NEET Scam: ಭಾರತದಲ್ಲಿ ಶಿಕ್ಷಣ ಎನ್ನುವುದು ಕೇವಲ ಜ್ಞಾನಾರ್ಜನೆಯ ಮಾರ್ಗವಲ್ಲ; ಅದು ಕೋಟ್ಯಂತರ ಮಧ್ಯಮ ವರ್ಗದ ಮತ್ತು ಬಡ ಕುಟುಂಬಗಳ ಪಾಲಿಗೆ ಬದುಕಿನ ಏಕೈಕ ಆಶಾಕಿರಣ. ತಂದೆ-ತಾಯಿ ತಮ್ಮ ಜೀವಮಾನದ ಕಷ್ಟದ ಗಳಿಕೆಯನ್ನು ಮಕ್ಕಳ ಕೋಚಿಂಗ್ಗಾಗಿ ಸುರಿಯುತ್ತಾರೆ. ಇತ್ತ ವಿದ್ಯಾರ್ಥಿಗಳು ಹಗಲಿರುಳು ಎನ್ನದೆ, ನಿದ್ದೆ ಕೆಟ್ಟು, ಸಾಮಾಜಿಕ ಜೀವನವನ್ನೇ ತ್ಯಜಿಸಿ ಒಂದೇ ಒಂದು ಪರೀಕ್ಷೆಗಾಗಿ ತಪಸ್ಸಿನಂತೆ ಕಾಯುತ್ತಾರೆ. ಅದೇ ವೈದ್ಯಕೀಯ ಪ್ರವೇಶ ಪರೀಕ್ಷೆ ‘ನೀಟ್’ (NEET). ಆದರೆ, ದೇಶದ ಇತಿಹಾಸದಲ್ಲೇ ಅತ್ಯಂತ ಕರಾಳ ಎನ್ನಬಹುದಾದ ಮಹಾ ಪರೀಕ್ಷಾ ವಂಚನೆಯೊಂದು ಇತ್ತೀಚೆಗೆ ಬಯಲಾಗಿದೆ. ದೇಶದ 22 ಲಕ್ಷಕ್ಕೂ ಹೆಚ್ಚು ಯುವ ವಿದ್ಯಾರ್ಥಿಗಳ ಕನಸುಗಳನ್ನು, ಭವಿಷ್ಯವನ್ನು ಕೇವಲ ಕೆಲವೇ ಕೆಲವು ಲಕ್ಷ ರೂಪಾಯಿಗಳಿಗೆ ಹರಾಜು ಹಾಕಲಾಗಿದೆ. ಈ ವ್ಯವಸ್ಥಿತ ಮಾಫಿಯಾದ ಮುಖವಾಡವನ್ನು ಕಳಚಿ ನೋಡಿದರೆ, ನಮಗೆ ಕಾಣಸಿಗುವುದು ಕೇವಲ ಭ್ರಷ್ಟಾಚಾರವಲ್ಲ; ಬದಲಿಗೆ ಇಡೀ ದೇಶದ ಶಿಕ್ಷಣ ಮತ್ತು ಆರೋಗ್ಯ ವ್ಯವಸ್ಥೆಯನ್ನೇ ಬಲಿಗೊಡುತ್ತಿರುವ ಕ್ರಿಮಿನಲ್ ಜಾಲ, ಅದಕ್ಷ ಆಡಳಿತ ಹಾಗೂ ರಾಜಕಾರಣಿಗಳ ಅಪವಿತ್ರ ಮೈತ್ರಿ!
