Apex Bank: ಕರ್ನಾಟಕದ ರಾಜಕೀಯ ರಂಗದಲ್ಲಿ ಮೇಲ್ನೋಟಕ್ಕೆ ಕಾಣುವ ಶಾಂತತೆಯ ಹಿಂದೆ, ಅಧಿಕಾರದ ತೀವ್ರ ಜಟಾಪಟಿ ಹಾಗೂ ತೆರೆಮರೆಯ ರಣತಂತ್ರಗಳು ಧಗಧಗನೆ ಉರಿಯುತ್ತಿವೆ. ರಾಜ್ಯ ಕಾಂಗ್ರೆಸ್ನಲ್ಲಿ ಮುಖ್ಯಮಂತ್ರಿ ಸ್ಥಾನಕ್ಕಾಗಿ ನಡೆಯುತ್ತಿರುವ ಶೀತಲ ಸಮರ ಮತ್ತು ಆಂತರಿಕ ಬಣಬಡಿದಾಟಗಳು ಈಗ ಅತ್ಯಂತ ಅಪಾಯಕಾರಿ ಹಂತ ತಲುಪಿವೆ. ಈ ಬಣ ಜಟಾಪಟಿಗೆ ಪ್ರಸ್ತುತ ಹೊಸ ರಂಗಸ್ಥಳವಾಗಿರುವುದು ಸೆಪ್ಟೆಂಬರ್ 10 ರಂದು ನಡೆಯಲಿರುವ ಅತ್ಯಂತ ಪ್ರಭಾವಿ ‘ಅಪೆಕ್ಸ್ ಬ್ಯಾಂಕ್’ (Apex Bank) ಅಧ್ಯಕ್ಷ ಸ್ಥಾನದ ಚುನಾವಣೆ. ಇದು ಕೇವಲ ಒಂದು ಬ್ಯಾಂಕಿನ ಆಡಳಿತ ಮಂಡಳಿಯ ಚುನಾವಣೆಯಷ್ಟೇ ಅಲ್ಲ, ಬದಲಿಗೆ ಸಿಎಂ ಡಿಕೆ ಶಿವಕುಮಾರ್ (DK Shivakumar) ಅವರ ಗದ್ದುಗೆಯ ಭವಿಷ್ಯವನ್ನು ಮತ್ತು ಅವರ ರಾಜಕೀಯ ಅಸ್ತಿತ್ವವನ್ನು ನಿರ್ಧರಿಸುವ ನಿರ್ಣಾಯಕ ‘ಅಗ್ನಿಪರೀಕ್ಷೆ’.
ಅಪೆಕ್ಸ್ ಬ್ಯಾಂಕ್: ರಾಜ್ಯ ರಾಜಕಾರಣದ ನೈಜ ‘ಕುಬೇರ’ ಪೀಠ
ಅಪೆಕ್ಸ್ ಬ್ಯಾಂಕ್ (Apex Bank) ಎಂದರೆ ಸಾಮಾನ್ಯ ಹಣಕಾಸು ಸಂಸ್ಥೆಯಲ್ಲ. ಸುಮಾರು 41,000 ಕೋಟಿ ರೂಪಾಯಿಗಳ ಬೃಹತ್ ವಹಿವಾಟು ನಡೆಸುವ, ಸ್ವತಃ ರಾಜ್ಯ ಸರ್ಕಾರಕ್ಕೇ ಸಾಲ ನೀಡಬಲ್ಲ ಆರ್ಥಿಕ ತಾಕತ್ತು ಹೊಂದಿರುವ ಏಕೈಕ ಸಹಕಾರಿ ಬ್ಯಾಂಕ್ ಇದು. ರಾಜ್ಯದ 21 ಡಿಸಿಸಿ (DCC) ಬ್ಯಾಂಕ್ಗಳು, ವಿವಿಧ ಮಹಾಮಂಡಳಗಳು ಹಾಗೂ ಸಾವಿರಾರು ಸಹಕಾರಿ ಸಂಘಗಳು ಇದರ ಆರ್ಥಿಕ ನಿಯಂತ್ರಣಕ್ಕೊಳಪಡುತ್ತವೆ.
