Congress: ಭಾರತೀಯ ರಾಜಕಾರಣದಲ್ಲಿ ತತ್ವ, ಸಿದ್ಧಾಂತ ಮತ್ತು ನೈತಿಕತೆಗಳಿಗಿಂತ ಅಧಿಕಾರ ಹಾಗೂ ಹಣದ ಆಮಿಷಗಳೇ ಮೇಲುಗೈ ಸಾಧಿಸುತ್ತವೆ ಎಂಬುದಕ್ಕೆ ಕರ್ನಾಟಕದಲ್ಲಿ ಇತ್ತೀಚೆಗೆ ನಡೆದ ರಾಜಕೀಯ ಬೆಳವಣಿಗೆಗಳಿಗಿಂತ ದೊಡ್ಡ ಉದಾಹರಣೆ ಬೇಕಿಲ್ಲ. ರಾಷ್ಟ್ರ ಮಟ್ಟದಲ್ಲಿ ಲೋಕಸಭೆ ಚುನಾವಣೆಯ ಸಂದರ್ಭದಿಂದ ಹಿಡಿದು ಇತ್ತೀಚಿನವರೆಗೂ ಕಾಂಗ್ರೆಸ್ (Congress) ನಾಯಕ ರಾಹುಲ್ ಗಾಂಧಿಯವರು ಸಂವಿಧಾನದ ಪ್ರತಿಯನ್ನು ಕೈಯಲ್ಲಿ ಹಿಡಿದು ದೇಶದುದ್ದಕ್ಕೂ ಸಂಚರಿಸುತ್ತಿದ್ದಾರೆ. ಬಿಜೆಪಿ ಸರ್ಕಾರವು ದೇಶದಲ್ಲಿ ದಲಿತರು (SC), ಹಿಂದುಳಿದ ವರ್ಗಗಳು (OBC) ಮತ್ತು ಆದಿವಾಸಿಗಳ (ST) ಹಕ್ಕುಗಳನ್ನು ಕಸಿಯುತ್ತಿದೆ, ಲ್ಯಾಟರಲ್ ಎಂಟ್ರಿ (Lateral Entry) ಮೂಲಕ ಮೀಸಲಾತಿಯನ್ನು ಗಾಳಿಗೆ ತೂರುತ್ತಿದೆ ಎಂದು ಗಂಟಲು ಹರಿದುಕೊಳ್ಳುತ್ತಿದ್ದಾರೆ. ಆದರೆ, ಇಷ್ಟೆಲ್ಲಾ ಭಾಷಣ ಬಿಗಿಯುವ ಕಾಂಗ್ರೆಸ್ ತನ್ನದೇ ಆಡಳಿತವಿರುವ ರಾಜ್ಯಗಳಲ್ಲಿ ಹಿಂದುಳಿದ ಅಥವಾ ದಲಿತ ಸಮುದಾಯದ ಒಬ್ಬನೇ ಒಬ್ಬ ಮುಖ್ಯಮಂತ್ರಿಯನ್ನು ಉಳಿಸಿಕೊಳ್ಳಲು ವಿಫಲವಾಗಿರುವುದು ಅವರ ಬೊಗಳೆ ರಾಜಕಾರಣ ಹಾಗೂ ಇಬ್ಬಂದಿ ನೀತಿಯನ್ನು ಅನಾವರಣಗೊಳಿಸಿದೆ.