ಈ ವ್ಯವಸ್ಥಿತ ಶೋಷಣೆಯ ಕುರಿತು ‘ಅಸಲಿ ಸುದ್ದಿ’ ಜೊತೆ ತಮ್ಮ ಆಕ್ರೋಶಭರಿತ ಅಭಿಪ್ರಾಯಗಳನ್ನು ಹಂಚಿಕೊಂಡಿದ್ದಾರೆ ಕಾಂಗ್ರೆಸ್ ಮುಖಂಡರು ಹಾಗೂ ಹಿರಿಯ ವಕೀಲರಾದ ರಮೇಶ್ ಬದ್ನೂರ್. ಅವರ ತೀಕ್ಷ್ಣ ಒಳನೋಟಗಳು ಮತ್ತು ರಾಷ್ಟ್ರೀಯ ಮಟ್ಟದ ಹಗರಣದ ಕರಾಳ ಮುಖಗಳು ಇಡೀ ದೇಶ ಕಣ್ಣು ಬಿಟ್ಟು ನೋಡಬೇಕಾದ ಅನಿವಾರ್ಯತೆಯನ್ನು ಸೃಷ್ಟಿಸಿದೆ.
2014 ರಿಂದ ಮುಂದುವರಿದ ಹಗರಣಗಳ ಸರಣಿ: ಇದು ಮೋದಿಯವರ ನೈತಿಕ ವೈಫಲ್ಯ
“ಈ NEET ಪರೀಕ್ಷೆ ಎನ್ನುವುದು 2013 ರಿಂದ ಆರಂಭವಾಯಿತು. ಆದರೆ 2014 ರಿಂದ ಇಲ್ಲಿಯವರೆಗೆ ದೇಶದಲ್ಲಿ ನರೇಂದ್ರ ಮೋದಿ ಅವರ ನೇತೃತ್ವದ ಬಿಜೆಪಿ ಸರ್ಕಾರವೇ ಆಡಳಿತ ನಡೆಸುತ್ತಿದೆ. ಈ ಹಗರಣ ಇಂದು ನಿನ್ನೆಯದಲ್ಲ, ಪ್ರತಿ ವರ್ಷವೂ ತೆರೆಮರೆಯಲ್ಲಿ ಇಂತಹ ದಂಧೆಗಳು (NEET Scam) ನಿರಂತರವಾಗಿ ನಡೆಯುತ್ತಲೇ ಇವೆ,” ಎಂದು ವಕೀಲ ರಮೇಶ್ ಬದ್ನೂರ್ ಇತಿಹಾಸವನ್ನು ಬಿಚ್ಚಿಟ್ಟರು. “ಇಲ್ಲಿ ಅತ್ಯಂತ ರೋಚಕ ಮತ್ತು ನಾಚಿಕೆಗೇಡಿನ ಸಂಗತಿ ಎಂದರೆ, ಈ ಹಗರಣದ ಬೇರುಗಳನ್ನು ಕೆದಕುತ್ತಾ ಹೋದರೆ ಸಿಗುವವರೆಲ್ಲರೂ ಕಮಲ ಪಾಳೆಯದವರೇ! ಈ ಮಹಾ ವಂಚನೆಯಲ್ಲಿ ಭಾಗಿಯಾಗಿರುವ ಪ್ರತಿಯೊಬ್ಬ ಕಿಂಗ್ಪಿನ್ಗಳಿಗೂ ಬಿಜೆಪಿಯ ಪ್ರಭಾವಿ ನಾಯಕರ ಶ್ರೀರಕ್ಷೆ ಇದೆ ಎನ್ನುವುದು ಇಂದು ಜಗಜ್ಜಾಹೀರಾಗಿದೆ.”
