ಯುದ್ಧ ಅಂದಾಕ್ಷಣ ನಮಗೆ ನೆನಪಾಗುವುದು ವಿಮಾನಗಳ ಗರ್ಜನೆ, ಟ್ಯಾಂಕರ್ಗಳ ಸದ್ದು ಮತ್ತು ಒಬ್ಬ ಸುಪ್ರೀಂ ಕಮಾಂಡರ್ ನೀಡುವ ಆಜ್ಞೆಗಳು. ಆದರೆ, ಆಧುನಿಕ ಯುದ್ಧರಂಗದಲ್ಲಿ ಶತ್ರು ಎಷ್ಟೇ ಬಲಿಷ್ಠನಾಗಿದ್ದರೂ ಅವನನ್ನು ಹಣ್ಣುಗಾಯಿಗಾಗಿಸಬಹುದು ಎಂದು ಇರಾನ್ ಜಗತ್ತಿಗೆ ತೋರಿಸಿಕೊಟ್ಟಿದೆ. ಇದಕ್ಕೆ ಕಾರಣವೇ ಇರಾನ್ನ ರಕ್ಷಣಾ ಕವಚದಂತಿರುವ ‘ಮೊಸಾಯಿಕ್ ಡಿಫೆನ್ಸ್’ (Mosaic Defense). ಈ ತಂತ್ರದ ಅಸಲಿ ರೂವಾರಿ ಮೇಜರ್ ಜನರಲ್ ಮೊಹಮ್ಮದ್ ಅಲಿ ಜಾಫರಿ.
ಸದ್ದಾಂ ಸೋಲಿನ ಚಿತಾಭಸ್ಮದಿಂದ ಹುಟ್ಟಿದ ತಂತ್ರ!
2003ರಲ್ಲಿ ಅಮೆರಿಕ ನೇತೃತ್ವದ ಮಿತ್ರಪಡೆಗಳು ಇರಾಕ್ ಮೇಲೆ ದಾಳಿ ಮಾಡಿದಾಗ, ಕೇವಲ 26 ದಿನಗಳಲ್ಲಿ ಇಡೀ ಇರಾಕ್ ಸೈನ್ಯ ಧೂಳೀಪಟವಾಯಿತು. ಜಗತ್ತಿನ ಬಲಿಷ್ಠ ಸೈನ್ಯಗಳಲ್ಲಿ ಒಂದೆಂದು ಕರೆಸಿಕೊಳ್ಳುತ್ತಿದ್ದ ಇರಾಕ್ ಇಷ್ಟು ಬೇಗ ಸೋಲಲು ಕಾರಣವೇನು? ಎಂದು ಅಲಿ ಜಾಫರಿ ಅಧ್ಯಯನ ನಡೆಸಿದರು. ಅವರಿಗೆ ಕಂಡಬಂದ ಸತ್ಯವೇನೆಂದರೆ, ಇರಾಕ್ನ ಶಕ್ತಿ ಮತ್ತು ಆಜ್ಞೆಗಳು ಸರ್ವಾಧಿಕಾರಿ ಸದ್ದಾಂ ಹುಸೇನ್ ಎಂಬ ಒಬ್ಬನೇ ವ್ಯಕ್ತಿಯಲ್ಲಿ ಕೇಂದ್ರೀಕೃತವಾಗಿತ್ತು. ಯಾವಾಗ ಸದ್ದಾಂ ಹುಸೇನ್ ಹತೋಟಿಗೆ ಸಿಕ್ಕರೋ, ಇಡೀ ಸೈನ್ಯಕ್ಕೆ ಆಜ್ಞೆ ನೀಡುವವರೇ ಇಲ್ಲದಂತಾಯಿತು.
ಇರಾನ್ ಮೇಲೆ ಇಂತಹ ದಾಳಿಯಾದರೆ ಏನಾಗಬಹುದು? ಎಂದು ಆಲೋಚಿಸಿದ ಜಾಫರಿ, “ತಲೆ ಇಲ್ಲದಿದ್ದರೂ ಹೋರಾಡಬಲ್ಲ ದೇಹ” ಬೇಕು ಎಂದು ನಿರ್ಧರಿಸಿದರು. ಇದೇ ‘ಮೊಸಾಯಿಕ್ ಡಿಫೆನ್ಸ್’ ಹುಟ್ಟಿಗೆ ಕಾರಣವಾಯಿತು.
