ಬಾಗಲಕೋಟೆಯ (Bagalkot) ರಾಜಕೀಯ ಇತಿಹಾಸದಲ್ಲಿ ‘ಛತ್ರಪತಿ ಶಿವಾಜಿ ಮಹಾರಾಜರ ಪ್ರತಿಮೆ ಪ್ರತಿಷ್ಠಾಪನೆ’ ಎಂಬುದು ಕೇವಲ ಒಂದು ಸಾಂಸ್ಕೃತಿಕ ಅಥವಾ ಧಾರ್ಮಿಕ ವಿಷಯವಾಗಿ ಉಳಿದಿಲ್ಲ. ಬದಲಿಗೆ, ಇದು ಅಧಿಕಾರ ರಾಜಕಾರಣದ ದಾಳವಾಗಿ, ಪ್ರತಿಷ್ಠೆಯ ಕಣವಾಗಿ ಮತ್ತು ಚುನಾವಣಾ ತಂತ್ರಗಾರಿಕೆಯ ‘ನಾಣ್ಯ’ವಾಗಿ ಮಾರ್ಪಟ್ಟಿರುವುದು ಒಂದು ವಿಪರ್ಯಾಸ.
ರಾಜ್ಯದಲ್ಲಿರುವ ಬಿಜೆಪಿ ಬೆಂಬಲಿತ ಸಂಘಟನೆಗಳು ಛತ್ರಪತಿ ಶಿವಾಜಿ ಮಹಾರಾಜನನ್ನು ಹಿಂದೂ ಸಾಮ್ರಾಜ್ಯದ ಸಂಸ್ಥಾಪಕ, ಅಪ್ರತಿಮ ವೀರ ಎಂದು ಆರಾಧ್ಯ ದೈವನಂತೆ ಪೂಜಿಸುತ್ತವೆ. ಆದರೆ, ಉತ್ತರ ಕರ್ನಾಟಕದ ಪ್ರಮುಖ ಜಿಲ್ಲಾ ಕೇಂದ್ರವಾದ ಬಾಗಲಕೋಟೆಯಲ್ಲಿ (Bagalkot) ಕಳೆದ ಎರಡು-ಮೂರು ವರ್ಷಗಳಿಂದ ಶಿವಾಜಿ ಮಹಾರಾಜರ ಹೆಸರಿನಲ್ಲಿ ನಡೆಯುತ್ತಿರುವ ವಿದ್ಯಮಾನಗಳು ಮಾತ್ರ ಈ ಮಹಾನ್ ನಾಯಕನ ಗೌರವಕ್ಕೆ ಚ್ಯುತಿ ತರುವಂತಿವೆಯೇ ಹೊರತು, ಅಪ್ರತಿಮ ವೀರನಿಗೆ ಗೌರವದ ಸಂಕೇತವಾಗಿ ಕಾಣುತ್ತಿಲ್ಲ. ರಾಜಕೀಯ ಪಕ್ಷಗಳ ನಡುವಿನ ಹಗ್ಗಜಗ್ಗಾಟ, ಅಧಿಕಾರಕ್ಕಾಗಿ ನಡೆಯುವ ತಂತ್ರಗಾರಿಕೆ ಮತ್ತು ‘ಕ್ರೆಡಿಟ್ ವಾರ್’ ನಡುವೆ ಶಿವಾಜಿ ಪ್ರತಿಮೆ ಸ್ಥಾಪನೆ ಎಂಬುದು ಈಗ ಚುನಾವಣಾ ಅಸ್ತ್ರವಾಗಿ ಬಳಕೆಯಾಗುತ್ತಿದೆ.
