ರಾಜ್ಯ ಬಿಜೆಪಿ (BJP) ಯಲ್ಲಿ ವಿಧಾನ ಪರಿಷತ್ ಚುನಾವಣೆಯ ನಂತರದ ಬೆಳವಣಿಗೆಗಳು ಒಂದು ರೀತಿಯ ‘ರಾಜಕೀಯ ರಹಸ್ಯ’ದಂತೆ ಭಾಸವಾಗುತ್ತಿವೆ. ಆಡಳಿತರೂಢ ಕಾಂಗ್ರೆಸ್ನ ಎದುರು ಬಿಜೆಪಿ ಮುಖಭಂಗ ಅನುಭವಿಸಿದ ಬೆನ್ನಲ್ಲೇ, ರಾಜ್ಯಾಧ್ಯಕ್ಷ ಬಿ.ವೈ. ವಿಜಯೇಂದ್ರ (B.Y. Vijayendra) ಅವರು ಘೋಷಿಸಿದ ‘ಧರ್ಮಸ್ಥಳದ ಆಣೆ-ಪ್ರಮಾಣ’ದ ಸವಾಲು, ಇದೀಗ ಪಕ್ಷದ ಒಳಗೇ ಹಲವು ಸಂಶಯಗಳಿಗೆ ಎಡೆಮಾಡಿಕೊಟ್ಟಿದೆ. ಈ ಬೆಳವಣಿಗೆಯನ್ನು ಸೂಕ್ಷ್ಮವಾಗಿ ಗಮನಿಸುತ್ತಿರುವ ರಾಜಕೀಯ ಪಡಸಾಲೆಯಲ್ಲಿ, ಇದು ಕೇವಲ ಸತ್ಯಶೋಧನೆಯ ಪ್ರಯತ್ನವೋ ಅಥವಾ ವಿಜಯೇಂದ್ರ ಅವರ ನಾಯಕತ್ವವನ್ನು ಅಸ್ಥಿರಗೊಳಿಸಲು ಹೆಣೆದ ವ್ಯವಸ್ಥಿತ ‘ಖೆಡ್ಡಾ’ವೋ ಎಂಬ ಪ್ರಶ್ನೆ ಗಂಭೀರವಾಗಿ ಕಾಡುತ್ತಿದೆ.
ಆಣೆ-ಪ್ರಮಾಣದ ಸವಾಲು – ಇದು ಸ್ವಯಂಕೃತ ಅಪರಾಧವೇ?
ರಾಜ್ಯ ಬಿಜೆಪಿಯ (BJP) ಉನ್ನತ ಮಟ್ಟದ ಸಭೆಗಳಲ್ಲಿ ಅಥವಾ ಸಾಂಸ್ಥಿಕ ಸಮಿತಿಗಳಲ್ಲಿ ಅಡ್ಡ ಮತದಾನದ ಬಗ್ಗೆ ಚರ್ಚಿಸಬೇಕಿದ್ದ ವಿಷಯವನ್ನು, ಬಹಿರಂಗವಾಗಿ ಧಾರ್ಮಿಕ ಕ್ಷೇತ್ರಕ್ಕೆ ಕೊಂಡೊಯ್ದಿದ್ದು ವಿಜಯೇಂದ್ರ ಅವರ ಪಾಲಿಗೆ ಒಂದು ‘ರಾಜಕೀಯ ಆತ್ಮಹತ್ಯೆ’ಯಂತೆ ಕಾಣಿಸುತ್ತಿದೆಯಾ? ಎಂಬ ಮಾತುಗಳು ಕೇಳಿಬರುತ್ತಿವೆ. ಆಣೆ-ಪ್ರಮಾಣದ ಮಾತು ಹೊರಬೀಳುತ್ತಿದ್ದಂತೆ ಪಕ್ಷದ ಹಿರಿಯ ನಾಯಕರಿಂದಲೇ ವಿರೋಧದ ದನಿಗಳು ಕೇಳಿಬಂದಿರುವುದು, ವಿಜಯೇಂದ್ರ ಅವರ ನಿರ್ಧಾರದ ಮೇಲೆ ಪಕ್ಷದೊಳಗೆ ಒಂದು ರೀತಿಯ ‘ಅಪನಂಬಿಕೆ’ ಇರುವುದನ್ನು ಸೂಚಿಸುತ್ತಿದೆಯಾ? ಎಂಬ ಅನುಮಾನ ಮೂಡುತ್ತದೆ. ಪಕ್ಷದೊಳಗೆ ಒಬ್ಬ ಅಧ್ಯಕ್ಷನ ತೀರ್ಮಾನವನ್ನು ಬಹಿರಂಗವಾಗಿಯೇ ತಳ್ಳಿಹಾಕುವ ಮಟ್ಟಕ್ಕೆ ಮುಜುಗರದ ಸನ್ನಿವೇಶ ಸೃಷ್ಟಿಯಾಗಿದ್ದು, ಇದು ಆಕಸ್ಮಿಕವೋ ಅಥವಾ ವಿಜಯೇಂದ್ರ ಅವರನ್ನು ‘ಅಪ್ರಬುದ್ಧ’ ಎಂದು ಬಿಂಬಿಸಲು ನಡೆಸಿದ ಪೂರ್ವಯೋಜಿತ ತಂತ್ರವೋ ಎಂಬುದು ಯಕ್ಷಪ್ರಶ್ನೆ.
ಆಣೆ-ಪ್ರಮಾಣಕ್ಕೆ ಬಿದ್ದ ತಣ್ಣೀರು: ವಿಜಯೇಂದ್ರ ತಂತ್ರ ವಿಫಲವಾಯ್ತಾ?
ವಿಜಯೇಂದ್ರ ಅವರು ಆಣೆ-ಪ್ರಮಾಣದ ಘೋಷಣೆ ಮಾಡಿದ್ದು ಬಿಜೆಪಿ (BJP) ಪಕ್ಷದೊಳಗಿನ ಅಡ್ಡ ಮತದಾನ ಮಾಡಿದವರನ್ನು ಹೆದರಿಸಲು ಅಥವಾ ಸತ್ಯ ಹೊರತರುವ ಹತಾಶ ಪ್ರಯತ್ನದಲ್ಲಿ ಇರಬಹುದು. ಆದರೆ, ಅಚ್ಚರಿಯೆಂದರೆ ಈ ಪ್ರಸ್ತಾವಕ್ಕೆ ಪಕ್ಷದ ಹಿರಿಯ ನಾಯಕರಿಂದಲೇ ಬಹಿರಂಗ ವಿರೋಧ ವ್ಯಕ್ತವಾಯಿತು. ಸುರೇಶ್ ಕುಮಾರ್ (Suresh Kumar) ಅವರಂತಹ ನಾಯಕರು ತೀವ್ರ ಅಸಮಾಧಾನ ಹೊರಹಾಕಿದರೆ, ಪ್ರಲ್ಹಾದ್ ಜೋಶಿ (Pralhad Joshi)ಯವರಂತಹ ಪ್ರಭಾವಿ ನಾಯಕರು ಮಧ್ಯಪ್ರವೇಶಿಸಿ, “ಧರ್ಮಸ್ಥಳವನ್ನು ಇದಕ್ಕೆ ಎಳೆಯಬೇಡಿ” ಎಂದು ವಿಜಯೇಂದ್ರ ಅವರ ಕೈಕಟ್ಟುವ ಕೆಲಸ ಮಾಡಿದರು.