ಗ್ರಾಮೀಣ ಭಾಗದ ಶೇಕಡಾ 70ಕ್ಕೂ ಹೆಚ್ಚು ರೈತರು ಮತ್ತು ಸಣ್ಣ ಉದ್ಯಮಿಗಳೊಂದಿಗೆ ನೇರ ಸಂಪರ್ಕ ಸಾಧಿಸಲು ಹಾಗೂ ರಾಜಕೀಯ ಪ್ರಾಬಲ್ಯ ಸ್ಥಾಪಿಸಲು ಅಪೆಕ್ಸ್ ಬ್ಯಾಂಕ್ ಅಧ್ಯಕ್ಷ ಸ್ಥಾನವು ಪ್ರಬಲ ವೇದಿಕೆಯಾಗಿದೆ. ಈ ಪೀಠದಲ್ಲಿ ಕುಳಿತ ನಾಯಕ ಇಡೀ ರಾಜ್ಯದ ಗ್ರಾಮೀಣ ಮಟ್ಟದಲ್ಲಿ ‘ಮಾಸ್ ಲೀಡರ್’ ಆಗಿ ಬೆಳೆಯಲು ಸಾಧ್ಯ. ಹೀಗಾಗಿಯೇ, ಪ್ರತಿಯೊಬ್ಬ ಮುಖ್ಯಮಂತ್ರಿಯೂ ತಮ್ಮದೇ ಬಣದ ಅತ್ಯಂತ ಆಪ್ತ ನಾಯಕನನ್ನು ಈ ಸ್ಥಾನದಲ್ಲಿ ಕೂರಿಸಲು ಸಕಲ ಶ್ರಮ ವಹಿಸುತ್ತಾರೆ.
ಇದನ್ನೂ ಓದಿ: ‘ಸಿದ್ದು’ ಶಾಪ, ‘ಕುಮಾರ’ ತಾಪ, ‘ಇಡಿ’ ಪ್ರಕೋಪ; ಡಿಕೆಶಿ ಸರ್ಕಾರಕ್ಕೆ ಒಂದೇ ತಿಂಗಳಲ್ಲಿ ನೂರೆಂಟು ಕಂಟಕ!
ಸಿದ್ದರಾಮಯ್ಯ ‘ಸೈಲೆಂಟ್’ ಗೇಮ್: ಮೌನದ ಹಿಂದಿನ ಮಾಸ್ಟರ್ ಪ್ಲಾನ್
ಮಾಜಿ ಸಿಎಂ ಸಿದ್ದರಾಮಯ್ಯ ಸದ್ಯ ಮಾಧ್ಯಮಗಳ ಮುಂದೆ ಮೌನವಾಗಿದ್ದರೂ, ತೆರೆಮರೆಯಲ್ಲಿ ಅತ್ಯಂತ ಅಪಾಯಕಾರಿ ಮತ್ತು ತಾಂತ್ರಿಕ ರಾಜಕೀಯ ಗೇಮ್ ಪ್ಲಾನ್ ಮಾಡುತ್ತಿದ್ದಾರೆ. “ಆಡದಲೇ ಮಾಡುವನು ರೂಢಿಯೊಳಗೆ ಉತ್ತಮನು” ಎನ್ನುವಂತೆ, ಸಿದ್ದರಾಮಯ್ಯ ನೇರವಾಗಿ ಯಾವುದೇ ತಗಾದೆ ತೆಗೆಯದೆ ‘ಅಹಿಂದ’ ಚಟುವಟಿಕೆಗಳಿಗೆ ಮತ್ತೆ ಮರುಜೀವ ನೀಡುತ್ತಿದ್ದಾರೆ.