ಸಂಘರ್ಷದ ಹಾದಿ: 2023ರ ಚುನಾವಣಾ ಹೊಸ್ತಿಲು
ಈ ವಿವಾದದ ಮೂಲ ಇರುವುದು 2023ರ ವಿಧಾನಸಭಾ ಚುನಾವಣೆಯ ಮುನ್ನಾ ದಿನಗಳಲ್ಲಿ. ಅಂದಿನ ಶಾಸಕರಾಗಿದ್ದ ವೀರಣ್ಣ ಚರಂತಿಮಠ ನಗರದ ಅಭಿವೃದ್ಧಿ ಹಾಗೂ ಸಾಂಸ್ಕೃತಿಕ ಅಸ್ಮಿತೆಯ ಭಾಗವಾಗಿ ಶಿವಾಜಿ ಮಹಾರಾಜರು ಮತ್ತು ಜಗಜ್ಯೋತಿ ಬಸವಣ್ಣನವರ ಪ್ರತಿಮೆಗಳನ್ನು ಪ್ರತಿಷ್ಠಾಪಿಸುವ ನಿರ್ಧಾರ ಕೈಗೊಂಡರು. ನಗರಸಭೆಯಲ್ಲಿ ಈ ಕುರಿತು ಠರಾವು (Resolution) ಕೂಡ ಪಾಸಾಯಿತು. ಆದರೆ, ರಾಜಕೀಯ ಲೆಕ್ಕಾಚಾರಗಳು ಇಲ್ಲಿಂದಲೇ ಶುರುವಾದವು. ಕಾನೂನಾತ್ಮಕವಾಗಿ ಜಿಲ್ಲಾಡಳಿತ ಮತ್ತು ಇಲಾಖೆಗಳಿಂದ ಪೂರ್ಣ ಪ್ರಮಾಣದ ಅನುಮತಿ ಪಡೆಯುವ ಪ್ರಕ್ರಿಯೆ ಪೂರ್ಣಗೊಳ್ಳುವ ಮೊದಲೇ ಚುನಾವಣೆ ಬಂದಿದ್ದರಿಂದ, ಆ ಕೆಲಸ ಅರ್ಧಕ್ಕೆ ನಿಂತಿತು. ಒಂದು ವೇಳೆ ಆಗಲೇ ನಿಯಮಾನುಸಾರ ಕೆಲಸ ಮುಗಿದಿದ್ದರೆ, ಇಂದು ಇಷ್ಟೊಂದು ರಾದ್ಧಾಂತಕ್ಕೆ ಅವಕಾಶವಿರುತ್ತಿರಲಿಲ್ಲ.
ರಾತ್ರೋರಾತ್ರಿ ಪ್ರತಿಮೆ ಪ್ರತಿಷ್ಠಾಪನೆ ಮತ್ತು ಕಾನೂನು ಕ್ರಮ
2023ರ ಚುನಾವಣೆಯಲ್ಲಿ ಕಾಂಗ್ರೆಸ್ನ ಹೆಚ್.ವೈ. ಮೇಟಿ ಜಯಗಳಿಸಿದ ನಂತರ ರಾಜಕೀಯ ಸಮೀಕರಣಗಳು ಬದಲಾದವು. ಅಧಿಕಾರ ಕಳೆದುಕೊಂಡ ಬಿಜೆಪಿ ಮತ್ತು ಅದರ ಬೆಂಬಲಿತ ಸಂಘಟನೆಗಳು, ‘ಕ್ರೆಡಿಟ್’ ಕಾಂಗ್ರೆಸ್ ಪಾಲಾಗಬಾರದೆಂಬ ಆತುರಕ್ಕೆ ಬಿದ್ದವು. ಇದರ ಪರಿಣಾಮವೇ ಬಾಗಲಕೋಟೆಯ ಲಯನ್ಸ್ ಸರ್ಕಲ್ ಬಳಿ ನಡೆದ ‘ಹೈಡ್ರಾಮಾ’. ಯಾವುದೇ ಪೂರ್ವಾನ್ವಯ ಅನುಮತಿ ಇಲ್ಲದೆ, ರಾತ್ರೋರಾತ್ರಿ ಶಿವಾಜಿ ಪ್ರತಿಮೆಯನ್ನು ಸ್ಥಾಪಿಸಲಾಯಿತು.
ಜಿಲ್ಲಾಡಳಿತವು ಸುಪ್ರೀಂ ಕೋರ್ಟ್ ಮತ್ತು ಹೈಕೋರ್ಟ್ ನಿರ್ದೇಶನಗಳನ್ನು ಪಾಲಿಸಬೇಕಾದ ಅನಿವಾರ್ಯತೆಯಲ್ಲಿತ್ತು. ಸಾರ್ವಜನಿಕ ಸ್ಥಳಗಳಲ್ಲಿ ಅನುಮತಿ ಇಲ್ಲದೆ ಪ್ರತಿಮೆ ಸ್ಥಾಪಿಸುವುದು ಕಾನೂನುಬಾಹಿರ ಎಂಬ ಕಾರಣಕ್ಕೆ ಪೊಲೀಸರು ಮತ್ತು ನಗರಸಭೆ ಅಧಿಕಾರಿಗಳು ಪ್ರತಿಮೆಯನ್ನು ತೆರವುಗೊಳಿಸಿದರು. ಇದು ಸಹಜವಾಗಿಯೇ ಭಕ್ತರ ಭಾವನೆಗಳನ್ನು ಕೆರಳಿಸಿತು ಮತ್ತು ಬಾಗಲಕೋಟೆ ಬಂದ್ಗೆ ನಾಂದಿ ಹಾಡಿತು. ಈ ವೇಳೆ ನಡೆದ ಲಾಠಿ ಪ್ರಹಾರ ಮತ್ತು ಸಂಘರ್ಷ ಜಿಲ್ಲೆಯಲ್ಲಿ ಅಶಾಂತಿಯ ವಾತಾವರಣ ನಿರ್ಮಿಸಿತು.