ರಾಷ್ಟ್ರೀಯ ಮಟ್ಟದ ತನಿಖೆಗಳೂ ಇದನ್ನೇ ಸಾಬೀತುಪಡಿಸುತ್ತಿವೆ. ಪರೀಕ್ಷೆಗೂ ಒಂದು ತಿಂಗಳ ಮುಂಚಿತವಾಗಿಯೇ ಮಾರುಕಟ್ಟೆಯಲ್ಲಿ ಪ್ರಶ್ನೆ ಪತ್ರಿಕೆ ಹರಾಜಾಗುತ್ತಿತ್ತು. ಇದರ ಹಿಂದೆ ರಾಜಸ್ಥಾನದ ಬಿಜೆಪಿ ಯುವ ಮೋರ್ಚಾದ (BJYM) ಮುಖಂಡ ದಿನೇಶ್ ಬೇವಲ್ನಂತಹವರ ನಂಟು ಇರುವುದು ಇಡೀ ವ್ಯವಸ್ಥೆಯ ಹೊಲಸನ್ನು ಎತ್ತಿ ತೋರಿಸುತ್ತದೆ. ಶಿಕ್ಷಣ ಸಚಿವರ ಪಕ್ಕದಲ್ಲೇ ನಿಲ್ಲುವ ಯೋಗ್ಯತೆ ಇರುವ ಇಂತಹ ಕ್ರಿಮಿನಲ್ಗಳು ವ್ಯವಸ್ಥೆಯಲ್ಲಿದ್ದರೆ, ಸಾಮಾನ್ಯ ವಿದ್ಯಾರ್ಥಿಗೆ ನ್ಯಾಯ ಸಿಗಲು ಹೇಗೆ ಸಾಧ್ಯ?
ಇದನ್ನೂ ಓದಿ: SWIFT City: ಇವರು ಸಿದ್ದರಾಮಯ್ಯ ಅಲ್ಲ ‘ಸುಳ್ಳುರಾಮಯ್ಯ’! ಆನೇಕಲ್ ‘ಸ್ವಿಫ್ಟ್ ಸಿಟಿ’ ಮಹಾ ಹಗರಣದ ಕರಾಳ ಮುಖ
ಬಾಗಲಕೋಟೆಗೂ ತಟ್ಟಿದ ಹಗರಣದ ಕರಾಳ ನೆರಳು: ಹೆಸರೇ ಬರೆಯಲಾಗದ ಅಯೋಗ್ಯ ವೈದ್ಯರು!
“ಈ ಮಹಾ ಹಗರಣಕ್ಕೆ (NEET Scam) ನಮ್ಮ ಬಾಗಲಕೋಟೆ ಜಿಲ್ಲೆ ಕೂಡ ಹೊರತಾಗಿಲ್ಲ!” ಎಂದು ರಮೇಶ್ ಬದ್ನೂರ್ ಅತ್ಯಂತ ಆಘಾತಕಾರಿ ಸ್ಥಳೀಯ ಸತ್ಯವೊಂದನ್ನು ಬಯಲು ಮಾಡಿದರು. “ಇಲ್ಲಿನ ಬಿಜೆಪಿಯ ಒಬ್ಬ ಪ್ರಭಾವಿ ಮುಖಂಡನ ಮಗ ಇದೇ ನೀಟ್ ಪರೀಕ್ಷೆಯಲ್ಲಿ ಕೋಟಿ ಕೋಟಿ ಹಣ ಚೆಲ್ಲಿ, ಮಹಾ ಅವ್ಯವಹಾರ ನಡೆಸಿ ಸೀಟ್ ಗಿಟ್ಟಿಸಿಕೊಂಡಿದ್ದ. ಆತ ಇಂದು ಪರೀಕ್ಷೆ ಪಾಸ್ ಮಾಡಿ ವೈದ್ಯನೂ ಆಗಿಬಿಟ್ಟಿದ್ದಾನೆ! ವಾಸ್ತವ ಏನೆಂದರೆ, ಆ ಮಹಾಶಯನಿಗೆ ತನ್ನ ಸ್ವಂತ ಹೆಸರನ್ನು ಸರಿಯಾಗಿ ಬರೆಯೋಕೆ ಬರುತ್ತೋ ಇಲ್ವೋ ಗೊತ್ತಿಲ್ಲ, ಆದರೆ ಇಂದು ಆತ ಜನರ ಪ್ರಾಣದ ಜೊತೆ ಆಟ ಆಡುವ ಡಾಕ್ಟರ್ ಆಗಿ ಕೆಲಸ ಮಾಡುತ್ತಿದ್ದಾನೆ. ಇಂತಹ ಅಯೋಗ್ಯ ವೈದ್ಯನ ಬಳಿಗೆ ಹೋಗುವ ಅಮಾಯಕ ರೋಗಿಗಳನ್ನು ಆ ದೇವರೇ ಕಾಪಾಡಬೇಕು!” ಎಂದು ಬದ್ನೂರ್ ಅತ್ಯಂತ ಆತಂಕ ವ್ಯಕ್ತಪಡಿಸಿದರು.
