TVK Vijay ದ್ರಾವಿಡ ಕೋಟೆಯ ‘ದಳಪತಿ’: ತಮಿಳು ಅಸ್ಮಿತೆಯ ವಿಜಯವೋ? ಅಥವಾ ಕಮಲ ಪಾಳಯಕ್ಕೆ ಹಾಸಿದ ರತ್ನಗಂಬಳಿಯೋ?

TVK Vijay: ತಮಿಳುನಾಡು ರಾಜಕಾರಣ ಎಂದಿಗೂ ಒಂದು ಭೇದಿಸಲಾಗದ ಒಗಟು. ಪೆರಿಯಾರ್ ಸಿದ್ಧಾಂತ, ಅಣ್ಣಾದೊರೈ ಅವರ ದ್ರಾವಿಡ ತರ್ಕ ಮತ್ತು ಕರುಣಾನಿಧಿ-ಜಯಲಲಿತಾ ಅವರಂತಹ ದೈತ್ಯ ನಾಯಕರ ನಡುವೆ ಬೆಳೆದು ಬಂದ ಈ ನೆಲದಲ್ಲಿ ರಾಷ್ಟ್ರೀಯ ಪಕ್ಷಗಳಿಗೆ ದಶಕಗಳಿಂದ ಪ್ರವೇಶವಿರಲಿಲ್ಲ. ಆದರೆ, ಇವತ್ತು ನಟ ವಿಜಯ್ (TVK Vijay) ಅವರ ‘ತಮಿಳಗ ವೆಟ್ರಿ ಕಳಗಂ’ (TVK) ಪಕ್ಷದ ಉದಯವು ಈ ಭದ್ರಕೋಟೆಯ ತಳಹದಿಯನ್ನೇ ಅಲ್ಲಾಡಿಸುತ್ತಿದೆ. ವಿಜಯ್ ಅವರ ಈ ಅನಿರೀಕ್ಷಿತ ಗೆಲುವು ತಮಿಳುನಾಡಿನ ಇಂದಿನ ರಾಜಕೀಯ ಮಿತ್‌ಗಳನ್ನು ಒಡೆದು ಹಾಕಿರಬಹುದು, ಆದರೆ ಇದರ ಆಳದಲ್ಲಿ ಅಡಗಿರುವ ಅಪಾಯದ ಮುನ್ಸೂಚನೆಗಳು ಮಾತ್ರ ಭಯಾನಕವಾಗಿವೆ.

ತೃತೀಯ ರಂಗದ ಉದಯ: ಬಿಜೆಪಿಯ ‘ಹಿಂಬಾಗಿಲ’ ಪ್ರವೇಶಕ್ಕೆ ನಾಂದಿಯೇ?

ಇತಿಹಾಸದ ಪುಟಗಳನ್ನು ತಿರುವಿ ನೋಡಿದರೆ ಒಂದು ಕಟು ಸತ್ಯ ಗೋಚರಿಸುತ್ತದೆ: ಎಲ್ಲೆಲ್ಲಿ ಪ್ರಬಲ ಪ್ರಾದೇಶಿಕ ಶಕ್ತಿಗಳ ನಡುವೆ ಮೂರನೇ ಶಕ್ತಿ ಉದಯವಾಗಿದೆಯೋ, ಅಲ್ಲೆಲ್ಲಾ ಅಂತಿಮವಾಗಿ ಲಾಭವಾಗಿದ್ದು ಬಿಜೆಪಿಗೆ ಮಾತ್ರ! ದೆಹಲಿಯಲ್ಲಿ ಕಾಂಗ್ರೆಸ್ ಮತ್ತು ಬಿಜೆಪಿ ನಡುವೆ ಆಮ್ ಆದ್ಮಿ ಪಕ್ಷ ಬಂದಾಗ ಅದು ಕಾಂಗ್ರೆಸ್‌ನ ಸಾಂಪ್ರದಾಯಿಕ ಮತಬ್ಯಾಂಕನ್ನೇ ಸೀಳಿತು. ಈಗ ತಮಿಳುನಾಡಿನಲ್ಲಿ ವಿಜಯ್ (TVK Vijay) ಮಾಡುತ್ತಿರುವುದೂ ಅದನ್ನೇ. ಡಿಎಂಕೆ ಮತ್ತು ಎಐಎಡಿಎಂಕೆಗಳ ಜಾತ್ಯತೀತ ಮತಗಳನ್ನು ವಿಜಯ್ ವಿಭಜಿಸಿದರೆ, ಅದು ಬಿಜೆಪಿಗೆ ತಮಿಳುನಾಡಿನ ಒಳಗೆ ಬರಲು ಕೆಂಪು ಹಾಸು (Red Carpet) ಹಾಸಿಕೊಟ್ಟಂತೆ ಎಂಬ ವಿಶ್ಲೇಷಣೆಗಳು ದಟ್ಟವಾಗಿವೆ. ದ್ರಾವಿಡ ನೆಲದ ಮತಗಳು ಚಿದ್ರವಾದಷ್ಟೂ ಬಿಜೆಪಿಯಂತಹ ಶಕ್ತಿಗಳಿಗೆ ಇಲ್ಲಿ ನೆಲೆ ಕಂಡುಕೊಳ್ಳುವುದು ಸುಲಭವಾಗುತ್ತದೆ.