ಒಂದು ದೃಷ್ಟಿಯಿಂದ ನೋಡಿದರೆ, ವಿಜಯೇಂದ್ರ ಅವರ ಈ ‘ಹಠಾತ್ ನಿರ್ಧಾರ’ವನ್ನು ಪಕ್ಷದ ಹಿರಿಯ ನಾಯಕರು ಸಾರ್ವಜನಿಕವಾಗಿ ತರಾಟೆಗೆ ತೆಗೆದುಕೊಂಡದ್ದು, ವಿಜಯೇಂದ್ರ ಅವರ ಆದೇಶಕ್ಕೆ ಪಕ್ಷದಲ್ಲಿ ಬೆಲೆಯಿಲ್ಲ ಎಂಬ ಸಂದೇಶವನ್ನು ರವಾನಿಸಿದಂತಿದೆ. ಇದು ವಿಜಯೇಂದ್ರ ಹೆಣೆದಿದ್ದ ಆಣೆ-ಪ್ರಮಾಣದ ತಂತ್ರವನ್ನು ಅವರ ಸ್ವಪಕ್ಷೀಯರೇ ವಿಫಲಗೊಳಿಸಿದ ಪರಿ ಎನ್ನಲಾಗುತ್ತಿದೆ.
‘ಅಪ್ರಬುದ್ಧ’ ಎಂಬ ಹಣೆಪಟ್ಟಿ – ವಿರೋಧಿ ಬಣದ ಟಾರ್ಗೆಟ್?
ವಿಜಯೇಂದ್ರ ಅವರ ಅಧಿಕಾರ ಸ್ವೀಕಾರದಿಂದಲೂ ಪಕ್ಷದೊಳಗಿನ ಒಂದು ಪ್ರಭಾವಿ ಬಣ ಅಸಮಾಧಾನದಲ್ಲಿದೆ ಎಂಬುದು ಗುಟ್ಟಾಗಿ ಉಳಿದಿಲ್ಲ. ಈಗಿನ ಅಡ್ಡ ಮತದಾನದ ಸೋಲನ್ನು ವಿಜಯೇಂದ್ರ ಅವರ ವೈಫಲ್ಯ ಎಂದು ಬಿಂಬಿಸುವ ಮೂಲಕ, ಅವರನ್ನು ಹೈಕಮಾಂಡ್ನ ಎದುರು ಅಸಮರ್ಥರನ್ನಾಗಿ ಚಿತ್ರಿಸುವ ಪ್ರಯತ್ನಗಳು ವೇಗ ಪಡೆದುಕೊಂಡಿವೆ ಎಂದು ವಿಶ್ಲೇಷಿಸಲಾಗುತ್ತಿದೆ. ಡಿಕೆ ಶಿವಕುಮಾರ್ ಅವರಂತಹ ಅನುಭವಿ ರಾಜಕಾರಣಿಗಳ ತಂತ್ರಕ್ಕೆ ಬಲಿಯಾದ ವಿಜಯೇಂದ್ರ ಅವರಿಗೆ ಪಕ್ಷವನ್ನು ಮುನ್ನಡೆಸುವಷ್ಟು ಅನುಭವವಿಲ್ಲ ಎಂಬಂತೆ ಬಿಂಬಿಸುವ ಮೂಲಕ, ಅವರನ್ನು ರಾಜ್ಯ ಅಧ್ಯಕ್ಷ ಸ್ಥಾನದಿಂದ ಕೆಳಗಿಳಿಸಲು ಬೇಕಾದ ವಾತಾವರಣವನ್ನು ಸೃಷ್ಟಿಸಲಾಗುತ್ತಿದೆಯೇ? ಎಂಬ ಅನುಮಾನ ಬಲವಾಗಿದೆ. “ಯಡಿಯೂರಪ್ಪ ಅವರ ಮಗ” ಎಂಬ ಕಾರಣಕ್ಕೆ ಕೊಟ್ಟ ಸ್ಥಾನದಲ್ಲಿ ಅವರು ವಿಫಲರಾಗಿದ್ದಾರೆ ಎಂಬ ಬಿಂಬವನ್ನು ಗಟ್ಟಿಗೊಳಿಸಲು, ಈ ಅಡ್ಡ ಮತದಾನವನ್ನೇ ಒಂದು ಬಲವಾದ ಅಸ್ತ್ರವಾಗಿ ಬಳಸಿಕೊಳ್ಳಲಾಗುತ್ತಿದೆ.
