Kim Jong Un Power: ಅಮೆರಿಕವನ್ನೇ ನಡುಗಿಸಬಲ್ಲ ತಾಕತ್ತು ಇರೋದು ಈ ದೇಶಕ್ಕೆ; ಹತ್ತಿರವೂ ಸುಳಿಯಲ್ಲ ಟ್ರಂಪ್ !

Kim Jong Un Power: ಇಂದು ಜಗತ್ತು ಮಹಾಯುದ್ಧದ ಹೊಸ್ತಿಲಲ್ಲಿ ಬಂದು ನಿಂತಿದೆ. ಇಸ್ರೇಲ್ ಮತ್ತು ಇರಾನ್ ನಡುವಿನ ಸಂಘರ್ಷಕ್ಕೆ ಅಮೆರಿಕಾ ಸಾಥ್ ನೀಡುತ್ತಿದ್ದರೆ, ಮತ್ತೊಂದೆಡೆ ರಷ್ಯಾ ಹಾಗೂ ಚೀನಾದಂತಹ ರಾಷ್ಟ್ರಗಳು ತಮ್ಮದೇ ಆದ ತಂತ್ರಗಳನ್ನು ರೂಪಿಸುತ್ತಿವೆ. ಇಂತಹ ಭೀಕರ ವಾತಾವರಣದ ನಡುವೆ ಸೋಷಿಯಲ್ ಮೀಡಿಯಾದಲ್ಲಿ ಉತ್ತರ ಕೊರಿಯಾದ ಸರ್ವಾಧಿಕಾರಿ ಕಿಮ್ ಜಾಂಗ್ ಉನ್ ಅವರ ಫೋಟೋಗಳು ಭಾರೀ ವೈರಲ್ ಆಗುತ್ತಿವೆ. “ನನ್ನನ್ನು ಯಾರೂ ಆಟಕ್ಕೆ ಸೇರಿಸಿಕೊಳ್ಳುತ್ತಿಲ್ಲ” ಎಂದು ಮುನಿಸಿಕೊಂಡ ಮಗುವಿನಂತೆ ಕಿಮ್ ಅವರ ಫೋಟೋಗಳನ್ನು ಎಡಿಟ್ ಮಾಡಿ ಹಾಸ್ಯ ಮಾಡಲಾಗುತ್ತಿದೆ. ಆದರೆ, ಈ ‘ಹಾಸ್ಯ’ದ ಹಿಂದೆ ಅಡಗಿರುವ ಸತ್ಯ ಏನೆಂದರೆ, ಜಗತ್ತಿನ ದೊಡ್ಡಣ್ಣ ಅಮೆರಿಕಾದ ನಿದ್ದೆಗೆಡಿಸುವ ಏಕೈಕ ವ್ಯಕ್ತಿ ಎಂದರೆ ಅದು ಕಿಮ್ ಜಾಂಗ್ ಉನ್ ಮಾತ್ರ!

ದೊಡ್ಡಣ್ಣನನ್ನೂ ನಡುಗಿಸುವ ಕಿಮ್ ಶಕ್ತಿ:

ಅಮೆರಿಕಾ ಎಂದರೆ ಇಡೀ ಜಗತ್ತನ್ನೇ ತನ್ನ ಏರಿಯಾ ಎಂದು ಭಾವಿಸಿ ಮೆರೆಯುವ ರಾಷ್ಟ್ರ. ತನ್ನ ಶತ್ರುಗಳು ಎಷ್ಟೇ ಬಲಿಷ್ಠರಾಗಿದ್ದರೂ ಪಾತಾಳದಿಂದಲಾದರೂ ಹುಡುಕಿ ಹೊಡೆಯುವ ಇತಿಹಾಸ ಅಮೆರಿಕದ್ದಿದೆ. ಮೊನ್ನೆ ಮೊನ್ನೆಯಷ್ಟೇ ವೆನೆಜುವೆಲಾ ಅಧ್ಯಕ್ಷನನ್ನು ಬೆಡ್‌ರೂಮ್‌ನಿಂದ ಎಳೆದುಕೊಂಡು ಹೋದ ಸಾಹಸವನ್ನು ಅಮೆರಿಕಾ ಮಾಡಿತ್ತು. ಆದರೆ, ಇಷ್ಟೆಲ್ಲಾ ದರ್ಪ ತೋರುವ ಅಮೆರಿಕಾಕ್ಕೆ ಉತ್ತರ ಕೊರಿಯಾದ ಈ ಸರ್ವಾಧಿಕಾರಿಯನ್ನು ಮುಟ್ಟುವ ಧೈರ್ಯ ಮಾತ್ರ ಬರುತ್ತಿಲ್ಲ (Kim Jong Un Power). ಕಿಮ್ ತನ್ನ ವಿಚಿತ್ರ ಸ್ಟೈಲ್ ಅಥವಾ ಗಾತ್ರದಿಂದ ಅಮೆರಿಕಾವನ್ನು ಹೆದರಿಸುತ್ತಿಲ್ಲ, ಬದಲಾಗಿ ತನ್ನ ಬತ್ತಳಿಕೆಯಲ್ಲಿರುವ ಅತ್ಯಾಧುನಿಕ ಹಾಗೂ ವಿನಾಶಕಾರಿ ಶಸ್ತ್ರಾಸ್ತ್ರಗಳಿಂದ ಇಡೀ ಅಮೆರಿಕಾವನ್ನೇ ನಡುಗಿಸುತ್ತಿದ್ದಾನೆ.

ಬತ್ತಳಿಕೆಯಲ್ಲಿರುವ ‘ಮಾನ್ಸ್ಟರ್ ಮಿಸೈಲ್’ಗಳು:

Kim Jong Un Power: ಉತ್ತರ ಕೊರಿಯಾದಲ್ಲಿ ಜನರಿಗೆ ತಿನ್ನಲು ಅನ್ನವಿಲ್ಲದಿರಬಹುದು, ಆದರೆ ಕಿಮ್ ಜಾಂಗ್ ಉನ್ ಬಳಿ ಇರುವ ಮಿಸೈಲ್‌ಗಳು ಮಾತ್ರ ವಿಶ್ವದ ಯಾವುದೇ ಮೂಲೆಯನ್ನು ತಲುಪಬಲ್ಲವು. ಕಿಮ್‌ನ ಪ್ರಮುಖ ಅಸ್ತ್ರಗಳಲ್ಲಿ ‘ಹೋಸಾಂಗ್-17’ (Hwasong-17) ಅತ್ಯಂತ ಭಯಾನಕವಾದುದು. ಇದನ್ನು ಜಗತ್ತು ‘ಮಾನ್ಸ್ಟರ್ ಮಿಸೈಲ್’ ಎಂದೇ ಕರೆಯುತ್ತದೆ.

• ವ್ಯಾಪ್ತಿ: ಇದರ ರೇಂಜ್ ಬರೋಬರಿ 15,000 ಕಿಲೋಮೀಟರ್. ಅಂದರೆ ಉತ್ತರ ಕೊರಿಯಾದಲ್ಲಿ ಕೂತು ಒಂದು ಬಟನ್ ಒತ್ತಿದರೆ ಅದು ನೇರವಾಗಿ ಅಮೆರಿಕಾದ ವಾಷಿಂಗ್ಟನ್ ಡಿಸಿ ಅಥವಾ ವೈಟ್ ಹೌಸ್ ಮೇಲೆ ಬೀಳಬಲ್ಲದು.
• ವೇಗ: ಗಂಟೆಗೆ ಸುಮಾರು 13,500 ಕಿಲೋಮೀಟರ್ ವೇಗದಲ್ಲಿ ಸಾಗುವ ಈ ಮಿಸೈಲ್ 2000 ದಿಂದ 3500 ಕೆಜಿ ಸ್ಫೋಟಕಗಳನ್ನು ಹೊತ್ತೊಯ್ಯಬಲ್ಲದು.
• MIRV ತಂತ್ರಜ್ಞಾನ: ಇದು ಒಂದೇ ಸಲ ಹಾರಿದರೂ ಆಕಾಶದಲ್ಲಿ ಹತ್ತಾರು ಮರಿ ರಾಕ್ಷಸ ಮಿಸೈಲ್‌ಗಳಾಗಿ ವಿಭಜನೆಗೊಂಡು ಬೇರೆ ಬೇರೆ ಟಾರ್ಗೆಟ್‌ಗಳನ್ನು ಏಕಕಾಲಕ್ಕೆ ಧ್ವಂಸಗೊಳಿಸಬಲ್ಲದು.
• ಇದರ ಜೊತೆಗೆ ‘ಹೋಸಾಂಗ್-18’ ಎಂಬ ಸಾಲಿಡ್ ಫ್ಯೂಲ್ ಮಿಸೈಲ್ ಕೂಡ ಕಿಮ್ ಬಳಿ ಇದೆ. ಇಂಧನ ತುಂಬಲು ಸಮಯ ವ್ಯರ್ಥ ಮಾಡದೆ ತಕ್ಷಣವೇ ಲಾಂಚ್ ಮಾಡಬಹುದಾದ ಈ ಮಿಸೈಲ್ ಅಮೆರಿಕಾದ ರೇಡಾರ್‌ಗಳಿಗೆ ಸಿಗುವ ಮೊದಲೇ ಗುರಿ ತಲುಪುವಷ್ಟು ವೇಗ ಹೊಂದಿದೆ.