ಇದು ಕೇವಲ ಒಬ್ಬ ಬಾಗಲಕೋಟೆಯ ಉದಾಹರಣೆಯಲ್ಲ; ದೇಶಾದ್ಯಂತ ಹಣದ ಬಲದಿಂದ ವೈದ್ಯಕೀಯ ಪದವಿ ಪಡೆದ ಸಾವಿರಾರು ಅಯೋಗ್ಯರು ಇಂದು ಜನರ ಜೀವದ ಜೊತೆ ಚೆಲ್ಲಾಟವಾಡುತ್ತಿದ್ದಾರೆ. ಒಬ್ಬ ವಕೀಲ ತಪ್ಪು ಮಾಡಿದರೆ ಒಂದು ಕೇಸ್ ಸೋಲಬಹುದು, ಒಬ್ಬ ಇಂಜಿನಿಯರ್ ತಪ್ಪು ಮಾಡಿದರೆ ಒಂದು ಬಿಲ್ಡಿಂಗ್ ಬಿದ್ದುಹೋಗಬಹುದು. ಆದರೆ ಒಬ್ಬ ಅಯೋಗ್ಯ ವೈದ್ಯ ತಪ್ಪು ಮಾಡಿದರೆ ಇಡೀ ಜೀವವೇ ಹೊರಟುಹೋಗುತ್ತದೆ! ನಾಳೆ ದಿನ ಈ ಹಗರಣದ ವೈದ್ಯರ ಕೈಗೆ ದೇಶದ ಪ್ರಧಾನಿಯೋ, ದೊಡ್ಡ ವಿಜ್ಞಾನಿಯೋ ಸಿಕ್ಕಿ ಜೀವ ಕಳೆದುಕೊಂಡರೆ ಅದು ದೇಶಕ್ಕೆ ತುಂಬಲಾರದ ನಷ್ಟವಲ್ಲವೇ? ಇಂತಹ ಅಯೋಗ್ಯರನ್ನು ಸೃಷ್ಟಿಸುತ್ತಿರುವ ಈ ವ್ಯವಸ್ಥೆಯನ್ನು ದೇಶಪ್ರೇಮ ಎನ್ನಬೇಕೇ? ಎಂದು ಬದ್ನೂರ್ ಪ್ರಶ್ನೆ ಮಾಡಿದ್ದಾರೆ.
