು, ಮುಧೋಳದ ನಾಗರಿಕರು ತಮ್ಮ ಹಕ್ಕುಗಳಿಗಾಗಿ ಎಚ್ಚೆತ್ತುಕೊಳ್ಳಬೇಕಾದ ಸಮಯ ಬಂದಿದೆ ಎಂದು ಮುಷ್ಟಿ ಬಿಗಿದಿರುವ ಚಿತ್ರಗಳೊಂದಿಗೆ ಪೋಸ್ಟರ್ಗಳನ್ನು ಹಂಚಿಕೊಳ್ಳುತ್ತಿದ್ದಾರೆ.
ಇದನ್ನೂ ಓದಿ: R.B. Thimmapur: ಅಬಕಾರಿ ಅಕ್ರಮದ ಉರುಳು! ಸಚಿವ ಗಾದಿಯಿಂದ ಸೀದಾ ಮನೆಗೆ? ತಿಮ್ಮಾಪುರ ಕುರ್ಚಿ ಅಲುಗಾಡಿಸಿದ ಹಗರಣ!
ಜನಾಕ್ರೋಶದ ಜ್ವಾಲೆಗೆ ಉತ್ತರಿಸುವರೇ ಸಚಿವರು?
ಒಂದೆಡೆ ಜಿಲ್ಲೆಯ ಅಭಿವೃದ್ಧಿಯನ್ನು ಪರಾಮರ್ಶಿಸಬೇಕಾದ ಉಸ್ತುವಾರಿ ಸಚಿವರು ಕೆಡಿಪಿ ಸಭೆ ನಡೆಸದೇ ಎಂಟು ತಿಂಗಳು ಕಳೆದಿದ್ದಾರೆ. ಇನ್ನೊಂದೆಡೆ ಸಚಿವರ ಸ್ವಕ್ಷೇತ್ರ ಮುಧೋಳದಲ್ಲೇ ಅಭಿವೃದ್ಧಿ ಶೂನ್ಯವಾಗಿ, ಮೂಲಸೌಕರ್ಯಗಳಿಲ್ಲದೇ ಜನ ಕಣ್ಣೀರು ಹಾಕುತ್ತಿದ್ದಾರೆ. ಅಧಿಕಾರದ ಮದದಲ್ಲಿ ಸಾರ್ವಜನಿಕರ ಸಮಸ್ಯೆಗಳನ್ನು ಆಲಿಸದಿದ್ದರೆ ಪ್ರಜಾಪ್ರಭುತ್ವದಲ್ಲಿ ಜನರೇ ಸುಪ್ರೀಂ ಎಂಬುದನ್ನು ರಾಜಕಾರಣಿಗಳು ಮರೆಯಬಾರದು.
ಅಭಿವೃದ್ಧಿ ವಿಚಾರವಾಗಿ ಯಾರೂ ನನ್ನ ಹತ್ತಿರ ಬರಬೇಡಿ ಎಂಬಂತೆ ವರ್ತಿಸುತ್ತಿರುವ ಸಚಿವರ ಧೋರಣೆಗೆ ಸಾರ್ವಜನಿಕರೇ ಪೋಸ್ಟರ್ ಮೂಲಕ, “ಅಭಿವೃದ್ಧಿ ಮಾಡೋದು ಕನಸಿನ ಮಾತು, ಮೊದಲಿನ ಅವಧಿಯಲ್ಲಿ ಮಾಡಿರುವ ಅಭಿವೃದ್ಧಿ ಹೆಸರಲ್ಲಿ 3ವರ್ಷ ಕಾಲ ಕಳೆದಿದ್ದೇನೆ… ಸೆರೆ ಅಂಗಡಿ ಬೇಕಾದ್ರೆ ಬನ್ನಿ, ಹೆಜ್ಜೆ ಹೆಜ್ಜೆಗೊಂದು ಮಾಡಿ ಕೊಡೋಣ” ಎಂದು ಸಚಿವರ ಮನಸ್ಥಿತಿಯನ್ನು ಅಣಕಿಸಿದ್ದಾರೆ.
ಇನ್ನಾದರೂ ಮಾನ್ಯ ಸಚಿವರಾದ ಆರ್. ಬಿ. ತಿಮ್ಮಾಪುರ ಅವರು ತಮ್ಮ 8 ತಿಂಗಳ ಸುದೀರ್ಘ ಆಡಳಿತಾತ್ಮಕ ನಿದ್ರೆಯಿಂದ ಹೊರಬರಬೇಕಿದೆ. ತಕ್ಷಣವೇ ಬಾಗಲಕೋಟೆ ಜಿಲ್ಲೆಯ ಕೆಡಿಪಿ ಸಭೆಯನ್ನು ಕರೆದು ನೆನೆಗುದಿಗೆ ಬಿದ್ದಿರುವ ಯೋಜನೆಗಳಿಗೆ ಚಾಲನೆ ನೀಡಬೇಕು. ಅದರೊಂದಿಗೆ ತಮ್ಮ ಸ್ವಕ್ಷೇತ್ರ ಮುಧೋಳದ ಬೀದಿ ದೀಪ, ಕುಡಿಯುವ ನೀರು ಮತ್ತು ಬಾರ್ಗಳ ಹಾವಳಿಯನ್ನು ನಿಯಂತ್ರಿಸಲು ಕಟ್ಟುನಿಟ್ಟಿನ ಕ್ರಮ ಕೈಗೊಳ್ಳಬೇಕು. ಇಲ್ಲದಿದ್ದರೆ, ಮುಂಬರುವ ದಿನಗಳಲ್ಲಿ ಮುಧೋಳದ ಪ್ರಜ್ಞಾವಂತ ಮತದಾರರು ಇಂತಹ ಬೇಜವಾಬ್ದಾರಿ ಆಡಳಿತಕ್ಕೆ ಚುನಾವಣೆಯ ಮೂಲಕ ಸೂಕ್ತ ಬುದ್ಧಿ ಕಲಿಸುವುದು ನಿಶ್ಚಿತ.