ಇದನ್ನೂ ಓದಿ: Bagalkot: ಮಾಜಿ ಶಾಸಕನ ಅಬ್ಬರಕ್ಕೆ ಸೈಲೆಂಟ್ ಆದರೇ ಎಸ್ಪಿ? ‘ಧಮ್ಮು ತಾಕತ್’ ಮಾತಿಗೆ ಪೊಲೀಸರು ಕಕ್ಕಾಬಿಕ್ಕಿ!
ಬಿಜೆಪಿಯ ಆಂತರಿಕ ಭಿನ್ನಮತ ಮತ್ತು ರಾಜಕೀಯ ವಾಗ್ದಾಳಿ
ಶಿವಾಜಿ ಪ್ರತಿಮೆಯ ವಿಚಾರದಲ್ಲಿ ಕಾಂಗ್ರೆಸ್ ವಿರುದ್ಧ ಹೋರಾಡಬೇಕಿದ್ದ ಬಿಜೆಪಿ, ಆಂತರಿಕ ಭಿನ್ನಾಭಿಪ್ರಾಯದ ಸುಳಿಗೆ ಸಿಲುಕಿತು. ಪ್ರತಿಭಟನೆಯ ವೇಳೆ ರಾಜ್ಯಸಭಾ ಸದಸ್ಯ ನಾರಾಯಣ ಸಾ ಬಾಂಡಗೆ ಮತ್ತು ಪೊಲೀಸರ ನಡುವೆ ನಡೆದ ವಾಗ್ವಾದ ಜಿಲ್ಲಾ ಮಟ್ಟದಲ್ಲಿ ದೊಡ್ಡ ಸುದ್ದಿಯಾಯಿತು. ಆದರೆ, ಇದಾದ ಬೆನ್ನಲ್ಲೇ ನಡೆದ ಸಭೆಯಲ್ಲಿ ಮಾಜಿ ಶಾಸಕ ವೀರಣ್ಣ ಚರಂತಿಮಠ, ಸ್ವಪಕ್ಷೀಯರ ಮೇಲೆಯೇ (ಎಮ್ಎಲ್ಸಿ ಮತ್ತು ಇತರರು) ಗೂಬೆ ಕೂರಿಸಲು ಯತ್ನಿಸಿದ್ದು ವಿವಾದಕ್ಕೆ ತುಪ್ಪ ಸುರಿಯಿತು.
ತಮ್ಮದೇ ಪಕ್ಷದ ನಾಯಕರಾದ ಪಿ.ಹೆಚ್. ಪೂಜಾರ ಮತ್ತು ಡಾ. ಮಾನೆ ಅವರ ಹೆಸರನ್ನು ಪರೋಕ್ಷವಾಗಿ ಪ್ರಸ್ತಾಪಿಸಿ, ಇವರೇ ಪ್ರತಿಮೆ ಸ್ಥಾಪನೆಗೆ ಅಡ್ಡಿಪಡಿಸುತ್ತಿದ್ದಾರೆ ಎಂಬ ಚರಂತಿಮಠ ಅವರ ಆರೋಪವು ಬಿಜೆಪಿಯ ಒಳಜಗಳವನ್ನು ಬೀದಿಗೆ ತಂದಿತು. ಇದಕ್ಕೆ ಪೂಜಾರ ನೀಡಿದ ಕಟು ಪ್ರತಿಕ್ರಿಯೆಗಳು, ಈ ಹೋರಾಟವು ಸಿದ್ಧಾಂತಕ್ಕಿಂತ ಹೆಚ್ಚಾಗಿ ವೈಯಕ್ತಿಕ ವರ್ಚಸ್ಸಿನ ಹೋರಾಟ ಎಂಬುದನ್ನು ಸಾಬೀತುಪಡಿಸಿದವು.