ಕೋಚಿಂಗ್ ಮಾಫಿಯಾ ಮತ್ತು ನಿಯಮಗಳ ಗಾಳಿಗೆ ತೂರಿದ ಎನ್ಟಿಎ
ಯಾವುದೇ ಸ್ಪರ್ಧಾತ್ಮಕ ಪರೀಕ್ಷೆಯ ಪ್ರಶ್ನೆ ಪತ್ರಿಕೆ ತಯಾರಿಸುವ ತಜ್ಞರು ಅಥವಾ ಸಂಸ್ಥೆಗಳು ಯಾವುದೇ ಖಾಸಗಿ ಶಿಕ್ಷಣ ಸಂಸ್ಥೆಗಳೊಂದಿಗೆ ನಂಟು ಹೊಂದಿರಬಾರದು ಎಂಬ ಕಠಿಣ ನಿಯಮವಿದೆ. ಆದರೆ ನೀಟ್ ನಡೆಸುವ ನ್ಯಾಷನಲ್ ಟೆಸ್ಟಿಂಗ್ ಏಜೆನ್ಸಿ (NTA) ಯ ಒಳಗಣ್ಣುಗಳೇ ಕೋಚಿಂಗ್ ಮಾಫಿಯಾದೊಂದಿಗೆ ಕೈಜೋಡಿಸಿವೆ. “ಇಲ್ಲಿ ಪತ್ರಿಕೆ ಸಿದ್ಧಪಡಿಸುವ ಜವಾಬ್ದಾರಿ ಹೊತ್ತವರೇ ತಮ್ಮದೇ ಆದ ಸ್ವಂತ ನೀಟ್ ಕೋಚಿಂಗ್ ಸೆಂಟರ್ಗಳನ್ನು ಹೊಂದಿದ್ದಾರೆ! ಇದರ ಅರ್ಥವೇನು? ಅವರು ನೇರವಾಗಿ ಪ್ರಶ್ನೆ ಪತ್ರಿಕೆಯನ್ನು ಲೀಕ್ ಮಾಡುತ್ತಾರೆ, ಇಲ್ಲವೇ ಆ ಪ್ರಶ್ನೆಗಳಿಗೆ ಅನುಗುಣವಾಗಿ ತಮ್ಮದೇ ಸೆಂಟರ್ನ ವಿದ್ಯಾರ್ಥಿಗಳನ್ನು ತಯಾರು ಮಾಡುತ್ತಾರೆ. ಹಾಗಾದರೆ ಹಗಲಿರುಳು ಕಷ್ಟಪಟ್ಟು ಓದುವ ಬಡ ವಿದ್ಯಾರ್ಥಿಗಳ ಗತಿಯೇನು?” ಎಂದು ಬದ್ನೂರ್ ಪ್ರಶ್ನಿಸಿದರು.
ಇದೇ ಕಾರಣಕ್ಕೆ ಮಹಾರಾಷ್ಟ್ರ, ರಾಜಸ್ಥಾನ, ಗುಜರಾತ್ನಂತಹ ಬಿಜೆಪಿ ಆಡಳಿತವಿರುವ ರಾಜ್ಯಗಳಲ್ಲೇ ನೀಟ್ ಪರೀಕ್ಷಾರ್ಥಿಗಳು ಅತಿ ಹೆಚ್ಚು ಸೀಟುಗಳನ್ನು ಗಿಟ್ಟಿಸಿಕೊಳ್ಳುತ್ತಿದ್ದಾರೆ ಮತ್ತು ಅಲ್ಲಿಯೇ ಪೇಪರ್ ಲೀಕ್ ಜಾಲಗಳು ಸಕ್ರಿಯವಾಗಿವೆ. ಕೇವಲ ನೀಟ್ ಮಾತ್ರವಲ್ಲ, ಯುಪಿಎಸ್ಸಿ (UPSC) ಪರೀಕ್ಷೆಯಲ್ಲೂ ಇಂತಹದ್ದೇ ವ್ಯವಸ್ಥಿತ ಹಗರಣಗಳು ನಡೆಯುತ್ತಿರುವ ಶಂಕೆ ಇದೆ. ಅಲ್ಲಿ ಯಾವಾಗಲೂ ಉತ್ತರ ಭಾರತೀಯರೇ ಮೇಲುಗೈ ಸಾಧಿಸುವುದರ ಹಿಂದೆ ಇಂತಹದ್ದೇ ದೊಡ್ಡ ಅವ್ಯವಹಾರ ನಡೆದಿರುವ ದಟ್ಟವಾದ ಅನುಮಾನ ಕಾಡುತ್ತಿದೆ.
ಇದನ್ನೂ ಓದಿ: D.K. Shivakumar: ಡಿಕೆಶಿ ಕನಸು ಭಗ್ನ! ಟ್ರಬಲ್ ಶೂಟರ್ ಸಿಎಂ ಆಗೋದೇ ಡೌಟ್?