ಶತ್ರು ಮತ್ತು ಎದುರಾಳಿಯ ನಡುವಿನ ಅಪಾಯಕಾರಿ ಆಟ

ವಿಜಯ್ (TVK Vijay) ಅವರು ತಮ್ಮ ಭಾಷಣಗಳಲ್ಲಿ ಬಿಜೆಪಿಯನ್ನು ‘ಸೈದ್ಧಾಂತಿಕ ಶತ್ರು’ ಎಂದು ಕರೆದರೆ, ಡಿಎಂಕೆಯನ್ನು ‘ರಾಜಕೀಯ ಎದುರಾಳಿ’ ಎನ್ನುತ್ತಾರೆ. ಬಿಜೆಪಿ ದ್ರಾವಿಡ ಮನೋಭಾವಕ್ಕೆ ವಿರುದ್ಧವಾಗಿದೆ ಮತ್ತು ವಿಭಜಕ ರಾಜಕೀಯ ಮಾಡುತ್ತಿದೆ ಎಂದು ಅವರು ಪದೇ ಪದೇ ಗುಡುಗುತ್ತಿದ್ದಾರೆ. ಆದರೆ, ವಿಜಯ್ ಅವರ ಈ ಹೋರಾಟವು ಡಿಎಂಕೆಯನ್ನು ದುರ್ಬಲಗೊಳಿಸುತ್ತಿದೆಯೇ ಹೊರತು ಬಿಜೆಪಿಯನ್ನಲ್ಲ. ಡಿಎಂಕೆ ಮತ್ತು ಬಿಜೆಪಿ ನಡುವೆ ಒಳ ಒಪ್ಪಂದವಾಗಿದೆ ಎಂದು ಆರೋಪಿಸುವ ವಿಜಯ್, ತಾವು ಮಾತ್ರ ಬಿಜೆಪಿಯೊಂದಿಗೆ ಎಂದಿಗೂ ಮೈತ್ರಿ ಮಾಡಿಕೊಳ್ಳುವುದಿಲ್ಲ ಎಂದು ಘೋಷಿಸಿದ್ದಾರೆ. ಆದರೆ, ರಾಜಕೀಯದ ತೆರೆಮರೆಯ ಚಿತ್ರಣವೇ ಬೇರೆ ಇರುತ್ತದೆ. ಎರಡು ಪ್ರಾದೇಶಿಕ ಶಕ್ತಿಗಳ ನಡುವಿನ ಸಂಘರ್ಷದಲ್ಲಿ ಮೂರನೆಯವರು ಗೆದ್ದಾಗ, ಅದರ ನೇರ ಲಾಭ ರಾಷ್ಟ್ರೀಯ ಪಕ್ಷಗಳ ಪಾಲಾಗುವುದು ಐತಿಹಾಸಿಕ ಸತ್ಯ.

ಇದನ್ನೂ ಓದಿ: Bagalkot: 74 ವರ್ಷಗಳ ರೆಕಾರ್ಡ್ ಬ್ರೇಕ್! ಮೇಟಿ ಪುತ್ರನ ಅಬ್ಬರಕ್ಕೆ ಚರಂತಿಮಠರ ರಾಜಕೀಯ ಭವಿಷ್ಯವೇ ಅಂತ್ಯ?

