ಬೆಂಗಳೂರು: ದಕ್ಷಿಣ ಭಾರತದ ರಿಯಲ್ ಎಸ್ಟೇಟ್ ಲೋಕದ ಸಾಮ್ರಾಟ, ‘ಕಾನ್ಫಿಡೆಂಟ್ ಗ್ರೂಪ್’ ಅಧ್ಯಕ್ಷ ಸಿ.ಜೆ. ರಾಯ್ (C.J. Roy) ಅವರ ಸಾವಿನ ಪ್ರಕರಣ ದಿನಕ್ಕೊಂದು ಹೊಸ ತಿರುವು ಪಡೆಯುತ್ತಿದೆ. ಮೊದಲು ಇದು ಕೇವಲ ಮಾನಸಿಕ ಒತ್ತಡದಿಂದ ಸಂಭವಿಸಿದ ಆತ್ಮಹತ್ಯೆ ಎಂದು ಭಾವಿಸಲಾಗಿತ್ತು. ಆದರೆ, ಈಗ ಹೊರಬರುತ್ತಿರುವ ಸ್ಫೋಟಕ ಮಾಹಿತಿ ಉದ್ಯಮ ಲೋಕವನ್ನೇ ನಡುಗಿಸಿದೆ. ಬರೋಬ್ಬರಿ 500 ಕೋಟಿ ರೂಪಾಯಿಗಳ ಹವಾಲಾ ವ್ಯವಹಾರ ರಾಯ್ ಅವರ ಸಾವಿಗೆ ನೇರ ಕಾರಣವಾಯಿತೇ? ಎಂಬ ಪ್ರಶ್ನೆ ಈಗ ತನಿಖಾ ಸಂಸ್ಥೆಗಳ ಮುಂದೆ ಬಂದು ನಿಂತಿದೆ.
500 ಕೋಟಿಯ ‘ಮಿಸ್ ಮ್ಯಾಚ್’ ಮತ್ತು ಐಟಿ ಬಲೆ
ಸಿ.ಜೆ. ರಾಯ್ (C.J. Roy) ಅವರ ಉದ್ಯಮ ಸಾಮ್ರಾಜ್ಯ ಕೇರಳದಿಂದ ದುಬೈವರೆಗೆ ಹರಡಿಕೊಂಡಿತ್ತು. ಆದರೆ, ಕಳೆದ ಡಿಸೆಂಬರ್ ತಿಂಗಳಿನಿಂದ ಅವರ ಮೇಲೆ ಆದಾಯ ತೆರಿಗೆ ಇಲಾಖೆಯ (IT) ಕಣ್ಣು ಬಿದ್ದಿತ್ತು. ಕೇರಳದ ಕೊಚ್ಚಿಯಲ್ಲಿ ಅವರು ಹಮ್ಮಿಕೊಂಡಿದ್ದ ಬೃಹತ್ ಪ್ರಾಜೆಕ್ಟ್ಗಳ ಬೆನ್ನತ್ತಿದ ಐಟಿ ಅಧಿಕಾರಿಗಳಿಗೆ ಅಚ್ಚರಿಯ ಸಂಗತಿಯೊಂದು ಕಾದಿತ್ತು. ರಾಯ್ ಅವರ ಲೆಕ್ಕಪತ್ರದಲ್ಲಿ ಸುಮಾರು 500 ಕೋಟಿ ರೂಪಾಯಿಗಳ ವ್ಯತ್ಯಾಸ (Mismatch) ಕಂಡುಬಂದಿತ್ತು.
ಈ 500 ಕೋಟಿ ರೂಪಾಯಿ ಹಣ ಎಲ್ಲಿಂದ ಬಂತು? ಇದರ ಮೂಲ ಯಾವುದು? ಇದಕ್ಕೆ ಸಂಬಂಧಿಸಿದ ದಾಖಲೆಗಳಿವೆಯೇ? ಎಂಬ ಪ್ರಶ್ನೆಗಳಿಗೆ ರಾಯ್ ಬಳಿ ಉತ್ತರವಿದ್ದಂತಿರಲಿಲ್ಲ. ಇದೇ ಕಾರಣಕ್ಕೆ ಅವರು ಡಿಸೆಂಬರ್ನಲ್ಲಿ ದುಬೈನಲ್ಲಿದ್ದಾಗ ಐಟಿ ದಾಳಿ ನಡೆದರೂ, ಅಧಿಕಾರಿಗಳ ಕೈಗೆ ಸಿಗದೆ ಅಲ್ಲಿಯೇ ಉಳಿದುಕೊಂಡಿದ್ದರಾ?. ಭಾರತಕ್ಕೆ ಮರಳಿದರೆ ಬಂಧನವಾಗಬಹುದು ಎಂಬ ಭೀತಿ ಅವರನ್ನು ಕಾಡತೊಡಗಿತ್ತೆ? ಹೀಗೆ ಹಲವು ಪ್ರಶ್ನೆಗಳು ಇದೀಗ ಉದ್ಭವವಾಗಿವೆ.