ಬಡ ಪ್ರತಿಭಾವಂತರ ಸರಣಿ ಆತ್ಮಹತ್ಯೆ: ಇದು ಕೊಲೆಯಲ್ಲದೆ ಮತ್ತೇನು?
ನೀಟ್ ಎನ್ನುವ ಭಸ್ಮಾಸುರ ಇಂದು ಬಡ ಪ್ರತಿಭಾವಂತ ವಿದ್ಯಾರ್ಥಿಗಳನ್ನು ಜೀವಂತವಾಗಿ ಬಲಿ ಪಡೆಯುತ್ತಿದೆ. ರಮೇಶ್ ಬದ್ನೂರ್ ಅವರು ಇತ್ತೀಚಿನ ಹೃದಯ ವಿದ್ರಾವಕ ಘಟನೆಗಳನ್ನು ನೆನೆದರು: “ಒಬ್ಬ ನೀಟ್ ವಿದ್ಯಾರ್ಥಿ, ‘ನಾನು ಮೂರನೇ ಬಾರಿಗೆ ಪರೀಕ್ಷೆ ಬರೆಯುತ್ತಿದ್ದೇನೆ, ಈ ಬಾರಿ ಖಂಡಿತ ವೈದ್ಯನಾಗಿ ನನ್ನ ಕುಟುಂಬದ ಕಷ್ಟ ತೀರಿಸುತ್ತೇನೆ’ ಎಂದು ನಂಬಿದ್ದ. ಆದರೆ ಹಗರಣದಿಂದಾಗಿ ಪರೀಕ್ಷೆ ರದ್ದಾದ ಸುದ್ದಿ ಕೇಳಿ ಆತ ಜೀವವನ್ನೇ ಕಳೆದುಕೊಂಡ. ಮತ್ತೊಬ್ಬ ಅತ್ಯಂತ ಬಡ ಕುಟುಂಬದ ಯುವಕ, ಪಿಯುಸಿ ಮುಗಿಸಿ ಇಡೀ ವರ್ಷ ರೂಮಿನಲ್ಲಿ ಕೂತು ಸಿದ್ಧತೆ ನಡೆಸಿದ್ದ. ಆತನ ತಂದೆ ತನಗಾಗಿ ಬದುಕಿದವರಲ್ಲ, ಬೇರೆಯವರ ಮನೆಯಲ್ಲಿ ಜೀತಕ್ಕಿದ್ದು ಕಷ್ಟಪಟ್ಟು ವರ್ಷಕ್ಕೆ 2 ಲಕ್ಷ ರೂಪಾಯಿ ಹೊಂದಿಸಿ ಮಗನ ಓದಿಗೆ ಕಟ್ಟಿದ್ದರು. ಇನ್ನೇನು ತನ್ನ ಮಗ ವೈದ್ಯನಾಗುತ್ತಾನೆ ಎಂಬ ತಂದೆಯ ಕನಸು ಈ ಹಗರಣದ ಕಿಚ್ಚಿಗೆ ಬೂದಿಯಾಯಿತು. ಆ ಯುವಕ ನೊಂದು ಆತ್ಮಹತ್ಯೆ ಮಾಡಿಕೊಂಡ. ಈ ಸಾವಿಗೆ ನೇರ ಹೊಣೆ ಯಾರು?”
ನಕಲಿ ದೇಶಪ್ರೇಮದ ಮುಖವಾಡ ಮತ್ತು ಅಸಲಿ ದೇಶದ್ರೋಹಿಗಳು!
