ಬಾಗಲಕೋಟೆ: ದಿವಂಗತ ಶಾಸಕ ಎಚ್.ವೈ. ಮೇಟಿ ಅವರ ನಿಧನದಿಂದ ತೆರವಾಗಿರುವ ಬಾಗಲಕೋಟೆ ವಿಧಾನಸಭಾ ಕ್ಷೇತ್ರದ ಉಪಚುನಾವಣೆಗೆ ಕೊನೆಗೂ ಕಾಂಗ್ರೆಸ್ ತನ್ನ ಅಭ್ಯರ್ಥಿಯನ್ನು ಘೋಷಿಸಿದೆ. ತೀವ್ರ ಕುತೂಹಲ ಕೆರಳಿಸಿದ್ದ ಟಿಕೆಟ್ ಪೈಪೋಟಿಯಲ್ಲಿ ಅಂತಿಮವಾಗಿ ಉಮೇಶ ಮೇಟಿ ಅವರಿಗೆ ಅದೃಷ್ಟ ಒಲಿದಿದೆ. ಆದರೆ, ಈ ಆಯ್ಕೆಯ ಹಿಂದೆ ಕುಟುಂಬದ ಒಳಗಿನ ಬಂಡಾಯದ ಭೀತಿ (Inside Story) ಮತ್ತು ‘ಆಪ್ತ’ ರಾಜಕಾರಣದ ನೆರಳು ಅಡಗಿದೆ ಎನ್ನುವುದು ಈಗ ಸಾರ್ವಜನಿಕ ಚರ್ಚೆಯ ವಿಷಯ.
ಬಾದಾಮಿ ಮಾದರಿಯ ‘ಆಪ್ತ’ ತಂತ್ರಗಾರಿಕೆ?
ಬಾಗಲಕೋಟೆ ರಾಜಕಾರಣದ ಇಂದಿನ ಸ್ಥಿತಿಯನ್ನು ಅರ್ಥ ಮಾಡಿಕೊಳ್ಳಬೇಕಾದರೆ ಒಮ್ಮೆ ನೆರೆಯ ಬಾದಾಮಿ ಕ್ಷೇತ್ರದ ಇತಿಹಾಸವನ್ನು ಮೆಲುಕು ಹಾಕಬೇಕು. ಮಾಜಿ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರು ಬಾದಾಮಿಯಿಂದ ಸ್ಪರ್ಧಿಸಿದಾಗ, ಅಲ್ಲಿನ ಹಿರಿಯ ನಾಯಕ ಬಿ.ಬಿ. ಚಿಮ್ಮನಕಟ್ಟಿ ಅವರ ಕುಟುಂಬವನ್ನು ರಾಜಕೀಯವಾಗಿ ಮೂಲೆಗುಂಪು ಮಾಡುವ ಪ್ರಯತ್ನಗಳು ನಡೆದಿದ್ದವು ಎಂಬ ಮಾತುಗಳು ಇಂದಿಗೂ ಹಸಿರಾಗಿವೆ. 2018 ರಿಂದ 2023 ರ ಅವಧಿಯಲ್ಲಿ ಸಿದ್ದರಾಮಯ್ಯನವರ ಬಾದಾಮಿ ಕ್ಷೇತ್ರದ ಸಂಪೂರ್ಣ ಉಸ್ತುವಾರಿಯನ್ನು ಹೊಳಬಸು ಶೆಟ್ಟರ್ ಅವರೇ ನೋಡಿಕೊಳ್ಳುತ್ತಿದ್ದರು. ಆದರೆ, 2023 ರ ಚುನಾವಣೆಯಲ್ಲಿ ಭೀಮಸಿ ಚಿಮ್ಮನಕಟ್ಟಿ ಅವರ ಗೆಲುವು ಆ ‘ಆಪ್ತ’ ವಲಯದ ಹಿಡಿತವನ್ನು ಸಡಿಲಗೊಳಿಸಿತ್ತು.
