ಬಾಗಲಕೋಟೆ: ರಾಜಕೀಯದಲ್ಲಿ ಶಾಶ್ವತ ಶತ್ರುಗಳೂ ಇಲ್ಲ, ಶಾಶ್ವತ ಮಿತ್ರರೂ ಇಲ್ಲ ಎಂಬ ಮಾತಿಗೆ ಬಾಗಲಕೋಟೆ ವಿಧಾನಸಭಾ ಕ್ಷೇತ್ರದ ಉಪಚುನಾವಣೆ ಸಾಕ್ಷಿಯಾಗುತ್ತಿದೆ. ಪಕ್ಷದಿಂದ ಉಚ್ಚಾಟನೆಗೊಂಡಿದ್ದರೂ, ಹಿಂದುತ್ವದ ಫೈರ್ಬ್ರಾಂಡ್ ನಾಯಕ ಬಸನಗೌಡ ಪಾಟೀಲ್ ಯತ್ನಾಳ್ (Yatnal) ಇದೀಗ ಬಿಜೆಪಿಯ ಪಾಲಿಗೆ ‘ಅನಿವಾರ್ಯ’ ನಾಯಕನಾಗಿ ಅಖಾಡಕ್ಕಿಳಿಯುತ್ತಿದ್ದಾರೆ. ಯಡಿಯೂರಪ್ಪ ಕುಟುಂಬದ ವಿರುದ್ಧ ಬಹಿರಂಗವಾಗಿಯೇ ಯುದ್ಧ ಸಾರಿದ್ದ ಯತ್ನಾಳ್ ಅವರನ್ನು, ಅದೇ ಕುಟುಂಬದ ನಾಯಕತ್ವದ ಬಿಜೆಪಿ ಇಂದು ಅನಿವಾರ್ಯವಾಗಿ ಸ್ವಾಗತಿಸುತ್ತಿರುವುದು ರಾಜ್ಯ ರಾಜಕೀಯದ ಕುತೂಹಲಕಾರಿ ಬೆಳವಣಿಗೆ.
ಪ್ರತಿಷ್ಠೆಯ ಕದನ ಮತ್ತು ಯತ್ನಾಳ್ ಎಂಟ್ರಿ
ಬಾಗಲಕೋಟೆ ಉಪಚುನಾವಣೆ ಕೇವಲ ಒಂದು ಕ್ಷೇತ್ರದ ಗೆಲುವು ಸೋಲಲ್ಲ; ಇದು ಸಿದ್ದರಾಮಯ್ಯ ನೇತೃತ್ವದ ಕಾಂಗ್ರೆಸ್ ಸರ್ಕಾರ ಮತ್ತು ವಿಜಯೇಂದ್ರ ನೇತೃತ್ವದ ಬಿಜೆಪಿ ನಡುವಿನ ಅಸ್ತಿತ್ವದ ಹೋರಾಟ. ಇಂತಹ ಸಂದರ್ಭದಲ್ಲಿ ಮಾಜಿ ಶಾಸಕ ವೀರಣ್ಣ ಚರಂತಿಮಠ ಅವರ ಗೆಲುವಿಗಾಗಿ ಬಿಜೆಪಿ ತನ್ನೆಲ್ಲಾ ಆಂತರಿಕ ಭಿನ್ನಾಭಿಪ್ರಾಯಗಳನ್ನು ಬದಿಗಿಟ್ಟು ಯತ್ನಾಳ್ (Yatnal) ಅವರ ಮೊರೆ ಹೋಗಿದೆ. ದಿನಬೆಳಗಾದರೆ ಬಿ.ಎಸ್. ಯಡಿಯೂರಪ್ಪ ಹಾಗೂ ಬಿ.ವೈ. ವಿಜಯೇಂದ್ರ ವಿರುದ್ಧ ಕೆಂಡ ಕಾರುವ ಯತ್ನಾಳ್ ಅವರನ್ನು ಪ್ರಚಾರಕ್ಕೆ ಕರೆಯಬೇಕೋ ಬೇಡವೋ ಎಂಬ ಗೊಂದಲ ಬಿಜೆಪಿಯಲ್ಲಿ ದಟ್ಟವಾಗಿತ್ತು. ಆದರೆ, ಸ್ಥಳೀಯವಾಗಿ ಕೇಳಿಬಂದ ‘ಹಿಂದುತ್ವದ ಕೂಗು’ ಮತ್ತು ಕಾರ್ಯಕರ್ತರ ಒತ್ತಡಕ್ಕೆ ಮಣಿದ ಹೈಕಮಾಂಡ್ ಹಾಗೂ ರಾಜ್ಯ ನಾಯಕತ್ವ ಅಂತಿಮವಾಗಿ ಯತ್ನಾಳ್ ಅವರಿಗೆ ‘ಪರೋಕ್ಷ’ ಹಸಿರು ನಿಶಾನೆ ತೋರಿಸಿದೆ.