“ಈ ಬಿಜೆಪಿಯವರು ಮತ್ತು ಅವರ ಬೆಂಬಲಿಗರು ದಿನದ 24 ಗಂಟೆಯೂ ಬರೀ ಘೋಷಣೆಗಳನ್ನು ಕೂಗುವುದೇ ದೇಶಪ್ರೇಮ ಎಂದು ಭಾವಿಸಿದ್ದಾರೆ,” ಎಂದು ಬದ್ನೂರ್ ತರಾಟೆಗೆ ತೆಗೆದುಕೊಂಡರು. “ಇತ್ತೀಚೆಗೆ ಯುವಕನೊಬ್ಬ ಅತ್ಯಂತ ಪ್ರಬುದ್ಧವಾಗಿ ಒಂದು ಪ್ರಶ್ನೆ ಕೇಳಿದ್ದ—’ದೇಶದ ಜನರ ಜೊತೆಗೆ ದೇಶದ ಸರ್ಕಾರವೇ ನಿಲ್ಲದಿದ್ದ ಮೇಲೆ, ಈ ದೇಶದ ಜನರು ಯಾಕೆ ಸರ್ಕಾರದ ಜೊತೆ ನಿಲ್ಲಬೇಕು?’ ಈ ಮಾತು ನೂರಕ್ಕೆ ನೂರರಷ್ಟು ಸತ್ಯ. ದೇಶದ ಯುವಶಕ್ತಿಯ ಭವಿಷ್ಯವನ್ನು ಹಣಕ್ಕಾಗಿ ಹರಾಜು ಹಾಕುವ ಈ ನೀಟ್ ಹಗರಣದ ಸೂತ್ರಧಾರರೆಲ್ಲರೂ ಅಪ್ಪಟ ದೇಶದ್ರೋಹಿಗಳಾಗಿದ್ದಾರೆ!”
ಅವರು ಮುಂದುವರಿದು ತೀಕ್ಷ್ಣವಾಗಿ ಪ್ರಶ್ನಿಸಿದರು, “ಇದೇ ಹಗರಣವನ್ನು ಒಬ್ಬ ಮುಸ್ಲಿಂ ವ್ಯಕ್ತಿ ಮಾಡಿದ್ದರೆ ಇಷ್ಟೊತ್ತಿಗೆ ಆತನನ್ನು ಇಡೀ ದೇಶದ ಮಾಧ್ಯಮಗಳು ‘ದೇಶವಿರೋಧಿ’, ‘ಉಗ್ರಗಾಮಿ’ ಎಂದು ಬಿಂಬಿಸುತ್ತಿದ್ದವು. ಈಗ ಇಡೀ ಹಗರಣದಲ್ಲಿ ಸಿಲುಕಿರುವ ಈ ಬಿಜೆಪಿ ಮುಖಂಡರನ್ನು ದೇಶದ್ರೋಹಿಗಳು ಎಂದು ಕರೆಯಬೇಕಲ್ವೇ? ಇಂತಹ ಮಹಾ ಅಪರಾಧಿಗಳನ್ನು ರಕ್ಷಿಸುತ್ತಿರುವ ಮತ್ತು ಇವರ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳದ ಪ್ರಧಾನಿ ನರೇಂದ್ರ ಮೋದಿ ಕೂಡ ದೇಶದ್ರೋಹದ ಭಾಗಿ ಅಲ್ವೇ?”
ಇದನ್ನೂ ಓದಿ: Vinay Vs Joshi: ‘ಸೇಡಿನ’ ರಾಜಕಾರಣದ ಅನಾವರಣ; ಕುಲಕರ್ಣಿ ಮುಗಿಸಲು ನಡೆದ ‘ಸಿಸ್ಟಮ್ಯಾಟಿಕ್’ ಗೇಮ್ ಪ್ಲಾನ್?