ಇದನ್ನೂ ಓದಿ: Swamiji Scandal: ಕಾಮʻಕೋಡಿ ಹರಿಸಿದ ಭವಿಷ್ಯ ಹೇಳುವ ಸ್ವಾಮಿ! ಮತ್ತೊಂದು ಹಸಿಬಿಸಿ ವಿಡಿಯೋ ಲೀಕ್!

ಅಣ್ವಸ್ತ್ರಗಳ ಭಂಡಾರ:

ವರದಿಗಳ ಪ್ರಕಾರ, ಉತ್ತರ ಕೊರಿಯಾ ಬಳಿ ಸದ್ಯಕ್ಕೆ 40 ರಿಂದ 50 ಸನ್ನದ್ಧ ಸ್ಥಿತಿಯಲ್ಲಿರುವ ಅಣ್ವಸ್ತ್ರಗಳಿವೆ. ಎರಡನೇ ಮಹಾಯುದ್ಧದಲ್ಲಿ ಹಿರೋಷಿಮಾ ಮೇಲೆ ಬಿದ್ದ ಬಾಂಬ್‌ಗಿಂತ 10 ಪಟ್ಟು ಹೆಚ್ಚು ಪ್ರಬಲವಾದ ಅಣ್ವಸ್ತ್ರಗಳು ಕಿಮ್ ಬಳಿ ಇವೆ. ಎಂತಹ ಅತ್ಯಾಧುನಿಕ ಏರ್ ಡಿಫೆನ್ಸ್ ಸಿಸ್ಟಮ್ (ಉದಾಹರಣೆಗೆ ಅಮೆರಿಕದ ಥಾಡ್ ಅಥವಾ ಪೇಟ್ರಿಯಾಟ್) ಕೂಡ ನೂರಾರು ಮಿಸೈಲ್‌ಗಳು ಒಟ್ಟಿಗೆ ಬಂದಾಗ ತಡೆಯಲು ಅಸಾಧ್ಯ.

ನೆರೆಹೊರೆಯ ರಾಷ್ಟ್ರಗಳ ಮೇಲಿನ ಭಯ:

ಅಮೆರಿಕಾ ನೇರವಾಗಿ ಉತ್ತರ ಕೊರಿಯಾದ ಮೇಲೆ ದಾಳಿ ಮಾಡದಿರಲು ಇನ್ನೊಂದು ಪ್ರಮುಖ ಕಾರಣವೆಂದರೆ ಅದರ ಮಿತ್ರ ರಾಷ್ಟ್ರಗಳಾದ ದಕ್ಷಿಣ ಕೊರಿಯಾ ಮತ್ತು ಜಪಾನ್. ಕಿಮ್ ಉತ್ತರ ಕೊರಿಯಾವನ್ನು ಒಂದು ಮಿಲಿಟರಿ ಕಂಟೋನ್ಮೆಂಟ್ ತರಹ ಮಾಡಿಕೊಂಡಿದ್ದಾನೆ. ಯುದ್ಧ ಘೋಷಣೆಯಾದ ಒಂದೇ ಗಂಟೆಯಲ್ಲಿ ದಕ್ಷಿಣ ಕೊರಿಯಾದ ರಾಜಧಾನಿ ‘ಸೋಲ್’ (Seoul) ಬೂದಿಯಾಗುವ ಸಾಧ್ಯತೆಯಿದೆ. ಸೋಲ್ ನಗರವು ಗಡಿಯಿಂದ ಕೇವಲ 40 ಕಿಲೋಮೀಟರ್ ದೂರದಲ್ಲಿದೆ. ಕಿಮ್ ತನ್ನ ಆರ್ಟಿಲರಿಗಳ ಮೂಲಕವೇ ಈ ನಗರವನ್ನು ಸ್ಮಶಾನ ಮಾಡಬಲ್ಲ. ದಕ್ಷಿಣ ಕೊರಿಯಾದ ಅರ್ಧದಷ್ಟು ಜನಸಂಖ್ಯೆ ಸೋಲ್ ನಗರದಲ್ಲೇ ಇರುವುದರಿಂದ ಅಮೆರಿಕಾ ತನ್ನ ಮಿತ್ರರನ್ನು ಬಲಿಕೊಟ್ಟು ಯುದ್ಧಕ್ಕೆ ಇಳಿಯಲು ಸಿದ್ಧವಿಲ್ಲ.

ರಷ್ಯಾ ಮತ್ತು ಚೀನಾ ಎಂಬ ‘ಗಾಡ್ ಫಾದರ್’ಗಳು:

ಕಿಮ್ ಜಾಂಗ್ ಉನ್ ಇಂದು ಜಾಗತಿಕವಾಗಿ ಒಂಟಿಯಲ್ಲ. ಅವನ ಹಿಂದೆ ರಷ್ಯಾದ ಪುಟಿನ್ ಮತ್ತು ಚೀನಾದ ಜಿನ್‌ಪಿಂಗ್ ಎಂಬ ಇಬ್ಬರು ಬಲಿಷ್ಠ ನಾಯಕರಿದ್ದಾರೆ. ಚೀನಾವು ಉತ್ತರ ಕೊರಿಯಾವನ್ನು ಅಮೆರಿಕಾದ ವಿರುದ್ಧದ ಒಂದು ‘ಬಫರ್ ಜೋನ್’ ಆಗಿ ಬಳಸಿಕೊಳ್ಳುತ್ತಿದೆ. ಅಮೆರಿಕಾ ಎಷ್ಟೇ ಆರ್ಥಿಕ ದಿಗ್ಬಂಧನ ಹೇರಿದರೂ ಚೀನಾ ಕದ್ದುಮುಚ್ಚಿ ಕಿಮ್‌ಗೆ ಪೆಟ್ರೋಲ್, ಆಹಾರ ಮತ್ತು ಹಣದ ಪೂರೈಕೆ ಮಾಡುತ್ತಿದೆ. ಇನ್ನು ರಷ್ಯಾ ಮತ್ತು ಉತ್ತರ ಕೊರಿಯಾ ನಡುವೆ ಇತ್ತೀಚೆಗೆ ‘ರಕ್ತ ಸಂಬಂಧ’ದಂತಹ ಒಪ್ಪಂದವಾಗಿದೆ. ಕಿಮ್ ರಷ್ಯಾಕ್ಕೆ ಮದ್ದುಗುಂಡುಗಳನ್ನು ನೀಡುತ್ತಿದ್ದರೆ, ಪುಟಿನ್ ಪ್ರತಿಯಾಗಿ ಸ್ಯಾಟಲೈಟ್ ಟೆಕ್ನಾಲಜಿಯನ್ನು ನೀಡುತ್ತಿದ್ದಾರೆ. ಯಾರಾದರೂ ಒಬ್ಬರ ಮೇಲೆ ದಾಳಿ ಮಾಡಿದರೆ ಇಬ್ಬರೂ ಸೇರಿ ಶತ್ರುವಿನ ಮೇಲೆ ಮುಗಿಬೀಳುವ ಒಪ್ಪಂದವೂ ಇವರ ನಡುವೆ ಇದೆ. ಇದು ಮೂರನೇ ಮಹಾಯುದ್ಧಕ್ಕೆ ನೇರ ಆಹ್ವಾನ ನೀಡಿದಂತಾಗುತ್ತದೆ.