ಸಿದ್ದರಾಮಯ್ಯ ಎಂಬ ಅಹಿಂದ ಅಸ್ಮಿತೆಯ ಬಲಿ
ಕರ್ನಾಟಕದಲ್ಲಿ ಸಿದ್ದರಾಮಯ್ಯ ಕೇವಲ ಒಬ್ಬ ವ್ಯಕ್ತಿಯಲ್ಲ; ಅವರು ರಾಜ್ಯದ ಶೋಷಿತ, ಹಿಂದುಳಿದ, ದಲಿತ ಮತ್ತು ಅಲ್ಪಸಂಖ್ಯಾತ (ಅಹಿಂದ) ವರ್ಗಗಳ ದಶಕಗಳ ಹೋರಾಟದ ಧ್ವನಿ ಹಾಗೂ ಅಸ್ಮಿತೆ. ಕಡು ಬಡತನದಿಂದ ಬಂದು ಶೋಷಿತರ ಪರವಾಗಿ ಬಜೆಟ್ಗಳನ್ನು ರೂಪಿಸಿ, ಜನಪ್ರಿಯ ಭಾಗ್ಯಗಳ ಮೂಲಕ ಜನರ ಮನಸ್ಸು ಗೆದ್ದ ನಾಯಕ. ಸಿದ್ದರಾಮಯ್ಯನವರು ಮುಖ್ಯಮಂತ್ರಿಯಾಗಿದ್ದವರೆಗೂ ಕಾಂಗ್ರೆಸ್ (Congress) ಪಕ್ಷಕ್ಕೆ ದೇಶದ ಇತರೆಡೆಗಳಲ್ಲಿ ಸಾಮಾಜಿಕ ನ್ಯಾಯದ ಬಗ್ಗೆ ಮಾತನಾಡುವ ಅತ್ಯುನ್ನತ ನೈತಿಕ ಹಕ್ಕಿತ್ತು. ಆದರೆ, ಹೈಕಮಾಂಡ್ನ ಆಂತರಿಕ ರಾಜಕೀಯದ ಒತ್ತಡ ಮತ್ತು ಹಿತಾಸಕ್ತಿಗಳ ಕಾರಣದಿಂದಾಗಿ ಸಿದ್ದರಾಮಯ್ಯ ಅವರನ್ನು ಮುಖ್ಯಮಂತ್ರಿ ಸ್ಥಾನದಿಂದ ಕೆಳಗಿಳಿಸಿರುವುದು ಅಹಿಂದ ವರ್ಗಕ್ಕೆ ಕಾಂಗ್ರೆಸ್ ಮಾಡಿದ ಅತಿ ದೊಡ್ಡ ಸೈದ್ಧಾಂತಿಕ ದ್ರೋಹವಾಗಿದೆ.
ಸಿದ್ದರಾಮಯ್ಯ ಸರ್ಕಾರವು ಅತ್ಯಂತ ಸುಸೂತ್ರವಾಗಿ, ಜನಪರ ಕಾರ್ಯಕ್ರಮಗಳೊಂದಿಗೆ ಸಾಗುತ್ತಿತ್ತು. ಅಂತಹ ಜನನಾಯಕನನ್ನು ಅರ್ಧದಲ್ಲೇ ಅಧಿಕಾರದಿಂದ ಕೆಳಗಿಳಿಸುವ ಯಾವುದೇ ಅನಿವಾರ್ಯತೆ ರಾಜ್ಯದ ಜನರಿಗಾಗಲಿ, ಶಾಸಕರಿಗಾಗಲಿ ಇರಲಿಲ್ಲ. ಆದರೂ, ದೆಹಲಿ ಹೈಕಮಾಂಡ್ ಬಲಾಢ್ಯ ಸಮುದಾಯದ ಒಕ್ಕಲಿಗ ನಾಯಕ ಡಿಕೆ ಶಿವಕುಮಾರ್ ಅವರಿಗೆ ಮಣೆ ಹಾಕಿ ಸಿದ್ದರಾಮಯ್ಯ ಅವರನ್ನು ಬಲಿಪಶು ಮಾಡಿದೆ. ಇದು ಕಾಂಗ್ರೆಸ್ ತನ್ನ ಕಾಲಿಗೆ ತಾನೇ ಕೊಡಲಿ ಏಟು ಹಾಕಿಕೊಂಡಂತೆ.
ಇದನ್ನೂ ಓದಿ: Siddaramaiah: ಕರಗಿದ ವಿಧಾನಸೌಧದ ಕಲ್ಲುಗಳು, ಮೌನವಾಯ್ತು ಬಡವರ ಗಟ್ಟಿ ಧ್ವನಿ: ‘ಭಾಗ್ಯಗಳ ಸರದಾರ’ನ ವಿದಾಯದ ಭಾವಯಾನ!