ಸಿನಿಮಾ ಗ್ಲಾಮರ್ ವರ್ಸಸ್ ಸೈದ್ಧಾಂತಿಕ ಸ್ಪಷ್ಟತೆ

ರಾಜಕೀಯವೆಂದರೆ ಕೇವಲ 70 ಎಂಎಂ ಪರದೆಯ ಮೇಲೆ ಅಬ್ಬರಿಸುವ ಸಿನೆಮಾ ಅಲ್ಲ. ವಿಜಯ್ ಅವರ ಚಿತ್ರಗಳಾದ ‘ಸರ್ಕಾರ್’ ಅಥವಾ ‘ಜನನಾಯಕನ್’ ಸಮಾಜದ ಭ್ರಷ್ಟಾಚಾರವನ್ನು, ಚುನಾವಣಾ ವಂಚನೆಯನ್ನು ಪ್ರಶ್ನಿಸಬಹುದು. ಆದರೆ ವಾಸ್ತವ ರಾಜಕಾರಣದ ಸವಾಲುಗಳೇ ಬೇರೆ. ಕೇವಲ ಅಭಿಮಾನಿ ಸಂಘಗಳನ್ನು ನೆಚ್ಚಿಕೊಂಡು ಪಕ್ಷ ಕಟ್ಟಿರುವುದು ಎಷ್ಟು ದಿನಗಳ ಕಾಲ ಸುಸ್ಥಿರವಾಗಿರಲು ಸಾಧ್ಯ? ಡಿಎಂಕೆ ಮತ್ತು ಎಐಎಡಿಎಂಕೆಯಂತಹ ಕೇಡರ್ ಆಧಾರಿತ ಪಕ್ಷಗಳ ಎದುರು ವಿಜಯ್ ಅವರ ಗ್ಲಾಮರ್ ರಾಜಕಾರಣ ಕೇವಲ ಅಲ್ಪಕಾಲದ ಉಬ್ಬರವಾಗುವ ಸಾಧ್ಯತೆಯಿದೆ. ಜಾತ್ಯತೀತತೆಯ ಮಾತಾಡುವ ವಿಜಯ್, ಅಧಿಕಾರಕ್ಕೆ ಬಂದ ಮೇಲೆ ದಲಿತರು, ಅಲ್ಪಸಂಖ್ಯಾತರು ಮತ್ತು ಶೋಷಿತ ವರ್ಗಗಳ ಹಿತರಕ್ಷಣೆಯಲ್ಲಿ ಎಷ್ಟರ ಮಟ್ಟಿಗೆ ರಾಜಿ ಮಾಡಿಕೊಳ್ಳದೆ ನಿಲ್ಲುತ್ತಾರೆ ಎಂಬುದು ದೊಡ್ಡ ಪ್ರಶ್ನೆ.

ಸ್ಟಾಲಿನ್ ಅವರ ತಂತ್ರಗಾರಿಕೆಯ ವೈಫಲ್ಯ

ಚುನಾವಣೆಯ ಉದ್ದಕ್ಕೂ ಎಂ.ಕೆ. ಸ್ಟಾಲಿನ್ ಅವರು ವಿಜಯ್ ಅವರನ್ನು ತುಂಬಾ ಹಗುರವಾಗಿ ಪರಿಗಣಿಸಿದರು. ವಿಜಯ್ ಅವರನ್ನು ಒಂದು ಪ್ರಬಲ ಶಕ್ತಿಯನ್ನಾಗಿ ಅವರು ನೋಡಲೇ ಇಲ್ಲ. “ರಾಜಕೀಯ ಮಾಡಬೇಕೆಂದವರು ಡಿಎಂಕೆಯನ್ನು ಟಾರ್ಗೆಟ್ ಮಾಡಲೇಬೇಕು” ಎಂದು ವ್ಯಂಗ್ಯವಾಡಿದ ಸ್ಟಾಲಿನ್, ವಿಜಯ್ ಅವರ ಟಿವಿಕೆ ಸೆಳೆಯಬಲ್ಲ ಮತಗಳ ಪ್ರಮಾಣವನ್ನು ಅಂದಾಜಿಸುವಲ್ಲಿ ಎಡವಿದರು. ಪ್ರತಿ ಕುಟುಂಬದಲ್ಲಿ ಕನಿಷ್ಠ ಒಂದು ಅಥವಾ ಎರಡು ಮತಗಳು ವಿಜಯ್ ಪಾಲಾಗುತ್ತಿವೆ ಎಂಬ ತಜ್ಞರ ವರದಿಗಳನ್ನು ಕಡೆಗಣಿಸಿದ್ದು ಡಿಎಂಕೆಗೆ ಮುಳುವಾಯಿತು. ವಿಜಯ್ ಅವರ ಕ್ರಿಶ್ಚಿಯನ್ ಹಿನ್ನೆಲೆಯಿಂದಾಗಿ ಅವರಿಗೆ ಸಾಮಾಜಿಕ ನೆಲೆಯಿಲ್ಲ ಎಂದು ಭಾವಿಸಿದ್ದ ವಿರೋಧಿಗಳಿಗೆ ಇಂದು ವಿಜಯ್ ಅವರ ಗೆಲವು ನುಂಗಲಾರದ ತುತ್ತಾಗಿದೆ.