ಏನಿದು ‘‘ಮೊಸಾಯಿಕ್ ಡಿಫೆನ್ಸ್’ (Mosaic Defense) ಮಾದರಿ?
ಮೊಸಾಯಿಕ್ ಎಂದರೆ ಸಣ್ಣ ಸಣ್ಣ ಬಣ್ಣದ ಕಲ್ಲುಗಳನ್ನು ಜೋಡಿಸಿ ಮಾಡುವ ಒಂದು ಕಲಾಕೃತಿ. ಇದರಲ್ಲಿ ಒಂದು ಕಲ್ಲು ಬಿದ್ದರೂ ಕಲಾಕೃತಿಯ ಅಂದ ಕೆಡುವುದಿಲ್ಲ. ಅಲಿ ಜಾಫರಿ ಇರಾನ್ ಸೈನ್ಯವನ್ನು ಇದೇ ರೀತಿ ರೂಪಿಸಿದರು. ಇಡೀ ದೇಶವನ್ನು 31 ಸ್ವತಂತ್ರ ಪ್ರಾಂತೀಯ ಕಮಾಂಡ್ಗಳಾಗಿ ವಿಂಗಡಿಸಿದರು.
ಪ್ರತಿಯೊಂದು ಪ್ರಾಂತ್ಯವೂ ತನ್ನದೇ ಆದ ಸಣ್ಣ ಸಣ್ಣ ಸೈನ್ಯವನ್ನು ಹೊಂದಿದೆ. ಈ ಸೈನ್ಯದ ಬಳಿ ಸ್ವಂತ ಶಸ್ತ್ರಾಸ್ತ್ರಗಳು, ಸ್ವತಂತ್ರ ಗುಪ್ತಚರ ದಳ ಮತ್ತು ತಕ್ಷಣಕ್ಕೆ ನಿರ್ಧಾರ ತೆಗೆದುಕೊಳ್ಳುವ ಸಂಪೂರ್ಣ ಅಧಿಕಾರವಿರುತ್ತದೆ. ಅಂದರೆ, ಒಂದು ವೇಳೆ ಅಮೆರಿಕ ಅಥವಾ ಇಸ್ರೇಲ್ ಇರಾನ್ನ ರಾಜಧಾನಿ ಟೆಹ್ರಾನ್ ಅನ್ನು ನಾಶಪಡಿಸಿ, ಅಲ್ಲಿನ ಎಲ್ಲಾ ಹಿರಿಯ ನಾಯಕರನ್ನು ಕೊಂದರೂ ಸಹ, ಉಳಿದ 30 ಪ್ರಾಂತ್ಯಗಳ ಸೈನ್ಯ ಯಾರ ಆಜ್ಞೆಗೂ ಕಾಯದೆ ಶತ್ರುಗಳ ಮೇಲೆ ಏಕಕಾಲದಲ್ಲಿ ದಾಳಿ ಮುಂದುವರಿಸುತ್ತವೆ.
ಇದನ್ನೂ ಓದಿ: Hormuz Crisis: ಗೋಧಿ ಮೀಡಿಯಾ-ಭಕ್ತರ ಸುಳ್ಳಿಗೆ ವಿದೇಶಾಂಗ ಇಲಾಖೆಯಿಂದಲೇ ತಪರಾಕಿ; ಇರಾನ್ ಅನುಮತಿ ಕೇವಲ ಕಟ್ಟುಕಥೆ!
ತಂತ್ರಗಾರ ಜಾಫರಿಯ ‘ಜೇನುಗೂಡು’ ಪ್ಲಾನ್
ಅಲಿ ಜಾಫರಿ ಅವರು ಇರಾನ್ನ ಇಸ್ಲಾಮಿಕ್ ರೆವಲ್ಯೂಷನರಿ ಗಾರ್ಡ್ ಕಾಪ್ಸ್ (IRGC) ಮುಖ್ಯಸ್ಥರಾಗಿದ್ದಾಗ ಈ ವ್ಯವಸ್ಥೆಯನ್ನು ಜಾರಿಗೆ ತಂದರು. ಇವರ ತಂತ್ರದ ಮೂರು ಮುಖ್ಯ ಆಧಾರಸ್ತಂಭಗಳು ಇಂತಿವೆ:
- ಅಧಿಕಾರ ವಿಕೇಂದ್ರೀಕರಣ: ಅಧಿಕಾರವು ಒಬ್ಬರ ಕೈಯಲ್ಲಿ ಇರಬಾರದು. ಸಣ್ಣ ಘಟಕದ ಸೈನಿಕನಿಗೂ ತನ್ನ ಪ್ರದೇಶದಲ್ಲಿ ದಾಳಿಯಾದಾಗ ಪ್ರತ್ಯುತ್ತರ ನೀಡುವ ಸ್ವಾತಂತ್ರ್ಯ ಇರಬೇಕು.