ಹೈಕೋರ್ಟ್ ಮೆಟ್ಟಿಲೇರಿ ವಾಪಸ್ ಬಂದಿದ್ದು ಯಾಕೆ?
ಐಟಿ ಅಧಿಕಾರಿಗಳ ಕಿರುಕುಳ ನೀಡುತ್ತಿದ್ದಾರೆ ಎಂದು ಆರೋಪಿಸಿ ರಾಯ್ (C.J. Roy) ಅವರು ಹೈಕೋರ್ಟ್ ಮೆಟ್ಟಿಲೇರಿದ್ದರು. ಆದರೆ, ಇಲ್ಲೇ ಅಸಲಿ ಟ್ವಿಸ್ಟ್ ಇರುವುದು. ತಮ್ಮ ಬಿಸಿನೆಸ್ ಪಾರ್ಟ್ನರ್ಗಳು ಮತ್ತು ಚಾರ್ಟರ್ಡ್ ಅಕೌಂಟೆಂಟ್ (CA) ನೀಡಿದ ಒಂದು ಸಲಹೆ ಅವರ ನಿರ್ಧಾರವನ್ನೇ ಬದಲಿಸಿತು. “ಕೋರ್ಟ್ನಲ್ಲಿ ಸುದೀರ್ಘ ಹೋರಾಟ ನಡೆಸಿದರೆ ವ್ಯವಹಾರಕ್ಕೆ ಧಕ್ಕೆಯಾಗುತ್ತದೆ, ಅದಕ್ಕಿಂತ ಐಟಿ ಅಧಿಕಾರಿಗಳ ಮುಂದೆ ಹಾಜರಾಗಿ ಸೆಟಲ್ ಮಾಡಿಕೊಳ್ಳುವುದು ಲೇಸು” ಎಂಬ ಸಲಹೆಯಂತೆ ಅವರು ಅರ್ಜಿಯನ್ನು ವಾಪಸ್ ಪಡೆದರು.
ಆದರೆ, ಭಾರತಕ್ಕೆ ಮರಳಿದ ರಾಯ್ ಅವರಿಗೆ ಐಟಿ ಅಧಿಕಾರಿಗಳ ಪ್ರಶ್ನೆಗಳು ಸಿಂಹಸ್ವಪ್ನವಾದವು. 500 ಕೋಟಿ ರೂಪಾಯಿಗಳ ಹವಾಲಾ ಹಣದ ಮೂಲವನ್ನು ಸಾಬೀತುಪಡಿಸಲು ಸಾಧ್ಯವಾಗದೆ ಅವರು ಹತಾಶರಾಗಿದ್ದರು. ಒಂದು ಕಡೆ ವ್ಯವಹಾರದ ಗೌರವ, ಇನ್ನೊಂದು ಕಡೆ ಕಾನೂನಿನ ಸಂಕೋಲೆ – ಇವೆರಡರ ನಡುವೆ ಸಿಲುಕಿದ ರಾಯ್ ‘ಅತ್ತ ದರಿ ಇತ್ತ ಪುಲಿ’ ಎಂಬಂತಾಗಿದ್ದರು.
ಹೋಟೆಲ್ನಲ್ಲಿ ನಡೆದಿದ್ದ ಆ ವಿಫಲ ಯತ್ನ!
ತನಿಖಾ ಮೂಲಗಳ ಪ್ರಕಾರ, ಸಿ.ಜೆ. ರಾಯ್ (C.J. Roy) ಅವರು ತಮ್ಮ ಕಚೇರಿಯಲ್ಲಿ ಗುಂಡು ಹಾರಿಸಿಕೊಳ್ಳುವ ಮೊದಲೇ ಬೆಂಗಳೂರಿನ ಪ್ರಖ್ಯಾತ ಖಾಸಗಿ ಹೋಟೆಲ್ ಒಂದರಲ್ಲಿ ಆತ್ಮಹತ್ಯೆಗೆ ಸಜ್ಜಾಗಿದ್ದರು. ಹೋಟೆಲ್ ಕೋಣೆಯಲ್ಲಿ ತನಿಖಾಧಿಕಾರಿಗಳಿಗೆ ಕೆಲವು ಸಜೀವ ಗುಂಡುಗಳು (Live Bullets) ಪತ್ತೆಯಾಗಿರುವುದು ಈ ಶಂಕೆಗೆ ಬಲ ನೀಡಿದೆ.