ಅಂಬಾನಿ-ಅದಾನಿ ಸಾಮ್ರಾಜ್ಯ ಮತ್ತು ನಾಗರಿಕರ ಮೌನಕ್ಕೆ ಎಚ್ಚರಿಕೆ
ಒಂದು ಕಾಲದಲ್ಲಿ ಭಾರತವನ್ನು ಬ್ರಿಟಿಷರ ‘ಈಸ್ಟ್ ಇಂಡಿಯಾ ಕಂಪನಿ’ ಲೂಟಿ ಮಾಡುತ್ತಿತ್ತು ಮತ್ತು ದೇಶವನ್ನು ತನ್ನ ಹಿಡಿತದಲ್ಲಿಟ್ಟುಕೊಂಡಿತ್ತು. ಆದರೆ ಇಂದು ದೇಶದ ಪರಿಸ್ಥಿತಿ ಬದಲಾಗಿಲ್ಲ. ಇಂದು ಈಸ್ಟ್ ಇಂಡಿಯಾ ಕಂಪನಿಯ ಜಾಗದಲ್ಲಿ ಅಂಬಾನಿ ಮತ್ತು ಅದಾನಿ ಕಂಪನಿಗಳು ಕುಳಿತು ಇಡೀ ದೇಶದ ಆರ್ಥಿಕತೆ, ಶಿಕ್ಷಣ ಮತ್ತು ಭವಿಷ್ಯವನ್ನು ಮುನ್ನಡೆಸುತ್ತಿವೆ ಎಂದು ಬದ್ನೂರ್ ವಿಷಾದಿಸಿದರು. ಸ್ವತಃ ಬಿಜೆಪಿಯೊಳಗಿನ ಕೆಲವು ಮುಖಂಡರೇ ಈ ಹಗರಣದ ಅಸಲಿ ಕಿಂಗ್ಪಿನ್ಗಳನ್ನು ಮೋದಿ ಸರ್ಕಾರ ರಕ್ಷಿಸುತ್ತಿದೆ ಎಂದು ಒಪ್ಪಿಕೊಳ್ಳುತ್ತಿದ್ದಾರೆ. ಅದು ಸ್ವತಃ ಮೋದಿಯೇ ಇರಬಹುದೇ ಎನ್ನುವ ಅನುಮಾನಗಳಿಗೂ ಈಗ ರೆಕ್ಕೆಪುಕ್ಕ ಬಂದಿದೆ.
ಕೊನೆಯದಾಗಿ, ಈ ದೇಶದ ಜನರಿಗೆ ‘ಅಸಲಿ ಸುದ್ದಿ’ ಹಾಗೂ ರಮೇಶ್ ಬದ್ನೂರ್ ನೀಡುವ ಎಚ್ಚರಿಕೆ ಒಂದೇ—ವೈದ್ಯರನ್ನು ನಮ್ಮ ದೇಶದಲ್ಲಿ ‘ನಾರಾಯಣ ಹರಿ’ ಎಂದು ದೇವರ ಸ್ವರೂಪದಲ್ಲಿ ಕಾಣುತ್ತೇವೆ. ಗುಣಮಟ್ಟದ ಶಿಕ್ಷಣ ಮಾತ್ರವೇ ಒಂದು ಪ್ರತಿಭಾವಂತ ದೇಶವನ್ನು ನಿರ್ಮಿಸಲು ಸಾಧ್ಯ. ಇಂತಹ ಘಟನೆಗಳು ನಡೆದಾಗ ನಮ್ಮ ದೇಶದ ಜನರು ಪಕ್ಷಾತೀತವಾಗಿ, ಜಾತ್ಯತೀತವಾಗಿ ಒಟ್ಟಾಗಿ ನಿಂತು ಸರ್ಕಾರವನ್ನು ಪ್ರಶ್ನಿಸಬೇಕು. ಅಧಿಕಾರದ ಮದದಲ್ಲಿರುವವರನ್ನು ನಾವು ಕಂಡು ಕಾಣದಂತೆ ಸುಮ್ಮನಿದ್ದರೆ, ನಾಳೆ ಈ ದೇಶದ ವಿನಾಶ ಗ್ಯಾರಂಟಿ! ಇನ್ನಾದರೂ ಯುವಜನತೆ ಮತ್ತು ನಾಗರಿಕ ಸಮಾಜ ಎಚ್ಚೆತ್ತುಕೊಳ್ಳಬೇಕಿದೆ.