ಶರಣಾದರಾ ಯಡಿಯೂರಪ್ಪ-ವಿಜಯೇಂದ್ರ?
ಯತ್ನಾಳ್ ಅವರ ಪ್ರಚಾರಕ್ಕೆ ಸ್ವತಃ ಯಡಿಯೂರಪ್ಪ ಮತ್ತು ವಿಜಯೇಂದ್ರ ಅವರು “ಯಾರು ಬಂದರೂ ಸ್ವಾಗತ” ಎಂದು ಹೇಳಿರುವುದು ರಾಜಕೀಯ ವಲಯದಲ್ಲಿ ತೀವ್ರ ಚರ್ಚೆಗೆ ಕಾರಣವಾಗಿದೆ. ವೈಯಕ್ತಿಕ ದಾಳಿಗಳನ್ನು ನಡೆಸುತ್ತಿದ್ದ ವ್ಯಕ್ತಿಯನ್ನು ಪಕ್ಷದ ಹಿತದೃಷ್ಟಿಯಿಂದ ಸಹಿಸಿಕೊಳ್ಳುವುದು ಅನಿವಾರ್ಯವಾಯಿತೇ? ಅಥವಾ ಈ ಉಪಚುನಾವಣೆಯಲ್ಲಿ ಸೋಲಾದರೆ ಅದರ ಹೊಣೆಗಾರಿಕೆಯನ್ನು ತಪ್ಪಿಸಿಕೊಳ್ಳಲು ಯತ್ನಾಳ್ ಅವರನ್ನು ದಾಳವಾಗಿ ಬಳಸಲಾಗುತ್ತಿದೆಯೇ? ಎಂಬ ಪ್ರಶ್ನೆಗಳು ಎದ್ದಿವೆ.
ಕೆಲವು ರಾಜಕೀಯ ವಿಶ್ಲೇಷಕರ ಪ್ರಕಾರ, ಇದು “ನಾಯಿ ಹಸಿದಿತ್ತು, ಅನ್ನ ಹಳಸಿತ್ತು” ಎಂಬಂತಹ ಪರಿಸ್ಥಿತಿ. ಬಿಜೆಪಿಗೆ ಹಿಂದುತ್ವದ ಮತಗಳ ಕ್ರೂಢೀಕರಣಕ್ಕೆ ಯತ್ನಾಳ್ ಬೇಕು, ಇತ್ತ ಯತ್ನಾಳ್ ಅವರಿಗೆ ತಮ್ಮ ರಾಜಕೀಯ ಅಸ್ತಿತ್ವ ಮತ್ತು ಪಂಚಮಸಾಲಿ ಸಮುದಾಯದ ಮೇಲಿನ ಹಿಡಿತ ಸಾಬೀತುಪಡಿಸಲು ಒಂದು ವೇದಿಕೆ ಬೇಕು. ಈ ಪರಸ್ಪರ ಲಾಭದ ಉದ್ದೇಶವೇ ಇವರಿಬ್ಬರನ್ನು ಒಂದು ಮಾಡಿದೆ. ಆದರೆ, ಚುನಾವಣೆಯ ನಂತರ ಯತ್ನಾಳ್ ಅವರನ್ನು ‘ಟಿಶ್ಯೂ ಪೇಪರ್’ ತರಹ ಬಳಸಿ ಬಿಸಾಡುತ್ತಾರೆಯೇ ಅಥವಾ ಪಕ್ಷಕ್ಕೆ ಮತ್ತೆ ಅಧಿಕೃತವಾಗಿ ಸೇರಿಸಿಕೊಳ್ಳುತ್ತಾರೆಯೇ ಎಂಬುದು ಯಕ್ಷಪ್ರಶ್ನೆ.