ಬಸವಣ್ಣನವರ ಪ್ರತಿಮೆ: ರಾಜಕೀಯಕ್ಕೆ ಸಿಲುಕದ ಸಮಾಧಾನಕರ ಸಂಗತಿ
ಇಡೀ ವಿವಾದದ ನಡುವೆ ಸಮಾಧಾನಕರ ಸಂಗತಿಯೆಂದರೆ ಜಗಜ್ಯೋತಿ ಬಸವಣ್ಣನವರ ಪ್ರತಿಮೆ ಸ್ಥಾಪನೆಯ ವಿಚಾರ. ನಗರದ APMC ಬಳಿ ಬಸವಣ್ಣನವರ ಮೂರ್ತಿ ಪ್ರತಿಷ್ಠಾಪನೆಗೆ ಜಾಗ ಗುರುತು ಮಾಡಲಾಗಿದ್ದು, ಇದಕ್ಕೆ ಎಲ್ಲ ಪಕ್ಷಗಳು ಮತ್ತು ಸಂಘಟನೆಗಳಿಂದ ಯಾವುದೇ ವಿರೋಧ ವ್ಯಕ್ತವಾಗಿಲ್ಲ. ಬಸವಣ್ಣನವರು ಇಲ್ಲಿ ರಾಜಕೀಯ ದಾಳವಾಗದೇ ಇರುವುದು ಮತ್ತು ಅವರ ಪ್ರತಿಮೆ ವಿಚಾರದಲ್ಲಿ ಒಮ್ಮತವಿರುವುದು ಜಿಲ್ಲೆಯ ಸಾಮರಸ್ಯಕ್ಕೆ ಸಾಕ್ಷಿಯಾಗಿದೆ.
ಶಿವಾಜಿ ಪ್ರತಿಮೆ ಸ್ಥಳದ ವಿವಾದ: ಮರಾಠ ಸಮುದಾಯದಲ್ಲೇ ಭಿನ್ನಾಭಿಪ್ರಾಯ!
ಶಿವಾಜಿ ಮಹಾರಾಜರ ಪ್ರತಿಮೆಯನ್ನು ಲಯನ್ಸ್ ಸರ್ಕಲ್ ಬಳಿ ಪ್ರತಿಷ್ಠಾಪಿಸಲು ಉದ್ದೇಶಿಸಲಾಗಿದೆ. ಆದರೆ, ಇಲ್ಲಿ ರಾಜಕೀಯಕ್ಕಿಂತ ಹೆಚ್ಚಾಗಿ ಸಾಮಾಜಿಕ ಕಳಕಳಿಯ ಭಿನ್ನಾಭಿಪ್ರಾಯಗಳು ಎದ್ದು ಕಾಣುತ್ತಿವೆ. ವಿಶೇಷವೆಂದರೆ, ಸ್ವತಃ ಮರಾಠ ಸಮುದಾಯದಲ್ಲೇ ಈ ಸ್ಥಳದ ಬಗ್ಗೆ ಪರ-ವಿರೋಧ ಚರ್ಚೆಗಳು ನಡೆಯುತ್ತಿವೆ:
- ಒಂದು ವರ್ಗದ ವಾದ: ಹೇಗಾದರೂ ಮಾಡಿ ಮೂರ್ತಿ ಪ್ರತಿಷ್ಠಾಪನೆ ಆದರಷ್ಟೇ ಸಾಕು ಎಂಬ ನಿಲುವು ಇವರದ್ದು.
- ಮತ್ತೊಂದು ವರ್ಗದ ಆತಂಕ: ಲಯನ್ಸ್ ಸರ್ಕಲ್ ಸುತ್ತಮುತ್ತ ಹಲವಾರು ಬಾರ್ ಮತ್ತು ರೆಸ್ಟೋರೆಂಟ್ಗಳು ಇವೆ. ಯಾರಾದರೂ ಮದ್ಯವ್ಯಸನಿಗಳು ಬಂದು ಮಹಾರಾಜರ ಮೂರ್ತಿಗೆ ಅವಮಾನ ಮಾಡಬಹುದು ಅಥವಾ ಅಹಿತಕರ ಘಟನೆಗಳು ಸಂಭವಿಸಬಹುದು ಎನ್ನುವ ಭಯ ಇವರದ್ದು. ಈ ಕಾರಣಕ್ಕೆ, ಗೌರವಯುತವಾಗಿ ನವನಗರದ ಯಾವುದಾದರೂ ಪ್ರಶಸ್ತ ಜಾಗದಲ್ಲಿ ಮೂರ್ತಿ ಸ್ಥಾಪಿಸಲಿ ಎನ್ನುವುದು ಇವರ ಒತ್ತಾಯ. ಸಮುದಾಯದ ಈ ನೈಜ ಕಳಕಳಿಯನ್ನು ರಾಜಕೀಯ ನಾಯಕರು ಗಮನಿಸದಿರುವುದು ವಿಷಾದನೀಯ.
ಇದನ್ನೂ ಓದಿ: Bagalkot: ಕೇಸರಿ ಪಡೆಯ ‘ಡೆಡ್ಲೈನ್’ಗೆ ಡೋಂಟ್ ಕೇರ್! ಎಸ್ಪಿ ಸಿದ್ದಾರ್ಥ ಗೋಯಲ್ ಖಡಕ್ ‘ದಂಡಯಾತ್ರೆ’
ಕಾಂಗ್ರೆಸ್ನ ‘ಮಾಸ್ಟರ್ ಸ್ಟ್ರೋಕ್’ ಮತ್ತು ಹೊಳೆಬಸು ಶೆಟ್ಟರ್ ಎಂಟ್ರಿ!
ಹೆಚ್.ವೈ. ಮೇಟಿ ನಿಧನದ ನಂತರ ಬಾಗಲಕೋಟೆ ಕ್ಷೇತ್ರಕ್ಕೆ ಉಪಚುನಾವಣೆಯ ಕಾರ್ಮೋಡ ಕವಿದಿದೆ. ಈ ಸಂದರ್ಭವನ್ನು ಸರಿಯಾಗಿ ಬಳಸಿಕೊಂಡ ಕಾಂಗ್ರೆಸ್ ಮುಖಂಡ ಹೊಳೆಬಸು ಶೆಟ್ಟರ್, ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರಿಗೆ ಪ್ರಸ್ತಾವನೆ ಸಲ್ಲಿಸಿ ಪ್ರತಿಮೆಗಳ ಸ್ಥಾಪನೆಗೆ ಹಣ ಬಿಡುಗಡೆ ಮಾಡಿಸುವಲ್ಲಿ ಯಶಸ್ವಿಯಾಗಿದ್ದಾರೆ.
ಇದು ಬಿಜೆಪಿಗೆ ನುಂಗಲಾರದ ತುತ್ತಾಗಿದೆ. ಬಿಜೆಪಿ ಯಾವತ್ತೂ ಶಿವಾಜಿಯನ್ನು ತನ್ನ ‘ಪೇಟೆಂಟ್’ ಎನ್ನುವಂತೆ ಬಿಂಬಿಸುತ್ತಾ ಬಂದಿತ್ತು. ಆದರೆ, ಈಗ ಕಾಂಗ್ರೆಸ್ ಸರ್ಕಾರವೇ ಹಣ ಬಿಡುಗಡೆ ಮಾಡಿ ಪ್ರತಿಮೆ ಸ್ಥಾಪನೆಗೆ ಮುಂದಾಗಿರುವುದು ಬಿಜೆಪಿಯ ‘ಹಿಂದೂತ್ವ’ದ ಕಾರ್ಡ್ ಅನ್ನು ನಿಷ್ಕ್ರಿಯಗೊಳಿಸುವ ತಂತ್ರವೆಂದು ವಿಶ್ಲೇಷಿಸಲಾಗುತ್ತಿದೆ. ಶೆಟ್ಟರ್ ಅವರ ಈ ನಡೆ ಚುನಾವಣಾ ದೃಷ್ಟಿಕೋನದಿಂದ ಕೂಡಿದೆ ಎಂಬುದು ರಹಸ್ಯವಾಗಿ ಉಳಿದಿಲ್ಲ.
ಅಭಿವೃದ್ಧಿಗಿಂತ ಕ್ರೆಡಿಟ್ಗೇ ಪ್ರಾಮುಖ್ಯತೆ?
