ಬೆಂಗಳೂರು: ನಾಡಿನ ಜನತೆಗೆ ರಕ್ಷಣೆ ನೀಡುವಲ್ಲಿ ಮತ್ತು ಅಪರಾಧಗಳ ತನಿಖೆಯಲ್ಲಿ ಹಗಲಿರುಳು ಶ್ರಮಿಸುವ ಪೊಲೀಸ್ ಇಲಾಖೆಯ (Police) ವೀರರಿಗೆ 2025ನೇ ಸಾಲಿನ ‘ಮುಖ್ಯಮಂತ್ರಿಗಳ ಪೊಲೀಸ್ ಪದಕ’ವನ್ನು ಪ್ರಕಟಿಸಲಾಗಿದೆ. ಈ ಬಾರಿಯ ಪಟ್ಟಿಯಲ್ಲಿ ಇಡೀ ದೇಶವನ್ನೇ ಬೆಚ್ಚಿಬೀಳಿಸಿದ್ದ ಮಾಜಿ ಸಂಸದ ಪ್ರಜ್ವಲ್ ರೇವಣ್ಣ ಲೈಂಗಿಕ ಹಗರಣದ ತನಿಖೆ ನಡೆಸಿದ ಐಪಿಎಸ್ ಅಧಿಕಾರಿ ಸುಮನ್ ಡಿ. ಪೆನ್ನೇಕರ್ ಅವರ ಹೆಸರು ಅಗ್ರಸ್ಥಾನದಲ್ಲಿರುವುದು ವಿಶೇಷ ಸಮಾಚಾರ.
ರಾಜ್ಯ ಪೊಲೀಸ್ ಮಹಾನಿರ್ದೇಶಕರು ಮತ್ತು ಐಜಿಪಿ (DG-IGP) ಡಾ. ಎಂ.ಎ. ಸಲೀಂ ಅವರು ಮಾರ್ಚ್ 27 ರಂದು ಈ ಕುರಿತು ಅಧಿಕೃತ ಆದೇಶ ಹೊರಡಿಸಿದ್ದು, ಏಪ್ರಿಲ್ 2 ರಂದು ನಡೆಯಲಿರುವ ಸಂಭ್ರಮದ ಸಮಾರಂಭದಲ್ಲಿ 153 ಅಧಿಕಾರಿ ಮತ್ತು ಸಿಬ್ಬಂದಿಗಳಿಗೆ ಈ ಪ್ರತಿಷ್ಠಿತ ಪದಕವನ್ನು ಪ್ರದಾನ ಮಾಡಲಾಗುವುದು.
ಪ್ರಜ್ವಲ್ ರೇವಣ್ಣ ಕೇಸ್ನಲ್ಲಿ ಸಿಂಹಿಣಿಯಂತೆ ಗುಡುಗಿದ್ದ ಸುಮನ್ ಪನ್ನೇಕರ್!
ಈ ಸಾಲಿನ ಮುಖ್ಯಮಂತ್ರಿ ಪದಕದ ಪಟ್ಟಿಯಲ್ಲಿ ಪ್ರಮುಖವಾಗಿ ಕೇಳಿ ಬರುತ್ತಿರುವ ಹೆಸರು ಬಳ್ಳಾರಿ ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ (SP) ಡಾ. ಸುಮನ್ ಡಿ. ಪೆನ್ನೇಕರ್. ಅವರು ಈ ಗೌರವಕ್ಕೆ ಪಾತ್ರರಾಗಲು ಪ್ರಮುಖ ಕಾರಣ ಪ್ರಜ್ವಲ್ ರೇವಣ್ಣ ಅವರ ಮೇಲಿದ್ದ ಲೈಂಗಿಕ ದೌರ್ಜನ್ಯ ಪ್ರಕರಣದ ನಿಷ್ಪಕ್ಷಪಾತ ತನಿಖೆ.
ವಿಶೇಷ ತನಿಖಾ ತಂಡದ (SIT) ಪ್ರಮುಖ ಸದಸ್ಯರಾಗಿದ್ದ ಸುಮನ್ ಪನ್ನೇಕರ್ ಅವರು ಅತ್ಯಂತ ರಾಜಕೀಯ ಪ್ರಭಾವವಿದ್ದ ಈ ಪ್ರಕರಣವನ್ನು ಅತ್ಯಂತ ಚಾಣಾಕ್ಷತನದಿಂದ ನಿಭಾಯಿಸಿದರು. ಸಂತ್ರಸ್ತೆಯರ ಹೇಳಿಕೆ ಪಡೆಯುವಲ್ಲಿ, ಡಿಜಿಟಲ್ ಸಾಕ್ಷ್ಯಗಳನ್ನು ಕಲೆಹಾಕುವಲ್ಲಿ ಮತ್ತು ಆರೋಪಿಯ ವಿರುದ್ಧ ಗಟ್ಟಿ ಪುರಾವೆಗಳನ್ನು ಸಿದ್ಧಪಡಿಸುವಲ್ಲಿ ಅವರು ತೋರಿದ ಧೈರ್ಯ ಮೆಚ್ಚುವಂತದ್ದು. ಅಧಿಕಾರ ಮತ್ತು ಹಣದ ಪ್ರಭಾವದ ನಡುವೆಯೂ ಕಾನೂನಿನ ಕೈ ಉದ್ದವಿದೆ ಎಂಬುದನ್ನು ಸಾಬೀತುಪಡಿಸಿದ ಸುಮನ್ ಅವರ ದಕ್ಷತೆಗೆ ಈ ಪದಕವು ಸಿಕ್ಕ ದೊಡ್ಡ ಮನ್ನಣೆಯಾಗಿದೆ.