ಆದರೆ, ಹೋಟೆಲ್ನಂತಹ ಸಾರ್ವಜನಿಕ ಸ್ಥಳದಲ್ಲಿ ಸಾವು ಸಂಭವಿಸಿದರೆ ಅದು ತಕ್ಷಣವೇ ಸುದ್ದಿಯಾಗುತ್ತದೆ ಮತ್ತು ಖಾಸಗಿತನಕ್ಕೆ ಧಕ್ಕೆಯಾಗುತ್ತದೆ ಎಂದು ಭಾವಿಸಿದ ರಾಯ್, ಕೊನೆ ಕ್ಷಣದಲ್ಲಿ ಅಲ್ಲಿಂದ ನಿರ್ಗಮಿಸಿ ತಮ್ಮ ಕಚೇರಿಯ ಚೇಂಬರ್ ತಲುಪಿದ್ದರು ಎಂದು ಹೇಳಲಾಗುತ್ತಿದೆ. ತಮ್ಮದೇ ಕಚೇರಿ ಪ್ರೈವಸಿಗೆ ಸೂಕ್ತ ಸ್ಥಳವೆಂದು ಅವರು ನಿರ್ಧರಿಸಿದ್ದರು.
ಇದನ್ನೂ ಓದಿ: KERALA STORY-2: ಕಲೆಯ ಮುಖವಾಡದಡಿ ವಿಷದ ಇಂಜೆಕ್ಷನ್; ಇದು ಸಿನೆಮಾ ಅಲ್ಲ, ಯೋಜಿತ ಸಾಂಸ್ಕೃತಿಕ ಭಯೋತ್ಪಾದನೆ!
ಆ ಘೋರ ಸಾವಿನ ಹಿಂದಿನ ವಿಜ್ಞಾನ
ಜನವರಿ 30ರ ಆ ಕಪ್ಪು ಶುಕ್ರವಾರದಂದು ರಾಯ್ (C.J. Roy) ಅವರು ಪಾಯಿಂಟ್ ಬ್ಲ್ಯಾಂಕ್ ರೇಂಜ್ನಲ್ಲಿ ತಮ್ಮ ಎದೆಗೆ ಗುರಿ ಇಟ್ಟು ಫೈರ್ ಮಾಡಿಕೊಂಡಿದ್ದರು. ಶೂಟ್ ಮಾಡಿದ ತಕ್ಷಣ ಅವರು ಕುಸಿದು ಬಿದ್ದಿದ್ದರೂ, ಸ್ಥಳದಲ್ಲಿ ಹೆಚ್ಚು ರಕ್ತ ಚೆಲ್ಲಿರಲಿಲ್ಲ. ಇದು ಅನೇಕ ಅನುಮಾನಗಳಿಗೆ ದಾರಿ ಮಾಡಿಕೊಟ್ಟಿತ್ತು. ಆದರೆ, ವೈದ್ಯಕೀಯ ವರದಿಗಳು ಈ ರಹಸ್ಯವನ್ನು ಬಿಚ್ಚಿಟ್ಟಿವೆ.
ಗುಂಡು ದೇಹದ ಒಳಗೆ ಪ್ರವೇಶಿಸಿ ಹೃದಯವನ್ನು ಸೀಳಿ, ಕಿಡ್ನಿಗೆ ತಗುಲಿತ್ತು. ಬಳಿಕ ಪಕ್ಕೆಲುಬಿನ (Ribs) ಮೂಳೆಯಲ್ಲಿ ಸಿಲುಕಿಕೊಂಡಿತ್ತು. ಗುಂಡು ದೇಹದಿಂದ ಹೊರಬರದ ಕಾರಣ, ರಕ್ತವು ದೇಹದ ಒಳಗೇ ಹೆಪ್ಪುಗಟ್ಟಿತ್ತು (Internal Bleeding). ಇದರಿಂದಾಗಿ ಹೊರಗಡೆ ರಕ್ತದ ಮಡುವಿಗಿಂತ ಹೆಚ್ಚಾಗಿ ಆಂತರಿಕ ಗಾಯಗಳೇ ಸಾವಿಗೆ ವೇಗವಾಗಿ ಕಾರಣವಾದವು.