ಕಾರ್ಪೊರೇಟ್ ಸಂಸ್ಕೃತಿ ಮತ್ತು ಸೈದ್ಧಾಂತಿಕ ರಾಜಿ
ಕಾಂಗ್ರೆಸ್ (Congress) ನಾಯಕ ರಾಹುಲ್ ಗಾಂಧಿಯವರು ತಮ್ಮ ಭಾಷಣಗಳಲ್ಲಿ ಸದಾ ‘ಆರ್ಎಸ್ಎಸ್ ಮುಕ್ತ ಕಾಂಗ್ರೆಸ್’ ಮತ್ತು ‘ಸೈದ್ಧಾಂತಿಕ ಸ್ಪಷ್ಟತೆ’ಯ ಬಗ್ಗೆ ಮಾತನಾಡುತ್ತಾರೆ. ಪಕ್ಷದಲ್ಲಿ ಆರ್ಎಸ್ಎಸ್ ಮನಸ್ಥಿತಿ ಇರುವವರು ಹೊರನಡೆಯಲಿ ಎಂದು ಬಹಿರಂಗವಾಗಿಯೇ ಎಚ್ಚರಿಕೆ ನೀಡಿದ್ದರು. ಆದರೆ, ಇಂದು ಕರ್ನಾಟಕದಲ್ಲಿ ಯಾರನ್ನು ಮುಖ್ಯಮಂತ್ರಿ ಸಿಂಹಾಸನದ ಮೇಲೆ ಕೂರಿಸಲಾಗಿದೆ? ಹಿಂದೆ ಸದನದಲ್ಲೇ ಆರ್ಎಸ್ಎಸ್ ಗೀತೆಯನ್ನು ಗುಣುಗುಣಿಸುತ್ತಾ, ಸಾರ್ವಜನಿಕವಾಗಿ ತನ್ನ ಸೈದ್ಧಾಂತಿಕ ನಿಲುವುಗಳಿಗಿಂತ ವ್ಯವಹಾರಕ್ಕೆ ಪ್ರಾಮುಖ್ಯತೆ ನೀಡುವ ಡಿಕೆ ಶಿವಕುಮಾರ್ ಅವರನ್ನು ಹೈಕಮಾಂಡ್ ಆಯ್ಕೆ ಮಾಡಿದೆ. ಸಿದ್ದಾಂತದ ಮೇಲೆ ರಾಜಕಾರಣ ಮಾಡುತ್ತೇನೆ ಎನ್ನುವ ರಾಹುಲ್ ಗಾಂಧಿಯವರು, ಕೇವಲ ತನ್ನ ತಾಯಿ ಸೋನಿಯಾ ಗಾಂಧಿಯವರ ಅಚ್ಚುಮೆಚ್ಚಿನ ‘ಸಂಕಟಹರ’ ಎನ್ನುವ ಒಂದೇ ಕಾರಣಕ್ಕೆ ಡಿಕೆಶಿಗೆ ಶರಣಾಗಿದ್ದಾರೆ.
ಡಿಕೆ ಶಿವಕುಮಾರ್ ಅವರು ಜನಸಾಮಾನ್ಯರ ಅಥವಾ ರೈತರ ನಾಯಕನೇ? ಖಂಡಿತ ಇಲ್ಲ. ಬಿಡದಿ ಮತ್ತು ಕನಕಪುರ ಭಾಗದ ರೈತರು ಇಂದು ಡಿಕೆ ಶಿವಕುಮಾರ್ ವಿರುದ್ಧ ಆಕ್ರೋಶ ಹೊರಹಾಕುತ್ತಿದ್ದಾರೆ. “ಡಿಕೆ ಇಲ್ಲಿಗೆ ಬರಲಿ, ಅವರಿಗೆ ಒಂದು ಗತಿ ಕಾಣಿಸುತ್ತೇವೆ” ಎಂದು ಹಳ್ಳಿಗಳ ರೈತರು ಬಹಿರಂಗವಾಗಿ ಆಕ್ರೋಶ ವ್ಯಕ್ತಪಡಿಸುತ್ತಿರುವುದು ಅವರ ‘ಜನಪ್ರಿಯತೆ’ ಎಂತಹುದು ಎಂಬುದನ್ನು ತೋರಿಸುತ್ತದೆ. ಡಿಕೆ ಶಿವಕುಮಾರ್ ಎಂದರೆ ರಾಜಕೀಯದಲ್ಲಿ ಕೇವಲ ಅತಿ ಮಿತಿ ಇಲ್ಲದ ಹಣದ ಪ್ರಭಾವ ಮತ್ತು ರಿಸಾರ್ಟ್ ರಾಜಕಾರಣ ಅಷ್ಟೇ. ಬೇರೆ ರಾಜ್ಯಗಳಲ್ಲಿ ಕಾಂಗ್ರೆಸ್ ಶಾಸಕರು ಪಕ್ಷಾಂತರ ಮಾಡುವಾಗ ಅವರನ್ನು ರಿಸಾರ್ಟ್ಗಳಲ್ಲಿ ಕೂಡಿ ಹಾಕಿ ತಂತ್ರಗಾರಿಕೆ ನಡೆಸುವ ‘ಟ್ರಬಲ್ ಶೂಟರ್’ ಇಮೇಜ್ ಬಿಟ್ಟರೆ, ಅವರಲ್ಲಿ ಯಾವುದೇ ಜನಪರ ಸಿದ್ಧಾಂತವಿಲ್ಲ.