ಇದನ್ನೂ ಓದಿ: Media Masala: KPCC ಗೆ ಅಬಕಾರಿ ಮಿನಿಸ್ಟರ್ ದೋಖಾ? ಆಪ್ತ ಪತ್ರಕರ್ತ ಶಾಮೀಲು!
ಪಂಚಮಸಾಲಿ ಮತ್ತು ಹಿಂದುತ್ವದ ಲೆಕ್ಕಾಚಾರ
ಬಾಗಲಕೋಟೆ ಕ್ಷೇತ್ರದಲ್ಲಿ ಪಂಚಮಸಾಲಿ ಲಿಂಗಾಯತ ಮತಗಳು ನಿರ್ಣಾಯಕ. ಯತ್ನಾಳ್ ಅವರು ಈ ಸಮುದಾಯದ ಪ್ರಬಲ ಧ್ವನಿಯಾಗಿ ಗುರುತಿಸಿಕೊಂಡಿದ್ದಾರೆ. ಚರಂತಿಮಠ ಅವರು ಕೂಡ ಇದೇ ಸಮುದಾಯದವರಾದ್ದರಿಂದ, ಸಮಾಜದ ಮತಗಳನ್ನು ಒಗ್ಗೂಡಿಸಲು ಯತ್ನಾಳ್ ಅವರ ಪ್ರಭಾವ ಕೆಲಸ ಮಾಡಬಹುದು ಎಂಬುದು ಬಿಜೆಪಿ ಲೆಕ್ಕಾಚಾರ.
ಜೊತೆಗೆ, ಮುಖ್ಯಮಂತ್ರಿ ಸಿದ್ದರಾಮಯ್ಯ ಮತ್ತು ಡಿಸಿಎಂ ಡಿ.ಕೆ. ಶಿವಕುಮಾರ್ ಅವರು ಈಗಾಗಲೇ ಕ್ಷೇತ್ರದಲ್ಲಿ ಬಿರುಸಿನ ಪ್ರಚಾರ ನಡೆಸಿದ್ದಾರೆ. ಕಾಂಗ್ರೆಸ್ನ ‘ಅಹಿಂದ’ ಮತಬ್ಯಾಂಕ್ಗೆ ಪ್ರತಿಯಾಗಿ ಬಿಜೆಪಿಯು ತನ್ನ ಸಾಂಪ್ರದಾಯಿಕ ‘ಹಿಂದುತ್ವ’ದ ಅಸ್ತ್ರವನ್ನು ಪ್ರಯೋಗಿಸಲು ಯತ್ನಾಳ್ ಅವರನ್ನು ಮುಂಚೂಣಿಗೆ ತಂದಿದೆ. ಸಿದ್ದರಾಮಯ್ಯ ಪ್ರಚಾರ ಮಾಡಿದ ಜಾಗಗಳಲ್ಲೇ ಯತ್ನಾಳ್ ಸಭೆಗಳು ಆಯೋಜನೆಗೊಂಡಿರುವುದು ನೇರ ಸಮರಕ್ಕೆ ಸಾಕ್ಷಿಯಾಗಿದೆ.
ಕಾಂಗ್ರೆಸ್ಗೆ ಲಾಭವೋ ಅಥವಾ ನಷ್ಟವೋ?