ಇದನ್ನೂ ಓದಿ: ಮಕ್ಕಳ ಕೈಲಿ ವಿಷಬೀಜ; ಶಾಂತಿಯ ತೋಟದಲ್ಲಿ ‘ಕೋಮು ಕ್ರಿಮಿಗಳ’ ಸಂಚು?

ವಿಯೆಟ್ನಾಂ ಮತ್ತು ಅಫ್ಘಾನಿಸ್ತಾನದ ಪಾಠ:

ಅಮೆರಿಕಾಕ್ಕೆ ಏಷ್ಯಾದ ನೆಲದಲ್ಲಿ ಯುದ್ಧ ಮಾಡುವುದು ಎಂದಿಗೂ ಸುಲಭವಲ್ಲ. ವಿಯೆಟ್ನಾಂ ಯುದ್ಧದಲ್ಲಿ 58,000 ಅಮೆರಿಕನ್ ಸೈನಿಕರು ಪ್ರಾಣ ಕಳೆದುಕೊಂಡು ಸೋಲೊಪ್ಪಿ ಓಡಿಬಂದ ಇತಿಹಾಸವಿದೆ. ಅಫ್ಘಾನಿಸ್ತಾನದಲ್ಲಿ 20 ವರ್ಷಗಳ ಕಾಲ ತಾಲಿಬಾನಿಗಳ ಜೊತೆ ಹೋರಾಡಿದರೂ ಅಂತಿಮವಾಗಿ ಸೋತು ಶಸ್ತ್ರಾಸ್ತ್ರಗಳನ್ನು ಅಲ್ಲೇ ಬಿಟ್ಟು ಪಲಾಯನ ಮಾಡಬೇಕಾಯಿತು. ಉತ್ತರ ಕೊರಿಯಾದ ಭೂಗೋಳ ಕೂಡ ಕಡಿದಾದ ಬೆಟ್ಟಗುಡ್ಡಗಳಿಂದ ಕೂಡಿದ್ದು, ಅಲ್ಲಿ ಗೆರಿಲ್ಲಾ ತಂತ್ರಗಳನ್ನು ಎದುರಿಸುವುದು ಅಮೆರಿಕನ್ ಸೈನಿಕರಿಗೆ ಕಬ್ಬಿಣದ ಕಡಲೆಯಂತಿದೆ.

ಒಟ್ಟಾರೆಯಾಗಿ ಹೇಳುವುದಾದರೆ, ಸೋಷಿಯಲ್ ಮೀಡಿಯಾದಲ್ಲಿ ಕಿಮ್ ಜಾಂಗ್ ಉನ್ ಅವರನ್ನು ನೋಡಿ ಹಾಸ್ಯ ಮಾಡುವುದು ಸುಲಭ. ಆದರೆ ಆತನ ಬಳಿ ಇರುವ 12 ಲಕ್ಷ ಸಕ್ರಿಯ ಸೈನಿಕರು, ಸಾವಿರಾರು ಬ್ಯಾಟಲ್ ಟ್ಯಾಂಕ್‌ಗಳು ಮತ್ತು ಅಮೆರಿಕವನ್ನೇ ಸುಟ್ಟು ಭಸ್ಮ ಮಾಡಬಲ್ಲ ಅಣ್ವಸ್ತ್ರಗಳು ಜಗತ್ತಿನ ಕಣ್ಣು ಕೆಂಪಾಗಿಸಿವೆ. ಶತ್ರುವಿನ ತಂಟೆಗೆ ಹೋದರೆ ತಾನೂ ಉಳಿಯುವುದಿಲ್ಲ ಎಂಬ ಸತ್ಯ ದೊಡ್ಡಣ್ಣ ಅಮೆರಿಕಾಕ್ಕೆ ಚೆನ್ನಾಗಿ ತಿಳಿದಿದೆ. ಹಾಗಾಗಿಯೇ ಕಿಮ್ ಇಂದಿಗೂ ಅಭೇದ್ಯ ಶಕ್ತಿಯಾಗಿ ಉಳ್ಕೊಂಡಿದ್ದಾನೆ.