ಪಕ್ಷದೊಳಗೆ ‘ಮನೆಕಳ್ಳ’ರ ಆಟ – ಯಾರ ರಕ್ಷಣೆಯಲ್ಲಿದ್ದಾರೆ ಶಾಸಕರು?
ಪಕ್ಷದ ಹಿರಿಯ ನಾಯಕರ ವಲಯದಲ್ಲಿ ಚರ್ಚೆಯಾಗುತ್ತಿರುವಂತೆ, ಬಿಜೆಪಿ ಸಂಘಟನೆಗೆ ಅಹರ್ನಿಶಿ ದುಡಿಯುವ ತಳಮಟ್ಟದ ಕಾರ್ಯಕರ್ತರನ್ನು ಕಡೆಗಣಿಸಿ, ಕೆಲ ಪ್ರಬಲ ಸಮುದಾಯದ ಶಾಸಕರಿಗೆ ಪಕ್ಷದ ಚುಕ್ಕಾಣಿ ನೀಡಿದ್ದೇ ಈ ಸೋಲಿಗೆ ಕಾರಣವೇ? ಎಂಬ ಪ್ರಶ್ನೆ ಈಗ ಕಾರ್ಯಕರ್ತ ವಲಯದಲ್ಲಿ ಹರಿದಾಡುತ್ತಿದೆ. ವಿಜಯೇಂದ್ರ ಅವರ ಆಪ್ತ ವಲಯದವರು ಎನ್ನಲಾದವರೇ ಈ ಒಳಸಂಚಿನಲ್ಲಿ ಭಾಗಿಯಾಗಿದ್ದಾರಾ? ಅಥವಾ ವಿಜಯೇಂದ್ರ ಅವರ ಮೇಲೆ ಪ್ರಭಾವ ಬೀರುವ ಶಾಸಕರೇ ಪಕ್ಷದ ದ್ರೋಹಕ್ಕೆ ಕಾರಣರಾಗಿದ್ದಾರಾ? ಎಂಬ ಮಾತುಗಳು ಕೇಳಿಬರುತ್ತಿವೆ. ಪಕ್ಷದ ಶಿಸ್ತಿನ ಹೆಸರಿನಲ್ಲಿ ಈ ‘ಮನೆಕಳ್ಳ’ರನ್ನು ಪತ್ತೆ ಹಚ್ಚುವ ಬದಲು, ಆಣೆ-ಪ್ರಮಾಣದ ನೆಪದಲ್ಲಿ ವಿವಾದ ಸೃಷ್ಟಿಸಿ, ಆ ಮೂಲಕ ವಿಜಯೇಂದ್ರ ಅವರ ವರ್ಚಸ್ಸನ್ನು ಧೂಳೀಪಟ ಮಾಡಲಾಗುತ್ತಿದೆಯೇ? ಎಂಬ ಸ್ಪೆಕ್ಯುಲೇಷನ್ ರಾಜಕೀಯ ವಲಯದಲ್ಲಿ ಸಂಚಲನ ಮೂಡಿಸಿದೆ.
ಇದನ್ನೂ ಓದಿ: JDS: ಕ್ರಾಸ್ ವೋಟಿಂಗ್ ‘ಖಯಾಲಿ’- ಕಮಲ ಮೈತ್ರಿಯ ಮುಳ್ಳು! ಪರಿಷತ್ ಪೆಟ್ಟು ಜೆಡಿಎಸ್ ಅಸ್ತಿತ್ವಕ್ಕೆ ಬಿದ್ದ ಮರಣಶಾಸನವೇ?
ಕುರ್ಚಿಯ ಸುತ್ತ ಸುತ್ತುತ್ತಿದೆಯೇ ಸಂಚು?