ಈಗ ಅದೇ ‘ಬಾದಾಮಿ ಮಾಡೆಲ್’ ತಂತ್ರಗಾರಿಕೆ ಬಾಗಲಕೋಟೆಯಲ್ಲೂ ಮರುಕಳಿಸುತ್ತಿದೆಯೇ ಎಂಬ ಅನುಮಾನ ಮೇಟಿ ಕುಟುಂಬದ ಒಳಗೆ ಮೊಳಕೆಯೊಡೆದಿತ್ತು. ದಿವಂಗತ ಎಚ್.ವೈ. ಮೇಟಿ ಅವರೊಂದಿಗೆ ದೀರ್ಘಕಾಲ ಆಪ್ತ ಸಹಾಯಕರಾಗಿ (PA) ಕೆಲಸ ಮಾಡಿದ್ದ ಹೊಳಬಸು ಶೆಟ್ಟರ್, ಇಂದು ಸಿಎಂ ಸಿದ್ದರಾಮಯ್ಯನವರ ಅತ್ಯಾಪ್ತ ವಲಯದಲ್ಲಿ ಗುರುತಿಸಿಕೊಂಡಿದ್ದಾರೆ. ಮೇಟಿ ಅವರ ನಿಧನದ ನಂತರ, ತಮಗೆ ಆಪ್ತರಾಗಿರುವ ಮಲ್ಲಿಕಾರ್ಜುನ ಮೇಟಿ ಅವರಿಗೆ ಟಿಕೆಟ್ ಕೊಡಿಸುವ ಮೂಲಕ ಕ್ಷೇತ್ರವನ್ನು ತಮ್ಮ ‘ಪರೋಕ್ಷ’ ಹಿಡಿತಕ್ಕೆ ತೆಗೆದುಕೊಳ್ಳುವ ತಂತ್ರಗಾರಿಕೆ ನಡೆಯುತ್ತಿದೆ ಎಂಬ ಆತಂಕ ಕುಟುಂಬದ ಇತರ ಸದಸ್ಯರಲ್ಲಿ ಮನೆಮಾಡಿತ್ತು.
ಇದನ್ನೂ ಓದಿ: Davanagere By-Election: ಸಾಬ್ರಿಗೆ ಕಾಂಗ್ರೆಸ್ ಟೋಪಿ? ಜಾತ್ಯತೀತದ ಅಸಲಿ ಮುಖವಾಡ ಬಯಲು!
ಮಹಾದೇವಿ ಮೇಟಿ ನಡೆಸಿದ ‘ಡಿಜಿಟಲ್’ ಯುದ್ಧ
ಈ ಪರೋಕ್ಷ ರಾಜಕಾರಣದ ವಾಸನೆಯನ್ನು ಮೊದಲು ಪತ್ತೆಹಚ್ಚಿದ್ದೇ ಮೇಟಿ ಅವರ ಕಿರಿಯ ಪುತ್ರಿ ಮಹಾದೇವಿ ಮೇಟಿ. ಮಲ್ಲಿಕಾರ್ಜುನ ಮೇಟಿ ಅವರಿಗೆ ಟಿಕೆಟ್ ನೀಡಿದರೆ ಅವರು ಕೇವಲ ‘ನಾಮಕಾವಸ್ಥೆ ಶಾಸಕ’ರಾಗಿ ಉಳಿಯುತ್ತಾರೆ ಮತ್ತು ಕ್ಷೇತ್ರದ ಅಧಿಕಾರ ಚಲಾಯಿಸುವವರು ಬೇರೆಯವರೇ ಆಗಿರುತ್ತಾರೆ ಎಂಬ ಸತ್ಯವನ್ನು ಮಹಾದೇವಿ ಅರಿತಿದ್ದರು.