ಮಾನಸಿಕ ಖಿನ್ನತೆ ಮತ್ತು ಮಿಸ್ ಆದ ಮಾತ್ರೆಗಳು
ಸಿ.ಜೆ. ರಾಯ್ (C.J. Roy) ಅವರು ಕಳೆದ ಕೆಲವು ತಿಂಗಳುಗಳಿಂದ ತೀವ್ರ ಮಾನಸಿಕ ಖಿನ್ನತೆಯಿಂದ (Depression) ಬಳಲುತ್ತಿದ್ದರು ಮತ್ತು ಅದಕ್ಕಾಗಿ ಮಾತ್ರೆಗಳನ್ನು ಸೇವಿಸುತ್ತಿದ್ದರು. ಆದರೆ, ಆತ್ಮಹತ್ಯೆ ಮಾಡಿಕೊಂಡ ದಿನ ಅವರು ತಮ್ಮ ನಿಯಮಿತ ಮಾತ್ರೆಗಳನ್ನು ಸೇವಿಸಿರಲಿಲ್ಲ. ಖಿನ್ನತೆಯ ಮಾತ್ರೆಗಳನ್ನು ದಿಢೀರ್ ನಿಲ್ಲಿಸುವುದು ಅಥವಾ ಮಿಸ್ ಮಾಡುವುದು ವ್ಯಕ್ತಿಯ ಆಲೋಚನಾ ಶಕ್ತಿಯನ್ನು ಕುಂಠಿತಗೊಳಿಸಿ, ಆತ್ಮಹತ್ಯಾ ಪ್ರವೃತ್ತಿಯನ್ನು ಪ್ರಚೋದಿಸುತ್ತದೆ ಎನ್ನುತ್ತಾರೆ ತಜ್ಞರು. ಅಂದು ಐಟಿ ಅಧಿಕಾರಿಗಳಿಗೆ ಉತ್ತರ ನೀಡಬೇಕಾದ ಒತ್ತಡದ ನಡುವೆ, ಮಾತ್ರೆ ಸೇವಿಸದಿದ್ದದ್ದು ಅವರ ಸಾವಿನ ನಿರ್ಧಾರಕ್ಕೆ ಪುಷ್ಟಿ ನೀಡಿದಂತಾಯಿತು.
ಇದನ್ನೂ ಓದಿ: Snehamayi Krishna: ಆರೋಪದ ಅಬ್ಬರ, ಕ್ಷಮೆಯ ಬಿಕ್ಕಳಿಕೆ: ಹಾದಿ ತಪ್ಪಿತೇ ಸ್ನೇಹಮಯಿ ಕೃಷ್ಣನ ಹೋರಾಟ?
ಇನ್ನು ಬಾಕಿ ಉಳಿದಿರುವ ಪ್ರಶ್ನೆಗಳು
ಸಿ.ಜೆ. ರಾಯ್ ಅವರ ಈ ದುರಂತ ಅಂತ್ಯದೊಂದಿಗೆ 500 ಕೋಟಿ ರೂಪಾಯಿಗಳ ಹವಾಲಾ ಹಣದ ರಹಸ್ಯವೂ ಮಣ್ಣಾಗಿದೆಯೇ? ಅಥವಾ ಈ ಹಣದ ಹಿಂದೆ ಕೇರಳದ ಪ್ರಭಾವಿ ರಾಜಕಾರಣಿಗಳ ಅಥವಾ ಇತರ ಉದ್ಯಮಿಗಳ ಕೈವಾಡವಿದೆಯೇ? ಐಟಿ ಅಧಿಕಾರಿಗಳ ತನಿಖೆಯ ರೀತಿನೀತಿಗಳು ರಾಯ್ ಅವರನ್ನು ಬಲಿಪಡೆದವೇ? ಇವೆಲ್ಲವೂ ಸದ್ಯಕ್ಕೆ ನಿಗೂಢ.
ಸದ್ಯ ಪೊಲೀಸರು ರಾಯ್ ಅವರ ಫೋನ್ ದಾಖಲೆಗಳು, ಸಿಎ ಮತ್ತು ಬಿಸಿನೆಸ್ ಪಾರ್ಟ್ನರ್ಗಳ ಹೇಳಿಕೆಗಳನ್ನು ಆಧರಿಸಿ ತನಿಖೆ ಮುಂದುವರಿಸಿದ್ದಾರೆ. ಈ 500 ಕೋಟಿ ರೂಪಾಯಿಗಳ ‘ಕರಾಳ ಹಣ’ ಯಾರದ್ದು ಎಂಬುದು ಬಯಲಾದಲ್ಲಿ ಉದ್ಯಮ ಲೋಕದ ಮತ್ತಷ್ಟು ‘ದೊಡ್ಡ ತಲೆಗಳು’ ಉರುಳುವುದರಲ್ಲಿ ಸಂಶಯವಿಲ್ಲ.