ಕೇಂದ್ರ ಏಜೆನ್ಸಿಗಳ ‘ಮೌನ’ ಮತ್ತು ಅನುಮಾನದ ಹುತ್ತ

ಬಿಜೆಪಿಯನ್ನು ವಿರೋಧಿಸುವ ಪ್ರತಿಯೊಬ್ಬ ನಾಯಕನ ಮೇಲೆ ಇಂದು ಇಡಿ ಅಥವಾ ಸಿಬಿಐ ದಾಳಿಗಳು ನಡೆಯುತ್ತಿವೆ. ಆದರೆ, ವಿಜಯ್ ಅವರು ಬಿಜೆಪಿಯ ಸೈದ್ಧಾಂತಿಕ ಶತ್ರು ಎಂದು ಘೋಷಿಸಿಕೊಂಡರೂ ಅವರ ಮೇಲೆ ಯಾವುದೇ ಕೇಂದ್ರ ಏಜೆನ್ಸಿಗಳ ದಾಳಿ ನಡೆಯದಿರುವುದು ಹಲವು ಅನುಮಾನಗಳಿಗೆ ದಾರಿ ಮಾಡಿಕೊಟ್ಟಿದೆ. ಹಿಂದೆ ವಿಜಯ್ ಸಿನೆಮಾಗಳ ಮೇಲೆ ದಾಳಿ ನಡೆದಾಗ ರಾಹುಲ್ ಗಾಂಧಿ ಮತ್ತು ಸ್ಟಾಲಿನ್ ಅವರು ವಿಜಯ್ ಪರವಾಗಿ ನಿಂತಿದ್ದರು. ಆದರೆ ಈಗ ಅದೇ ವಿಜಯ್, ಸ್ಟಾಲಿನ್ ಮತ್ತು ರಾಹುಲ್ ಗಾಂಧಿಯವರ ಹಾದಿಗೇ ಮುಳ್ಳಾಗುತ್ತಿದ್ದಾರೆ. ವಿಜಯ್ ಎಂಬ ಅಸ್ತ್ರವನ್ನು ಬಳಸಿ ದ್ರಾವಿಡ ಪಕ್ಷಗಳನ್ನು ದುರ್ಬಲಗೊಳಿಸುವ ಗುಪ್ತ ತಂತ್ರ ಇದರ ಹಿಂದೆ ಅಡಗಿದೆಯೇ ಎಂಬ ಚರ್ಚೆ ಈಗ ಮುನ್ನೆಲೆಗೆ ಬಂದಿದೆ.

ಇದನ್ನೂ ಓದಿ: Veeranna Charantimath: ಚುನಾವಣೆ ಹೊತ್ತಲ್ಲೇ ಸೋಲನ್ನು ಆಹ್ವಾನಿಸಿದ್ದ ಚರಂತಿಮಠ; ಇರಲಾರದೆ ಇರುವೆ ಬಿಟ್ಟುಕೊಂಡ ಸ್ವಾಮಿಯ ಕಥೆ!

ತಮಿಳುನಾಡಿನ ಮಾದಕ ದ್ರವ್ಯ ಸಮಸ್ಯೆ ಮತ್ತು ಯುವಜನರ ಆಕರ್ಷಣೆ

ತಮಿಳುನಾಡಿನ ಯುವಜನರನ್ನು ವಿಜಯ್ ತಮ್ಮತ್ತ ಸೆಳೆದುಕೊಂಡಿದ್ದು ರಾಜ್ಯದ ಪ್ರಮುಖ ಸಮಸ್ಯೆಗಳ ಮೂಲಕ. ವಿಶೇಷವಾಗಿ ಮಾದಕ ದ್ರವ್ಯಗಳ ಹಾವಳಿಯನ್ನು ತಡೆಗಟ್ಟುವ ಭರವಸೆ ಯುವ ಮತದಾರರನ್ನು ಆಕರ್ಷಿಸಿತು. ಸ್ಮಾರ್ಟ್‌ಫೋನ್ ಪ್ರಚಾರ ಮತ್ತು ಹೊಲೋಗ್ರಾಮ್‌ಗಳ ಮೂಲಕ ಜನರನ್ನು ತಲುಪಿದ ವಿಜಯ್ ಅವರ ಶೈಲಿ ಆಧುನಿಕವಾಗಿದ್ದರೂ, ಸೈದ್ಧಾಂತಿಕವಾಗಿ ಅವರು ಇಂದಿಗೂ ಅಸ್ಪಷ್ಟವಾಗಿಯೇ ಉಳಿದಿದ್ದಾರೆ. ತಮಿಳುನಾಡನ್ನು ಮಾದಕ ದ್ರವ್ಯ ಮುಕ್ತಗೊಳಿಸುವ ಭರವಸೆ ನೀಡಿದ ವಿಜಯ್, ಆಡಳಿತಾತ್ಮಕವಾಗಿ ಇದನ್ನು ಹೇಗೆ ನಿಭಾಯಿಸುತ್ತಾರೆ ಎಂಬುದು ಕಾದು ನೋಡಬೇಕಿದೆ.