- ಶತ್ರುವನ್ನು ದಣಿಸುವುದು: ಅಮೆರಿಕದಂತಹ ರಾಷ್ಟ್ರಗಳ ಬಳಿ ಅತ್ಯಾಧುನಿಕ ತಂತ್ರಜ್ಞಾನವಿದೆ. ಅವರ ಮುಂದೆ ನೇರವಾಗಿ ನಿಂತು ಯುದ್ಧ ಮಾಡುವ ಬದಲು, ಗೆರಿಲ್ಲಾ ಮಾದರಿಯಲ್ಲಿ ಸಣ್ಣ ಸಣ್ಣ ತಂಡಗಳಾಗಿ ಎಲ್ಲಾ ಕಡೆಯಿಂದ ಅಟ್ಯಾಕ್ ಮಾಡಿ ಅವರನ್ನು ಮಾನಸಿಕವಾಗಿ ಮತ್ತು ದೈಹಿಕವಾಗಿ ಸುಸ್ತಾಗಿಸುವುದು.
- ಅದೃಶ್ಯ ಗೋಡೆ: ಈ ಸೈನ್ಯದ ಘಟಕಗಳು ಗುಪ್ತವಾಗಿರುತ್ತವೆ. ಶತ್ರು ವಿಮಾನಗಳು ಎಲ್ಲಿ ಬಾಂಬ್ ಹಾಕಬೇಕು ಎಂದು ಹುಡುಕುವಷ್ಟರಲ್ಲಿ, ಬೇರೆ ಯಾವುದೋ ಮೂಲೆಯಿಂದ ಇರಾನ್ನ ಕ್ಷಿಪಣಿಗಳು ಚಿಮ್ಮುತ್ತವೆ.
ಇಂದಿನ ಸಂಘರ್ಷದಲ್ಲಿ ಈ ತಂತ್ರದ ಅಗ್ನಿಪರೀಕ್ಷೆ
ಫೆಬ್ರವರಿ 2026ರ ನಂತರದ ವಿದ್ಯಮಾನಗಳನ್ನು ಗಮನಿಸಿದರೆ ಈ ತಂತ್ರದ ಶಕ್ತಿ ಅರ್ಥವಾಗುತ್ತದೆ. ಇತ್ತೀಚಿನ ಘರ್ಷಣೆಗಳಲ್ಲಿ ಅಮೆರಿಕ ಮತ್ತು ಇಸ್ರೇಲ್ ಪಡೆಗಳು ಇರಾನ್ನ ಅತ್ಯುನ್ನತ ಕಮಾಂಡರ್ಗಳನ್ನು ಗುರಿಯಾಗಿಸಿಕೊಂಡು ಹತ್ಯೆ ಮಾಡಿದವು. ಇರಾನ್ನ ರಕ್ಷಣಾ ಸಚಿವರು ಮತ್ತು ಪ್ರಮುಖ ಜನರಲ್ಗಳೇ ಹತರಾದಾಗ ಇರಾನ್ ಸೋತಿತು ಎಂದೇ ಜಗತ್ತು ಭಾವಿಸಿತ್ತು. ಆದರೆ, ಆಶ್ಚರ್ಯವೆಂಬಂತೆ ಕೆಲವೇ ಗಂಟೆಗಳಲ್ಲಿ ಇರಾನ್ನ ನೂರಾರು ಕ್ಷಿಪಣಿಗಳು ಮತ್ತು ಡ್ರೋನ್ಗಳು ಅಮೆರಿಕದ ಮಿಲಿಟರಿ ನೆಲೆಗಳ ಮೇಲೆ ಅಪ್ಪಳಿಸಿದವು.