ಇಂತಹ ಒಬ್ಬ ಕಾರ್ಪೊರೇಟ್ ಕುಳಕ್ಕೆ ಇಡೀ ರಾಜ್ಯವನ್ನು ದಾರೆ ಎರೆದುಕೊಟ್ಟಿರುವುದರ ಹಿಂದೆ ಹೈಕಮಾಂಡ್ನ ಆರ್ಥಿಕ ದುರುದ್ದೇಶ ಎದ್ದು ಕಾಣುತ್ತಿದೆ. ಮುಂಬರುವ ವಿವಿಧ ರಾಜ್ಯಗಳ ಚುನಾವಣೆಗಳಿಗೆ ಕರ್ನಾಟಕದಿಂದ ನಿರಂತರ ಹಣಕಾಸಿನ ನೆರವು (Funding) ಹರಿಯುತ್ತದೆ ಎನ್ನುವ ಒಂದೇ ಒಂದು ಕಾರಣಕ್ಕೆ, ಸೈದ್ಧಾಂತಿಕ ನಾಯಕತ್ವವನ್ನು ಗಾಳಿಗೆ ತೂರಿ ಧನಬಲವಿರುವ ವ್ಯಕ್ತಿಗೆ ಪಟ್ಟ ಕಟ್ಟಲಾಗಿದೆ.
ಬಿಜೆಪಿಯ ಹಾದಿಯಲ್ಲಿ ಕಾಂಗ್ರೆಸ್: ಇತಿಹಾಸದ ಪಾಠ
ಇದೇ ರೀತಿಯ ತಪ್ಪನ್ನು ಈ ಹಿಂದೆ ಬಿಜೆಪಿ ಮಾಡಿ ಭೀಕರ ಪರಿಣಾಮವನ್ನು ಎದುರಿಸಿದೆ. ಕರ್ನಾಟಕದಲ್ಲಿ ಬಿಜೆಪಿಯನ್ನು ಕಟ್ಟಿ ಬೆಳೆಸಿದ ಧೀಮಂತ ನಾಯಕ, ಲಿಂಗಾಯತ ಸಮುದಾಯದ ಮುಖಂಡ ಬಿ.ಎಸ್. ಯಡಿಯೂರಪ್ಪ ಅವರನ್ನು ವಯಸ್ಸಿನ ನೆಪ ಹೇಳಿ ಹೈಕಮಾಂಡ್ ಅರ್ಧದಲ್ಲೇ ಮುಖ್ಯಮಂತ್ರಿ ಸ್ಥಾನದಿಂದ ಕೆಳಗಿಳಿಸಿತು. ಅದರ ಪರಿಣಾಮವಾಗಿ ಇಡೀ ಲಿಂಗಾಯತ ಸಮುದಾಯ ಬಿಜೆಪಿಯಿಂದ ದೂರ ಸರಿದು, ಕಳೆದ ವಿಧಾನಸಭಾ ಚುನಾವಣೆಯಲ್ಲಿ ಬಿಜೆಪಿ ಧೂಳೀಪಟವಾಯಿತು. ಇಂದು ಅದೇ ಚರಿತ್ರೆ ಕಾಂಗ್ರೆಸ್ ಪಕ್ಷದಲ್ಲಿ ಮರುಕಳಿಸುತ್ತಿದೆ.
ಬಿಜೆಪಿಗೆ ಲಿಂಗಾಯತ ಸಮುದಾಯ ಒಂದು ಚುನಾವಣೆಯಲ್ಲಿ ಪೆಟ್ಟು ಕೊಟ್ಟಿರಬಹುದು. ಆದರೆ ಕಾಂಗ್ರೆಸ್ಗೆ ಸಿದ್ದರಾಮಯ್ಯ ವಿಚಾರದಲ್ಲಿ ಆಗಲಿರುವ ನಷ್ಟ ಅದಕ್ಕಿಂತ ನೂರು ಪಟ್ಟು ದೊಡ್ಡದು. ಏಕೆಂದರೆ ಕರ್ನಾಟಕದಲ್ಲಿ ‘ಅಹಿಂದ’ ಎನ್ನುವುದು ಕೇವಲ ಒಂದು ಜಾತಿಯಲ್ಲ, ಅದು ರಾಜ್ಯದ ಶೇ. 70 ಕ್ಕಿಂತಲೂ ಅಧಿಕವಿರುವ ಬಹುಸಂಖ್ಯಾತ ಜನಸಮುದಾಯದ ಒಕ್ಕೂಟ. ಒಮ್ಮೆ ಈ ಅಹಿಂದ ವರ್ಗವು ಕಾಂಗ್ರೆಸ್ ತಮಗೆ ದ್ರೋಹ ಮಾಡಿದೆ ಎಂದು ತಿರುಗಿಬಿದ್ದರೆ, ರಾಜ್ಯದಲ್ಲಿ ಕಾಂಗ್ರೆಸ್ ಮುಂದಿನ ಹಲವು ದಶಕಗಳ ಕಾಲ ತಲೆ ಎತ್ತಲು ಸಾಧ್ಯವಾಗುವುದಿಲ್ಲ.