ಗೌರವಕ್ಕೆ ಪಾತ್ರರಾದ ಇತರೆ ಪ್ರಮುಖ ಅಧಿಕಾರಿಗಳು
ಕೇವಲ ಸುಮನ್ ಪನ್ನೇಕರ್ ಅವರಷ್ಟೇ ಅಲ್ಲದೆ, ರಾಜ್ಯದ ವಿವಿಧ ಮೂಲೆಗಳಲ್ಲಿ ಜನಸ್ನೇಹಿ ಪೊಲೀಸಿಂಗ್ ಮತ್ತು ಕಾನೂನು ಸುವ್ಯವಸ್ಥೆ ಕಾಪಾಡಿದ 153 ಮಂದಿ ಧೀರರು ಈ ಪಟ್ಟಿಯಲ್ಲಿದ್ದಾರೆ. ಪ್ರಮುಖವಾಗಿ:
- ಡಾ. ಅರುಣ್ ಕೆ. (SP, ಉಡುಪಿ ಜಿಲ್ಲೆ): ಕೋಮು ಸೂಕ್ಷ್ಮ ಪ್ರದೇಶದಲ್ಲಿ ಶಾಂತಿ ಸುವ್ಯವಸ್ಥೆ ಕಾಪಾಡಿದ್ದಕ್ಕಾಗಿ ಇವರನ್ನು ಗುರುತಿಸಲಾಗಿದೆ.
- ಪ್ರತೀಕ್ ಶಂಕರ್ (SP, ಯಾದಗಿರಿ ಜಿಲ್ಲೆ): ಅಪರಾಧ ತಡೆಗಟ್ಟುವಲ್ಲಿ ಆಧುನಿಕ ತಂತ್ರಜ್ಞಾನ ಬಳಸಿದ ಕೀರ್ತಿ ಇವರದ್ದು.
- ಡಾ. ಗೋಪಾಲ ಎಂ. ಬ್ಯಾಕೋಡ (DCP, ಸಂಚಾರ ದಕ್ಷಿಣ ವಿಭಾಗ, ಬೆಂಗಳೂರು): ರಾಜಧಾನಿಯ ಸಂಚಾರ ದಟ್ಟಣೆ ನಿರ್ವಹಣೆಯಲ್ಲಿ ಶಿಸ್ತು ತಂದಿದ್ದಕ್ಕಾಗಿ ಇವರಿಗೆ ಪದಕ ಲಭಿಸಿದೆ.
ಈ ಪಟ್ಟಿಯಲ್ಲಿ ಹಿರಿಯ ಐಪಿಎಸ್ ಅಧಿಕಾರಿಗಳಿಂದ ಹಿಡಿದು, ಬೀಟ್ ಕಾನ್ಸ್ಟೇಬಲ್ ಹಂತದವರೆಗಿನ ಸಿಬ್ಬಂದಿ ಇರುವುದು ಇಲಾಖೆಯ ಪ್ರತಿಯೊಬ್ಬರಿಗೂ ಸ್ಫೂರ್ತಿಯಾಗಿದೆ.
ಕೋರಮಂಗಲದಲ್ಲಿ ಸಮರ ತಾಲೀಮು: ಕಠಿಣ ಶಿಸ್ತು ಜಾರಿ
ಏಪ್ರಿಲ್ 2 ರಂದು ನಡೆಯುವ ಪದಕ ಪ್ರದಾನ ಸಮಾರಂಭದ ಹಿನ್ನೆಲೆಯಲ್ಲಿ ಇಂದಿನಿಂದಲೇ (ಮಾರ್ಚ್ 29) ಬೆಂಗಳೂರಿನ ಕೋರಮಂಗಲದ ಕೆಎಸ್ಆರ್ಪಿ (KSRP) 3ನೇ ಪಡೆಯ ಮೈದಾನದಲ್ಲಿ ಪೂರ್ವಭಾವಿ ತಾಲೀಮು (ರಿಹರ್ಸಲ್) ಆರಂಭವಾಗಿದೆ.
- ಶಿಸ್ತಿನ ಆದೇಶ: ಆಯ್ಕೆಯಾದ ಎಲ್ಲಾ 153 ಅಧಿಕಾರಿಗಳು ಇಂದು ಬೆಳಗ್ಗೆ 8:00 ಗಂಟೆಗೆ ಕಮಾಂಡೆಂಟ್ ಎದುರು ವರದಿ ಮಾಡಿಕೊಳ್ಳುವಂತೆ ಸೂಚಿಸಲಾಗಿದೆ.