ಗೆಲುವಿನ ಸಂಭ್ರಮವೋ ಅಥವಾ ಅಪಾಯದ ಮುನ್ಸೂಚನೆಯೋ?

ವಿಜಯ್ ಅವರ ಗೆಲವು ಪ್ರಜಾಪ್ರಭುತ್ವದ ಸಾಧ್ಯತೆಗಳನ್ನು ತೋರಿಸಿರಬಹುದು. ಆದರೆ, ದ್ರಾವಿಡ ಚಳವಳಿಯ ಮೂಲ ಆಶಯಗಳನ್ನು ಎತ್ತಿ ಹಿಡಿಯುವಲ್ಲಿ ಅವರು ವಿಫಲರಾದರೆ, ಅದು ತಮಿಳುನಾಡಿನ ಪಾಲಿಗೆ ದೊಡ್ಡ ಆತಂಕಕಾರಿ ಬೆಳವಣಿಗೆಯಾಗಲಿದೆ. ರಾಷ್ಟ್ರೀಯ ಪಕ್ಷಗಳನ್ನು ದಶಕಗಳಿಂದ ದೂರವಿಟ್ಟ ತಮಿಳಿಗರು, ಈಗ ವಿಜಯ್ ಎಂಬ ‘ಬ್ರ್ಯಾಂಡ್’ ರಾಜಕಾರಣದ ಮೂಲಕ ಅರಿಯದೆಯೇ ರಾಷ್ಟ್ರೀಯ ಪಕ್ಷಗಳಿಗೆ ಜಾಗ ಮಾಡಿಕೊಡುತ್ತಿದ್ದಾರೆಯೇ? ಮೂರನೇ ಶಕ್ತಿಯ ಉದಯವು ಯಾವಾಗಲೂ ಮೂಲ ಪ್ರಾದೇಶಿಕ ಶಕ್ತಿಯನ್ನು ಕುಗ್ಗಿಸುತ್ತದೆ. ಇದು ಬಿಜೆಪಿಯಂತಹ ಪಕ್ಷಗಳಿಗೆ ‘ವೇಟಿಂಗ್ ಲಿಸ್ಟ್’ನಿಂದ ಮೇಲಕ್ಕೆ ಬರಲು ಇರುವ ಸುವರ್ಣಾವಕಾಶ.

ತಮಿಳುನಾಡು ಇವತ್ತು ಹೊಸ ದಳಪತಿಯನ್ನು ಕಂಡಿರಬಹುದು, ಆದರೆ ಆ ದಳಪತಿಯ ಹಾದಿ ತಮಿಳು ಅಸ್ಮಿತೆಯನ್ನು ಉಳಿಸುತ್ತದೆಯೇ ಅಥವಾ ರಾಷ್ಟ್ರೀಯ ಪಕ್ಷಗಳ ಕೈಗೊಂಬೆಯಾಗುತ್ತದೆಯೇ ಎಂಬುದು ಮಿಲಿಯನ್ ಡಾಲರ್ ಪ್ರಶ್ನೆ. ದ್ರಾವಿಡ ಸಿದ್ಧಾಂತದ ಉಕ್ಕಿನ ಕೋಟೆಯಲ್ಲಿ ಬಿರುಕು ಮೂಡಿಸಿರುವ ವಿಜಯ್, ಆ ಬಿರುಕಿನ ಮೂಲಕ ಯಾರನ್ನು ಒಳಕ್ಕೆ ಬಿಟ್ಟುಕೊಳ್ಳುತ್ತಾರೆ ಎಂಬುದು ಇಡೀ ದಕ್ಷಿಣ ಭಾರತದ ರಾಜಕಾರಣದ ಭವಿಷ್ಯವನ್ನು ನಿರ್ಧರಿಸಲಿದೆ.