ಯತ್ನಾಳ್ ಅವರ ಎಂಟ್ರಿಯಿಂದ ಕಾಂಗ್ರೆಸ್ಗೆ ದೊಡ್ಡ ಮಟ್ಟದ ನಷ್ಟವಾಗುತ್ತದೆ ಎಂದು ಹೇಳುವುದು ಕಷ್ಟ. ಯಾಕೆಂದರೆ, ಯತ್ನಾಳ್ ಅವರ ಭಾಷಣಗಳು ಕೇವಲ ಬಿಜೆಪಿಯ ಕಡುಬಂಧುಗಳಾದ ಹಿಂದುತ್ವದ ಮತಗಳು ಚದುರಿ ಹೋಗದಂತೆ ತಡೆಯಬಹುದೇ ಹೊರತು, ಕಾಂಗ್ರೆಸ್ನ ಭದ್ರಕೋಟೆಯಾಗಿರುವ ದಲಿತ, ಹಿಂದುಳಿದ ಮತ್ತು ಅಲ್ಪಸಂಖ್ಯಾತ ಮತಗಳನ್ನು ಸೆಳೆಯಲು ಸಾಧ್ಯವಿಲ್ಲ. ಹೀಗಾಗಿ, ಯತ್ನಾಳ್ ಅವರ ಪ್ರಭಾವವು ಕೇವಲ ‘ಡ್ಯಾಮೇಜ್ ಕಂಟ್ರೋಲ್’ ಮಾಡಬಲ್ಲದೇ ಹೊರತು ಕಾಂಗ್ರೆಸ್ನ ಮತಬ್ಯಾಂಕ್ಗೆ ಲಗ್ಗೆ ಇಡುವುದು ಕಷ್ಟ ಎನ್ನಲಾಗುತ್ತಿದೆ.
ಇದನ್ನೂ ಓದಿ: Bagalkot By-Election: ಬಾಗಲಕೋಟೆ ಅಭಿವೃದ್ಧಿಯ ಅಸಲಿ ಹರಿಕಾರ ಮೇಟಿ; ಚರಂತಿಮಠ ಕೊಡುಗೆ ಶೂನ್ಯ- ಸಿದ್ದರಾಮಯ್ಯ ಗುಡುಗು
ಭವಿಷ್ಯದ ರಾಜಕೀಯ ಬೆಳವಣಿಗೆಗಳು
ಇಂದಿನಿಂದ ಯತ್ನಾಳ್ (Yatnal) ಅಖಾಡಕ್ಕಿಳಿಯುತ್ತಿದ್ದು, ಅವರ ಪ್ರತಿಯೊಂದು ನಡೆ ಮತ್ತು ಮಾತುಗಳು ಚುನಾವಣಾ ಫಲಿತಾಂಶದ ಮೇಲೆ ಮಾತ್ರವಲ್ಲದೆ, ಬಿಜೆಪಿಯ ಆಂತರಿಕ ಸಮೀಕರಣದ ಮೇಲೂ ಪರಿಣಾಮ ಬೀರಲಿವೆ. ಒಂದು ವೇಳೆ ಚರಂತಿಮಠ ಗೆದ್ದರೆ, ಯತ್ನಾಳ್ ಅವರ ಕೈ ಮೇಲಾಗುತ್ತದೆ ಮತ್ತು ಅವರು ಪಕ್ಷದ ನಾಯಕತ್ವದ ಮೇಲೆ ಮತ್ತಷ್ಟು ಒತ್ತಡ ಹೇರಬಹುದು. ಆದರೆ, ಸೋಲಾದರೆ ಆ ಹೊಣೆಗಾರಿಕೆಯನ್ನು ಯತ್ನಾಳ್ ತಲೆಗೆ ಕಟ್ಟಲು ವಿರೋಧಿ ಬಣ ಸಜ್ಜಾಗಿ ಕುಳಿತಿದೆ.
ಒಟ್ಟಾರೆಯಾಗಿ, ಬಾಗಲಕೋಟೆ ಉಪಚುನಾವಣೆಯು ಯತ್ನಾಳ್ ಅವರ ಶಕ್ತಿ ಪ್ರದರ್ಶನಕ್ಕೆ ವೇದಿಕೆಯಾಗಿದ್ದು, ಬಿಜೆಪಿಯ ಹಿರಿಯ ನಾಯಕರು ಮನಸ್ಸಿಲ್ಲದಿದ್ದರೂ ‘ಅನಿವಾರ್ಯತೆ’ಗೆ ಶರಣಾದಂತೆ ಕಾಣುತ್ತಿದೆ. ಇದು ‘ಬಳಸಿ ಬಿಸಾಡುವ’ ತಂತ್ರವೋ ಅಥವಾ ಹೊಸ ರಾಜಕೀಯ ಸಖ್ಯದ ಆರಂಭವೋ ಎಂಬುದು ಚುನಾವಣಾ ಫಲಿತಾಂಶದ ನಂತರವಷ್ಟೇ ಸ್ಪಷ್ಟವಾಗಲಿದೆ.