- ಹಾಜರಾತಿ ಕಡ್ಡಾಯ: ಒಂದು ವೇಳೆ ಯಾರಾದರೂ ತಾಲೀಮಿನಲ್ಲಿ ಭಾಗವಹಿಸದಿದ್ದರೆ, ಅಂತವರಿಗೆ ಏಪ್ರಿಲ್ 2ರ ಮುಖ್ಯ ಸಮಾರಂಭದಲ್ಲಿ ಪದಕ ಸ್ವೀಕರಿಸಲು ಅವಕಾಶವಿರುವುದಿಲ್ಲ ಎಂದು ಕಟ್ಟುನಿಟ್ಟಾಗಿ ತಿಳಿಸಲಾಗಿದೆ.
ಸಮವಸ್ತ್ರ ಸಂಹಿತೆ ಮತ್ತು ನಿಯಮಗಳು
ಪದಕ ಸ್ವೀಕರಿಸುವ ಸಮಾರಂಭಕ್ಕೆ ವಿಶೇಷ ಸಮವಸ್ತ್ರ ಸಂಹಿತೆಯನ್ನು ಜಾರಿಗೊಳಿಸಲಾಗಿದೆ:
- ಡಿವೈಎಸ್ಪಿ ಮತ್ತು ಮೇಲ್ಪಟ್ಟ ಅಧಿಕಾರಿಗಳು: ವರ್ಕಿಂಗ್ ಡ್ರೆಸ್ ಜೊತೆಗೆ ಕ್ರಾಸ್ ಬೆಲ್ಟ್ ಹಾಗೂ ‘ಖಡ್ಗ’ (Sword) ಧರಿಸುವುದು ಕಡ್ಡಾಯ.
- ಸಿಪಿಐ ನಿಂದ ಎಎಸ್ಐ ವರೆಗೆ: ವರ್ಕಿಂಗ್ ಡ್ರೆಸ್ ಮತ್ತು ಕ್ರಾಸ್ ಬೆಲ್ಟ್ ಧರಿಸಬೇಕು.
- ಎಚ್ಸಿ ಮತ್ತು ಪಿಸಿ ಸಿಬ್ಬಂದಿ: ಅಪ್ಪಟ ಪಥಸಂಚಲನಕ್ಕೆ ಸಿದ್ಧಪಡಿಸಿದ ‘ಸೆರಿಮೋನಿಯಲ್ ಡ್ರೆಸ್’ ಧರಿಸಲಿದ್ದಾರೆ.
ವಿಶೇಷವೆಂದರೆ, ಒಂದು ವೇಳೆ ಆಯ್ಕೆಯಾದ ಅಧಿಕಾರಿಗಳು ಪ್ರಸ್ತುತ ಯಾವುದಾದರೂ ಕಾರಣಕ್ಕೆ ಅಮಾನತ್ತಿನಲ್ಲಿದ್ದರೆ ಅಂತಹವರಿಗೆ ಈ ಪದಕ ಸ್ವೀಕರಿಸುವ ಅವಕಾಶ ಇರುವುದಿಲ್ಲ. ನಿವೃತ್ತರಾದವರಿಗೆ ಅಥವಾ ಮರಣ ಹೊಂದಿದವರಿಗೆ ಅವರ ಕುಟುಂಬದವರ ಮೂಲಕ ಈ ಗೌರವವನ್ನು ತಲುಪಿಸಲು ಇಲಾಖೆ ನಿರ್ಧರಿಸಿದೆ.
ಪೊಲೀಸ್ ಇಲಾಖೆಯಲ್ಲಿ ಪ್ರಾಮಾಣಿಕವಾಗಿ ದುಡಿಯುವವರಿಗೆ ಈ ರೀತಿಯ ಪದಕಗಳು ಬೆನ್ನಿನ ಮೇಲೆ ಸಿಕ್ಕ ಪ್ರೀತಿಯ ಚಪ್ಪಾಳೆ ಇದ್ದಂತೆ. ಅದರಲ್ಲೂ ಸುಮನ್ ಪನ್ನೇಕರ್ ಅಂತಹ ಮಹಿಳಾ ಅಧಿಕಾರಿಗಳು ದೊಡ್ಡ ಸವಾಲುಗಳನ್ನು ಎದುರಿಸಿ ಸಾಧನೆ ಮಾಡಿದಾಗ ಅವರಿಗೆ ಸಿಗುವ ಈ ಪುರಸ್ಕಾರವು ಇಡೀ ಮಹಿಳಾ ಸಮುದಾಯಕ್ಕೆ ಹೆಮ್ಮೆಯ ವಿಷಯ.
ರಾಜ್ಯದ 153 ಪೊಲೀಸರಿಗೆ 2025ನೇ ಸಾಲಿನ ಸಿಎಂ ಪದಕ ಘೋಷಣೆ. ಪೂರ್ಣ ಪಟ್ಟಿ ಇಲ್ಲಿದೆ ನೋಡಿ:
