ಮಾತು ಕೇವಲ ಸಂವಹನದ ಮಾಧ್ಯಮವಲ್ಲ; ಅದು ಅಧಿಕಾರದಲ್ಲಿರುವವರು ಶೋಷಿತರ ಅಥವಾ ಪ್ರಶ್ನೆ ಮಾಡುವವರ ವಿರುದ್ಧ ಬಳಸುವ ಅತ್ಯಂತ ಕ್ರೂರ ಆಯುಧವೂ ಹೌದು. ಮೇ 15ರಂದು ದೆಹಲಿ ಹೈಕೋರ್ಟ್ನ ವಿಚಾರಣೆಯೊಂದರಲ್ಲಿ ಭಾರತದ ಮುಖ್ಯ ನ್ಯಾಯಮೂರ್ತಿ ಸೂರ್ಯಕಾಂತ್ ಅವರು ದೇಶದ ನಿರುದ್ಯೋಗಿ ಯುವಜನತೆಯನ್ನು, ವ್ಯವಸ್ಥೆಯನ್ನು ಪ್ರಶ್ನಿಸುವ ಸಾಮಾಜಿಕ ಜಾಲತಾಣದ ಧ್ವನಿಗಳನ್ನು ಹಾಗೂ ಆರ್.ಟಿ.ಐ ಕಾರ್ಯಕರ್ತರನ್ನು ‘ಜಿರಳೆಗಳು’ (Cockroach) ಮತ್ತು ‘ಪರಾವಲಂಬಿಗಳು’ (Parasites) ಎಂದು ಜರೆದಿದ್ದಾರೆ. ಈ ದರ್ಪದ ಮಾತು ಕೇವಲ ಒಬ್ಬ ವ್ಯಕ್ತಿಯ ಆಕ್ರೋಶವಲ್ಲ; ಇದು ಇಡೀ ಆಡಳಿತ ವ್ಯವಸ್ಥೆ ಸಾಮಾನ್ಯ ನಾಗರಿಕರನ್ನು ನೋಡುವ ಕ್ರೂರ ದೃಷ್ಟಿಕೋನವನ್ನು ಬಯಲು ಮಾಡಿದೆ.
ಇತಿಹಾಸದ ಕರಾಳ ಪುಟಗಳನ್ನು ತಿರುವಿ ಹಾಕಿದ ಯಾರಿಗಾದರೂ, ಉನ್ನತ ಪೀಠದಲ್ಲಿರುವವರು ಇಂತಹ ‘ಅಮಾನವೀಯ ಭಾಷೆ’ (Dehumanizing language) ಬಳಸಿದಾಗ ಬೆನ್ನುಮೂಳೆಯಲ್ಲಿ ನಡುಕ ಹುಟ್ಟುವುದು ಸಹಜ. ಏಕೆಂದರೆ, ಯಾವುದೇ ಒಂದು ಸಾಮೂಹಿಕ ದೌರ್ಜನ್ಯ ಅಥವಾ ನರಮೇಧದ ಆರಂಭವಾಗುವುದು ಇಂತಹದ್ದೇ ಕೀಟನಾಮಕರಣಗಳಿಂದ.
ಪದಗಳ ಹಿಂದಿರುವ ಸಂಚು ಮತ್ತು ಇತಿಹಾಸದ ರಕ್ತಸಿಕ್ತ ಸಾಕ್ಷಿ
ಯಾರನ್ನಾದರೂ ದಮನ ಮಾಡಬೇಕೆಂದರೆ ಮೊದಲು ಅವರ ‘ಮನುಷ್ಯತ್ವ’ವನ್ನು ಕಸಿದುಕೊಳ್ಳಬೇಕು. ‘ಜಿರಳೆ’ (Cockroach), ‘ಗೆದ್ದಲು’ ಅಥವಾ ‘ಕ್ರಿಮಿ’ ಎಂಬ ಪದಪ್ರಯೋಗಗಳ ಹಿಂದೆ ಮೂರು ಕರಾಳ ಆಯಾಮಗಳು ಅಡಗಿರುತ್ತವೆ:
- ಸಮಾಜದ ಶತ್ರುಗಳೆಂಬ ಚಿತ್ರಣ: ಪ್ರಶ್ನೆ ಮಾಡುವ ಯುವಕರನ್ನು ದೇಶದ ಪ್ರಗತಿಯನ್ನು ಲೂಟಿ ಮಾಡುವ ‘ಪರಾವಲಂಬಿಗಳು’ ಎಂದು ಬಿಂಬಿಸಲಾಗುತ್ತದೆ.
- ‘ಶುದ್ಧೀಕರಣ’ದ ಭ್ರಮೆ: ಸಮಾಜದಲ್ಲಿ ಒಂದು ಪವಿತ್ರ ಹಾಗೂ ಶ್ರೇಷ್ಠ ವರ್ಗವಿದೆ, ಅದನ್ನು ರಕ್ಷಿಸಲು ಈ ‘ಕೀಟಗಳನ್ನು’ ಹೊರಹಾಕಲೇಬೇಕು ಎಂಬ ಸಾಮುದಾಯಿಕ ಜಾಗೃತಿಯನ್ನು ಬಿತ್ತಲಾಗುತ್ತದೆ.
- ಅಪರಾಧ ಪ್ರಜ್ಞೆಯಿಲ್ಲದ ಹಿಂಸೆ: ಮನೆಯಲ್ಲಿ ಜಿರಳೆಗಳನ್ನು ಕೀಟನಾಶಕ ಹಾಕಿ ಕೊಲ್ಲುವಾಗ ಮನುಷ್ಯನಿಗೆ ಯಾವುದೇ ಪಾಪಪ್ರಜ್ಞೆ ಕಾಡುವುದಿಲ್ಲ. ಹಾಗೆಯೇ, ವ್ಯವಸ್ಥೆಯನ್ನು ಪ್ರಶ್ನಿಸುವ ಯುವಕರ ಮೇಲಿನ ಸಾಂಸ್ಥಿಕ ದೌರ್ಜನ್ಯವನ್ನು ‘ಅಪರಾಧ’ ಎಂದು ನೋಡುವ ಬದಲಿಗೆ, ಸಮಾಜಕ್ಕೆ ಮಾಡುತ್ತಿರುವ ‘ಚಿಕಿತ್ಸೆ’ ಎಂದು ಬಿಂಬಿಸಲಾಗುತ್ತದೆ.
ಇತಿಹಾಸದ ಭಯಾನಕ ಪುಟಗಳು:
- 1994 ರಲ್ಲಿ ರುವಾಂಡಾದಲ್ಲಿ ಕೇವಲ ನೂರು ದಿನಗಳಲ್ಲಿ 8 ಲಕ್ಷಕ್ಕೂ ಅಧಿಕ ತುತ್ಸಿ ಸಮುದಾಯದ ಜನರನ್ನು ಭೀಕರವಾಗಿ ಕತ್ತರಿಸಿ ಕೊಂದಾಗ, ಅಲ್ಲಿನ ಬಹುಸಂಖ್ಯಾತರು ಮತ್ತು ಮಾಧ್ಯಮಗಳು ಬಳಸಿದ್ದು ಇದೇ ‘ಜಿರಳೆ’ (Cockroach) ಎಂಬ ಪದವನ್ನು.
- ಜರ್ಮನಿಯ ಅಡಾಲ್ಫ್ ಹಿಟ್ಲರ್ ಲಕ್ಷಾಂತರ ಯಹೂದಿಗಳನ್ನು ಗ್ಯಾಸ್ ಚೇಂಬರ್ಗೆ ದೂಡುವ ಮುನ್ನ ಅವರನ್ನು ‘ಪರಾವಲಂಬಿ ಕೀಟಗಳು’ ಎಂದೇ ಕರೆದಿದ್ದ. ಕಾಂಬೋಡಿಯಾ, ಬೋಸ್ನಿಯಾ ಮತ್ತು ದಾರ್ಫರ್ನ ಜನಾಂಗೀಯ ಹತ್ಯೆಗಳಿಗೂ ಮುನ್ನ ಇಂತಹದೇ ಭಾಷೆಯನ್ನು ಬಳಸಿ ಜನರ ಮನಸ್ಸಿನಲ್ಲಿ ದ್ವೇಷ ಬಿತ್ತಲಾಗಿತ್ತು.
ಸಾಂವಿಧಾನಿಕ ಬಿಕ್ಕಟ್ಟು ಮತ್ತು ರಾಜಕೀಯ ತಲ್ಲಣ
ಪ್ರತಿಭಟನೆ ತೀವ್ರವಾಗುತ್ತಿದ್ದಂತೆ ಮುಖ್ಯ ನ್ಯಾಯಮೂರ್ತಿಗಳು ತಮ್ಮ ಮಾತನ್ನು ಮಾಧ್ಯಮಗಳು ತಪ್ಪಾಗಿ ಬಿಂಬಿಸಿವೆ ಎಂದು ಸ್ಪಷ್ಟನೆ ನೀಡುತ್ತಾ ‘ಯು-ಟರ್ನ್’ ಹೊಡೆದಿದ್ದಾರೆ. ಆದರೆ ಈ ವಿಷಯ ಕೇವಲ ಸಾಮಾಜಿಕ ಜಾಲತಾಣದ ಆಕ್ರೋಶವಾಗಿ ಉಳಿದಿಲ್ಲ; ದೇಶದ ಪ್ರಮುಖ ರಾಜಕೀಯ ವಲಯದಲ್ಲೂ ಭಾರಿ ತಲ್ಲಣ ಸೃಷ್ಟಿಸಿದೆ.
ಹಿರಿಯ ರಾಜಕೀಯ ವಿಶ್ಲೇಷಕರು ಮತ್ತು ನಾಯಕರು ಈ ಇಡೀ ಪ್ರಸಂಗವನ್ನು ಭಾರತದ ಪ್ರಜಾಪ್ರಭುತ್ವದ ಸಾಂವಿಧಾನಿಕ ಬಿಕ್ಕಟ್ಟು ಎಂದು ಕರೆದಿದ್ದಾರೆ. ನ್ಯಾಯಾಂಗದ ಅತ್ಯುನ್ನತ ಪೀಠದಲ್ಲಿರುವವರು ಸಾರ್ವಜನಿಕರನ್ನು ಕೀಟಗಳಿಗೆ ಹೋಲಿಸುವುದು ಸಂವಿಧಾನದ ಆಶಯಗಳಿಗೇ ಧಕ್ಕೆ ತರುತ್ತದೆ ಎಂದು ಆತಂಕ ವ್ಯಕ್ತಪಡಿಸಿದ್ದಾರೆ. ತಪ್ಪುಗಳನ್ನು ತಿದ್ದಬೇಕಾದ ನ್ಯಾಯಾಲಯಗಳೇ ನಾಗರಿಕರನ್ನು ಈ ರೀತಿ ನಡೆಸಿಕೊಂಡರೆ, ಪ್ರಜೆಗಳು ತಮ್ಮ ಹಕ್ಕುಗಳಿಗಾಗಿ ಯಾರನ್ನು ನಂಬಬೇಕು ಎಂಬ ಗಂಭೀರ ಪ್ರಶ್ನೆ ರಾಜಕೀಯ ಮುಖಂಡರಿಂದ ಕೇಳಿಬರುತ್ತಿದೆ.
ಸ್ವತಃ ಜಸ್ಟಿಸ್ ಸೂರ್ಯಕಾಂತ್ ಅವರ ಮೇಲೆಯೇ ಈ ಹಿಂದೆ ರಿಯಲ್ ಎಸ್ಟೇಟ್ ಅಕ್ರಮ ಹಾಗೂ ಕೋಟ್ಯಾಂತರ ರೂಪಾಯಿ ಲಂಚ ಪಡೆದ ಗಂಭೀರ ಆರೋಪಗಳಿದ್ದವು ಎಂಬುದನ್ನು ‘ದಿ ಕ್ಯಾರವಾನ್’ ಪತ್ರಿಕೆಯ ವರದಿಗಳನ್ನು ಉಲ್ಲೇಖಿಸಿ ಯುವಕರು ಇಂದು ನೆನಪಿಸುತ್ತಿದ್ದಾರೆ. ಹಾಗಾದರೆ, ಸಿಸ್ಟಮ್ ಅನ್ನ ಚರಂಡಿ ಮಾಡಿದ ಅಸಲಿ ಪರಾವಲಂಬಿಗಳು ಯಾರು?
ವ್ಯಂಗ್ಯದ ಮೂಲಕ ನಡುಕ ಹುಟ್ಟಿಸಿದ ‘ಕಾಕ್ರೋಚ್ ಜನತಾ ಪಾರ್ಟಿ’ (CJP)
ಇತಿಹಾಸದಲ್ಲಿ ಯಾರನ್ನೆಲ್ಲ ಜಿರಳೆಗಳೆಂದು ಕರೆಯಲಾಗಿತ್ತೋ ಅವರೆಲ್ಲ ಶೋಷಣೆಗೆ ಒಳಗಾಗಿದ್ದರು. ಆದರೆ 21ನೇ ಶತಮಾನದ ಭಾರತೀಯ ಯುವಶಕ್ತಿ ಆ ನಿಂದನೆಯ ಪದವನ್ನೇ ಬಂಡಾಯದ ಬ್ರ್ಯಾಂಡ್ ಆಗಿ ಬದಲಾಯಿಸಿದೆ. ಅಭಿಜಿತ್ ದೀಪ್ಕೆ ಎಂಬ ಯುವಕನ ನೇತೃತ್ವದಲ್ಲಿ ಕೇವಲ 48 ಗಂಟೆಗಳಲ್ಲಿ ಜನ್ಮತಾಳಿದ ‘ಕಾಕ್ರೋಚ್ ಜನತಾ ಪಾರ್ಟಿ’ (CJP) ಚಳವಳಿಗೆ ಈಗಾಗಲೇ 1 ಲಕ್ಷಕ್ಕೂ ಅಧಿಕ ಯುವಕರು ಸದಸ್ಯರಾಗಿದ್ದಾರೆ. ಇನ್ಸ್ಟಾಗ್ರಾಮ್ನಂತಹ ವೇದಿಕೆಗಳಲ್ಲಿ ಕೇವಲ 48 ಗಂಟೆಗಳಲ್ಲಿ 5 ಲಕ್ಷಕ್ಕೂ ಅಧಿಕ ಫಾಲೋವರ್ಸ್ ಪಡೆದು ಈ ಚಳವಳಿ ಜಾಗತಿಕ ಗಮನ ಸೆಳೆದಿದೆ.
“ಇಡೀ ವ್ಯವಸ್ಥೆಯನ್ನು ನೀವು ಗಲೀಜು ಚರಂಡಿಯನ್ನಾಗಿ ಮಾಡಿದರೆ, ಅಲ್ಲಿ ಜಿರಳೆಗಳು ಹುಟ್ಟಿಕೊಳ್ಳದೆ ಮತ್ತೇನು ಹುಟ್ಟಲು ಸಾಧ್ಯ?” ಎಂಬ ಇವರ ಪ್ರಶ್ನೆ ಇಡೀ ಸಿಸ್ಟಮ್ನ ಮುಖವಾಡವನ್ನು ಕಳಚಿ ಹಾಕಿದೆ. ಭ್ರಷ್ಟಾಚಾರ, ತಪ್ಪು ಶಿಕ್ಷಣ ಪದ್ಧತಿ, ನೀಟ್ (NEET) ಪೇಪರ್ ಲೀಕ್ ಹಗರಣಗಳು ಮತ್ತು ಬೃಹತ್ ನಿರುದ್ಯೋಗದ ವಿರುದ್ಧ ಯುವಕರು ಸಿದ್ಧಪಡಿಸಿರುವ ಪ್ರಣಾಳಿಕೆ ಇಡೀ ರಾಜಕೀಯ ವಲಯಕ್ಕೆ ನಡುಕ ಹುಟ್ಟಿಸಿದೆ. ಹಿರಿಯ ವಕೀಲ ಪ್ರಶಾಂತ್ ಭೂಷಣ್ ಅವರಂತಹ ಗಣ್ಯರು ಕೂಡ ಈ ಡಿಜಿಟಲ್ ಕ್ರಾಂತಿಗೆ ಬೆಂಬಲ ನೀಡಿದ್ದಾರೆ.
ಈ ಪಕ್ಷದ ಐದು ಮುಖ್ಯ ಬೇಡಿಕೆಗಳು ಇಂತಿವೆ:
- ರಿಟೈರ್ಮೆಂಟ್ ಗಿಫ್ಟ್ ನಿಷೇಧ: ತೀರ್ಪು ನೀಡಿ ನಿವೃತ್ತರಾದ ತಕ್ಷಣ ನ್ಯಾಯಾಧೀಶರು ರಾಜಕೀಯ ಪಕ್ಷಗಳಿಂದ ರಾಜ್ಯಸಭಾ ಸೀಟು ಅಥವಾ ಇನ್ಯಾವುದೇ ಗಿಫ್ಟ್ ಪಡೆಯುವುದನ್ನು ಸಂಪೂರ್ಣವಾಗಿ ನಿಷೇಧಿಸಬೇಕು.
- ಮತದಾನದ ಹಕ್ಕು ಕದ್ದರೆ ಯುಎಪಿಎ (UAPA): ಮತದಾರರ ಪಟ್ಟಿಯಿಂದ ಒಬ್ಬನೇ ಒಬ್ಬ ಅರ್ಹ ಮತದಾರನ ಹೆಸರನ್ನು ಡಿಲೀಟ್ ಮಾಡಿದರೂ ಅದನ್ನು ದೇಶದ್ರೋಹ ಎಂದು ಪರಿಗಣಿಸಿ ಚುನಾವಣಾ ಆಯುಕ್ತರನ್ನು ಜೈಲಿಗೆ ತಳ್ಳಬೇಕು.
- ಮಹಿಳೆಯರಿಗೆ 50% ಸಮಾನ ಪಾಲು: ಸಂಸತ್ತು ಮತ್ತು ಸಚಿವ ಸಂಪುಟ ಎರಡರಲ್ಲೂ ಅರ್ಧದಷ್ಟು ಸ್ಥಾನಗಳನ್ನು ಮಹಿಳೆಯರಿಗೇ ನೀಡಬೇಕು.
- ದ್ವೇಷದ ಮಾಧ್ಯಮಗಳ ಲೈಸೆನ್ಸ್ ರದ್ದು: ಕಾರ್ಪೊರೇಟ್ ಒಡೆತನದ ಮಾಧ್ಯಮಗಳ ಪರವಾನಗಿ ರದ್ದುಗೊಳಿಸಿ, ದ್ವೇಷ ಬಿತ್ತುವ ಆಂಕರ್ಗಳ ಬ್ಯಾಂಕ್ ಖಾತೆಗಳ ಆಡಿಟ್ ಆಗಬೇಕು.
- ಪಕ್ಷಾಂತರಿಗಳಿಗೆ 20 ವರ್ಷಗಳ ನಿಷೇಧ: ದುಡ್ಡಿನ ಆಸೆಗೆ ಬಿದ್ದು ಪಕ್ಷ ಬದಲಿಸುವ ಜನಪ್ರತಿನಿಧಿಗಳನ್ನು ಮುಂದಿನ 20 ವರ್ಷಗಳ ಕಾಲ ಯಾವುದೇ ಚುನಾವಣೆಗೆ ಸ್ಪರ್ಧಿಸದಂತೆ ಬ್ಯಾನ್ ಮಾಡಬೇಕು.
ಇದನ್ನೂ ಓದಿ: NEET Scam: ಜೋಶಿಯವರೇ, ಉಡಾಫೆ ರಾಜಕಾರಣ ನಿಲ್ಲಿಸಿ! ವೈಫಲ್ಯ ಮುಚ್ಚಿಡಲು KPSC ದಾಳವೇಕೆ?
ಹೊಸ ರಾಜಕೀಯ ಪರ್ಯಾಯವೇ ಅಥವಾ ಕೇವಲ ಆಕ್ರೋಶವೇ?
ಸದ್ಯಕ್ಕೆ CJP 1951ರ ಪ್ರಜಾಪ್ರತಿನಿಧಿ ಕಾಯ್ದೆಯ ಸೆಕ್ಷನ್ 29ಎ ಅಡಿಯಲ್ಲಿ ಚುನಾವಣಾ ಆಯೋಗದಲ್ಲಿ ಅಧಿಕೃತವಾಗಿ ನೋಂದಾಯಿತ ರಾಜಕೀಯ ಪಕ್ಷವಾಗಿಲ್ಲದಿದ್ದರೂ, ಇದು ದೇಶದ ಯುವಮನಸ್ಸುಗಳನ್ನು ಒಂದುಗೂಡಿಸುವ ಪ್ರಬಲ ಒತ್ತಡ ಗುಂಪಾಗಿ ಹೊರಹೊಮ್ಮಿದೆ. ಯುವಕರು ಕೇವಲ ಸಾಮಾಜಿಕ ಜಾಲತಾಣಗಳಲ್ಲಿ ಕಮೆಂಟ್ ಮಾಡುವುದಕ್ಕೆ ಸೀಮಿತವಾಗದೆ, ತಾವು ‘ಜಿರಳೆಗಳು’ ಎಂಬ ಟ್ಯಾಗ್ಗಳನ್ನು ಹೆಮ್ಮೆಯಿಂದ ಧರಿಸಿ ಕೆರೆಗಳ ಹೂಳೆತ್ತುವುದು, ನದಿಗಳನ್ನು ಸ್ವಚ್ಛಗೊಳಿಸುವುದರ ಮೂಲಕ ಸಮಾಜಮುಖಿ ಕ್ರಾಂತಿಗೆ ಇಳಿದಿದ್ದಾರೆ.
ಟಿಎಂಸಿ ಸಂಸದೆ ಮಹುವಾ ಮೊಯಿತ್ರಾ ಸೇರಿದಂತೆ ಹಲವು ವಿರೋಧ ಪಕ್ಷದ ಪ್ರಮುಖ ನಾಯಕರು ಈ ವೇದಿಕೆಯನ್ನು ಬೆಂಬಲಿಸಿದ್ದು, ವ್ಯವಸ್ಥೆಯ ಅಸಲಿ ಲೋಪದೋಷಗಳ ಬಗ್ಗೆ ಮುಕ್ತವಾಗಿ ಚರ್ಚಿಸುತ್ತಿದ್ದಾರೆ. ಆಮ್ ಆದ್ಮಿ ಪಾರ್ಟಿಯ ಆರಂಭದ ದಿನಗಳಂತೆ ಈ ಚಳವಳಿಯೂ ರಾಜಕೀಯ ಪಲ್ಲಟ ತರಬಲ್ಲದೇ ಎಂಬ ಆತಂಕ-ಕುತೂಹಲಗಳು ಸದ್ಯ ಸೃಷ್ಟಿಯಾಗಿವೆ.
ಮುಖ್ಯ ನ್ಯಾಯಮೂರ್ತಿಗಳೇ ನೆನಪಿರಲಿ, ವಿಜ್ಞಾನದ ಪ್ರಕಾರ ‘ಜಿರಳೆ’ ಎನ್ನುವುದು ಡೈನೋಸರ್ ಕಾಲದಿಂದಲೂ ಪ್ರಕೃತಿಯ ಎಲ್ಲಾ ವಿಕೋಪಗಳನ್ನು ಎದುರಿಸಿ ಬದುಕಿ ಉಳಿದಿರುವ, ಪರಮಾಣು ಬಾಂಬ್ ಬಿದ್ದರೂ ಸಾಯದ ಏಕೈಕ ಜೀವಿ. ಈ ದೇಶದ ಯುವಜನರು ದೇಶದ ಆಸ್ತಿ. ಅವರಿಗೆ ಉದ್ಯೋಗ, ಸರಿಯಾದ ಶಿಕ್ಷಣ ನೀಡದೆ ಅವರನ್ನು ‘ಜಿರಳೆಗಳು’ ಎಂದು ಕರೆಯುವ ಅಧಿಕಾರ ಯಾರಿಗೂ ಇಲ್ಲ. ಅಧಿಕಾರದ ಬಲದಿಂದ ಯುವಶಕ್ತಿಯ ಧ್ವನಿಯನ್ನು ಅಷ್ಟು ಸುಲಭವಾಗಿ ಹೊಸಕಿ ಹಾಕಲು ಸಾಧ್ಯವಿಲ್ಲ ಎಂಬುದನ್ನು ಈ ಪ್ರತಿರೋಧ ಸಾಬೀತುಪಡಿಸಿದೆ. ನ್ಯಾಯದ ಪೀಠದಲ್ಲಿ ಕುಳಿತು ನೀವು ಆಡಿದ ಮಾತು, ಇಂದು ದೇಶದ ಯುವಕರಲ್ಲಿ ಹೊಸ ಕ್ರಾಂತಿಯ ಜಾಗೃತಿಯನ್ನು ಮೂಡಿಸಿದೆ.