ಹಾಗಾಗಿಯೇ, ಅವರು ಸಾಮಾಜಿಕ ಜಾಲತಾಣಗಳ ಮೂಲಕ ಅಖಾಡಕ್ಕಿಳಿದರು. “ನಾನೂ ಆಕಾಂಕ್ಷಿ” ಎಂದು ಘೋಷಿಸುವ ಮೂಲಕ ಅವರು ಕೇವಲ ಟಿಕೆಟ್ಗಾಗಿ ಬೇಡಿಕೆ ಇಡಲಿಲ್ಲ, ಬದಲಾಗಿ ಕ್ಷೇತ್ರದ ಮೇಲೆ ಹೊರಗಿನವರ ಪ್ರಭಾವ ಹೆಚ್ಚಾಗಬಾರದು ಎಂಬ ಸಂದೇಶ ರವಾನಿಸಿದರು. ಮಹಾದೇವಿಯವರ ಈ ಹಠಮಾರಿ ಧೋರಣೆ ಮತ್ತು ನೇರ ನುಡಿಗಳು ಕಾಂಗ್ರೆಸ್ ವರಿಷ್ಠರಿಗೆ ದೊಡ್ಡ ತಲೆನೋವಾಗಿ ಪರಿಣಮಿಸಿತು.
ಸರ್ವೆ ವರದಿ ಮತ್ತು ಸಿಎಂ ಎದುರಿನ ಸತ್ಯದರ್ಶನ
ಪರಿಸ್ಥಿತಿ ಗಂಭೀರವಾಗುತ್ತಿದ್ದಂತೆ ಸಚಿವ ಸತೀಶ್ ಜಾರಕಿಹೊಳಿ ನೇತೃತ್ವದ ತಂಡ ಕ್ಷೇತ್ರದಲ್ಲಿ ವಾಸ್ತವ ಸ್ಥಿತಿಯ ಸಮೀಕ್ಷೆ ನಡೆಸಿತು. ಈ ಸರ್ವೆಯಲ್ಲಿ ಜನಸಾಮಾನ್ಯರ ಒಲವು ಮತ್ತು ಕಾರ್ಯಕರ್ತರ ಬೆಂಬಲ ಉಮೇಶ ಮೇಟಿ ಅವರ ಪರವಾಗಿರುವುದು ಸ್ಪಷ್ಟವಾಯಿತು. ಕುಟುಂಬದ ಕಲಹ ಬೀದಿಗೆ ಬಂದರೆ ಬಿಜೆಪಿಗೆ ಲಾಭವಾಗಬಹುದು ಎಂಬ ಆತಂಕದಿಂದ ಸಿಎಂ ಸಿದ್ದರಾಮಯ್ಯನವರು ಮೇಟಿ ಅವರ ನಾಲ್ವರು ಮಕ್ಕಳನ್ನು ಕರೆಸಿ ‘ಕ್ಲೋಸ್ ಡೋರ್’ ಮೀಟಿಂಗ್ ನಡೆಸಿದರು.
ಈ ರಹಸ್ಯ ಸಭೆಯಲ್ಲಿ ಕುಟುಂಬದ ಸದಸ್ಯರು ಮುಚ್ಚುಮರೆಯಿಲ್ಲದೆ ತಮ್ಮ ಅಸಮಾಧಾನವನ್ನು ಸಿಎಂ ಮುಂದೆ ತೋಡಿಕೊಂಡರು. ಟಿಕೆಟ್ ಹಂಚಿಕೆಯಲ್ಲಿ ‘ಆಪ್ತ’ ವಲಯದ ಹಸ್ತಕ್ಷೇಪ ಹಾಗೂ ಅದರಿಂದ ಆಗಬಹುದಾದ ರಾಜಕೀಯ ನಷ್ಟದ ಬಗ್ಗೆ ಸಿಎಂಗೆ ಮನವರಿಕೆ ಮಾಡಿಕೊಡುವಲ್ಲಿ ಮಹಾದೇವಿ ಯಶಸ್ವಿಯಾದರು ಎನ್ನಲಾಗಿದೆ. ಉಮೇಶ ಮೇಟಿ ಅವರಿಗೆ ಟಿಕೆಟ್ ನೀಡಿದರೆ ಮಾತ್ರ ಕ್ಷೇತ್ರದಲ್ಲಿ ಒಗ್ಗಟ್ಟು ಸಾಧ್ಯ ಎಂಬ ಕಠಿಣ ವಾಸ್ತವವನ್ನು ಅರಿತ ಸಿದ್ದರಾಮಯ್ಯನವರು, ಅಂತಿಮವಾಗಿ ಉಮೇಶ ಅವರ ಹೆಸರಿಗೆ ಮೊಹರು ಒತ್ತಿದರು.
ಶಕ್ತಿ ಪ್ರದರ್ಶನವೋ ಅಥವಾ ಅನಿವಾರ್ಯತೆಯೋ?
ಉಮೇಶ ಮೇಟಿ ಅವರಿಗೆ ಟಿಕೆಟ್ ಘೋಷಣೆಯಾಗಿರುವುದು ಮಹಾದೇವಿ ಮೇಟಿ ಅವರ ಹಠಕ್ಕೆ ಸಿಕ್ಕ ಜಯದಂತೆ ಕಂಡರೂ, ಇದು ವಾಸ್ತವವಾಗಿ ಬಾಗಲಕೋಟೆ ಕಾಂಗ್ರೆಸ್ನಲ್ಲಿ ‘ಪರೋಕ್ಷ ಅಧಿಕಾರ’ ನಡೆಸಲು ಹವಣಿಸುತ್ತಿದ್ದ ಶಕ್ತಿಗಳಿಗೆ ಬಿದ್ದ ಪೆಟ್ಟು ಎನ್ನಬಹುದು. ಮೇಟಿ ಅವರ ನಿಧನದ ನಂತರ ಉಂಟಾದ ಶೂನ್ಯವನ್ನು ತುಂಬಲು ಅವರ ಕುಟುಂಬವೇ ಒಂದಾಗಬೇಕಾದ ಅನಿವಾರ್ಯತೆ ಇತ್ತು.
ಈಗ ಟಿಕೆಟ್ ಪ್ರಹಸನ ಮುಗಿದಿದೆ. ಆದರೆ, ಉಮೇಶ ಮೇಟಿ ಅವರು ಕೇವಲ ಅಭ್ಯರ್ಥಿಯಾಗಿ ಉಳಿಯದೆ, ತಂದೆಯಂತೆ ಸ್ವತಂತ್ರ ಶಕ್ತಿಯಾಗಿ ಹೊರಹೊಮ್ಮುತ್ತಾರಾ? ಅಥವಾ ತೆರೆಯ ಮರೆಯ ಆಟಗಳು ಮುಂದುವರಿಯುತ್ತವಾ? ಎಂಬುದನ್ನು ಮತದಾರರು ನಿರ್ಧರಿಸಲಿದ್ದಾರೆ. ಸದ್ಯಕ್ಕೆ ಮಾತ್ರ, ‘ಆಪ್ತರ’ ಹಸ್ತಕ್ಷೇಪಕ್ಕೆ ಬ್ರೇಕ್ ಹಾಕಿಸಿ ತನ್ನ ಸೋದರನಿಗೆ ಟಿಕೆಟ್ ಕೊಡಿಸುವಲ್ಲಿ ಮಹಾದೇವಿ ಮೇಟಿ ಯಶಸ್ವಿಯಾಗಿದ್ದಾರೆ.
ಬಾಗಲಕೋಟೆಯ ರಾಜಕೀಯ ಚದುರಂಗದಾಟದಲ್ಲಿ ಈ ಬಾರಿ ‘ಪರೋಕ್ಷ ದಾಳ’ಗಳಿಗಿಂತ ‘ನೇರ ನಡೆ’ಗಳೇ ಮೇಲುಗೈ ಸಾಧಿಸಿರುವುದು ವಿಶೇಷ.