ಇದನ್ನೂ ಓದಿ: Siddaramaiah: ಬಂಡಾಯದ ತಂತ್ರ ಕೈಬಿಟ್ಟು ರಾಜೀನಾಮೆಗೆ ಮುಂದಾದ ಸಿದ್ದರಾಮಯ್ಯ! ಅತಂತ್ರವಾಗುತ್ತಾ ಆಪ್ತರ ರಾಜಕೀಯ?
ಮುಂದಿನ ಚುನಾವಣೆಗಳಲ್ಲಿ ಯಾವ ಮುಖ ಹೊತ್ತು ಹೋಗುತ್ತಾರೆ?
ರಾಷ್ಟ್ರ ಮಟ್ಟದಲ್ಲಿ ಲ್ಯಾಟರಲ್ ಎಂಟ್ರಿ ಮತ್ತು ದಲಿತರ ಹಕ್ಕುಗಳ ಬಗ್ಗೆ ಮಾತನಾಡುವ ಕಾಂಗ್ರೆಸ್, ಮುಂದಿನ ಚುನಾವಣೆಗಳಲ್ಲಿ ಕರ್ನಾಟಕದ ದಲಿತ, ಹಿಂದುಳಿದ ಮತ್ತು ಶೋಷಿತ ವರ್ಗಗಳ ಮುಂದೆ ಯಾವ ಮುಖ ಹೊತ್ತು ಮತಭಿಕ್ಷೆಗೆ ತೆರಳುತ್ತದೆ? ಒಬ್ಬ ಹಿಂದುಳಿದ ಸಮುದಾಯದ ಸಿದ್ದರಾಮಯ್ಯ ಅವರನ್ನು ಕೇವಲ ಹಣದ ಚೀಲದ ಪ್ರಭಾವಕ್ಕೆ ಮಣಿದು ಕೆಳಗಿಳಿಸಿದ ಮೇಲೆ, ರಾಹುಲ್ ಗಾಂಧಿ ಹಿಡಿಯುವ ಸಂವಿಧಾನದ ಪುಸ್ತಕಕ್ಕೆ ಏನು ಬೆಲೆ ಇರುತ್ತದೆ?
ಜನಪರ ಆಡಳಿತ ನೀಡುವ ನಾಯಕನಿಗಿಂತ ಹಣದ ಹೊಳೆ ಹರಿಸುವ ನಾಯಕನೇ ಶ್ರೇಷ್ಠ ಎಂದು ಸಾಬೀತುಪಡಿಸಿದ ಹೈಕಮಾಂಡ್ಗೆ ಮುಂದಿನ ದಿನಗಳಲ್ಲಿ ರಾಜ್ಯದ ಪ್ರಜ್ಞಾವಂತ ಮತದಾರರು ಮತ್ತು ಶೋಷಿತ ವರ್ಗಗಳು ತಕ್ಕ ಪಾಠ ಕಲಿಸುವುದರಲ್ಲಿ ಯಾವುದೇ ಸಂಶಯವಿಲ್ಲ. ನೈತಿಕತೆಯನ್ನು ಸಂಪೂರ್ಣವಾಗಿ ಕಳೆದುಕೊಂಡಿರುವ ಕಾಂಗ್ರೆಸ್, ತನ್ನ ಅಧಿಕಾರ ದಾಹ ಹಾಗೂ ಆಂತರಿಕ ಹಿತಾಸಕ್ತಿಗಳ ಬಲಿಪಶುವಾಗಿ ಕರ್ನಾಟಕದಲ್ಲಿ ತನ್ನ ಅಧಿಪತ್ಯವನ್ನು ತಾನೇ ಸರ್ವನಾಶ ಮಾಡಿಕೊಂಡಿದೆ.