ಸ್ಥಳೀಯ ರಾಜಕಾರಣದ ಈ ಬಯಲಾಟಗಳನ್ನು ಗಮನಿಸಿದರೆ ಒಂದು ವಿಷಯ ಸ್ಪಷ್ಟವಾಗುತ್ತದೆ: ಬಾಗಲಕೋಟೆಯಲ್ಲಿ ಯಾವ ಪಕ್ಷಕ್ಕೂ ಶಿವಾಜಿ ಅಥವಾ ಬಸವಣ್ಣನವರ ಬಗ್ಗೆ ಕಳಕಳಿಗಿಂತ, ಆ ಪ್ರತಿಮೆಯನ್ನು ಉದ್ಘಾಟಿಸುವವರು ಯಾರು? ಶಂಕುಸ್ಥಾಪನೆ ಮಾಡುವವರು ಯಾರು? ಎಂಬ ‘ಕ್ರೆಡಿಟ್’ ಮುಖ್ಯವಾಗಿದೆ. ಕಾಂಗ್ರೆಸ್ ಅವಧಿಯಲ್ಲಿ ಪ್ರತಿಮೆ ಸ್ಥಾಪನೆಯಾದರೆ ಅದರ ಲಾಭ ಅವರಿಗೆ ಸಿಗುತ್ತದೆ ಎಂಬ ಆತಂಕ ಬಿಜೆಪಿಯಲ್ಲಿದ್ದರೆ, ಬಿಜೆಪಿಯ ಹಿಂದುತ್ವದ ಅಜೆಂಡಾವನ್ನು ಹತ್ತಿಕ್ಕಲು ಕಾಂಗ್ರೆಸ್ ಇದನ್ನು ಬಳಸಿಕೊಳ್ಳುತ್ತಿದೆ.
ಸಮಾಜವನ್ನು ಒಗ್ಗೂಡಿಸಬೇಕಾದ ಮಹಾನ್ ಪುರುಷರ ಪ್ರತಿಮೆಗಳು ಇಂದು ಸಮಾಜವನ್ನು ಒಡೆಯುವ ಅಥವಾ ರಾಜಕೀಯ ಲಾಭ-ನಷ್ಟದ ಲೆಕ್ಕಾಚಾರಕ್ಕೆ ಬಳಕೆಯಾಗುತ್ತಿರುವುದು ಪ್ರಜಾಪ್ರಭುತ್ವದ ದುರಂತ. ಕಾನೂನುಬದ್ಧವಾಗಿ ಪ್ರತಿಮೆ ಸ್ಥಾಪಿಸುವುದಕ್ಕೆ ಯಾವ ಪಕ್ಷದ ವಿರೋಧವೂ ಇಲ್ಲದಿರುವಾಗ, ಕೇವಲ ಶ್ರೇಯಸ್ಸಿಗಾಗಿ ಗಲಾಟೆ ಮಾಡುವುದು ಜನರ ಕಣ್ಣಲ್ಲಿ ಹಾಸ್ಯಾಸ್ಪದವಾಗಿ ಕಾಣುತ್ತಿದೆ.
ಬಾಗಲಕೋಟೆಯ ಮತದಾರ ಈಗ ಜಾಗೃತನಾಗಿದ್ದಾನೆ. ಕೇವಲ ಭಾವನಾತ್ಮಕ ವಿಚಾರಗಳನ್ನು ಮುಂದಿಟ್ಟುಕೊಂಡು ಅಭಿವೃದ್ಧಿಯನ್ನು ಮರೆಮಾಚುವ ತಂತ್ರಗಳು ದೀರ್ಘಕಾಲ ನಡೆಯುವುದಿಲ್ಲ. ಶಿವಾಜಿ ಮಹಾರಾಜರು ಕೇವಲ ಒಂದು ಜಾತಿಗೆ ಅಥವಾ ಒಂದು ಪಕ್ಷಕ್ಕೆ ಸೀಮಿತವಾದವರಲ್ಲ. ಅವರ ಪ್ರತಿಮೆ ಸ್ಥಾಪನೆ ರಾಜಕೀಯ ಮುತ್ಸದ್ದಿತನದಿಂದ ಆಗಬೇಕೇ ಹೊರತು, ಚುನಾವಣಾ ‘ಕ್ವಾಯ್ನ್’ ಆಗಿ ಬಳಕೆಯಾಗಬಾರದು. ಜಿಲ್ಲಾಡಳಿತವು ಎರಡೂ ಪಕ್ಷಗಳನ್ನು ವಿಶ್ವಾಸಕ್ಕೆ ತೆಗೆದುಕೊಂಡು, ಶಾಂತಿಯುತವಾಗಿ ಮತ್ತು ಕಾನೂನುಬದ್ಧವಾಗಿ ಈ ಪ್ರಕ್ರಿಯೆಯನ್ನು ಪೂರ್ಣಗೊಳಿಸುವುದೇ ಸದ್ಯದ ಅನಿವಾರ್ಯತೆಯಾಗಿದೆ.