ಇದಕ್ಕೆ ಕಾರಣವೇ ಜಾಫರಿ ರೂಪಿಸಿದ ಈ ‘ಮೊಸಾಯಿಕ್’ ವ್ಯವಸ್ಥೆ. ಅಲ್ಲಿ ನಾಯಕರಿಲ್ಲದಿದ್ದರೂ, ಸ್ಥಳೀಯ ಘಟಕಗಳು ತಮ್ಮ ಶಸ್ತ್ರಾಸ್ತ್ರಗಳನ್ನು ಬಳಸಿ ಯುದ್ಧವನ್ನು ಮುಂದುವರಿಸಿದ್ದವು. ಈ ಘಟನೆ ಜಗತ್ತಿನ ಮಿಲಿಟರಿ ಪರಿಣಿತರನ್ನು ಬೆಚ್ಚಿಬೀಳಿಸಿದೆ.
ಇದನ್ನೂ ಓದಿ: US-IRAN WAR: ದೊಡ್ಡಣ್ಣನ ಅಹಂಕಾರ ಮಣ್ಣುಪಾಲು; ಇರಾನ್ ಮುಂದೆ ಅಮೆರಿಕ ಈಗ ಅಕ್ಷರಶಃ ‘ಭಿಕ್ಷುಕ’!
ಸೋಲದ ಇರಾನ್: ಶತ್ರುಗಳಿಗೆ ಇದು ಮೃತ್ಯುಜಾಲ!
ಅಲಿ ಜಾಫರಿಯ ಈ ತಂತ್ರ ಇರಾನ್ ಯುದ್ಧವನ್ನು ಗೆಲ್ಲುವಂತೆ ಮಾಡದಿರಬಹುದು, ಆದರೆ ಇರಾನ್ ಅನ್ನು ಸೋಲಿಸುವುದನ್ನು ಶತ್ರುಗಳಿಗೆ ಅಸಾಧ್ಯದ ಕೆಲಸವನ್ನಾಗಿ ಮಾಡಿದೆ. ಶತ್ರು ಪಡೆಗಳು ಇರಾನ್ನ ಒಳಗೆ ಕಾಲಿಟ್ಟರೆ, ಅವರು ಕೇವಲ ಒಂದು ಸೈನ್ಯದ ಜೊತೆ ಯುದ್ಧ ಮಾಡುವುದಿಲ್ಲ; ಬದಲಾಗಿ ಪ್ರತಿಯೊಂದು ಹಳ್ಳಿಯಲ್ಲಿ, ಪ್ರತಿಯೊಂದು ನಗರದಲ್ಲಿರುವ ಸಣ್ಣ ಸಣ್ಣ ಸೈನಿಕ ಗುಂಪುಗಳ ಜೇನುಗೂಡಿಗೆ ಕೈಹಾಕಿದಂತೆ ಆಗುತ್ತದೆ.
ಅಲಿ ಜಾಫರಿ ಎಂಬ ತಂತ್ರಜ್ಞ ರೂಪಿಸಿದ ಈ ‘ಮೊಸಾಯಿಕ್ ಡಿಫೆನ್ಸ್’ ಇಂದು ಕೇವಲ ಮಿಲಿಟರಿ ಪ್ಲಾನ್ ಆಗಿ ಉಳಿದಿಲ್ಲ, ಅದು ಇರಾನ್ನ ಉಸಿರಾಗಿದೆ. “ಶತ್ರುಗಳು ನಮ್ಮ ತಲೆಯನ್ನು ಕತ್ತರಿಸಬಹುದು, ಆದರೆ ನಮ್ಮ ಹೋರಾಟದ ಕಿಚ್ಚನ್ನು ಆರಿಸಲು ಸಾಧ್ಯವಿಲ್ಲ” ಎಂಬ ಸಂದೇಶವನ್ನು ಇರಾನ್ ಈ ಮೂಲಕ ಜಗತ್ತಿಗೆ ರವಾನಿಸುತ್ತಿದೆ. ಪಶ್ಚಿಮ ಏಷ್ಯಾದಲ್ಲಿ ದೊಡ್ಡಣ್ಣನ ದರ್ಬಾರಿಗೆ ಬ್ರೇಕ್ ಹಾಕಲು ಈ ಒಂದು ‘ಮಾಸ್ಟರ್ ಪ್ಲಾನ್’ ಸಾಕು ಎನ್ನುವುದು ಇಂದಿನ ಕಟುಸತ್ಯ.