- ಹಿಂಬಾಗಿಲ ಅಹಿಂದಾ ರಣತಂತ್ರ: ಸಿದ್ದರಾಮಯ್ಯ ಅವರು ಬೀರೂರಿನಲ್ಲಿ ಸಂಗೊಳ್ಳಿ ರಾಯಣ್ಣ ಪ್ರತಿಮೆ ಅನಾವರಣ, ಬೆಂಗಳೂರಿನಲ್ಲಿ ಹಿಂದುಳಿದ ವರ್ಗಗಳ ಒಕ್ಕೂಟದ ಸಮಾವೇಶ, ಬಾದಾಮಿಯಲ್ಲಿ ‘ಸಿದ್ದರಾಮಯ್ಯ ಅಭಿಮಾನಿ ಬಳಗ’ದ ಸಭೆಗಳ ಮೂಲಕ ಪಕ್ಷದ ಚೌಕಟ್ಟನ್ನು ಮೀರಿ ತಮ್ಮದೇ ಸ್ವಂತ ಬಲವನ್ನು ಗಟ್ಟಿಮಾಡಿಕೊಳ್ಳುತ್ತಿದ್ದಾರೆ.
- ಡಿಕೆಶಿ ಶಕ್ತಿಗೆ ಟಕ್ಕರ್: ಕೆಪಿಸಿಸಿ ಅಧ್ಯಕ್ಷರಾಗಿದ್ದಾಗ ಡಿಕೆ ಶಿವಕುಮಾರ್ ಅವರು ‘ವ್ಯಕ್ತಿ ಪೂಜೆ ಬೇಡ, ಪಕ್ಷದ ಪೂಜೆ ಮಾಡಿ’ ಎಂದು ಕಟ್ಟಳೆ ವಿಧಿಸಿದ್ದರು. ಆದರೆ ಈಗ ಅಧಿಕಾರದ ಕೇಂದ್ರದಿಂದ ಹೊರಗಿರುವ ಸಿದ್ದರಾಮಯ್ಯ ಅವರಿಗೆ ಯಾವುದೇ ನಿರ್ಬಂಧಗಳಿಲ್ಲದೆ, ತಮ್ಮ ಅಭಿಮಾನಿ ಬಳಗ ಮತ್ತು ಜಾತಿ ಸಮಾವೇಶಗಳ ಮೂಲಕ ಡಿಕೆಶಿಗೆ ಸೈಲೆಂಟ್ ಆಗಿ ಚೆಕ್-ಮೇಟ್ ನೀಡುತ್ತಿದ್ದಾರೆ.
ಕೆ.ಎನ್. ರಾಜಣ್ಣ ‘ವೈಲೆಂಟ್’ ಕೌಂಟರ್: ಅಸ್ತಿತ್ವದ ಕದನ
ಇತ್ತ ಸಿದ್ದರಾಮಯ್ಯ ಅವರ ಸೈಲೆಂಟ್ ಗೇಮ್ಗೆ ನೇರ ಮತ್ತು ಧಗೆಯಿಡುವ ‘ವೈಲೆಂಟ್ ಕೌಂಟರ್’ ನೀಡುತ್ತಿರುವುದು ವಾಲ್ಮೀಕಿ ನಾಯಕ ಸಮುದಾಯದ ಪ್ರಭಾವಿ ನಾಯಕ, ಮಾಜಿ ಸಚಿವ ಕೆ.ಎನ್. ರಾಜಣ್ಣ ಹಾಗೂ ಅವರ ಪುತ್ರ ರಾಜೇಂದ್ರ ರಾಜಣ್ಣ.
- ಡಿಕೆಶಿ ವರ್ಸಸ್ ರಾಜಣ್ಣ ಹಳೆ ಹಗರಣ: ಈ ಹಿಂದೆ ಸಂಪುಟದಿಂದ ತಮಗೆ ಮಂತ್ರಿಸ್ಥಾನ ಸಿಗದಂತೆ ತಡೆದಿದ್ದು ಮತ್ತು ತಮ್ಮನ್ನು ರಾಜಕೀಯವಾಗಿ ಹತ್ತಿಕ್ಕಲು ಯತ್ನಿಸಿದ್ದು ಡಿಕೆ ಶಿವಕುಮಾರ್ ಎಂಬ ತೀವ್ರ ಆಕ್ರೋಶ ರಾಜಣ್ಣ ಅವರಲ್ಲಿದೆ.
- ಅಪೆಕ್ಸ್ ಕಣದಲ್ಲಿ ಸಂಬಂಧಿಯ ಹಠ: ಡಿಕೆ ಶಿವಕುಮಾರ್ ಅವರು ತಮ್ಮ ಸಂಬಂಧಿ ಹಾಗೂ ಎಂಎಲ್ಸಿ ಎಸ್. ರವಿ ಅವರನ್ನು ಅಪೆಕ್ಸ್ ಬ್ಯಾಂಕ್ ಅಧ್ಯಕ್ಷರನ್ನಾಗಿ ಮಾಡಲು ಪಟ್ಟು ಹಿಡಿದಿದ್ದರೆ, ಇತ್ತ ಸಿದ್ದರಾಮಯ್ಯ ಬೆಂಬಲದೊಂದಿಗೆ ರಾಜೇಂದ್ರ ರಾಜಣ್ಣ ಕಣಕ್ಕಿಳಿದಿದ್ದಾರೆ.
- ಸಂಖ್ಯಾಬಲದ ಮೇಲುಗೈ: 19 ಚುನಾಯಿತ ನಿರ್ದೇಶಕರ ಪೈಕಿ ರಾಜಣ್ಣ ಬಣಕ್ಕೆ ಈಗಾಗಲೇ 11ಕ್ಕೂ ಹೆಚ್ಚು ನಿರ್ದೇಶಕರ ಬೆಂಬಲವಿದೆ. ಬಿಜೆಪಿ ನಿರ್ದೇಶಕ ಬೆಳ್ಳಿ ಪ್ರಕಾಶ್ ಮತ್ತು ಜೆಡಿಎಸ್ನ ಸೂರಜ್ ರೇವಣ್ಣ ಅವರಂತಹ ವಿಪಕ್ಷ ನಿರ್ದೇಶಕರು ಡಿಕೆಶಿ ಮೇಲಿನ ಅಸಮಾಧಾನದಿಂದ ರಾಜಣ್ಣ ಅವರ ಪರ ನಿಂತಿದ್ದಾರೆ. ಇತ್ತೀಚೆಗೆ ರಾಜೇಂದ್ರ ರಾಜಣ್ಣ ಅವರು ಕೇಂದ್ರ ಸಚಿವ ಅಮಿತ್ ಶಾ ಹಾಗೂ ಹೆಚ್.ಡಿ. ದೇವೇಗೌಡ ಅವರನ್ನು ಭೇಟಿಯಾಗಿ ಬಂದಿರುವುದು ಈ ‘ವೈಲೆಂಟ್’ ಕೌಂಟರ್ಗೆ ಆನೆಬಲ ತಂದಿದೆ.
ವಾಲ್ಮೀಕಿ ನಾಯಕ ರಾಜೇಂದ್ರಗೆ ಕಡೆಗಣನೆ: ಡಿಕೆಶಿಗೆ ಕಾದಿದೆ ಮಹಾ ಗಂಡಾಂತರ!
ಕರ್ನಾಟಕ ರಾಜಕಾರಣದಲ್ಲಿ ವಾಲ್ಮೀಕಿ/ನಾಯಕ ಸಮುದಾಯವು ಸುಮಾರು 50 ರಿಂದ 60 ವಿಧಾನಸಭಾ ಕ್ಷೇತ್ರಗಳಲ್ಲಿ ಶಾಸಕರ ಜಾತಕ ನಿರ್ಧರಿಸುವ ಬಲ ಹೊಂದಿದೆ. ರಾಜಣ್ಣ ಅವರನ್ನು ಸಂಪುಟದಿಂದ ಹೊರಗಿಟ್ಟಾಗಲೇ ಸಮುದಾಯದಲ್ಲಿ ಆಕ್ರೋಶ ವ್ಯಕ್ತವಾಗಿತ್ತು. ಈಗ ಅಪೆಕ್ಸ್ ಬ್ಯಾಂಕ್ (Apex Bank) ನಲ್ಲೂ ರಾಜೇಂದ್ರ ರಾಜಣ್ಣ ಅವರನ್ನು ಬದಿಗೊತ್ತಿ, ತಮ್ಮ ಆಪ್ತ ಸಂಬಂಧಿ ಎಸ್. ರವಿ ಅವರಿಗೆ ಮಣೆ ಹಾಕಿದರೆ ಡಿಕೆಶಿಗೆ ಈ ಕೆಳಗಿನ ಆಪತ್ತುಗಳು ಎದುರಾಗಲಿವೆ:
1. ‘ಅಹಿಂದ ವಿರೋಧಿ’ ಹಣೆಪಟ್ಟಿ: ಕಾಂಗ್ರೆಸ್ನೊಳಗೂ ಡಿಕೆ ಶಿವಕುಮಾರ್ ಅವರು ಅಹಿಂದ ನಾಯಕರನ್ನು ತುಳಿಯುತ್ತಿದ್ದಾರೆ ಮತ್ತು ಕುಟುಂಬ ರಾಜಕಾರಣ ಮಾಡುತ್ತಿದ್ದಾರೆ ಎನ್ನುವ ಸಾರ್ವಜನಿಕ ನಿರೂಪಣೆ ಗಟ್ಟಿಯಾಗುತ್ತದೆ.
2. ರಮೇಶ್ ಜಾರ್ಕಿಹೊಳಿ 2.0 ಕ್ರಾಂತಿ: ಹಿಂದೆ ಮೈತ್ರಿ ಸರ್ಕಾರವನ್ನು ಪತನಗೊಳಿಸುವಲ್ಲಿ ನಾಯಕ ಸಮುದಾಯದ ರಮೇಶ್ ಜಾರಕಿಹೊಳಿ ಪ್ರಮುಖ ಪಾತ್ರ ವಹಿಸಿದ್ದರು. ಈಗ ಮಂತ್ರಿಸ್ಥಾನ ಕಳೆದುಕೊಂಡು ವ್ಯಾಗ್ರರಾಗಿರುವ ರಾಜಣ್ಣ, ಅಪೆಕ್ಸ್ ಬ್ಯಾಂಕ್ನಲ್ಲಿ ತಮಗೆ ಹಿನ್ನಡೆಯಾದರೆ ಕನಿಷ್ಠ 30 ರಿಂದ 40 ಶಾಸಕರನ್ನು ಒಗ್ಗೂಡಿಸಿ ಸರ್ಕಾರದ ಬೆವರು ಇಳಿಸುವುದು ಖಚಿತ.
3. ಸಚಿವ ಸಂಪುಟದಲ್ಲಿ ಬಿರುಕು: ಸಹಕಾರ ಸಚಿವ ಲಕ್ಷ್ಮಣ ಸವದಿ ಅವರಂತಹ ನಾಯಕರು ಉಭಯ ಸಂಕಟದಲ್ಲಿದ್ದು, ಉತ್ತರ ಕರ್ನಾಟಕ ಮತ್ತು ಅಹಿಂದ ನಾಯಕರ ಒತ್ತಡಕ್ಕೆ ಮಣಿದು ರಾಜಣ್ಣ ಪರ ನಿಲ್ಲುವ ಸಾಧ್ಯತೆಯಿದೆ.
ಇದನ್ನೂ ಓದಿ: ಮೌಲ್ಯಗಳ ಮುಖವಾಡ, ಚಳುವಳಿಗಳ ಹತ್ಯೆ, ಹಗರಣಗಳ ಸರಮಾಲೆ! ಇದು ಹೆಗಡೆ ರಾಜಕೀಯದ ಕರಾಳ ಅಸಲಿಯತ್ತು…
ಡಿಕೆ ಸಿಎಂ ಕುರ್ಚಿಗೆ ಕಂಟಕವಾಯಿತಾ ಅಪೆಕ್ಸ್ ಸಮರ?
ಡಿಕೆ ಶಿವಕುಮಾರ್ ಅವರು ಸಿಎಂ ಸ್ಥಾನದಲ್ಲಿದ್ದರೂ, ಮುಂದಿನ ಅಸೆಂಬ್ಲಿ ಚುನಾವಣೆಯಲ್ಲಿ ಸುಮಾರು 55 ರಿಂದ 75 ಶಾಸಕರು ಸೋಲಲಿದ್ದಾರೆ ಎನ್ನುವ ಸುನಿಲ್ ಕನುಗೋಲು ಅವರ ವರದಿ ಶಾಸಕರ ನಿದ್ದೆಗೆಡಿಸಿದೆ. ಇಂತಹ ಸೂಕ್ಷ್ಮ ಸನ್ನಿವೇಶದಲ್ಲಿ:
- ಅಪೆಕ್ಸ್ ಬ್ಯಾಂಕ್ ಚುನಾವಣೆಯಲ್ಲಿ ಕೆ.ಎನ್. ರಾಜಣ್ಣ ಬಣವನ್ನು ಸೋಲಿಸಲು ಡಿಕೆಶಿ ಪ್ರಯತ್ನಿಸಿದರೆ, ಕಾಂಗ್ರೆಸ್ನಲ್ಲಿ ತಡೆಹಿಡಿಯಲಾಗದ ಬಂಡಾಯದ ಕಿಡಿ ಹೊತ್ತಿಕೊಳ್ಳಲಿದೆ.
- ಸ್ವಪಕ್ಷೀಯರೇ ವಿಪಕ್ಷಗಳಿಗೆ ದಾಖಲೆಗಳನ್ನು ಒದಗಿಸಿ, ಸರ್ಕಾರದ ಪತನಕ್ಕೆ ದಾರಿ ಮಾಡಿಕೊಡಲಿದ್ದಾರೆ.
- ಹೈಕಮಾಂಡ್ ಮಾತನ್ನೂ ಮೀರಲು ಹೊರಟರೆ, ರಾಜ್ಯದಲ್ಲಿ ಅವಧಿಗೆ ಮುನ್ನವೇ (Pre-mature Elections) ವಿಧಾನಸಭೆ ಚುನಾವಣೆ ಎದುರಾಗುವ ಎಲ್ಲ ಸಾಧ್ಯತೆಗಳೂ ದಟ್ಟವಾಗಿವೆ.
ಸಿದ್ದರಾಮಯ್ಯ ಅವರ ತಾಂತ್ರಿಕ ‘ಸೈಲೆಂಟ್ ಗೇಮ್’ ಮತ್ತು ರಾಜಣ್ಣ ಬಣದ ಆಕ್ರಮಣಕಾರಿ ‘ವೈಲೆಂಟ್ ಕೌಂಟರ್’ ಮಧ್ಯೆ ಡಿಕೆ ಶಿವಕುಮಾರ್ ಸಿಲುಕಿಕೊಂಡಿದ್ದಾರೆ. ಸೆಪ್ಟೆಂಬರ್ 10 ರ ಅಪೆಕ್ಸ್ ಬ್ಯಾಂಕ್ ಚುನಾವಣೆಯಲ್ಲಿ ವಾಲ್ಮೀಕಿ ನಾಯಕ ನಾಯಕತ್ವದ ರಾಜೇಂದ್ರ ರಾಜಣ್ಣ ಅವರಿಗೆ ಸ್ಥಾನ ಬಿಟ್ಟುಕೊಟ್ಟು ನಮಿಸದಿದ್ದರೆ, ಡಿಕೆ ಶಿವಕುಮಾರ್ ಅವರ ಸಿಎಂ ಗದ್ದುಗೆಯ ಆಯುಷ್ಯ ಕ್ಷಣಗಣನೆಗೆ ಬರುವುದು ನಿಶ್ಚಿತ. ಹೆಜ್ಜೆ ಹೆಜ್ಜೆಗೆ ಎಡವುತ್ತಿರುವ ಡಿಕೆಶಿಗೆ ಈ ಅಪೆಕ್ಸ್ ಬ್ಯಾಂಕ್ ಸಮರವೇ ಸಿಎಂ ಕುರ್ಚಿಯ ಅಂತ್ಯದ ಆರಂಭವಾಗಲಿದೆಯೇ ಎಂಬುದನ್ನು ಕಾದು ನೋಡಬೇಕಿದೆ.
ಯಾರ ಹಂಗೂ ಇಲ್ಲದ, ಯಾರಿಗೂ ಬಗ್ಗದ ಸ್ವತಂತ್ರ ಮಾಧ್ಯಮಕ್ಕೆ ನಿಮ್ಮ ಬೆಂಬಲದ ಅವಶ್ಯಕತೆ ಇದೆ...