ಒಟ್ಟಾರೆಯಾಗಿ, ಈಗ ನಡೆಯುತ್ತಿರುವ ವಿದ್ಯಮಾನಗಳು ಕೇವಲ ಒಂದು ಮತದಾನದ ಸೋಲಿಗೆ ಸೀಮಿತವಾಗಿಲ್ಲ. ಆಣೆ-ಪ್ರಮಾಣದ ವಿಚಾರದಲ್ಲಿ ವಿಜಯೇಂದ್ರ ಅವರು ಹಿಮ್ಮೆಟ್ಟಿದರೆ, ಅದು ಅವರ ನಾಯಕತ್ವಕ್ಕೆ ಬಿದ್ದಿರುವ ದೊಡ್ಡ ಪೆಟ್ಟು. ಒಂದು ವೇಳೆ ಮುಂದುವರಿದರೆ, ಅದು ಪಕ್ಷದ ಹಿರಿಯ ನಾಯಕರ ಕೆಂಗಣ್ಣಿಗೆ ಗುರಿಯಾಗಿ, ಅವರ ವಿರೋಧಿ ಬಣಕ್ಕೆ ಅವರನ್ನು ಪದಚ್ಯುತಗೊಳಿಸಲು ಮತ್ತೊಂದು ಅವಕಾಶ ನೀಡಿದಂತಾಗುತ್ತದೆ. ಈ ಇಕ್ಕಟ್ಟಿನ ಪರಿಸ್ಥಿತಿಯಲ್ಲಿ ವಿಜಯೇಂದ್ರ ಅವರು ಸಿಲುಕಿರುವ ಬಗೆಯನ್ನು ನೋಡಿದರೆ, ಅವರ ಸುತ್ತಲೂ ಒಂದು ರಾಜಕೀಯ ಖೆಡ್ಡಾ ಹೆಣೆಯಲಾಗಿದೆ ಎಂಬ ಅನುಮಾನಕ್ಕೆ ಬಲವಾದ ಪುರಾವೆಗಳು ಸಿಗುತ್ತಿವೆಯಾ? ಎಂದು ರಾಜಕೀಯ ಪಂಡಿತರು ಪ್ರಶ್ನಿಸುತ್ತಿದ್ದಾರೆ.
ರಾಜಕೀಯದ ಈ ಚದುರಂಗದಲ್ಲಿ ವಿಜಯೇಂದ್ರ ಅವರು ತಮ್ಮ ಅಸ್ತಿತ್ವವನ್ನು ಉಳಿಸಿಕೊಳ್ಳುತ್ತಾರೋ ಅಥವಾ ಈ ‘ಅಪ್ರಬುದ್ಧ’ ಎಂಬ ಹಣೆಪಟ್ಟಿಯೊಂದಿಗೆ ಪೀಠತ್ಯಾಗ ಮಾಡಬೇಕಾಗುತ್ತದೋ? ಎನ್ನುವುದು ಬಿಜೆಪಿಯ ಆಂತರಿಕ ಸಮೀಕರಣಗಳ ಮೇಲೆ ಅವಲಂಬಿತವಾಗಿದೆ. ಆದರೆ ಸದ್ಯದ ಮಟ್ಟಿಗೆ, ಬಿಜೆಪಿ ಎಂಬ ಮನೆಯಲ್ಲಿನ ‘ಕಳ್ಳ’ ಯಾರು ಎಂಬುದಕ್ಕಿಂತ, ಆ ಕಳ್ಳನ ನೆಪದಲ್ಲಿ ರಾಜ್ಯಾಧ್ಯಕ್ಷರ ಕುರ್ಚಿ ಕಿತ್ತುಕೊಳ್ಳುವ ಕಸರತ್ತೇ ಹೆಚ್ಚು ಸುದ್ದಿಯಲ್ಲಿದೆ ಎಂಬುದು ಮಾತ್ರ ವಾಸ್ತವಿಕ ಅನುಮಾನ.
